ইমা দূর্গা পূজাগী ৱারী লীখুন --- খোস্নাম মংগল
‘দূর্গা পূজা’ হিন্দু ময়াংশিংগীনি। মসি মখোয়গী খ্বাইদগী শীংথাবা য়ারবা পূজা উৎসব অমনি। অদুবু করম্বা নুমিৎ-থা দগী দেবীগী পূজা অসি হৌদোরকই মসিগী চপচাবা পাউখুম ঙসি ফাওবা ফংদ্রি।
অমবু ওইরবসু, রাজা সুরথ অমসুং সমাধি বৈশ্য ইবুংঙো অনীনা ইমা দূর্গা দেবীগী মূর্ত্তি শাদুনা ইরাৎ থৌনিবগী চৎনবসি সত্য যুগতা অহানবা হৌদোকই হায়না পৌরানিক শাস্ত্রদা পনবা থেংনৈ। হায়রিবা মতমসি শতাব্দি মরি মমাংগী ৱানি। শাস্ত্রদি ইতিহাস ওইনা লৌবা য়াদবনা মরম ওইনা মথক্তা পল্লিবসি চপচাবী লেপ্পদা অৱাবা ওই।
শক্নাইরবা ইংরেজ ঐতিহাসিক প্রোঃ ভ্যালেরী রোবাকনা হায়, “... of all the major religius Hinduism probe gives the greates importance to the feminine side of deity, called shakte or Devi (Goddess). There is already evidence of devotion to Goddesses in the indus valley civilization for example in what appear to be cutt seenes on seats. It is likely, however, that goddess worship continued to flurish at the popular level for by the Epic period goddesses had onece again had a powerful place in Hindu worship, both as consoers of gods and their own right.” অমরোমদা, প্রোঃ নীহাররঞ্জন রায়সু খৃষ্টাব্দ তরেৎ নিপালগী অতৈসু মমাংদনা ময়াং লৈবাক্তা ইমা শক্তি দেবীগী ইরাৎ পূজা চৎনবা হৌখ্রে হায়দুনা মহাক্না ‘বাঙ্গালীগী ইতিহাস’ হায়বা লাইরিক্তসু পল্লি। হৌজিক ঐখোয়না মূর্ত্তি শাদুনা ইরাৎলিবা ইমা দূর্গা দেবীগী শক্তম কায়াৎ অসি মার্কন্ড পুরাণগী পাউতাক মতুং ইন্না শাগৎপনি হায়রি।
ত্রেতাযুগতা রাক্ষস নিংথৌ লঙ্কা রাবণনা বসন্ত ঋতুগী মমৈদা লমতা থানা শক্তিগী মবেম্মা ওইরীবি ইমা দুর্গা দেবীগী ইরাৎ পূজা তৌবগী ৱাফম অসি ঋষি বাল্মীকিনা মহাক্কী রামায়ণদা পনবা থেংনৈ। মসিদগী শ্রীবাসন্তি পূজা অসি হৌদোরকপনি হায়নসু পন্ডিতশিংনা মোত পীরি।
লাই লৈপাক্তদি থা তরুক হায়বদি হিয়াঙ্গৈ থাদগী শক্তিবু থা ফাওবা দিন অদুগা কালেনদগী মেরা থা ফাওবা থা তরুক অসি অহিংনি। চৎনবী মতুং ইন্না অহিংদা লাইসি তুম্মী অদুগা নুংথিলদনা য়াহৌনা লৈ। মরম অসিমক্না রামচন্দ্রনা লমতা থাদা দেবীগী পূজা আরধনা তৌবসি মতিক চাই হায়না অখং-অহৈশিংনা লৌনৈ। মনুং মতম চাদনা চৎনবীগী ৱাংমদা শক্তি দেবীবু (কালেন্দগী মেরা থা ফাওবসি লাই লৈপাক্তা অহিংগী মতম ওইবনা শক্তি দেবীগী ইরাৎ পূজা হায়রিবা মতমসিদা তৌনবসি মনুং মতম চাদে হায়না শাস্ত্রদা পনবা থেংনৈ) ইরাৎ-পূজা তৌবগী ৱারীসু কৃত্তিবাসনা রামায়ণদা লীনা তাহল্লি। মদুদি মরূপ মপাংশিংনা পাউতাকপা মতুং ইন্না রামচন্দ্রনা মবেম্মা সীতাবু রাবণগী মখূৎতগী কন্ননবগীদমক ইমা শক্তি দেবীগী পূজা আরাধনা তৌবা নংখি। হায়রিবা মতমসি মেরা থানি। রামচন্দ্র মনুং মতম চাদনা ইমা শক্তি দেবীবু হৌদোক্তুনা পেলহল্লগা য়েক্না শা-গী লমচৎ চৎপা রাবণবু হাৎপগী নিজখিবা বর অদুবু মাংদা থম্লগা লাৎপদগী ময়াং লৈপাক্তা মেরা থাদা ইমা শক্তি দেবীগী পূজা আরাধনা তৌনবসি চৎনরকপনি হায়রি।
হৌজিক ঐখোয়না ইমা দেবীগা লোয়ননা কার্ত্তিক, গনেশ, লক্ষী অমসুং সরস্বতী পূন্না থমদুনা ইরাৎ পূজা তৌনরিবসি পৌরানিক নিয়ম নত্তে, মসি নহৌনা হাপচিন্দুনা চৎনহনবা হৌখিবনি হায়রি। অমবু ওইরবসু, ইমা দূর্গা দেবী শক্তি অমসুং থৌজালগী মবেম্মানি হায়বসিদা করিমত্তা খেন্নবা লৈতে। অসিগুম্বা ইমাগী কুমওন অসিদা জাতি-বিজাতি খায়দনা ময়াম অমত্তা ওইনা শা-গী লমচৎ চৎপা মীনুংশি খংদবশিংগী মায়োক্তা লেপ্তুনা ফজবা নিংথিবা মীওইবগী সমাজ অমা শেমগৎনবা ৱাশক লৌবা তঙাইফদে।
“যা দেবী সর্বভূতেষু মাতৃরূপেন সংস্থিতা
নমস্তস্যৈ নমস্তস্যৈনমোঃ নমাঃ।।
0 কমেন্ট:
কমেন্ট তৌবিয়ু