স্কন্দ পূরাণ অমসুং পদ্ম পুরানগী ৱারী পরিংদা হিন্দুগী মেরাগী থাউমৈ থানবা -- এন. ডি. হোদাম্বা
মেরা থা (কার্ত্তিক মাস) দা মৈরা কৎপগী ৱাফম অসি পুরাণ অনী অসিদা য়াম্নমক মমল লৈনা পনবিরম্বা থেংনজৈ। লাইশঙ, লম্বীদা, লমজাওদা, তু-খোং-পাৎ-তুরেল নচিংবদা কৎপগী ৱাফমসু থম্বীরম্মী। থা অসিদা তৌবা দান কয়ামরোমগী মনুংদা মৈরা কৎপগী দান (দ্বীপ দান তৌজবা) অসি থোইদোক্না মমল লৈনসু লৌবিরম্মী। থা অমা চুপ্না পূক্নীং শেংনা মৈরা কৎচবনা ভগবান শ্রী বিষ্ণু অমসুং লক্ষীগী থৌজাল ফংজৈ হায়নসু পনবিরম্মী।
চন্দ্র শর্ম্মা কৌবা ব্রাহ্মণ অমগী পাউতাক মতুং ইন্না সুনন্দন কৌবা নিংথৌ অমনা মৈরা কৎচবগী মহয়না তাইবঙপান অসিদা নুপী অঙাং, মচা-মশু অমসুং মরী-মতাগা লোয়ননা চহী লাক্ষ অমা নুঙাই-য়াইফনা পানবা ফংজনি। মহাক্না তাইবঙ থারবসু মহাক্কী লোইনবীগা লোয়ননা শ্রী বিষ্ণুগী দর্শন ফংজদুনা অরান খুবম ফংজখি। কনাগুম্বনা থা অসিদা মৈরা কৎচরবদি তমথিবগী মশক ওইরবা অশিবগী লাই ফমগী শক্তম কৈদৌঙৈদসু উনরোই ফাওবা হায়রি।
কার্ত্তিক থা অসিবু দামোদর হায়নসু খঙনৈ। অমরোমদা, দামোদর হায়বসি শ্রী বিষ্ণুগী অতোপ্পা লাইচৎ-লাইরোন অমগী মিংনি। মরম অদুনা মৈরা কৎচবা মতমদা-
“দামোদরায় বিশ্বায় বিশ্বরূপধরায় চ।
নমস্কৃত্যা প্রদাশ্যামী ব্যোমদীপং হরিপ্রিয়ম্।।”
হায়বা শ্লোক অসিনা মন্ত্র ওই। একাদশীদা সূর্য্যনা তুলা রাশিদা লৈবা অমসুং পূর্ণিমাদা লক্ষী য়াওনা ভগবান বিষ্ণুনা পেনবিবগী মরম লৈবনা মেরা থাউমৈ থানবগী তাইবঙ মপোক্তা লৈরিবা মীপুম খূদিংনা তৌফম থোকপা ওইরম্মী। খুরমজবা মতমদা—
“নমোপিতৃভ্যঃ প্রেতেভ্যো নমো ধর্মায় বিষ্ণবে।
নমো যমায় রুদ্রায় কান্তরপতয়ে নমঃ।।”
শ্লোক অসিবু মন্ত্র ওইনা শোঞ্জদুনা মেরা থাঊমৈ কৎচরিবা মীওই নত্রগা ইমুং মনুং অদুগী লৈখিদ্রবা মীরোলশিংগী থৱায়দু নোরোক্তা লৈরম্লবা ফাওবদা লাইরৈবাক ফংজগনি হায়না পনবিরম্মী। অতিয়ারোমদা চিংখৎতুনা থানবা থাউমৈনি হায়দুনা মসিবু আকাশদ্বীপ নত্রগা আকাশ প্রদীপ হায়নসু খঙনৈ। শোইরোমদবা অৱাংবা ৱা অমগী মতোন্দগী য়ান্থদুনা থানবা থাঊমৈনি। অতিয়া রোমদা চিংখৎতুনা থানবগী মরমদি থক্লোমদা লৈবা লাইশিং, থৱায়শিং (প্রেতাত্মা), ইপা-ইপুগী থৱায়শিং পুম্নমক্তা, পেনবিবগী দমক কৎচবগী ৱাখল্লোন অমসুং য়াওরি।
মেরা থাদা থানবনি হায়দুনা মসিবু মীতৈনা মেরা থাউমৈ থানবা হায়না খঙনবনি। ধর্মনন্দন কৌবা নিংথৌনা লেপ্তনা মেরা থা খুদিং আকাশদ্বীপ থাউমৈ কৎচবগী মহয়না থোইহেল্লবা কাংবাই তোংদুনা বিষ্ণুধামদা চৎচবা ফংজবনি। মরম অদুনা তাইবঙ মীনা মেরা থাউমৈ অসি থা অদুমক চুপ্না কৎচগদবনি হায়না বিষ্ণুনা নারদ মুনিদা মমল লৈনা লীবিখিবা ৱারী ওইরম্লে।
0 কমেন্ট:
কমেন্ট তৌবিয়ু