লিসিপ্রিয়া ইষ্ট টিমোরগী গুদউইল এম্বাসেদর হাপখ্রে
ইম্ফাল, সেপ্টেম্বর ৯ : `মশাগী চহী তরা খক্তা ঙাইরিবী মণিপুরী মচা মালেমগী শক্নাইরবী এনবাইরনমেন্ট এন্দ ক্লাইমেট এক্টিবিষ্ট লিসিপ্রিয়া কাঙুজমবু ইষ্ট টিমোর লৈবাক্কী গুদউইল এম্বেসেদর ওইনা মখোয়গী প্রেসিদেন্ট অমদি নোবেল পিছ প্রাইজসু ফংখ্রবা দাক্তর জোস রামোশ হোর্টানা হাপখ্রে। মহাক্না এনবাইরনমেন্ট অমদি পিছকী হিরম অনিসিদা থবক তৌগনি। মরী লৈনবা চে চাংশিং সেপ্টেম্বর ১দা লিসিপ্রিয়াদা চিথি ওইনা থারক্তুনা খঙহল্লকখ্রে হায়রি।
প্রেসতা থাদোরকপা চেরোল অমনা হায়, অসিগুম্বা অচৌবা ইকায়খুম্ননিংঙাই মশক ওইরবা লৈবাক অমগী ফম অমা পায়হল্লকপা হায়বসি অরাইবা নত্তে। ইন্দিয়াগী অঙাং মচা অমদা ওফিসিয়েল্লি লৈবাক অমগী এম্বেসেদর হাপ্লকপা অসিসু য়াম্না তাংনা থোকই। অখঙ অহৈশিংনা মত ফোঙদোকপদা লিসিপ্রিয়াবু এম্বেসেদর অমা ওইনা হাপ্লকখিবগী মরমসি ইন্দিয়া অমদি ইষ্ট টিমোর লৈবাক অনিগী মরী অসি হেন্না নকশিনহন্নবা লোয়ননা মালেমগী হোংলক্লিবা অইং অশাগী খল কায়হল্লক্লিবা ক্লাইমেট চেঞ্জ অসি পুন্না থেংননবা ওইরম্বা য়াই।
ইষ্ট টিমোর হায়রিবা লৈবাক অসিসু ঈশিং ঈমায় ৱাংখৎলকপনা সমুদ্র ইরোন্নুংদা নোংমদি শোয়দনা লুপখিবা য়াবগী ফীবমদা লৈরে। লেপ্তনা ঈশিং ঈচাও, ইকং, সাইক্লোনশিং লান্থেংনরি। লিসিপ্রিয়ানা মেদিয়াশিংদা হায়খিবদা ‘ঐহাকপু গুডউইল এম্বেসেদর অমা ওইনা হাপ্পীরকপা অসি ঐবু তশেংনা ইকায়খুম্নবীবনি। ঐহাক্না ইষ্ট টিমোরগী প্রেসিদেন্ট দাক্তর জোস রামোস হোর্টা অমদি ইষ্ট টিমোরগী প্রজা মীয়াম খুদিংমক ঐঙোন্দা থাজবা থম্বীবগীদমক থাগৎপা ফোঙদোকচরি’।
ঐহাকপু নখোয়গী খোঞ্জেল অমা ওইনবা ঐঙোন্দা শিন্নবীরিবা থৌদাং অসি ঐহাক্না চেৎনা লৌশিঞ্জৈ। ক্লাইমেট চেঞ্জদগী ইষ্ট টিমোরগুম্বা ইথৎ লৈবাক কয়া মালেম অসিদগী কন্নাবা হোৎনবদা ইথক্কুম্বা কয়াগী থৌদাং য়াম্না চাওই হায়খি। ক্লাইমেট চেঞ্জ অসি হৌরক্লিবা অঙাংশিংগী মফমদদি অকিবগী মশক ওইরে। মালেমগী ইনাক খুল্লবা লৈবাক্কী লুচিংবশিংনা হায়দোকখিবা ৱা ঙাক্না ক্লাইমেট চেঞ্জনা অৱাবা তাহল্লবা লৈবাকশিংদা মতেং পাংদুনা অঙাংশিংগী তুংগী পুন্সি কনগদবনি হায়না মহাক্না মখা তানা হায়খি।
নিংশিংবা য়াই লিসিপ্রিয়ানা হৌখিবা মেগী ২০ দা ইষ্ট টিমোরগী অনৌবা প্রেসিদেন্ট ৱাশক লৌবগী থৌরমদা মারেমগী লুচিংবশিংগী মমাঙদা মৈতৈ ফিজোল শেৎতুনা ৱা ঙাঙখিবনি। মদুগী নুমিৎ অদুদা ইষ্ট টিমোর নিংখা তম্বগী মহাও ফংবা চহী ২০ শুবগী নুমিৎসু ওইখিবনি। মহাক্না মখা তারদুনা হায়, ঐহাক অমুকসু ইষ্ট টিমোরদা দিসেম্বর থাদা চৎকনি। ঐহাক্নসু প্রেসিদেন্ট হোর্টাদা নিউ দিল্লীদা ইষ্ট টিমোরগী এম্বেসি অমা হাংদোক্তুনা ইন্দিয়াগী ক্লাইমেট, ইকোনোমিক অমদি ষ্ট্রেটেজিক পার্টনার ওইনা থবক তৌনবা তকশিল্লি। মহাক্নসু য়াবীরে অমসুং মথং চহীদা ইন্দিয়াদা লাক্লবা য়াই।
নোবেল লোরিয়েত জোজ রামোস হোর্টা ইস্ট টিমোর লৈবাক্কী প্রেসিদেন্ট ওইবা অনিরকশুরে। মমাঙদসু ২০০৭ তগী ২০১২ ফাওবা প্রেসিদেন্ট ওইরম্মী অমদি লৈবাক অসিগী অহানবা প্রাইম মিনিষ্টারসুনি। মহাকপু ইষ্ট টিমোরগী ফাউন্দি ফাদার হায়নসু খঙনৈ। দাক্তার জোস রামোস হোর্টানা ইষ্ট টিমোরবু ইন্দোনেসিয়াগী মখুৎতগী শান্তি ওইনা নিংতম্বা অমুক হঞ্জিনহনবা ঙমহনখিবগীদমক ইং ১৯৯৬ তা নোবেল পিছ প্রাইজ পীদুনা ইকায়খুম্নবা উৎখি।
লিসিপ্রিয়া মথংগী হপ্তাদা য়ুনাইটেদ নেসন্স হেদক্বার্টর, নিউইয়র্ক, য়ুএসএদা ৭৭রকশুবা য়ুএন জেনারেল এসেমব্লি ২০২২ গী মীফম মনুংদা পাঙথোক্কদৌরিবা য়ুনেস্কো ট্রান্সফোর্মিং এদুকেসন সম্মিৎ ২০২২ শরুক য়ানবা য়ুনাইটেদ নেসন্স সেক্রেটারি জেনারেল মিষ্টার এস্তোনিও গুতেরেসনা বার্তন তৌরকপদগী আমেরিকা চৎনবা শেম শারি হায়রি।
সোর্স: সঙাই এক্সপ্রেস
0 কমেন্ট:
কমেন্ট তৌবিয়ু