বাংলাদেশ মণিপুরী সাহিত্য সংসদ (বামসাস)কী গোল্ডেন জুবিলি হৌদোকপগী থৌরম পাংথোকখ্রে
১৯৭৫ খ্রিষ্টাব্দগী মে'গী তাং ১১ দা খোঙশান তমখিবা বাংলাদেশ মণিপুরী সাহিত্য সংসদ (বামসাস) চৎলিবা চহীসিদা 'সনা ফুদোংব'গী তাঙ্কক হায়বদি গোল্ডেন জুবিলিদা খোংদাররে। বাংলাদেশতা চহি য়াঙ্খৈ চুপ্না ইমালোল, সাহিত্য, সংস্কৃতিবু য়োকখৎতুনা লাকপা বামসাস লূপ অসিনা সনা ফুদোংবদা খোংদারকপাগী 'গোল্ডেন জুবিলি' সেলিব্রেশন থৌরম পরেংগী অহানবা থৌরম ওইনা হৌখিবা মে'গী তাং ১৬, ২০২৫ দা সিলেটকী প্রেসক্লাব ওডিটোরিয়ামদা 'সনা ফুদোংব'গী হৌদোকপগী থৌরম পাঙথোকখ্রে হায়রি।
বামসাসকী ফাউন্দার মেম্বারশিংবু লূপকি মায়কৈদগী ইকাইখুম্নবা উৎপগী মতাং অমা
'গোল্ডেন জুবিলি সেলিব্রেশন কমিটিগী কনভেনর এল. প্রশান্ত কুমার সিংহনা ময়ায় তাংবল লৌখিবা হৌদোকপগী সেশনদুদা গেস্ট ওব ওনার ওইনা সিলেট জেলা পরিষদকী চিফ একজিকিউটিভ ওফিসার সন্দ্বীপ কুমার সিংহ, সিনিয়র জার্নালিস্ট অমসুং শক্নাইরবা অইবা, সিলেট মিররগী ইডিটর আহমেদ নূর অমসুং সিলেট প্রেসক্লাবকী জেনারেল সেক্রেটারি মোহাম্মদ সিরাজুল ইসলাম'নচিংবা শরুক য়াখি। মদুগী মমাঙদা বামসাসকী অঙাঙ শৈশকপীশিংনা ন্যাশনাল এনথেম অমসুং কোরাস ঈশৈ অনী অমসুং একাডেমি ফর মণিপুরী কালচার এন্ড আর্টস (এমকা)গী আর্টিস্টশিংনা জগোই অনী উৎতুনা থৌরম হৌদোকখি।
কবি নামব্রম শংকরগী 'মানুষ তুমি' হায়বা বাংলালোনগী শৈরেং লাইরিক মায়খুম হাংদোকপা
থৌরম অদুগী শরুক অমা ওইনা মথংদা বামসাসকী ফাউন্দার মেম্বার এ কে শেরাম, কেএইচ. চন্দ্রমোহন সিংহ অমসুং এম. বীরেন্দ্র সিংহবু লৈ চরোং, লেংয়ান ফি, ক্রেস্ট, শাল অমসুং অতৈ খুদোলপোৎ কয়া পীদুনা বামসাসকি মায়কৈদগী ইকাইখুম্নখি। নামব্রম শংকর সিংহ, কেএইচ. সমেন্দ্র সিংহ অমসুং নীহার রঞ্জন শর্মানা কনডাক্ট তৌখিবা নোংমগী ওইবা থৌরমদুদা অতৈসু মমল লৈরবা ৱাহৈ কয়া থমবিখি বামসাস-বিশগাঁও ব্রাঞ্চকী ভাইস প্রেসিডেন্ট শেরাম অঞ্জন, বামসাস-কমলগঞ্জ ব্রাঞ্চকী প্রেসিডেন্ট এল. ইবুংহাল সিংহ শ্যামল, কবি নাসিমা চৌধুরী অমসুং কলেজ অমগী প্রিন্সিপাল ওইবিরম্বা প্রোফেসর মো. নিয়াজ উদ্দিন। থৌরম অদুদা বামসাস'না ফোংবা সাহিত্য চেফোঙ 'মৈরা'গী ৬৫ শুবা স্পেশাল ইস্যু অমসু ফোংখি অদুগা লোয়ননা কবি নামব্রম শংকরগী 'মানুষ তুমি' হায়বা বাংলালোনগী শৈরেং লাইরিক অমসু মায়খুম হাংদোকখি।
শৈরেং শৈদিন্নবা থৌরমগী মতাং অমা
অরোয়বা সেশনদা কবি রওশন আরা বাঁশি খূৎহৈবমনা ময়ায় তাংবল লৌরগা লন্নায় লেংবা শৈরেং শৈদিন্নবগী থৌরম অমসু পাংথোকখি, কবি অয়েকপম অঞ্জুনা কনডাক্ট তৌবা সেশনদুদা কবি সুমন বনিক অমসুং কবি রাহনামা শাব্বীর চৌধুরীনা গেস্ট ওব ওনার ওইদুনা শরূক য়াখি হায়রি ।
0 কমেন্ট:
কমেন্ট তৌবিয়ু