• 355
• ১৬ই মে ২০২১ ইং
• Share on:

রিতা থোকচোমগী ৱারীমচা – অচুম্বা ফিরেপ

নোংমা মচা মমৌবু কৌশিল্লগা হায়রকই, “ইচাশা নখোয় হয়েংদগী নুমিৎসু ফৈ তোঙান চারো ইমাসু নচন-ননাওশিংসিগা ঙম্নবা হোৎনরগে মতম খরদি। হয়েং মতাং অমদা মতেঙ পাংনবনা অমনি নত্রবদি নখোয়সু অঙাং নুবী য়াওশিল্লক্লবনিনা হেন্না পোৎলুম ওইরনি।” বসন্তসু শাওশিন্নরগা, “ইমানা অদু য়ৌরদি কৈসু কায়দে হায়রদুনা চৎখ্রে।” অদুদগীদি মাগী-মাগী তোঙান অদুম চানরে।

প্রেমা লাইরিক্তা থৱাই য়াওই। মথৌ মশক খঙ্ঙী। মচিন মৌপ্বা মখোয় মরিগী মনুংদা নুপী মথন্তনি। মথক্তা মবুং অমা মখাদা মৌপ্বা অনী। মপাদি খর কুইরে লৈখিদবা মমা লুখ্রাবীনা য়োক্লি।

মবুং বসন্ত থবক মচা অমা তৌরে। মমানা কৈথেলদা এঞ্ছাং নাপী য়োল্লি। মৌপ্বানুপা লমঙানবা ক্লাস টেন তম্লি , মৌপ্বা অতোম্বা লনচেনবা ক্লাস আইট তম্লি। প্রেমানা বি. এ. তম্লি। বসন্তগী থবক্কী পৈশা পিজখিবদু পূরগা পীখিবনিনা মখোয় খর ৱাই।

তাঞ্জা-মেঞ্জা হেক য়েংদনা বসন্ত নুপী অমা চেল্লক্লে। থিন্দনা অদুম লুহোংলে। মখোয় ইমুঙ মৌ হায়দু লাক্লে। মনেমগা মচলগা লৈবগা, মপুরোইবনা তোলোব চাবগা মৌ অনৌবী রাগীনি থবক খর কোমথোকই। সোমদদি মনেম্বোক চাউবী কৈথেল চৎলি মচলনুপী প্রেমাসু কলেজ তম্লি লোয়ননা অঙাং খরসু ট‍্যুইসন লৌরি। অদুবু মদুনা পৈশা য়াম্না থোকপমক নত্রবসু ইমুঙগী অহোবা খরদি মেন্নরিবনি।

রাগীনি নোংমা নোংমগী ইশৌ লাংবা হেনগৎলকই মাগী নুপাদা। লৈমীন্নরিবা মনেম্বোক, মচলনুপী, মনাও নুপাশিংবুসু হরাও-হরাও কৌনিংদে। মাগী ৱাখলদা পৈশা থোকপদি মাগী নুপাতনি, থাক্কদৌরিবা- শেমগদৌরিবদি ময়াম্নি। থবক্কী পৈশাসু পুথ্থরি খর ঙন্না ময়ামসিদগী তোঙান তাহৌবসিতনি মানা খল্লিবা। মাগী ঈশৌ ময়ামদুনা বসন্ত ঙাইহাক্ত পোথ্থাফম খঙহন্দে।

তৌফম খঙদদুনা য়ু থকচিল্লগা লাকখিবা কয়ানি। কোন্থংদদি মচিন্না থোক্না মী অসুক য়াম্বগী ভারসিবু ইতোম্তা পু হায়ব্রো কাইনকা লাউরকখিবসু কোঙ্গাইনি। মমানা পাখত্তুনা ইবুংঙো অদুম হায়গনু ময়ামসিসু মানা-মানা অঙম্বা হোৎনরি হায়না থেমজিঞ্জৈ। অদুবু বসন্তনা মদুগা তাবীদে মাগী উরাও-থরাওবীদু হেক্তা হৌরকই।

প্রেমা বি.এ. অরোইবা পরিক্ষ‍্যা থাখ্রে।

মখা তম্থবগী ৱাখলগা লৈত্রে। য়ারিবমখৈ পৈশা তাল্লগে খনখ্রে। লন্নাই স্কুল অমদা ওঝা ওইরে। স্কুলদগী হল্লক্লগা অঙাং ট‍্যুইসন অমুক তৌরে। প্রেমা অঙাং ওইরিঙৈদগী ঈশৈ শকপা য়াম্না হৈরকই। মানা ক্লাস আইট তম্লকপা অদুৱাইদা মবুংনা পুবীদুনা ঈশৈগী রাগ খরদি তমহৌই। মদুনসু হেন্না ঈশৈ শকপদা মপুঙ ফাবা অমদি ওইখি। স্কুল কলেজগী ফঙ্কসন কয়াদা ঈশৈ শক্লকখি। ঈশৈ চাংদম্নবদসু মনা কয়া ফংলকখি। অদুবু মদুদা মায়পুননদি অদুম হোৎনখিদ্রে।

রাগীনি মতম চূপ্পদা খূ-খূ কামদুনতা লৈ। মাগী নুপা ওফিস চৎখিবগা লৈকাইদা কোইবা চৎলি য়ুমদা লৈনিংদে হায়দুনা। ক্বা জার্দা চাবা হৈ, শোকা শান্নবা হৈনৈ। মাগী লম্বা চানবসু অদুম লৈকাইদা লৈ। বসন্তগী নিংঙাই অসুম-অসুম হেনগৎলকই পুবা থাংবা ৱারকই মমা চাউবী। খল্লকই মখোয়দা তোঙান পীজখ্রগে করিবু তৌরুগম্নো ঐখোয়সু ইখূৎ পাল্লি শূর-নোম্লগা চার লোইরে খনখ্রে।

নোংমা মচা মমৌবু কৌশিল্লগা হায়রকই, “ইচাশা নখোয় হয়েংদগী নুমিৎসু ফৈ তোঙান চারো ইমাসু নচন-ননাওশিংসিগা ঙম্নবা হোৎনরগে মতম খরদি। হয়েং মতাং অমদা মতেঙ পাংনবনা অমনি নত্রবদি নখোয়সু অঙাং নুবী য়াওশিল্লক্লবনিনা হেন্না পোৎলুম ওইরনি।” বসন্তসু শাওশিন্নরগা, “ইমানা অদু য়ৌরদি কৈসু কায়দে হায়রদুনা চৎখ্রে।” অদুদগীদি মাগী-মাগী তোঙান অদুম চানরে। হন্না-তুনকা অমত্তা য়েংলকখিদ্রে বসন্তদু।

প্রেমাসু পৈশা খর থোকচরবনিনা মৌপ্বা অনীদু লাইরিক তমহনবফাওদি খর-খর ঙমজৈ মমানা কৈথেল চৎপগা। মৌপ্বা লমঙানবা বি.এ.অরোইবা তম্লে, খল্লি লমঙানবা সিমতং মী ওইরবদিকো লনচেনবাসিমদি ইরাই লাইনা শেম্লনি। হায়গা তৌবগা লমঙানবা প্রাইভেৎ কম্পনি অমদা থবক তৌরে। মশক মচূ খর থোক্লে গাড়ী মচা অমসু তোংজরে। কুইদে লমঙানবা নুপী অমা পুরক্লে মাগীসু থিন্দনা অদুমক লুহোংলে। প্রেমা মচল ফংলে। মমাদি নোংম নোংমগী শোঞ্জিল্লক্লি। কৈথেল চৎলম্বদুসু ইন্থি নুংঙাইনা চৎপা ঙম্লক্ত্রে। লমঙানবগী নুপী ইবেহাইবীসু ঈশৌ মচা-মচা হৌরক্লে। মতোম্তা ইমুঙগী থবক তৌবা ঙমদ্রে হায়রক্লে।মমাগী সেবা তৌনীংলক্ত্রে। মচেগা মতৈগনদি হন্না য়েংদ্রগা হায়রক্লে। লমঙানবনসু হায়বা ৱাহৈ অমত্তা হায়খিদ্রে মাগী নুপীদা, হেন্নদুম চুম্মী খনখ্রে। মচে প্রেমাবুসু ময়ুম পানবা খঙদবীকা হায়রক্লে। প্রেমাসু খাঙবা য়াবা খাঙলি। মথৌনা মরোল অমা চিনবগা মমানা শোঞ্জিল্লকপগা খরদি ৱারে মচিন্দা ফোংদোক্তবতা মঙাইরে। মৌপ্বা অতোম্বা লনচেনবসু বি.এ. অহানবা চহী ফাওবদি কাজরে।

অশোমদা মবুং বসন্তদি নমদুনা থকখিবা য়ুদুনা হৈনবী অদুম ওইহৌরে। হেন্না হেন্না থক্কৎলক্লে। রাগীনিনা থিংবসু ঙমদ্রে। মচাশিংদি চাউশিল্লক্লি। ওফিস কামন্দবদগী সসপেন্দ কয়ারক তৌরবনি। মদুগী ৱানোম্বদতা মখূত্তা পৈশা পায়বা ঙমদ্রবনি। প্রেমাদগী পৈশা ফাওবা হংলবনি। প্রেমাসু মতৌ য়েংবা ঙমদদুনা হেক-হেক পীরিবনি।

সোমদা ইবেহাইবীগী ঈশৌসু কনখৎলক্লি। প্রেমাদা কন্না তাইনরি। মমাগী সেবা য়াম্না কন্না তৌদ্রবসু শোনবদি শোল্লে কৈথেল কাবা ঙমদ্রবনি। প্রেমা মাগী স্কুলদা ওঝা ওইমিন্নবা সনাহলগা খর-খর খঙনজবনি। মদুমক্না হেক্তা প্রেমানা য়াখিবদি নত্তে। অদুবু লৈরিবা ইমুঙগী মওং মতৌদুনা প্রেমা সনাহলগা মরি খর নকশিন্নখি। মমা খর শোঞ্জরবসু মা লৈত্রবদি মনম্মা-মচলসু মরৈরি অদুগা মৌপ্বা অতোম্বা লনচেনবসু বি.এ. মরোইদৌরে অদুনদি য়ুম থাদোকপা য়ারনি খল্লদুনা মাগী ওইবা ফিরেপ অমা লৌরগে খল্লক্লে।

মবুংনা মনম্মা লাক্লগা পূকচেল ওনখিবা অদুগা অৱা অনা পুমীন্নদুনা লাক্লিবা মৌপ্বা লমঙানবফাও নুপী থিখিবদগী ময়ুম পানবা খঙদবী কা হায়রকপদু প্রেমা অসুম নীঙমলক্ত্রে। মাবু পামজনা লৈরিবা সনাহলসু প্রেমাগী য়ানিংবা মতৌ উবদগী হেন্না মরি নকশিন্নরক্লে চেনবগী নুমিৎ ফাওবা লেপ্নরে।

প্রেমাগী য়ুমদা হায়দোকপা লাকপদু অশোনবী মমা নত্তনা কনাসু অততাই লৌবীনবা থোরক্ত্রে। মচিন হংবা লাকচররোই ঙন্না অদুম থিনবীরকউ হায়খ্রে। নুপা ময়ুমগী মীশিংসু চিন পুথ্থদনা অদুমক থিল্লক্লে। প্রেমাগী মনেম্বোক য়াম্না অচাও-অরম পাম্বীনি। মায়কৈ অনী চপ মান্ননা লম্বা তৌরগা চাউনগা লুহোংবা পামজবীনি। মচানুপাসু কোকহল-লাইহনগা ওইবনে।

প্রেমা সনাহলদা লুহোংলে। অউনপোৎ ইয়াও য়াওদে। মনেম্বোক মথ্বাই নুংঙাইতে, খোইরাং খোইশাওই প্রেমাবু উরগা। মচানুপাদা তত্তনা ঈশৌ তৌই নুপীবু লৈতবদৌনা হায়না। প্রেমা খল্লি করি তৌসিগে। ওন্থোকপা লাইবক হায়দুনি খনফম খঙদে। ঈশৌ ঈরাংনা মতোয়না হেক তৌরক্লসু কোক ঙাওবীদো হেক য়ৌই হায়দুনি প্রেমাদো। সনাহলসু মমাগী মতৌদা ইশোন শোন্থৈ। প্রেমাগীদমক থৌনা ফনা লেপ্পা ঙমদে। নুপা মখল অমা ওইরম্মী সনাহলসু।

প্রেমা খনবা য়াবা খল্লে ফিভমসি শোকচিন্দ্রিঙৈদা খোঙফম হন্দোকহৌরগে খল্লক্লে। নোংমা ময়ুমদা হল্লক্লে। অদুসু মনম্মা মচন্না ইন্থি নুংঙাইনকা কৌবিদ্রে মমা অশোনবীদুনতদি ৱাজৈ মচানুপীগীদমক। থেমজিঞ্জৈ, “ইবেম্মা ইমা থিনবীগে নঙবু খর খাঙ্ঙুনে। নুপী হায়বসিদি খাঙবা কনগদবনিনে। লৈকাইগী মীনোকসু নঙবু খর খল্লুনে।” অদুবু প্রেমানা, “ইমা ঐগী লাইবক্তা তম্লম্লবনি খাঙলগে হায়রক্লে।” প্রেমা নুপা ময়ুমদা হন্না চৎলু য়াখিদ্রে। নুপা ময়ুমদা চৎপদি লায়রদনা মানা পুরম্বা স্কুলদুফাওবা সনাহলগা পুল্লুগনি খনবদা রিজাইন তৌজরবনি। স্কুল ওথোরিতিনা খাম্বগা য়াখিদ্রে।

মপামদা অসুম লৈবদুসু হান্নদগী হেন্না ফিভম শোকচিল্লক্লে। মমাগী,” ইবেম্মা নঙবু খাঙ্ঙুনে নুপা ময়ুমদা থিনবীগে নুপীদি খাঙবা কনগদবনি। চিনগী মখা থাবদি পত্তবনি ঊ-ৱাগী মখা থাবতবু পৎপনি” হায়বা ৱাহৈদুনা নাকোং শিংজা য়ৈখ্রে। লৈরিবা মৌশিংদুনসু হল্লকপীনি হায়দুনা করেম কথাইনবীরে হেন্না-হেন্না অৱাবা হায়বদু ওইরে। অদুবু প্রেমা পূম্নমক মাইয়োক্নগে চপ য়ুংনা লেপখ্রে। মা নোঙ হেক ঙানবগা চাক ঈশিং চাথোক্লগা মাগী থবক থিবা চৎলি পৈশা তান্দবদি য়াদবনিনা। ফংবা কৌবা লৈতে করিনো তৌগদবা হেক হেক খল্লুবদা শ্বাই শ্বাই লাওই কোকচাউবী অমুক-অমুক কাই প্রেমাদো।

নোংমা প্রেমা লৈকাইগী মচে অমা থেংনরে। চিলদ্রেন হোম অমগী মপুনি। মেমী মাগী নুপা লৈখিদবা চহি অনীরোম ফারক্লে। চাউখ্রবা চিলদ্রেন হোমদু মবান্নী পুমিন্নরম্বদু হৌজিক্তি মতোম্তনি পুরিবসে অতৈদি ঙাইহাক-ঙাইহাক্কী মতেং পাংলম্বখক্তনি। মেমীগী মচা-মমৌ, মচানুপী-ময়ানুপাসু ডাক্তর ঙাক্তনি। মখোয়সু মখোয় মখোয়গী মথৌদা ঙাইক্তা শংজদ্রিবনি। অদুবু মেমীগী হোমদুগী হেল্থ কেম্প তৌবদগদি অদুম মায়পুননা হোৎনবিরিবনি। মশক থোকপা থৌরমদা মতেঙ পাংলবা নত্তনা নুংতিগী য়েংশিনবদি ঙম্নদে মচাশিংদুসু। মেমী মশাসু নর্সনি মপুরোইবনা চিলদ্রেন হোম চলাইবদুদা মাসু ভোলুন্টরি রিটাইরমেন্ট লৌথোক্লগা পুন্না হোৎনমীন্নখিবনি। মেমী প্রেমাগা ৱারী শান্নবদগী খঙলে প্রেমা থবক থিবদা ঙাওচৎনরবীনি অদুগা মাসু মপা চাবী অমা থিবদা ঙাওচৎনরিবীনি। মবান্নী মত্ত অমত্তা ওইনা অমনা অমগী মতেঙ পাংবা য়ানরে। প্রেমা মেমীগী চিলদ্রেন হোমদুদা লৈরে। অঙাংশিংদুবুসু লাইরিক তাকপিরে ওঝা ওইনা। ঙাইহাক শংবদসু ঈশৈ হেক হেক তম্বী মদুনা হোমদুদা লৈরিবা অঙাংশিংসু হেন্না নুংঙাইজরে। লৈ-শু মরাং কায়না থাদুনা হোমদুবু হেন্না মশক থোক্না ফজহল্লে। মতম মতমগী এঞ্ছাং-নাপী থাদুনা মখোয় নুংঙাইনা মতম লেল্লি।

প্রেমানা নিংথনা শেন্নবিরবনিনা অঙাংশিংদু মাগী মাগী হৈনবী লম্ দা কম্পিতিসন কয়া য়াওহল্লে মাগী মাগী চানবা জগোয়, ঈশৈ, লাইয়েকপা মখল মখলনি লাইরিক্তসু

অদু মঙাই। সরকারগী ওর্দর অমগী মখাদা প্রাইভেট স্কুলদা পুবা ওঝা ওইরবসু বি.এদ. ট্রেনিং লোইথোক্ত্রবদি য়াররোই হায়না হায়বদুসু প্রেমাদি মচে মেমীনা শিনবীদুনা বি.এদ সু লোইথোক্লে। মখোয় হোমগী ফাওন্দেসন দে দগদি অঙকপা মতৌনি। মণিপুরগী শক্নাইরবা ফম্নাইবা মন্ত্রি কয়াসু শরুক য়ারি।

প্রেমাগী হৈ-শিংবা মতৌদা মেমীনা মপুরোইবনা থৌরম্বা কারদু থৌবা তমহল্লে দ্রাইভর হেক-হেক ঙাইনবদো নুংঙাইতে হায়দুনা। প্রেমা কার ফজনা থৌরে গাড়ী মচাসু থৌবা হৈ। মখোয়গী ময়ুমদা অমদি নুপা ময়ুমদা চন্নদ্রবী প্রেমা হোম অসিদদি লাইরেম্বী অমগুমখ্রে। মেমীসু হরাওবনা লোইখ্রে।

প্রেমা ময়ুমদা নোংমতা চত্তে অদুবু অশোনবী মমাবুদি দ্রাইভর থারগা হেক-হেক লৌবিরুই। মৌপ্বানুপা অতোম্বা লনচেনবসু মচেগী মনাক্তা তোইনা-তোইনা লাকই। মাসু মণিপুর য়ুনিবর্সিটিদা ইংলিসতা মাস্টর তৌরি। প্রেমানা মমাবু হোমদা পুন্না লৈমিন্নরসি হায়খি মেমীনসু য়াখি অদুবু য়ুমদু হেক থাদোকপদি মমানা পামখিদে। মরক মরক্তা লাকপা নত্তনদি লৈয়ু য়াখিদে। হোয়, নোংমা ফাদোক্কদি লেকপসু ময়াওখি। হোমগী অঙাংশিং ওঝাশিং পীকনিক চৎপদসু মমাবু হেক-হেক পুবী। নবদ্বিপ, বৃন্দাবন অতৈ-অতৈ মফমকাসু কোয়বা পুবিদুনা মমাবু হরাওহল্লি। চাউবী মচাগী মতৌ উবদা শ্বর খরদি নে-তানা হোনঞ্জখি। শিরবসু খুয়া- তুশিৎনা শিরগনি হায়নফাও খনখি।

লৈকাইগী মীশিং অতৈ-অতৈশিংনা হেক-হেক হায়বা ৱাফম অমা মেমীনা য়াখিদে। প্রেমাসে মেমী থেংনরমদ্রবদি অসুম তৌরম্লোই হায়বা ৱাফমসে মেমী হেক্তা শাওনিংখি। মখৌ পোঙনা হায়খি, ” ঐসে প্রেমা থেংনরমদ্রবদি অসুম্না তৌরমলোই। প্রেমানা হান্ননা মতিক চারগা লৈরম্বনা ঙসিগী য়াম্লবা ভার পূম্নমকসে মানা ঈরাই লায়না পুবা ঙম্লিবনি।” মেমীগী মচাশিংনসু প্রেমাবু মমাগা হেক পোকমিন্নবা মন্দোমচামক্নি খনখি।