‘সাহিত্যগী লাল্লোই অথৌবা’ মনা লান্থোকখিবগা লোয়ননা ‘মহারানি কুমুদিনি’ অমসুং ‘হিংলমগে নশুংলাংগী’ ফোঙখ্রে
ইম্ফাল, ডিসেম্বর ০৩: প্রেস ক্লাবতা অঙোম নিংথৌ প্রিজার্ভেসন এন্দ ডকুমেন্টেসন সেন্টার, উরিপোক্না শীন্দুনা ঙসি পাঙথোকখিবা থৌরমদা শামুরৌদগী সুরজিৎ কুমার লোইতমাদ ‘সাহিত্যগী লাল্লোই অথৌবা’ মনা লান্থোকখিবগা লোয়ননা ডা. কুঞ্জলাল য়েন্দ্রেম্বমনা ইবা ‘মহারানি কুমুদিনি’ (পুৱারী) অমসুং থোকচোম অঞ্জনানা ইবা শৈরেং লাইরিক ‘হিংলমগে নশুংলাংগী’ ফোঙদোকখ্রে।
থৌরম অসিদা ইরমদমা খোর্জৈ অপূনবা লূপ (হিয়াংলম) গী প্রেসিদেন্ট সাহিত্য একাদেমি এৱার্দি মাইবম নবকিশোরনা অথোইবা মীথুংলেন ওইরগা লৈকোলগী প্রেসিদেন্ট ক্ষেত্রিময়ূম সুবদনিনা মীফম মপু ওইখি। অদুগা এম য়ুগী মণিপুরী দিপার্টমেন্টকী এসোসিয়েট প্রোফেসর ডা. কে শান্তিবালা অমসুং চিরোম রাজকেটননা লাইরিক্কী মরমদা ৱা ঙাঙখি।
থৌরমগা মরী লৈননা অইবা ডা. কুঞ্জলাল য়েন্দ্রেম্বমনা ফোঙদোকখিবদা চন্দ্রকৃতি মহারাজ গী অপোকপী মহারানি কুমুদিনিগী বাইওগ্রাফি ওইনা মহাক্কী লাইরিক অসি ফোঙজবনি। গম্ভির সিংহ নিংথৌগী তালোই ওইদুনা মহারানি মীংথোল অমদি মমাশিজগী মীংথোল ফংজখিবীনি। মহারানি কুমুদিনিগী মশক অমদি পুন্সিগী লিক্লম কয়াদা লোৎতুনা লৈরম্বা কয়া খঙদবা য়াদনি। মতমদুগী ফম্বাল হায়বসি য়েক্নবশিংনা কোয়শিল্লগা লৈবা, ফম্বালগী মীকানবা লৈবা মতমনি।
মচিন মনাও পোকমিন্নবা/পোকমিন্নদবা খায়দনা ফম্বালগী মীকানৈ। মসিদা মমাশিজ ওইরিঙৈদা মচাবু শঙদুনা লাল্লোং কয়া চত্থদুনা ঙাক শেনখিবা মহারানি কুমুদিনিগী ফিদম্নিংঙাই ওইবা থবকশিং উৎথোকপনি। মনাওনুপা থোকপা নোবিনগা থেংনরুবা অমসুং নরসিংহনা ৱারৌদুনা লৈবগী মতাং য়াওরি। ওয়েষ্টার্ন এদ্যুকেসনগী মঙাল ফংখিবা মণিপুরগী নিংথৌ পনবা য়াই হায়নসু ফোঙদোকখি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু