আপডেট:
image

লোইখিদ্রবা ৱারী

ঐসে অচেন্বীনি লমচৎ নাইদবীনি হায়দুনা পূম্নমক্না তাথি তাওইনা তৌবী। ঐনা চেল্লুরিবসিবু মীওইবনা তৌনদবা থবক্লা ইচে ? পন্থুং য়ৌদবা নুংশিববু নুংশিবা কৌসিরা ? মখোয়না ঐবু তাথি তাওইরিদুগী মতীক মখোয়বুসু ঐনা তুকচ্চৈ। নুংশিববু থাক ৱাংনা লৌবা ঙমদবা সমাজসিগী মীওইশিংসিগী লোনচৎসিবু ঐনা তরাম্না ওক্নিংদে।

 

ঙসিদি ওফিসতগী থোরক্লগা মথৌতাবা পোৎ চৈ খরা লৈগে হায়দুনা বিশাল মার্কেত্তা চঙলুবদগী থোরকপদা খরা থেঙদোকখ্রে। সদরঘাটকী টেক্সি স্টেন্দদা পুংখায়মুক ফারে লেপ্লক্লিবা। টেক্সি অমা ঙাঙনরে বাশঁকান্দি ফাওবগী মী অনী ৱাৎলি তৌদুনা অসুম্মক লৈ। থাগে হায়রবদি থাবা য়ারবনি অদুবু থাবা কৌবা লৈতে। ঐগা থবক তৌমিন্নবা ইচেনা পোকপা ইচানীপা অমিরদা ঐনা হায়, থেঙজীল্লক্লে ইবুংঙো ৱাৎলিবা মীশিংসিগী ভাড়াসি ঐখোয় পীরসি অদুগা য়াঙনা য়ূম য়ৌহৌরসি। মানা হায়– তৌরিবা কেরানিগী পীক্লবা তলবসিদা নুংতিগী লূপা নিফূ য়াঙ্খৈ হেন্না পীরবদি ঐখোয়গী তলবতি গাড়িদা লৈহৌবা তারেনে। চহী নৌরিবা ইচানীপানা হায়রিবসে চুম্বা জাৎনি। অদুম ওইনমক য়ুমগী মৌ অমনা থেঙনা থেঙনা হঞ্জিনবা হায়বসি লৈকায় মীনোক চঙলক্কদ্রা হায়বগী অকীবা লৈ হায়বসি ঐনা নিপামচা অসিদা গাড়ী থাংফমসিদা করম্না ৱারীরুগনি। ফনমক থেঙলগসু অমিরগা ঐগা ওফিস অমত্তদা থবক তৌমিন্নবগী থম্মোয়দা লৈরিবা থৌনা অসিনসু ঐগী য়ুমগী মীশিংদুনা করি ৱাখল খল্লমগনি খন্বদা মপাঙ্গল ইশোন শোন্থরকপগুমখি। ঐগী অঙাংশিংদুনা মমা লাক্লে হায়দুনা হরাওজগদবদু মখোয়গী দমক লৈরক্লিবা পোৎ চৈশিংদু উবদা মোমোন মীনোক্না লৈশাৎ তম্লক্কদবদু অমুক ভাবনা শাগৎপা হৌই। ইচানুপী অহল অসমাবু ফি শেৎপীবা হৌবদা অমিরনা কৌরকই–‘ইন্দোমচা চৎকদবা মী শুরে গাড়ীদা কাখৎলো ঐগী ওয়রোমদা ইন্দোমচা ফম্লো মথঙদা ইচে অসি ফমহল্লো। পাঙল নুপীনি মশক মতৌ ফজৈ ওন্থোক্না নহা ওইরি। চহীদা ঐগী য়াম্না মখা ওইগনি। পাঙল নুপী অমগী ফিজোল অমত্তা ৱাৎতে মাঙোন্দা। নাপু মচুগী ফনেক শানলোন্বী অমা লীৎলি,খুদোল চোন্বী ফুরিৎ ফিরাং কোক্লবি অমা লিৎলি, লংজমগী গুলাপ মচুগী ইন্নফি অমা ইল্লি। খ্বাংদা অশংবা মচুগী খ্বাংনমফি নম্মী।খোঙদা শেন্দেল তোংদে। গাড়ী থৌবা হৌবতা ঙায়রি। অমিরনা ঐঙোন্দা তুমিন্না হায়রকই — ইন্দোমচা মসিগী নুপীসিনি ঐনা নোংমা ৱারী শাবদু জানিগঞ্জতা বরাক তুরেলদগী ৱা হোনগৎহৌই হায়দুনা। সদরঘাট থোং লান্বগা ঐঙোন্দা হংলকই– ইচে কদায়দগীনো? কদায়দা চ্ৎলুরিবনো? ঐঙোন্দা কনাগুম্বনা কদায়দগীনো হংলক্লবদি ঐনা বাঁশকান্দি হেক্তা হায়নিংদে মরমদি ঐগী পোক্নফম খুঙ্গংবু ঐ করিগুম্বা মতমদসু মীকুপ অমা ফাওবা কাউথোকপা ঙমদে অদুনা ঐনা হায়– ঐদি সিঙ্গেরবন্দ নীঙোলনি, হৌজিক্না বাঁশকান্দিদা য়ুম পাল্লক্লে। ঐ শিলচর চৎলুরিবনি।মানা অমুক হংলকই– ইচেগা ইচানীপাসিগা শিলচরদা তোয়না তোয়না উই। করি থবক তৌবগে নখোয়?

 

—-নিপামচাসি ঐগী ইচেগী মচানি,ঐগী ইচানি। ঐখোয় অনীমক ওফিস অমদা পূন্না থবক তৌমিন্নৈ। নঙদি কদায়দগীনো অদুগা শিলচরদা করি থবক্কী চৎলুরিবনো ? ঐদি বিশিংশা হায়রিবা খুল অদুগীনি। শিলচরদা ঐগী নীপানা রিক্সো থৌরগা ভাড়াগী য়ুম অমদা ইটখোলাদা লৈমিন্নরমই। ইচা অনীগা ঐখোয় অনীগা ঐখোয় মরীগী পীক্লবা সংসার অদু মানা নোংমগী পুশিল্লকপা শেন্ফম অদুনা কোন্নজৈ অদুবু অনা অয়েক্তি কনানসু থিংবা ঙমদবনিনা অঙাংশিং নারকপদা মীঙোন্দগী লৌশীল্লুবা শেল খরা অসুম শিংবা ঙমদনা লৈরকপদগী নোংমদি ইম্ফালদা চৎলগে হায়দুনা চৎখিবদগী মৱা মপাউ তাখিদ্রে। ঐনা খোঙ্গুল লীরুগদবসু উপাই লৈতে। ঐনা হংই– নঙগী নীপাগী মচীন মনাউ নত্ত্রগা নঙগী নবুঙ নপ্বা কনা কনা লৈ ? শাংলবা স্বর মপী অমা হোন্দোরক্লগা খুম্লকখিবনি।

 

— ঐগী নীপাগীসু কনাসু ৱাৎতে। মমা মপা মচীন মনাও লোইনা লৈ। ঐগীসু বাবাতনি শিখ্রিবা ইচিন ইনাও শঙ্গু অমা লৈ ইনাক কৈরাক খুল্লি অদুবু ঐগী অৱাবদা মতেং পাংনবা মীদি লৈতে।

 

ঐগী নাকোং ময়াদা চঙশীল্লক্লগা হায়– ইচে নীপামচাসি তাহনগনু ইকায়জৈ। ঐখোয়গী অঙাংশিংগী মপাখোয়গা ঐখোয়গসি থায়নগী য়েংথিনবা লৈ হায়দুনা অহল্লমনশিংনা লৌন লৈনরক্কনু হায়না থাঙ চীক্তুনা ৱাশক্নরমই হায়। অদুবু ৱারী খুদিংমক খঙনা খঙনা নুংশিবদা ঙাওখিবা থম্মোয়সিনা পূম্নমকপু থওইরমদনা থেঙলবা অহীং অমদা ঐখোয় ইম্ফালগী দমক থোকখিরমই। মফমদুদা চহী মরী লৈরম্লগা বাবা লৈখিদ্রে হায়বা পাউ তাবদগী কাছারদা অমুক লাকখিবনি।মাইকৈ অনীমক্নসু ঐখোয়বু তরাম্না ওকপীবগী মহুত্তা শা ষন তান্বগুম তান্থোকপিরকপদগী ইটখোলাদা মানা রিক্সো থৌরগা লৈরকখিবনি। ইমানদি মী অফংবদা শেল থুম খরা খরা লোন্না পীরকই। কল্লিঙৈদা মরী মতাদা চৎলিবনি হায়দুনা থোরক্লগা ঐগা উনবা লাক্লমই। ইচে মমা ওইবীগী মিনুংশিগা করিগুম্বা পোৎশক অমগা চাংদম্নবা য়াদে হায়বসি অচুম্বনি হায়রগা মা খোঞ্জেল থোক্না কপ্পা হৌরকই। ঐনা হায়—ইনাও নঙ লাউনা ঙাঙগনু পেসেঞ্জার ময়াম পুন্না তোংলিবা গাড়ীনি। তপ্না তপ্না ৱারী শাসি মীনা নোক্নরক্কনি।

 

 —- চুম্মি ইচে ঐগী পুন্সিদা থোক্লিবা ৱারী পরীংসে কনাদসু থোক্লম্লোইদ্রা খল্লি। কনাদসু ঐগী ৱারীসে লীরুদে অদুবু ঙসিদি ইচেদা ৱারী খুদিংমকসে লীরগে। থম্মোয়গী মৈচাকসে খরা নেমথরকপগুম তৌই। কাশিপুর য়ৌরকপগী অদুৱাইদা ঐনা হংই– হৌজিক নঙ কদায়দা লৈ ?

 

—ঐগী নীপানা মনিপুরদা চৎখিবদগী থা অনীরোমদি শেল থুম থারক্লমই। অদুদগীদি মৱা মপাউ তাখিদ্রে। মানা শেল থারক্তবদগী য়ুম ভাড়া পীবা ঙমদবদগী য়ুম্বুনা তান্থোরকপদগী ঐ বিশিংশাদা লাকখি। অহান্বদা নীপাগী কাঙবুদা চৎলগা ইংখোল মচেৎ অমত্তং নিজরুই অদুবু ইকুবোক্না ইঙকশম পায়দুনা কোন্থোং ৱাংমা লান্না ইন্থোরকখি। মতুংদা অমুক ইপামদা চৎলুবদসু মখোয়না ঐবু নঙদি শিখিবা কুইখ্রে অদুনা অশীবগা অচঙবগা লৈমিন্নবা য়াদে হায়দুনা তান্থোরকই। ইমাদু উপাই লৈতনা কপ্তুনা লৈহৌই। তৌফম খঙদনা অসুম থোরকপদগী বাবাগা য়াম্না লুনা তিন্নরম্বা ময়াং অহল অমগা থেংনরুবদগী মানা চংজফম পিবীদুনা মাগীদা লৈরিবনি। ইচা নীপানা অমুক হংলকই— ইচেনা শিলচরদা থবক শুরুদ্রবসু ঐখোয়গী পাঙলনা তারিবা খুঙ্গংশিংদা চৎতুনা শূ নোম্বা য়াদব্রা ?

 

—– নোক্না চাউবা পাঙল সমাজনি।ঐসে অচেন্বীনি লমচৎ নাইদবীনি হায়দুনা পূম্নমক্না তাথি তাওইনা তৌবী। ঐনা চেল্লুরিবসিবু মীওইবনা তৌনদবা থবক্লা ইচে ? পন্থুং য়ৌদবা নুংশিববু নুংশিবা কৌসিরা ? মখোয়না ঐবু তাথি তাওইরিদুগী মতীক মখোয়বুসু ঐনা তুকচ্চৈ। নুংশিববু থাক ৱাংনা লৌবা ঙমদবা সমাজসিগী মীওইশিংসিগী লোনচৎসিবু ঐনা তরাম্না ওক্নিংদে। অদুনা থাপখ্রবা ময়াং মরকসিদা শূরুরগা ফংলকপা শেন্ফমদুনা ইচা চাউবা ঙাইরিবনি।

 

বাঁশকান্দি য়ৌরে হায়দুনা গাড়ী খাম্বদগী ঐখোয় কুমহৌরে।মহাক্তি লোইখিদ্রবা ৱারী অদু পুরদুনা উরিমখৈ মমিৎ কুপ্তনা য়েংলম্লগা ময়ুম মাইকৈ পাংহৌরি।

 

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু