রাজর্ষি ভাগ্যচন্দ্র লৈখিদবগী ২২৬ শুবা নীংশিং থৌরম পাঙথোকখ্রে
ইম্ফাল, ওক্টোবর ৬ : শ্রীশ্রী গোবিন্দজি তেম্পল বোর্দ, কার্তা ভাগ্যচন্দ্র পরিচয় অমসুং রাশেশ্বরী পালা মরূপ্না শীন্দুনা ঙসি রাজর্ষি ভাগ্যচন্দ্র লৈখিদবগী চহী ২২৬ শুবা নীংশিং থৌরম পাঙথোকখ্রে।
নীংশিং থৌরম অদুগা মরী লৈননা ঙসি অয়ূক রাজর্ষি ভাগ্যচন্দ্রগী পোক্নফম য়াইস্কুল জন্মস্থানদা তর্পন কৎলবা মতুং মখা তানা খ্বাইরম্বন্দ কৈথেলগী শামু মখোঙদা লৈবা রাজর্ষি ভাগ্যচন্দ্রগী মিতমদসু হৈকৎ-লৈকৎ তমখি। থৌরমসিগী মপূং ওইবা থৌরম্না শ্রীশ্রী গোবিন্দজি তেম্পলদা লূকচাও কৎপা অমসুং পুস্পাঞ্জলি কৎপনা ওইখি।
থৌরম অদুগা মরী লৈননা গোবিন্দজি তেম্পল বোর্দকী বোর সেনাপতি আর কে চিরঞ্জিৎনা হায়, ঙসি মেরাগী হুম্নি পানবা নুমিৎ অসিদা রাজর্ষি ভাগ্যচন্দ্র লৈখিদবনি। মহাক্না লৈখিদবা নুমিৎ অসিবু নীংশিংদুনা ঙসিগী থৌরম অসি পাঙথোকপনি। নিংথৌ অসি য়াম্না মথৌনা লৈবদা নৎতনা শাফম-লানফমদসু য়াম্না হৈ-শিংবা মণিপুরগী ৫৪ শুবা নিংথৌনি। মহাক্না পাল্লিঙৈ মতমদা অৱানা কয়ারক মণিপুরদা লান্দারকখিবা মতমদা থৌনা ফনা চোংথোক্তুনা ইরমদম অসি ঙাক্লমখি। অসুম্না লানফম কয়া শোক্নরুবা মতুং লাল ঙমদুনা মণিপুরগী নিংথৌ মতম কুইনা ওইখি। মসিগী মতুংদা ঈশ্বর-ভক্তিগী লম্বীদা চঙশিন্দুনা মতম অদুদা হীরম অসিগী মতাঙদা মণিপুর খুন্নাইদা লৈলম্বা চরাঙনবা কয়া মহাক্না ঈংথহন্নবা হোৎনখি।
ইং ১৭৭৬ তা মহাক্না শ্রীশ্রী গোবিন্দজি লিংখৎখি। লোয়ননা মশামক বৈষ্ণবিজমগী লাইনীং অসি লৌখি। মসিদগী মহাক্না জগোয় রাস অমদি নট-সংঙ্কীর্ত্তন লিংখৎতুনা মালেমদা আর্ত এন্দ কলচরগী লমসিদা মণিপুরগী অচৌবা মফম অমা কল্লম্বনি। ঙসি ২১ শুবা চহী অসি ফাওবা মণিপুরগী আর্ত অমদি কলচরগী মশক্না মালেমদা তোমথিন ঙাল্লিবা অসিমক নিংথৌ ভাগচন্দ্রগী অচৌবা খূদোল অমনি হায়নসু মহাক্না মখা তানা ফোঙদোকখি।
সোর্স: পোক্নফম
0 কমেন্ট:
কমেন্ট তৌবিয়ু