আপডেট:
image

লাইরিক ফোঙদ্রিঙৈদা য়েংশিল্লগনিঃ এদজুকেসন মিনিস্তর তিঐচ বসন্ত কুমার সিংহ

ইম্ফাল, সেপ্টেম্বর ১৬ : মণিপুরগী পুৱারী, নাৎ অমসুং চৎনবীগা মরী লৈনবা অইবা লাইরিকশিং ফোঙদ্রিঙৈদা লৈঙাক্কী এক্সপার্ট কমিটিনা ভেরিফাই তৌনবা থবক পায়খৎপা হৌরে হায়না কমিটি অসিগী চেয়ারমেন ওইরিবা এদজুকেসন মিনিস্তর তিঐচ বসন্ত কুমার সিংহনা ফোঙদোকখ্রে। মিনিস্তরনা ৱাফম অসি দি এম সি টি ই (দি এম কলেজ টিচার এদজুকেসন) গী চহী ৫০ মপূং ফারকপগী ঙসি পাঙথোকখিবা সনা ফূদোংবা থৌরমদা ফোঙদোকখিবনি।

দি এম সি তি ইগী গোল্ডেন জুবিলি হোলদা পাঙথোকখিবা থৌরম অদুদা চীফ গেস্ত ওইনা শরুক য়াখিবা এদজুকেসন মিনিস্তর তিঐচ বসন্ত কুমারনা হায়খি, মণিপুরগী পুৱারী, নাৎ অমসুং চৎনবীবু অরানবা মায়কৈদা পুনবা হোৎনরকপশিং থিংনবগী পান্দমদা কনাগুম্বনা ইবা লাইরিক অদু ফোঙদ্রিঙৈদা লৈঙাক্কী এদজুকেসন মিনিস্তরনা লুচিংবা মী ১৫ না শাবা এক্সপার্ত কমিটি অমা শেমদুনা লাইরিক অদুবু ভেরিফাই তৌনবা থবক পায়খৎপা হৌরে। কমিতি অসিগী অয়াবা য়াওদনা কনাগুম্বনা লমদম অসিগী পুৱারী, নাৎ অমসুং চৎনবীগা মরী লৈনবা লাইরিক অমত্তা ফোঙবা য়ারোই।

মিনিস্তরনা হায়খি, মণিপুরদা লৈঙাক্কী স্কুলগী ওজা ১৭,০০০ লৈফম থোকই। অদুবু মতমগী মতুংইন্না ওজা কয়া থবক্তগী পোত্থাখিবা অদুগা অনৌবা রিক্রতমেন্ত তৌদবা কয়া অসিনা হৌজিক ওজা ৭০০০ কী অৱাৎপা মায়োক্নরি। মসিগী মথক্তা ওজাশিং গী ট্রান্সফার পোস্তিংদা পোলিতিকেলগী ওইবা খূৎ চঙবনা স্কুল এদজুকেসন্দা দা অচৌবা খুদোংচাদবা অমা ওইরি।

মসি কোক্নবা ত্রান্সফার অমসুং পোস্টিং তৌবদা পেলিতিকেলগী খুৎ চঙলকপা তারবসু মদু মায়োক্নবা চঙই। ওজাশিং মখোয়গী চত্থোক-চৎশিন্দা খুদোং চাগদবা মফমশিংদা য়ারিমখৈ ত্রান্সফার অমসুং পোস্তিং পীনবসু লৈঙাক্না হোৎনরি। মসিগীদমক্তা ওজাশিংগী রেসিদেন্সিয়েলশিং খোমগৎপা হৌরে। মিনিস্তরনা হায়, ওজাশিং অরাপ্পা মফম অমসুং চীংদা ট্রান্সফার অমসুং পোস্তিং থাবা মতমদা পানিশমেন্তনি হায়না লান্না ওজাশিংনা খনবীগনু। ওজা পোস্তিং থাখ্রগা স্কুলদা লাকই লাক্ত্রে হায়বা ৱাথোক কয়া লৈবনা স্কুল অয়াম্বদা ওজাশিংগী ফোটো থেৎনবা থবক পায়খৎলে। মহৈরোয় অমসুং লোকেলিতিশিংনা স্কুরদা লাক্তুনা লাইরিক তাক্তবা ওজাশিং অদু মশক খঙবা ঙম্লগনি।

দি এম সিতি ইনা চহী ৫০ রোম এদজুকেসনগী লমদা লৌদুনা লাক্লিবা থৌদাং অসি কাউথোকপা চুম্লোই। ওজাশিংনা তাকপীরিবা তুংদা ওজা ওইরক্কদৌরিবা মহৈরোয়শিং অসি নিংথিনা শেশ্বা, অফবা ওজা লমদম অসিদা পুথোকপা মথৌ তাই। এন ই পি (নেসনেল এদজুকেসন পোলিসি) অসি ইমপ্লিমেন্ত তৌবা তারবসু ওজাশিংনা থৌদাং লৌদ্রগদি কান্নবা ফংলোই হায়না মিনিস্তর (এদজুকেসন) বসন্ত কুমারনা ফোঙদোকখি। ঙসিগী থৌরম অদুদা দি এম য়ুনিভার্সিতিগী ভাইস চাঞ্চেল্লর প্রো: রাজমুহোন, থাংমৈবন্দ এসেমব্লি কনস্তিত্যুএন্সিগী এম এল এ খুমুকচম জয়কিষন অমসুং দি এম সি তি ইগী প্রিন্সিপাল আর কে লোকেন্দ্রসু পেসিদিয়াম মেম্বারশিং ওইনা শরুক য়াখি।

সোর্স: পোক্নফম  

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু