আপডেট:
image

লিসিপ্রিয়া কাঙুজম য়ুনাইটেদ নেসন্স জেনারেল এসেমব্লি শরুক য়ানবা ইন্দিয়া থাদোকখ্রে

ইম্ফাল, সেপ্টেম্বর ১৮: মশাগী চহী তরা খক্তা ঙাইরিবী মণিপুরদগী হৌখিবা মালেমগী মশক নাইরবী ক্লাইমেট এক্তিভিষ্ট লিসিপ্রিয়া কাঙুজম য়ুনাইটেদ নেসন্স হেদক্বার্টারস, নিউইয়র্ক, য়ুএসএদা পাঙথোক্লিবা মালেমগী খ্বাইদগী মরুওইবা অমদি অচৌবা মীফম অমা ওইরিবা ৭৭ রকশুবা য়ুনাইটেদ নেসন্স জেনারেল এসেমব্লিদা ইন্দিয়াগী মীহুৎ অমা ওইনা শরুক য়ারুনবা খোংশানখ্রে।

য়ুনাইটেদ নেসন্সকী জেনারেল সেক্রেটারি এন্তোনিও গুতেরেসনা মহাকপু মীফম অসি য়াওরনবা অখন্নবা চেবাও থারকখিবনি হায়রি। মহাক্না য়ুএন ট্রান্সফোর্মিং এদুকেসন সম্মিৎতা শরুক য়াগনি। মহাক্না ইন্দিয়াগী মীহুৎ অমা ওইবতা নত্তনা মালেমগী অঙাং মিলিয়ন্স কয়াগী মীহুৎসু ওইরিবনি। চহী খুদিংগী সেপ্তেম্বর থাদা য়ুনাইটেদ নেসন্সকী মেম্বার ওইবা লৈবাক কয়াগী মালেমগী লুচিংবশিংনা মালেমগী মরুওইবা ৱাফম কয়া খন্ননবগীদমক য়ুএন হেদক্বার্টর, নিউইয়র্কতা মীফম অসি পাঙথোক্লি।

হন্দক চহীগী ৭৭ রকশুবা য়ুএনজিএগী মীফম অসি হৌখিবা লৈবাকপোকপা নুমিৎ সেপ্টেম্বর ১৩ দগী ফম্বা হৌখ্রে। অহানবা অৱাংবা থাক্কী লুচিংবশিংগী জেনারেল দিবেট অসি সেপ্টেম্বর ২০দগী হৌগনি। হন্দক চহীগী মীফম অসিদা হৌজিক হৌজিক থেংনরিবা মালেমগী ইসুশিং মরুওইনা য়ুক্রেনগী লান, ইনার্জি অমদি পোৎ চৈ মমল তাংখৎলকপা, কোবিদ ১৯ পেন্দেমিক অমদি ক্লাইমেট চেঞ্জনা থোকহল্লিবা অৱাবা খুদোংথিবা কয়াগী মরমদা খন্নবা য়াওরি।

লিসিপ্রিয়া হৌজিক রিয়ান ইন্টারনেসনেল স্কুলদা ক্লাস ফাইব তম্লি। মহাক ইকুই কুইদ্রিঙৈদা তিমোল লেষ্টে (ইষ্ট তিমোর) গী প্রেসিদেন্টগী স্পিসিয়েল ইনভোই ওইনা হাপখ্রবনি। মহাক্কী অপোকপীসু মহাক্কা লোয়নরি।

মহাক্না মেদিয়াশিংদা হায় মালেমগী অপীকপা ইথৎ লৈবাক টিমোর লেষ্টে অসি চাদা ০.০ দগী হন্থনা গ্লোবেল কার্বন ইমিসন থাদোক্লি অদুবু মখোয়গুম্বা লৈবাক কয়ানা খ্বাইদগী চাওনা ক্লাইমেট ক্রাসিসনা অৱাবা পীরি। খুঙ্গং কয়া সমুদ্র ঈশিং ঈমায় ৱাংখৎলকপনা ইরোন্নুংদা লুপখিগদৌরে। ঐখোয়না মালেমগী অইং অশাগী খল কায়রক্লিবা অসিগী অচুম্বা পাম্মী অমদি ক্লাইমেট চেঞ্জ থোকহল্লিবা ইনাক খুনবা লৈবাক শিংনা মাঙতাকহল্লবা অমদি অৱাবা তারবা লায়রবা লৈবাকশিংদা কম্পেন্সেসন পীফম থোকই। মদু নত্ত্রবদি ক্লাইমেট জষ্টিস ফংবা ঙম্লোই হায়খি।

অদুগা মীওইবনা লান্দা বিল্লিয়ন্স দোল্লরস কয়া থাদবগী মহুৎতা ক্লাইমেট চেঞ্জ থেংনবদা, লায়রবা কোকহন্নবা অমদি অঙাংশিং লাইরিক তম্বদা থাদবীরবদি ঐখোয়গী মালেম অসি কয়াদা নিংথিজবা মালেম অমা ওইগনি হায়না মহাক্না মখা তানা ৱাহং হংখি।

লিসিপ্রিয়ানা নিউ দিল্লীদা লৈবা য়ুনাইটেদ ষ্টেটস এম্বেসিনা মীফম অসি য়াওরুনবগীদমক মহাক্কী আমেরিকা ভিসা নোংমদা পীবীবগীদমক থাগৎপা ফোঙদোকখি। পৈশা লৈতবা অমদি পাসপোর্ট মতম লোইশিল্লকনা মরম ওইরগা মীফম অসি য়াওররোই হায়না ফাওবা লেপ্লম্লবনি হায়না মহাক্না মখা তাখি।

মহাক্না ফোঙদোকখিবদা ইন্দিয়াদা ঈশিং ঈচাও, ইকং থোকপা, শাবগী চাং হেনগৎলকপা সাইক্লোন, লোকষ্ট, এয়ার পোল্লুসননচিংবা মতম অমদা পুন্না হেক হেক অৱাবা অসি তাই। মসি ক্লাইমেট চেঞ্জনা থোকহল্লকপা ঙাক্তনি। মরাল লৈজদ্রবা অপীকপা অঙাং লীশিং কয়া ক্লাইমেট চেঞ্জনা হাৎলি অমদি মখোয়গী মমা মপা কয়া কায়নহল্লি। মীওই মিলিয়ন কয়ানা য়ুম কৈ কয়া ঈশিং ঈচাও অমদি সাইক্লোননচিংবনা ফুক্তুনা পুখিবদগী লৈফম লৈতবগী অৱাবা মায়োক্নরি।

মেদিয়া অমনা হংলকপা ৱাহংগী পাউখুমদা লিসিপ্রিয়ানা হায় ঐহাক্না চৎলিবা খোঙচৎ অসি ক্লাইমেট জষ্টিস পীয়ু হায়দুনা মালেমগী লুচিংবশিংদা তক্নবা চৎপনি। চেল্লম্বা তুরেল, পাৎ কয়া কংদুনা মাঙখ্রে, শংলম্বা উমং ৱামং কয়াসু মরু কোকখ্রে অমদি থৱায় পানবা জীব কয়াগী লৈফমবসু মীওইবনা ঐখোয়না মাঙ তাকহনখ্রে। ঐখোয়না কমদৌনা মালেম অসি কনগনি খঙদ্রবদি মালেম অসি মাঙতাকহনবা খুদক্তা লেপকদবনি।

মরাল লৈজদ্রবা অঙাং মিল্লিয়না কয়ানা ঐখোয়গী লুচিংবশিংগী অশোইবনা মখোয়গী পুন্সিবু মাঙহনবা অসি ঐখোয়না য়াফম থোক্তে। ঐখোয়না অরুবা নুংশিৎ শ্বর হোনবা পাম্মী, অরুবা ঈশিং থকপা পাম্মী অমদি তরু তনানবা মালেম অমদা লৈবা পাম্মী। ক্লাইমেট চেঞ্জ অসি নং ঐ নৎত্রগা কনাগুম্বা মীওই অমখক্তগী নত্তে। ক্লাইমেট চেঞ্জ হায়বসি মালেম অসিদা লৈরিবা মীওইবা খুদিংমক্কী প্রোব্লেমনি। লৈবাক অসিদা অমদি মালেম অসিদা লৈরিবা অঙাংশিং অসি হেক পোক্লকপদগী ক্লাইমেট চেঞ্জকী চেঞ্জ কী ভিক্তিম ওইরবনি হায়না মহাক্না মখা তানা নুঙাইতনা তমখি।

লিসিপ্রিয়া মালেমগী খ্বাইদগী মরুওইবা ক্লাইমেট চেঞ্জকী খোঞ্জেল অমা ওইরি। মহাক্না চহী অসিগী য়ুনাইটেদ নেসন্স জেনারেল এসেমব্লিদা খ্বাইদগী অঙাং ওইবা মীহুৎ ওইনা শরুক য়ারি। মহাক্না মালেমগী লুচিংবা কয়া উনরম্লবা মতুং সেপ্টেম্বর ২৬ তা ইন্দিয়াদা হল্লক্কনি।

সোর্স: সঙাই এক্সপ্রেস  

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু