কমলগঞ্জ ভানুগাছতা নুমিৎচুপ্না `মণিপুরী ভাষা উৎসব ২০২৫' (মণিপুরী লেঙ্গুয়েজ ডে ২০২৫) পাঙথোকখ্রে
কমলগঞ্জ, ৬ এপ্রিল ২০২৫ : মৈতৈ লোনবু বাংলাদেশকী লৈমায়দা ঙাক্তুনা থম্নবা অমসুং চাউখৎহন্নবা হোৎনবদা বাংলাদেশ মণিপুরী সাহিত্য সংসদ (বামসাস) না হৌখিবা চহী কয়াদগী বাংলাদেশতা ইমালোন অমসুং ঈনাৎকি ওইবা থৌরম কয়া পাঙথোক্তুনা লাক্লি। অসিগী মখা তাব ওইনা হন্দকশু ঙরাং ৫ এপ্রিল ২০২৫, থাংজ নুমিত্তা মৌলভীবাজার ডিস্ট্রিক্টকী কমলগঞ্জ উপজেলা মনুংচনবা আদমপুর ইউনিয়নগী তেতোইগাঁও দা লৈবা রশিদ উদ্দিন হাই স্কুলদা 'মণিপুরী ভাষা উৎসব ২০২৫' (মণিপুরী লেঙ্গুয়েজ ডে ২০২৫)কী থৌরম অমা পাঙথোকখি।
থৌরমগী অহৌবদা অয়ুক পুং ১০:৩০ দা বাংলাদেশ মণিপুরী সাহিত্য সংসদকী প্রেসিডেন্ট, বাংলাদেশকী শক্নাইরবা অইবা এ. কে শেরাম অমসুং তেতোইগাঁও রশিদ উদ্দিন হাই স্কুলগী হেড মাস্টার বিলকসি বেগম না লৈঙাক্কী অমসুং সংস্থাগী ফিরাল চিংখৎতুনা থৌরম হৌদোকখি।
মসিগী মতুংদা মৈতৈ অমসুং মৈতৈ পাঙাল মহৈরোয়শিং অমসুং থৌরম অদুদা শরুক য়াখিবা মীথুংলেনশিংনা শরুক য়াদুনা মচুনাইরবা রেলি অমা পুথোকখি। মতুং তারকপদা তেতইগাঁও রশিদ উদ্দিন হাই স্কুল শহীদ মিনারদা লৈ কৎতুনা লোলগীদমক থৱাই কৎখিবা অথৌবশিংগী মফমদা ইকাইখুম্নবা উৎখি।
মদুগী মতুংদা নুমিৎয়ুংবা ১২:৩০ মতমদা মহৈরোয়শিংগী মনুংদা মৈতৈ ময়েক্কী টেস্ট / এক্সাম / চাংদম্নবাগী থৌরম অমা শিনখি, অদুদা মহৈরোয় ১০০ হেন্না শরুক য়াখি। চাকলেন চারবা মতুংদা নুংথিল পুং ৩ দা মৈতৈ লোন অমসুং কলচারগী চৎনবী অমসুং য়োকখৎপগী মতাংদা খন্ন-নৈনবগী মীফম অমাসু স্কুলগী কনফারেন্স হোলদা পাঙথোকখি।
বাংলাদেশ মণিপুরী সাহিত্য সংসদ কমলগঞ্জ ব্রাঞ্চকী প্রেসিদেন্ট ইবুংহাল শ্যামলনা থৌরম মপু, কমলগঞ্জ উপজেলাগী এসিস্টেন্ট কমিশনার (ভূমি) ডি. এম সাদিক আল শাফিন না অথোইবা মীতুংলেন ওইনা নৈনা মিফম অদুদা শরুক য়াখি। থৌরম অসিগী মরু ওইবা ৱাঙাংলোই ওইনা ৱা ঙাংবিখি বাংলাদেশ মণিপুরী সাহিত্য সংসদ সেন্ট্রাল কমিটিগী প্রেসিদেন্ট বাংলাদেশকী শক্নাইরবা অইবা এ. কে শেরাম।
বাংলাদেশ মণিপুরী সাহিত্য সংসদ (বামসাস) সেন্ট্রেল কমিটিগী জেনারেল সেক্রেটারী নামব্রম শংকর অমসুং পাবলিসিটি অমসুং পাবলিকেশন সেক্রেটারী অয়েকপম অঞ্জু না খুৎশম্নদুনা কন্ডাক্ট তৌখিবা নৈন মীফম অদুদা অখন্নবা মীথুংলেন ওইনা অইবা অমসুং এডিটর (ভাস্কর) অমসুং সুনামগঞ্জ ডিস্ট্রিক্ট প্রাইমারী এডুকেশন অফিসার পুলিন রায়, তেতইগাঁও রসিদ উদ্দিন হাইস স্কুলগী হেড মাস্টার বিলকিস বেগম, কমলগঞ্জ প্রেসক্লাবকী কনভেনর এমএ ওয়াহিদ রুলু, অইবা সাজ্জাদুল হক স্বপন, কবি রওশন আরা বাঁশি, ওজা কামাল উদ্দীন য়াওনা অতৈ অতৈ কয়াসু শরুক য়াদুনা ৱা ঙাংখি।
পনবা য়াবদি মৈতৈ লোন অমসুং কলচার চাউখৎপগি পান্দমদা ইং কুমজা ২০০৮ দগী হৌনা ঙশি ফাওবা মণিপুরী লোন অমসুং কলচারগী কুম্মৈ অসি পাঙথোক্তুনা লাক্লি। অরোইবদা ময়েক্কী চাংদম্নবদা মাইপাক্লবা মহৈরোয়শিংবু মনা য়েন্থোক্কি অমসুং লোকেল আর্টিস্ট ময়াম্না কালচারেল প্রোগ্রাম অমসু পাঙথোকখি হায়রি।
0 কমেন্ট:
কমেন্ট তৌবিয়ু