আপডেট:
image

মৈতৈ ময়েক এক্সপার্ট সাব-কমিটি রিপোর্ট ১৯৮৯ পুথোক্তুনা চৎনহনগদবনিঃ- দাঃ এন দেবেন্দ্রে সিংহ

ইম্ফাল, ফেব্রুয়ারী ১৯ : হৌজিক চৎনরিবা ময়েক ২৭ অসিনা লৈরিবা পুয়াশিং অসি পাবদা ঙমদ্রে। মরম অদুনা পুয়া পাবা য়ানবা গবর্ণমেন্তনা শেমখিবা ‘মৈতৈ ময়েক এক্সপার্ট সাব কমিটি রিপোর্ট-১৯৮৯’ অদু পুথোক্তুনা ময়েক্কী মতাঙদা লৈরিবা চয়েৎনবশিং লোইশিন্দুনা সাব-কমিটিগী রিপোর্ট অদু চৎহনগদবনি হায়না ওল মণিপুর মেন্যুস্ক্রিপ্ত কস্তদিয়ান এসোসিয়েসন মণিপুরগী জেনারেল সেক্রেটারী দাঃ এন দেবেন্দ্রে সিংহনা ফোঙদোকখ্রে।

ঙসি উরিপোক্তা পাঙথোকখিবা পাউগী মীফম অমদা দাঃ এন দেবেন্দ্রনা হায়, মৈহৌরোলদগী লৈরক্লবা মৈতৈগী পুয়াশিং ইবদা শীজিন্নরিবা মৈতৈ ময়েক অসি হৌজিক তম্নরিবা ময়েক ২৭ অসি নত্তে। ময়েক ২৭ অসি স্কুল অমসুং য়ুনিবার্সিতি ফাওবগী থাক্কী সিলেবাসতা হাপ্তুনা মহৈরোয়শিংনা তম্লিবা অসিনা লৈরিবা পুয়াশিং অসি পাবা ঙমদে। য়ুনিভার্সিটিগী থাক্তা লৈরিবা মহৈরোয়শিংনা পুয়াগী মরমদা নৎত্রগা মণিপুরগী পুৱারীগী মতাঙদা রিসার্ছ তৌগে হায়রবদি পুয়া অমদি মৈতৈ নিংথৌশিংগী মতমদগী হৌরগা বৃটিশনা পাল্লিঙৈ মতম ফাওবদা নিংথৌগা খূৎয়েক পীনখিবা এগ্রীমেন্তশিং অমদি মণিপুরী পুৱারীগা মরী লৈনবা অইবা চেরোলশিং অমত্তা পাবা ঙম্লরোই। মরম অদুনা তপ্না তপ্না ঐখোয়গী পুৱারী অমদি পুয়া অসি মাঙখিবা য়াবগী অকিবা লৈরে।

ইনখৎলক্লিবা মহৈরোয়শিংনা পুয়া অমসুং মণিপুরগী পুৱারীগা মরী লৈনবা এগ্রীমেন্ত অমদি চেরোলশিং অসি পাবা ঙম্নবা অমসুং রিসার্ছ তৌনদুনা ঐখোয়গী পুৱারীবু য়োকখৎপগা লোয়ননা খুমাঙ চাওশিন্না পুখৎপা ঙম্নবা এক্সপার্ট অমদি গবর্নমেন্তনা শেমখিবা ‘মৈতৈ ময়েক এক্সপার্ত সাব কমিটি রিপোর্ট, ১৯৮৯’গী রিপোর্ট অদু পুথোক্তুনা চৎনহনগদবনি অমদি হৌজিক লৈরিবা ময়েক্কী চয়েৎনরিবা অসি অথুবা মতমদা লোইশিনবীয়ু হায়না দা: দেবেন্দ্রনা ফোঙদোকখি।

মহাক্না মখা তানা হায়, ইং ১৮৩৩ গী এপ্রিল ১৮ দা মহারাজ গম্ভীর সিংহ অমসুং ইস্ত ইন্দিয়া কোম্পানি অনীগী মরক্তা তৌনখিবা এগ্রীমেন্ততা মৈতৈ ময়েক অমসুং ইংলিশনা ইরি, মদু হৌজিকসু নেসনেল আর্কাইবস, নিউ দিল্লীদা লৈরি। মহারাজ গম্ভীর সিংহ মশামকসু এগ্রীমেন্ত অসিদা মৈতৈ ময়েক্না মশাগী খূৎয়েক পীরি। নিংথৌগী সনা মোহরসু নম্মী। মসি গবর্নমেন্তনা খোমগৎফম থোকই। নিংথৌরোল কয়ানা শীজিন্নরক্লবা ময়েকশিং অসি গবর্নমেন্ত অমসুং অতৈ অথোরিটি অমত্তনা চৎনদ্রে হায়না লাউথোকপা অমত্তা লৈখিদ্রে। মরম অদুনা মসিদা য়াওরিবা ময়েকশিং চৎহন্দুনা পুয়া চুম্না পাবা য়ানবা গবর্নমেন্তনা থৌরাং অমা লৌখৎপীয়ু।

দা: দেবেন্দ্রনা হায়, হৌজিক লৈরিবা কোন্থৌজম লাইরেম্মা, খোইবু, নিঙেল, লৈশাংখোংনচিংবদা লোয়ননা অঙনবা মতমগী শেলয়েক (কোইন) শিং অমসুং শাগৈ য়ুমদাবা পুয়াশিংদা ইরিবা ময়েকশিং আর্কিওলোজিকেল ইভিদেন্স লৈবা ঙাক্তনি। গবর্নমেন্তনা হৌজিক চৎনহল্লিবা ময়েক অসিদা ‘ী’ য়াওদবনা মরম ওইরগা ‘ী’ তপ্পা ৱাহৈ অমত্তা ইবা য়াদ্রে খুদম ওইনা ‘মী’। ময়েক অসিদা ‘ক্ষ’ অসি য়াওদবনা ‘ক্ষ’ য়াওবা ৱাহৈশিং অমত্তা ইবা য়াদ্রে খুদম ওইনা য়ুম্নাক ওইরিবা ক্ষেত্রিময়ূমনি।

হৌজিক অৱাংবা থাক্কী মহৈ লোইশঙ ওইরিবা এম য়ুনচিংবদা রিফারেন্স পীদুনা তম্লিবা লাইরিকশিং, চৈথারোল কুম্বাবা, নিংথৌরোল লম্বুবা, পোইরৈতোন খুন্থোকপা, পান্থোইবী খোঙ্গুল অমসু মশীং থীঙমদ্রবা পুয়া কয়া অসি ইবদা শীজিন্নরিবা ময়েকশিং খঙদোক্তুনা ময়েক্কী মতাঙদা চয়েৎনবশিং লৈরিবা অসি গবর্নমেন্তনা অথুবা মতমদা লোইশিনবীদুনা পুয়া পাবা য়াবা ময়েক লৈহন্নবা তুং কোইনা চৎনগদবা পোলিসি অমা শেম্বীয়ু হায়নসু দাঃ দেবেন্দ্রেনা আপিল তৌখি।
মৈতৈ লৈমারোল আর্ত পার্ফোমিং সেন্তারগী মীহুৎ আর কে নেতাসনানা হায়, লমদম অসিবু মশক তাক্লিবা ঐখোয়গী পুৱারী অমসুং পুয়াবু পাবা ঙম্বা ময়েক অমা লৈহন্নবা হোৎনবদা স্তেত অসিগী কনস্তিত্যুএন্সি ৬০ গী এমএলএ শিং অমসুং তোঙান-তোঙানবা হীরমশিংদা থবক তৌরিবা মীপূম খুদীংমক্না হোৎনবা মথৌ তাই।

সনামহি দিবাইন সোসাইটিতগী প্রেসিদেন্ট বিধুনা হায়, হীরম অসিগী মতাঙদা চঙশিল্লিবা লুপশিংগী মহীহুৎশিংনা হন্দক চীফ মিনিষ্টারগা উনবদা কালচারেল য়ুনিভার্সিটিগী এসিস্টেন্ত প্রোফেসার অমদা হকথেংননা হীরম অসিগা মরী লৈনবা থবক অদু খুৎশিন্নবগা লোয়ননা অথুবা মতমদা পুয়া পাবা য়াবা ময়েক অমা পুথোক্নবা পোলিসি অমা শেম্নবগী থবক পায়খৎনবা খঙহনখি। চীফ মিনিস্তারনা ময়েক্কী মতাঙদা লৌরিবা ৱাখল্লোন অদুবু লম অসিদা থবক তৌরিবা লূপশিংগী মায়কৈদগী থাগৎপা ফোঙদোকই।

হৌজিক তম্নরিবা ময়েক ২৭ অসিগী মথক্তা গবর্ণমেন্তনা অখন্নবা পোলিসি অমা শেমদুনা পুয়া পাবা য়াবা ময়েক অমা শেম্বীয়ু। হৌজিক লৈরিবা ময়েক্কী চয়েৎনবা অসি নাকল অনীমক্কী মীহুৎশিং পূন্না ফম্মিন্নদুনা তুং কোইনা চৎকদবা ৱারোইশিন অমসু পুরক্নবা গবর্ণমেন্তনা অথুবা মতমদা হোৎনবীয়ু হায়নসু মহাক্না আপিল তৌখি। ঙসিগী পাউগী মীফম অদুদা পোইরৈ ইনাৎ শিন্দম শঙ, মৈজ্রাও অমসুং এন খেলচন্দ্র ত্রাস্তকী মীহুৎশিংসু শরুক য়াখি।

সোর্স: পোক্নফম

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু

আপডেট: