৩১ শুবা গুরু কীর্ত্তন সেবা ২০২৪ পাঙথোকখ্রে
ইম্ফাল, ওক্টোবর ১৬ : গুলাপী নত সঙ্কীর্ত্তন একাদেমিনা শীন্দুনা ৩১ শুবা গুরু কীর্ত্তন সেবা, ২০২৪ (ফেস্তিবেল ওব নত সঙ্কীর্ত্তন) গী থৌরম ঙসি ক্বাকৈথেল ঙানপ্পী থোং মপালদা লৈবা একাদেমি অসিদা পাঙথোকখ্রে। থৌরম অদুদা জে এন মণিপুর দান্স একাদেমি, ইম্ফালগী হান্নগী দিরেক্তর দিলিপ ময়েংবমনা চীফ গেস্ত, থিএতর অমসুং কলচরেল এক্তিভিস্ত লোইতোংবম ব্রজমোহোন সিংহনা প্রেসিদেন্ত অমদি সাহিত্য একাদেমি এৱার্দি শরতচান্দ থিয়ামনা গেস্ত ওব ওনর ওইনা শরুক য়াখি।
চীফ গেস্তকী ৱারোল পীরদুনা দিলিপ ময়েংবমনা হায়খি, মণিপুরী নত সঙ্কীর্ত্তনদা ওজা গুলাপী অসি খ্বাইদগী হেন্না মশক নাইবা,মমল লৈবা অমসুং তোমথিন ওইবা মীশক অমনি। মহাক্না সঙ্কীর্ত্তন অসি ইমালোল ওইরিবা মৈতৈলোলনা শক্লকখিবনি।
ওজা গুলাপীনা ইরম্বা ঈশৈশিং অসি য়াম্না কুইনা খল্লগা পুখৎলম্বা পোৎ অমনি। মসিদি মমল নাইদ্রবা লন অমনি। মসিদা শেমদোক-শেমজিন তৌবীগন। সঙ্কীর্ত্তন অসি ইরায় লাইনা শেমখিবা নত্তে। গুরু ময়াম পূল্লগা শেমখিবনি। মণিপুরী সঙ্কীর্ত্তন অসি য়োকখৎসি হায়না দিলিপ ময়েংবমনা ফোঙদোকখি।
থৌরম অদুদা শরতচান্দ থিয়াম্না হায়খি, নিংথৌ পাল্লিঙৈ মতমদদি কলচরগী ওইবশিং অসি য়াম্না চেকশিন্না ঙাক্লম্মী। অদুবু হৌজিক্তি হান্না লৈরম্বা কলচরগী মশক অসি সুম সুম মাঙথরকপগুম তৌরক্লি। মসিগীদমক কলচর শিথরক্লে হায়দুনা লাউরগা লৈবা য়াবা মতম নৎত্রে। ইমুংদা লৈরিবা অহল-লমনশিংনা মখোয়গী মচা-মশুশিংদা ঐখোয়গী ওইবা কলচরশিং অসি নাখৈশেংনা খঙহনবা অশদি ইনলগা চৎহনবা মথৌ তাই।
‘মণিপুরী খুন্নাই কলচারনা পুল্লগা হৌরকখি অমদি কলচরনা হৌজিকসু য়োম্লগা হিংলিবনি। কলচরগা হেক লাপথোখিবগা মীওইবা খুন্নাই অসি লৈররোই হায়বা ৱাফম পল্লদুনা শরতচান্দ থিয়ামনা হায়, ‘ঐখোয়ন হেক পোকপদগী শিবা ফাওবদা কলচারনা শাগোন্নদুনা লাক্লি। নোংচুপ্লোমদগী হুম্লিক্লিবা চৎনবীগী অকনবা শাফূ অমনা লৈজরিবা কলচর অসি হুমদোকখিবা য়াবগী লৈরক্লিবা ফীবম অসিদা লমদমসগিী কলচর অসি ঙাক-শেন্দুনা থম্মীন্নসি। মরম অদুনা হৌরক্লিবা নহাশিংদা কলচরগী মমি তাহনবনা ফজরবা কলচরগী শক্তম অসি কায়দনা লৈহনবগী অচৌবা লম্বী ওইগনি।’
মহাক্না হায়খি, ঐখোয়না চহী লীশীং অনীগী পুৱারী লৈরে হায়না চাউথোক্না লৈরিবা অসি কলচর অসিনা য়োম্লগা লৈবননি। মসি নৎত্রগদি চহী ৫০ গী মতুংদগীদি ঐখোয়গী ওইবা আইদেন্তিসু মাঙখিবা য়াবগী অকিবা লৈ।
গুলাপী নত সঙ্কীর্ত্তন একাদেমিনা অসিগুম্বা থৌরম অসি মতম শাংনা পাঙথোরকপনা ঐখোয়গী কলচর অসি খঙহনবগী অচৌবা লম্বী অমসু ওইরিবনি। কলচর অসি কনগে হায়রগদি ঙসিগী থৌরম অসিগুম্বা অসি পাঙথোকপগী য়াম্না মথৌ তাই হায়না শরতচান্দ থিয়ামনা ফোঙদোকখি।
৩১শুবা গুরু কীর্ত্তন অসিদা গুরু বন্দনা (ঈশৈ), পুষ্পাঞ্জলি (গুরুশিং দা লৈ কৎপা), এৱার্দ লান্থোকপা অমসুং একাদেমি অসিগী আর্তিস্তশিংগী সনাতোন সঙ্গগী পারফোর্মেন্স ঊৎখি। চহী অসিগী ওইনা ত্রান্সলেতর অমসুং ইমিনেন্ত ক্রিতিক লাইশ্রম মেমো সিংহদা গুরু খ্বাইরাকপম লৈবাকমচা সিংহ এৱার্দ অমসুং নত সঙ্কীর্ত্তনগী পুংয়ৈবগী লমদা শকখঙলবা মণিপুর য়ুনিবর্সিতিগী দিপার্তমেন্ত ওব দান্স এন্দ ম্যুজিক্কী এসিস্তেন্ত প্রোফেসার দাঃ মৈকাম থোইবদা ওজা খ্বাইরাকপম ৱাংখৈ সিংহ এৱার্দ খূৎশিন্নখি। এৱার্দশিং অদুদা সাইতেসন, ইনফি অমসুং শেলগী মনা য়াওরি।
সোর্স: পোক্নফম
0 কমেন্ট:
কমেন্ট তৌবিয়ু