২ শুবা ঐখোয়গী ইম্ফাল ইন্তরনেসনেল ফিল্ম ফেস্তিবেল লোইশিনখ্রে
ইম্ফাল, ফেব্রুয়ারি ৯ : মণিপুর স্তেত ফিল্ম দিবলমেন্ত সোসাইতি (এম এস এফ দি এস) অমদি মণিপুর স্তেত ফিল্ম এন্দ তেলিভিজন ইন্সতিত্যুত (এম এস এফ তি আই), অমসুং ফিল্ম ফোরাম মণিপুর পূন্না খূৎশম্নরগা চত্থরকপা ২ শুবা ঐখোয়গী ইম্ফাল ইন্তরনেসনেল ফিল্ম ফেস্তিবেল, ২০২৫ ঙসি লোইশিনখ্রে।
মণিপুরগী পোনিদা ত্রিব্যুত পীদুনা তোঙান-তোঙানবা ভেন্যুশিং দা চত্থরকখিবা ইন্তরনেসনেল ফিল্ম ফেস্তিবেল অদু ঙসি পেলেস গেত্তা লৈবা সিতি কনভেন্সন সেন্তরদা মখল-মথেল কয়াগী ফজরবা কলচরেল ইভেন্ত কয়াগা লোয়ননা চীং-লেম্লবা থৌরম অমা পাঙথোক্তুনা লোইশিনখি।
চীং-লেম্লবা থৌরম অদুদা ফেস্তিবেল অসিগী ইন্তরনেসনেল কম্পিতিসন সেক্সনগী জুরি সুসান্ত মিশ্রা, সুপ্রিও সেন অমদি ফিপ্রেস্কি-ইন্দিয়া চেপ্তরগী অশোক রানীনা প্রসিদিয়ম মেম্বরশিং ওইনা শরুক য়াখি। লোয়ননা ফেস্তিবেল অসিগী তোঙান-তোঙানবা এৱার্দ কয়াসু লান্থোকখি।
ফেস্তিবেল অসিগী ইন্তরনেসনেল কম্পিতিসন সেক্সন (ফিক্সন) দা ম্যান্মাদা ইং ২০২১ দা মিলিতরিনা কুপ তৌরবা মতুংদা সাশন পায়রবা মতুং দা লৈবাক অসিগী নুপী তেক্সতাইল ৱার্কার কয়া এক্সপ্লোইত তৌবগী য়াম্না পৱারফুল ওইরবা নেরেসন অমদি শীংথানিংঙাই ওইরবা ভিজুএলশিংগীদমক মাও নাইংনা দিরেক্সন তৌবা ম্যাম্মারিজ ফিল্ম ‘মা-ক্রাই ওব সাইলেন্স’ না ফেস্তিবেল অসিগী বেস্ত ফিক্সন ফিচর ফিল্ম এৱার্দ ফংখ্রে। এৱার্দ অসিদা লুপা লাখ ৫ য়াওরি।
ইন্তরনেসনেল কম্পিতিসন সেক্সন (নন-ফিক্সন) দনা ভুতানগী অরুন ভত্তরাই অমসুং দোরোত্যা জুরবো এনীনা দিরেক্সন তৌবা ‘এজেন্ত ওব হেপ্পিনেস’ হায়রিবা ফিল্ম অসিনা বেস্ত ফিল্মগী মনা ফংখ্রে। এৱার্দ অসিদা লুপা লাখ ৩ য়াওরি।
তোপ-তোপ্পা তেলেন্তকা লোয়ননা ফিল্মদা নৌনা শাফোঙলকপশিং দা পীবা ঐখোয়গী পিত্চ এৱার্দকী মোস্ত প্রোমিজিং প্রোজেক্ত (ফিক্সন) এৱার্দনা প্রমোদা নান্দৈবমগী ‘দ সেন্ত ওব মাদর’ না ফংখ্রে। এৱার্দ অসিদা লুপা লাখ ৩ য়াওরি। ইমরজিং তেলেন্দ (নন-ফিক্সন) দা এন্দি তৌরাংবম অমসুং থোকচো নেলসনগী ‘ইচে তোম্বী-দা ব্রুওর ওব অন্দ্রো’ অমসুং ইমরজিং তেলেন্ত (ফিক্সন) দা অশোক ভৈলৌগী ‘খৈ-হি (নাইত এন্দ দে)’ না ফংখ্রে। এৱার্দশিং অসিদা লুপা লাখ অমমম য়াওরি।
বেস্ত পিত্চ এৱার্দ (ফিক্সন) দা এলেকজেন্দর লিও পৌগী ‘দ সেন্ত ওব দ রাইপনিং ফিল্ড’ দা লান্থোকখ্রে। এৱার্দ অসিদা লুপা লাখ ৩ য়াওরি। বেস্ত পিত্চ এৱার্দ (নন-ফিক্সন) না বোরুন থোকচোমগী ‘বেদপতিজ সোং স’ দা পীখ্রে। এৱার্দ অসিদা লুপা লাখ ২ য়াওরি।
সোর্স: পোক্নফম
0 কমেন্ট:
কমেন্ট তৌবিয়ু