• 399
• ২১শে জানুয়ারী ২০২২ ইং
• Share on:

বিবিআরএফ(ইউএস) ইয়ং ইনভেস্তিগেট গ্রান্ট ফংলবা বুধচন্দ্র খুন্দ্রাকপম

মণিপুরী মিরর ডেস্কঃ কানাদাগী মন্ত্রিয়লদা লৈবা ম্যাকগীল য়ুনিভর্সিটিগী নিউরোলোজিকেল ইন্সটিটিউটকী রিসার্চ এসোশিয়েট, বুধচন্দ্র সিংহ খুন্দ্রাকপম ইউএসএগী নিয়ুইয়র্কতা লৈবা ব্রেইন এন্ড বিহেভিওর রিসার্চ ফাউন্দেশন (বিবিআরএফ)না ইউএস ডলার ৭০,০০০ পিবা য়াম্ন প্রেজটিজিয়স ওইরবা ২০২০ ইয়ং ইনভেস্তিগেটর গ্রান্ট অমা ফংলে হায়দুনা ম্যাকগীল য়ুনিভর্সিটিনা ফোংবা ম্যাকগীলরিপোর্টর কৌবা নিউজপোর্টলদা ফোংলকখ্রে। পাও অসি চহীসিগী চৎখিবা সেপ্তেম্বরগী তাং ২৪দা ফোংদোরকখিবনি। কানাদা অমদি য়ুএসগী মণিপুরী অমসুং মণিপুরদগী ময়াম্ন মণিপুরী অমা ওইনা থোইদোক হেন্দোকপা গ্রান্দ অসি ফংবদা হরাও নুঙাইবা ফোংদোকপগা লোয়ননা মহাকপু থাগৎনরকলি।

বুধচন্দ্র খুন্দ্রাকপম মণিপুর, ইম্ফালগী সগোলবন্দ তেরা বজার, লৌখাকপম লৈকায়গী খুন্দ্রাকপম শামুঙৌ সিংহ অমসুং হুইদ্রোম রাসমনি দেবীগী মচানিপানি। ইম্ফালদা লৈবা সগোলব্দ ইংলিশ স্কুল অমসুং ডোন বোস্কো স্কুলদগী সেকেন্দরী অদুগা কেন্দ্রিয় বিদ্যালয়, লঙজিংদগী হায়ার সেকেন্দরী লোয়শনলবা মতুংদা দিল্লী য়ুনিভর্সিটিদা বিএসসি অমসুং এমএসসি তমথাখিবনি। মথংদা হরিয়ানাগী মানেসরদা লৈবা ন্যাশনেল ব্রেইন রিসার্চ সেন্টরদগী নিউরোসাইন্সতা পিএইচডি তৌরবা মতুংদা, ২০০৯ইংদা কানাদাগী মন্ত্রিয়লদা লৈবা ম্যাকগীল য়ুনিভর্সিটিগী নিউরোলোজিকেল ইন্সটিটিউট অসিদা পোষ্টদোক্তরেল রিসার্চর অমা ওইনা লাকখিবনি। মহাক মণিপুর গভর্নম্যান্টনা পিবা হায়স্কুল লিভিং এক্সামিনেশনদসু ৫সুবা পজিশন লৌদুনা “একাদেমিক এক্সিলেন্সি এওয়ার্ড” ফংলবা মহৈরোয় অমসুনি।

হৌজিক হৌজিক ম্যাকগিল য়ুনিভর্সিটিগী নিউরোলোজিকেল ইন্সটিটিউট অসিদা নিপামচা নুপিমচাশিংগী মরু ওইনা এদাল্টশন মতমগী ব্রেইন দেভলপম্যান্ট অমদি ম্যান্টল হ্ল্থেকী মরমদা রিসার্চ তৌরিবা নহা ওইরবা সাইন্টিষ্ট অমা ওইনা ময়াম্না শকখংলবা রিসার্চ স্কোলার অমনি। মন্ত্রিয়লদা লৈরিবা মণিপুরীশিংগী থবক থৌরম পুম্নমক্তা শরুক য়াবগা লোয়ননা কানাডাগী মণিপুরীশিংগী লুপ মণিপুরী এসোশিয়েশন ওব কানাদা (ম্যাক)গীসু এক্সিকিউতিব ম্যাম্বর অমা ওইনা থৌপুরিবা অমনি।

• ট্যাগ:
• ডায়াস্পোরা