আগস্ট ২৯ নুমিৎ অসিবু আসামদা ‘ইমালোল কনবা নুমিৎ’ হায়না পালন তৌবা হৌখ্রে
শিলচর,সেপ্টেম্বর ০৯ : ধর্ম তোঙাল্লবসু ইমালোলদি অমত্তনি, মণিপুরী লোলনি। আসাম বিধানসভাদা বিল পাশ তৌদুনা মণিপুরী লোলবু লৈঙাক্কী এসোসিয়েট ওফিসিয়েল ল্যাঙ্গুয়েজ ওইনা শক খঙখিবা আগস্ট ২৯ নুমিৎ অসিবু আসামদা ‘ইমালোল কনবা নুমিৎ’ হায়না হন্দক চহীদগী পালন তৌবা হৌখ্রে।
মণিপুরী লোলবু লৈঙাক্না ওফিসিয়েল ল্যাঙ্গুয়েজ ওইনা শক খঙবগী চহী অমা মপুং ফাবগী হরাও নুঙাই ফোঙদোকপা ওইনা মণিপুরী য়ুথ ফ্রন্ট অব আসাম (মাইফা) না শীন্দুনা লৈমরেম্বী ইন্দুপ্রভা শঙলেন বীনাকান্দি পার্ট-টু দা ‘ইমালোন কনবা নুমিৎ’ অসি চীংলেম্না পাঙথোকখি।
থৌরম অদুদা মণিপুরী অটোনোমাস কাউন্সিল ডিমান্ড কো অর্ডিনেশন কমিটি চেয়ারম্যান কে শান্তিকুমার, মাইফাগী প্রেসিডেন্ট থাংজম ব্রজেন, মণিপুরী ল্যাঙ্গুয়েজ প্রোটেকশন কো-অর্ডিনেশন কমিটিগী চেয়ারম্যান ড. কে. এন চান্দ, আমপাল গী ভিপি প্রভারাণী শর্মা, মৈরা পাইবী লুপ জয়েন্ট সেক্রেটারী কেএইচ নমিতি, মণিপুরী মুসলিম ফ্রন্টকী চীফ এডভাইজর আহম্মদ চৌধুরী, মণিপুরী মুসলিম মৈরা পায়বী সংস্থাগী প্রেসিডেন্ট জুবেদা বেগম নচিংবা লুপ কয়াগী মীহুৎশিং শরুক য়াখি। ধর্ম তোঙাল্লবসু ইমালোল তিন্নবা ঐখৈায় মশেন অমগা অমগা নুংশিননা লৈমিন্নরিবনি।
থৌরম অদুদা ৱা ঙাংবদা মাইফা চীফ এডভাইজর শেরাম হেরাজিৎনা আগস্ট ২৯ নুমিৎ অসি আসামগী মণিপুরী শিংগী পুৱারীদা খ্বাইদগী হরাও নুঙাইরবা নুমিৎ অমনি হায়না ফোঙলদুনা হায়খি, আসাম লৈঙাক্না মণিপুরী লোল ষ্টেট অসিগী অফিসশিংদা চৎনহনবা য়ারগনি হায়না বিধানসভাদা বিল অদু পাশ তৌখিবনি।
মসিগী হরাও নুঙাইবগী অহানবা চহী নি। মথংগী চহীদদি খুঙ্গং খুদিং ক্লাব খুদিং এনজিও মৈরা পায়বী লুপ খুদিংনা নুমিৎসি পাঙথোকপীয়ু হায়না হায়জখি। অটোনোমাস কমিটিগী চেয়ারম্যান কাঙাবম শান্তি কুমারনা মতম শাংনা এসোসিয়েট অফিসিয়েল ল্যাঙ্গুয়েজ ওইনা শক খঙহনবীয়ু হায়না খোঙজং চত্থখিবগী মহৈনি হায়খি। মণিপুরী ল্যাঙ্গুয়েজ প্রোটেকশন কমিটিগী চেয়ারম্যান কেএন চান্দনা লোল অসিবু কন্ননবা হোৎনবদা মীতৈ পাঙল অমদি মীতৈশিংনা পুন্না থৌদাং লৌমিন্নরি।
মহাক্না হায় ষ্টেট অমদা এসোসিয়েট ওফিসিয়েল লোল ফংবা হায়বসি ষ্টেট অদুগী মনুংদা লৈবা মীওই কাঙলুপনা লোনবগী চাং মতুং ইন্না চৎন কাঙলোন লৈ হায়বা ৱাফমসু ফোঙদোকখি।
মহাইফাগী প্রেসিডেন্ট থাংজম ব্রজেননা মীতৈ ময়েক তম্বী তাকপীবা ওজাশিংবা থাগৎ ৱাহৈ কয়া ফোঙলদুনা ময়েক অসিবু অতৈসু চাওখৎহন্নবা অমদি ময়ীং য়াম্না তম্বা ফংনবা হোৎনমিন্নসি হায়খি। আসাম মৈরা পায়বী কমিটিগী জয়েন্ট সেক্রেটারী কেএইচ নমিতা, মুসলিম মৈরা পায়বী সংস্থাগী প্রেসিডেন্ট জুবেদা বেগম নচিংবা ৱাফম কয়াসু থম্বীখি।
সোর্স: মরূপ
0 কমেন্ট:
কমেন্ট তৌবিয়ু