লিসিপ্রিয়ানা অনৌবা গিন্নিস ৱার্ল্ড রেকোর্দ থমখ্রে
ইম্ফাল, আগস্ট ২৬ : মশাগী চহী তরা খক্তা ঙাইরিবী মালেমগী শক্নাইরবী ক্লাইমেট এন্দ এনবাইরনমেন্টেল এক্টিবিষ্ট লিসিপ্রিয়া কাঙুজমনা ঙসি অনৌবা গিন্নিস ৱার্ল্ড রেকোর্দ থম্বা ঙমখ্রে। মহাক্না মালেমগী খ্বাইদগী চাওবা প্লষ্টিক বোটলনা শেম্বা ৱাহৈ পরেং অমা মপুং ফানা ইদুনা রেকোর্দ অসি থম্বা ঙমখিবনি।
পাউগী লিখুন অমগী মতুং ইন্না, মহাক্না পুন্না ঈশিং প্লাষ্টিক বোট্টল ৬,০৫৬ শীজিন্নদুনা শুপ্নতংগী মিনিট ৯.০২ দা অনৌবা রেকোর্দ অসি থমখিবনি। মমাঙদা য়ুনাইটেদ কিংদমদা লৈবা সেন্ট এদৱার্দ প্রেপ স্কুলনা রেকোর্দ অসি মিনিট ৪৫ দা পুন্না ঈশিং প্লাস্টিক বোটল ৩,৩২৫ না ৱাহৈ পরেং অমা ইদুনা থম্বা ঙমখিবনি। অদুবু হায়রিবা রেকোর্দ অসি ঙসি লিসিপ্রিয়ানা মায় পাক্না থুগায়বা ঙমখিবনি হায়রি।
রেকোর্দ অসি থম্নবা হোৎনবদা মহাক্কী মনাও নুপা ইরিনা কাঙুজম অমদি রয়ান ইন্টার্নেসনেল গ্রুপ ওফ ইন্সটিট্যুসনগী মহৈরোয়শিংনসু অসি থম্বা ঙমখিবনি। থৌরম অসি মহাক্কী স্কুল রয়ান ইন্টার্নেসেনেল স্কুল নোইদা এক্সটেন্সন্দা জুরিশিং, এক্সপার্ট লোয়ননা ইন্দিপেন্দেন্ট উইটনেস কয়াগা লোয়ননা পাঙথোকখি।
হায়রিবা রেকোর্দ অসি থম্বগী নুংগী ওইবা ৱাহন্থোক পীরদুনা লিসিপ্রিয়ানা মেদিয়াদা ফোঙদোকখিবদা, মহাক্না তৌরিবা অসি গিন্নিস ৱার্ল্ড রোকোর্দ থম্বা হায়বা পান্দম অদু খক্তা নত্তে। ঐহাক্না মালেমগী মীয়াম অমদি লুচিংবশিংদা প্লাষ্টিক পোল্লুসন্না থোকহল্লিবা অৱাবগী মশকশিং অমদি মালেম অসিবু মোৎশিল্লক্লিবা অসিগী মরমদা পাউজেল অচৌবা অমা থাবা পান্বগীনি।
ইরিবা ৱাহৈ পরেং অসি ‘সেব অৱার প্লানেট এন্দ অৱার ফিউচার’ কৌই। মসিগী অর্থদি মালেম অসিবু কল্লু অমদি ঐখোয়গী তুংগী পুন্সিবু কল্লু হায়বনি। ইন্দিয়ানা চহী অমদা মিলিয়ন টন ৩.৫ গী চেরংগী অমোৎপা পুথোকই। হায়রিবা অমোৎপা অসি পাৎ, তুরেল, কোম নৎত্রগা সমুদ্রদা তাখিগদৌবা ঙাক্তনি। মসিনা ক্লাইমেট চেঞ্জদা নত্তনা এয়ারপোল্লুসন অমদি মালেম অসিবু কায়থরক্নবগী অচৌবা মরম অমা ওইহল্লি হায়না মহাক্না মখা তাখি।
মহাক্না হায়, ‘ঙসি শীজিন্নরিবা বোট্টলশিং অসি ঐনা হোটেল রেষ্টুরেন্ট অমদি মীয়ামদগী থা অনি চঙনা ক্লাইমেট চেঞ্জ অমদি প্লাস্টিক পোল্লুসনগী পাউজেল অসি পীনিংবগীদমক্তা খোম্লুবনি। ঐখোয়গী তুংগী পুন্সি কনবা নৎত্রগা হাৎপা হায়বসি লুচিংবশিং অমদি অহলশিংদা লৈরে। ঐখোয় মীৎ পাংবা মতম ওইরে।’ ‘ঐখোয়গী চেল্লম্বা পাৎ, তুরেল খুদিংমক কংখ্রে। শংলম্বা উমং ৱামং অমদি চীংসাং কয়াসু মরু কোকখ্রে। লৌমী কয়ানা মতম চানা নোং তাদবা নৎত্রগা খুদক্কী ঈশিং ঈচাও কয়াদগী চানিংঙাই লৈতদনা মকোক্তা মখুৎ হাপ্নরে। হৌজিক ঐখোয়না চৎলিবা অরানবা খোঙথাং অসি চুমথোক্তুনা মহৌশাগী অকোয়বগী ফীবমবু ঙাক শেন্দুনা থম্বগা মতম ওইরে।’ হায়না মহাক্না ফোঙদোকখি।
ক্লাইমেট চেঞ্জ অসি থেংনবদা ঐখোয় খুদিংমক্না অচৌবা থৌদাং লৌবা তাই, মালেমগী লুচিংবশিংসু ক্লাইমেট চেঞ্জকী হিরমদা ঙাইহাক্কী খুবাক খরা ভাবোক্না খুরক্নবা পংহায়দা হায়জিনবগী চৎনবী অসিসু তোক্লসি হায়খি। থৌরম অদুদা হোক্কিগী মালেমগী থাক্কি শান্নরোয় ওইবগা লোয়ননা অর্জুনা এৱার্দি চীংলেনসনা কাঙুজমসু স্পিসিয়েল গেষ্ট ওইনা শরুক য়াখি।
সোর্স: সঙাই এক্সপ্রেস
0 কমেন্ট:
কমেন্ট তৌবিয়ু