রাকেশ নাওরেমগী মণিপুরী সোর্ট ফিল্ম “য়ুজ মি” ইন্টরনেস্নেল ফিল্ম ফেষ্টিভেল ২০২৪ গী ওফিসিয়েল সেলেক্সন তৌরক্লে
ইম্ফাল, ওক্টোবর ১৬ : ঈপাক ফিল্মস প্রদক্সন মণিপুরগী বেন্নর মখাদা রাকেশ নাওরেমনা প্রদ্যুসর অমদি ডাইরেক্টর ওইবা শুপ্নতগী মিনিৎ ৩ তমক শাংবা মণিপুরী সোর্ট ফিল্ম য়ুজ মি সেকেন্দ পুলারি ইন্টরনেস্নেল ফিল্ম ফেষ্টিভেল ২০২৪ গী ওফিসিয়েল সেলেক্সন তৌরক্লে।
ট্রিভান্দ্রম, কেরালাদা লৈবা ফিল্ম নিউজ এন্দ ইন্টরটেনমেন্ট আই পি টি ভি চেনেলনা শীন্দুনা পাঙথোকপা ফিল্ম ফেষ্টিভেল অসিগী ওফিসিয়েল সেলেক্সন তৌরকপদা রাকেশ নাওরেমগী সোর্ট ফিল্ম ‘য়ুজ মি’ অসি য়াওরকখিবনি।
নীংশিংবা য়াবদি, ফিল্ম অসি ফিল্ম এডুকেসন এন্দ ওয়েলফিয়ার ফাউন্দেসন, ঔরাংগবদ, মুম্বাইনা শীন্দুনা পাঙথোকখিবা ৫ শুবা রোসানি ইন্টরনেস্নেল ফিল্ম ফেষ্টিভেল ২০২৪ দা বেষ্ট সোর্ট ফিল্ম ডাইরেক্টর এৱার্ড অমদি টোপ ফাইভ ফিল্ম এৱার্ডসু ফঙখ্রবা ফিল্মনি।
নীংশিংবা য়াই, ফিল্ম অসিগী ষ্টোরি রাকেশ নাওরেম অমদি হুইদ্রোম সুরেসনি। নাগিন্দ্রনা কেমেরা ওইরিবা ফিল্ম অসিগী এডিটর রোমি লমাবমনি। রাকেশ নাওরেম, মোইরাংথেম ওকেন, হুইদ্রোম মার্লিন অমদি লাইশ্রম বিজয়া লক্ষমিনা মরু ওইবা আর্টিষ্ট ওইরিবা ফিল্ম অসিনা মোৎশিল্লক্লবা তুরেলগী ঈশিংনা থৱায় পানবা জিবশিংদা পীগদবা চৈথেংশিং অদুগী পাউজেল অমা পীবনি। অকোয়বগী ফিভ লু নান্না থম্বগা লোয়ননা লম্বীদা অচৎ অওক তৌরিবশিংনা ফত্তা হাওদি হুন্দোকপগী হৈনবী থাদোক্তুনা ইনভাইরোনমেন্ট কনসি হায়বগী পাউজেল পীরিবা সোর্ট ফিল্মনি।
ফিলম অসিগী প্রদ্যুসর অমদি ডাইরেক্টর রাকেশ নাওরেম মমাংদা লিংজেল, লুপা ২০ নচিংবা সোর্ট ফিল্ম কয়াসু ডাইরেক্সন পীখ্রে। শকহেনবী ইতৈমা, ফোঙদোক্নদ্রিঙৈ, ঙাইনা-ঙাইন, লৈইসিগী ৱাংমদা, ঈগী খোঙ্গুল অমদি বাংলাদেশকী সনা তম্ফা হায়রিবা ফিচর ফিল্মশিং অসি রাকেশ নাওরেমনা পুথোকখ্রবা ফিল্মশিংনি।
সোর্স: পাউনিলখোন
0 কমেন্ট:
কমেন্ট তৌবিয়ু