image

৮৬ শুবা এন কে সনাজাওবাগী মপোক কুমওন পাঙথোকখ্রে

ইম্ফাল, দিসেম্বর ৩০ : এন কে সনাজাওবা মেমোরিয়েল ত্রাস্তনা শীন্দুনা ৮৬ শুবা এন কে সনাজাওবগী মপোক কুমওন থৌরম ঙসি পেলেস কম্পাউন্দা লৈবা লময়ানবা শঙলেনদা পাঙথোকখ্রে।

থৌরমদুদা ফ্রীদমগী এদিতর আর কে রনেন্দ্রজিৎ, এন কে সনাজাওবা মেমোরিয়েল ত্রাস্টকী প্রেসিদেন্ট অরাম্বম লোকেন্দ্রনা মথং শিৎনা অথোইবা মীংথুংলেন অমদি থৌরম মপু ওইনা শরুক য়াখি। থৌরমদুগী শরুক অমা ওইনা লৈখিদ্রবা এন কে সনাজাওবগী ফোটোদা মীয়াম্না লৈসু কত্তুনা ইকাখুম্নবা উৎখি। দি পাইওনির ওব ইনভেস্তিগেটিব জার্নেলিজম ইন মণিপুর হায়বা থীমদা ইম্ফাল টাইমসকী এদিটর রিঙ্কু খুমুকচমনা রিসোর্ছ পার্সন ওইনা ৱা ঙাঙখি।

থৌরমদুদা এন কে সনাজাওবা মেমোরিয়েল ট্রাস্তকী ভাইস প্রেসিদেন্ট এস ঐচ সামুনা হায়খি, ঙসি পাঙথোক্লিবা এন কে সনাজাওবগী মপোক কুমওন অসি মমাঙদদি নভেম্বরগী তাং ১১ দা পাঙথোকপনি। অদুবু ত্রাস্ত অসিগী ৱারেপকী মতুং ইন্না মহাক্কী মপোক নুমিৎ দিসেম্বরগী তাং ৩০ অসিদা পাঙথোকপনি। মসি চহি খুদীংগী ওইনা দিসেম্বর তাং ৩০দা ওইনা পাঙথোক্লগনি।

ঙসি পাঙথোক্লিবা থৌরম অসিগী মরুওইবা পান্দমদি মহাক্না মণিপুর খুনাইগীদমক্তা কৎথোক্লম্বা মরুওইনা লময়ানবা পান মণিপুরী য়ুথ লিগকী থাগী ওইবা চেফোং অসিদা মহাক্না লৌরম্বা এদিতরগী থৌদাংনা মণিপুরগী হান্না খঙনদবা, নহারোল অহল্লোনদা নত্তনা তমপুদা লৈরম্বা ৱাখল কয়া অসি মহাক্না ফোঙদোক্তুনা মীয়ামবু মীকপ থোকহল্লম্বা অসিগীদমক মহাকপু মীয়াম্না মণিপুরগী ইনভেস্তিগেটিব জার্ণেলিস্টকী লমদা লময়ানবা হায়না হায়নরি অমদি মশক খঙনরি।

মহাক্না হায়খি, হৌগৎলক্লিবা জার্নেলিজমগী লমদা থৱায় য়াওজবশিংনসু মহাক্কী থৌনা লিংজেল অচুম্বগীদমক্তা অকিবা লৈতবা অরোন অথুপ নাইদবা, অচুমবগীদমক কমপ্রোমাইজ লৈতনা থৌনা ফনা ফোঙবা ঙম্বগী থৌনা অসি ঙসি হৌগৎলক্লিবা জার্নেলিস্তশিংনসু খাঙবা কনবা মথৌ তাই। মহাক্কী থৌনাগুম ঙসিগী জার্নেলিস্তশিংনা উৎপা মথৌ তারে।

সোর্স: পোক্নফম

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু