আপডেট:
image

এম ইনাওদা খুন্দোংবম ব্রোজেন্দ্রো নীংশিং মনা পীখ্রে

ইম্ফাল, জানুয়ারি ১৩ : লৈখিদ্রবা শক্নাইরবা প্লেরাইট খুন্দোংবম ব্রোজেন্দ্রোগী ইমুং মনুংনা কৎচবা খুন্দোংবম ব্রোজেন্দ্রো নিংশিং মনা ২০২৩ শক্নাইরবা প্লেরাইট মোইরাংথেম ইনাওদা লান্থোকখ্রে। রাইটার্স ফোরামনা পীবা মনা অসি লান্থোকপগী থৌরম ঙসি নুংথিল ইম্ফালগী জৱাহরলাল নেহেরু মণিপুর দান্স একাডমি হোলদা পাঙথোকখি।

থৌরম অদুদা প্রোফেসার আইএস কাংজমনা অথোইবা মীথুং, রাইটার্স ফোরাম ইম্ফালগী প্রেসিদেন্ট কৈশাম প্রিয়োকুমারনা থৌরম মপু ওইনা শরুক য়াখি। শেল ওইনা লুপা ৩০,০০০/- সাইটেসন অমা, শাল অমা য়াওবা মনা অসি শক্নাইরবা লীলা ইবা লৈখিদ্রবা খুন্দোংবম ব্রোজেন্দ্রোগী লোয়নবী খুন্দোংবম ওংবী রাইনা (লৈনা) অমসুং মচাশিংনা কৎপনি।

অতোপ্পা মমিং মোমোন হায়নসু খঙনবা খুন্দোংবম ব্রোজেন্দ্রো কুমজা ১৯৪৬কী জানুয়ারি ১৮দা খুন্দোংবম ইতোচা অমসুং খুন্দোংবম ওংবী ইবেচাওবীগী মচা মাপলগী মনুং অনিশুবা মপারি ওইনা তাইবংদা খোংদারকখি। লক্ষ্ণৌ য়ুনিভার্সিটিদা পোষ্ট গ্রেজুয়েট লোইরবা মতুং কোওপরেটিব সোসাইটি ওফিসতা ইন্সপেক্তর ওইনা লৈঙাক্কী থবক তৌরবা মতুং ওফিস অসিমক্কী এসিষ্টেন্ট রেজিষ্ট্রার ওইনা থবক্তগী পোত্থাখি।

‘নিঙমহৌদ্রবা’ হায়না মীংথোনবা লীলা অমা ইদুনা খুৎ থাবা হৌরবা মতুং ‘বর ইন্টারভিয়ু’, ‘ইচাশা ইপা লম্বোইরগে’, ‘ঐ মমানি’ ‘হাইগৎলাং’, ‘ইমাগী মমৌ’ অসিনচিংবা মমিং লৈরবা লীলা কয়া ইখিবা মীশক্নি। মসিগী মথক্তা এমজিএম থিয়েটারনা মহাক্কী লীলা কয়ামুক শান্নখি। মদুগী মনুংদা ‘মৌ মরি’, ‘নোংলৈ নুংশিৎ’, ‘ঙমখৈ ৱাথোক’, ‘লুহোংবা মথেল’, ‘রিফ্যুজি’ মমিং পনবা য়াই।

খুন্দোংবম ব্রোজেন্দ্রো নিংশিং মনা ফংলবা প্লেরাইট মোইরাংথেম ইনাও  কুমজা ১৯৪৭ কী ওক্তোবর ১১দা মোইরাংথেম তোন্দোন অমসুং রাজকুমারি মণিসনা অনিগী মপারী ওইনা তাইবংদা ফাওরকখি। নুপী অনি য়াওনা মচিন মনাও তরেৎকী মনুংদা ইতোন তোনবা মচানি। মোইরাংথেম ইনাও কুমজা ১৯৮৪ গী ফেব্রুয়ারি ২৯ দা য়ুম্নাম লৈকাইদগী মৈস্নাম সোবিতাগা য়ুম্বাল লম্বীদা খোংদামিন্নরবা মতুং কুমজা ২০০৬ কী আগস্ট অমদা লোয়নবীনা তাইবং থাদোকখিবদগী শিংজমৈ চোংথাম লৈকাইদগী রাজকুমারি থোইবীসনাগা অমুক হন্না য়ুম্বাল লম্বীদা খোংদামিন্নদুনা লৈরি।

দিএম কলেজগী মহৈরোয় অমা ওইনা গুৱাহাতি য়ুনিভার্সিটিদগী গ্রেজুয়েট লোইশিনখি। অঙাং ওইরিঙৈদগী ইবা পাবা পামজরকপনা কলেজ তম্লিঙৈ মতমদদি শৈরেংনা হেন্না খোয়দানা ইরকই। স্কুল কলেজগী চেফোঙশিংদা শৈরেং কয়া ফোঙলকখি। কুমজা ১৯৭৮ তা এআইআর ইম্ফালগী নহারোলগী থৌরমদা ‘অহিং অমা’ কৌবা লীলা মচা অমা শন্দোকখি। লীলা অদু য়াম্না পাম্লবা লীলা অমা ওইখি। চহী অদুমক্তদা মহাক্কী মমিং চৎলবা ‘চৎলেদো ঐগীদি থম্মোয়নুংদা মৈগী চীং পুদুনা’ এআইআর ইম্ফালদা শন্দোকখি।

কুমজা ২০২২ গী সেপ্তেম্বর থা ফাওবদা মহাক্না ইবা লীলা ৯৫ ওল ইন্দিয়া রেডিও (এআইআর) ইম্ফালদা শন্দোকখ্রে। মোইরাংথেম ইনাও রেদিও দ্রামা ইবগী কলাদা খুৎহৈবা মীশক অমা ওইবগী মথক্তা মশাগী ওরিজিনেলিটি অমদি ষ্টাইল অমগা লোয়ননা চহী কয়া মীয়ামগী পুক্নিং শুহ্মৎহন্দুনা লাক্রিবা মীশক্নি। মাগী রোমান্টিক অমসুং রিয়েলষ্টিক ইলিমেন্ট অনিমক য়াওবা খুৎই অসিনা মাগী লীলাশিংবু হেন্না মগুন লৈহল্লিবা মীশক্নি। মহাক্না ইবা লীলা কয়া সেলুলোইদ ফিল্ম ওইনা পুথোক্তুনা নেসনেল লেবেলদা এৱার্দ কয়া ফংখ্রবনি।

সোর্স: সঙাই এক্সপ্রেস

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু