মীলালনা শীন্দুনা মীতৈ ময়েক্কী নেসনেল কনভেন্সন পাঙথোকখ্রে
ইম্ফাল, জুলাই ৩১ : লমদমসিগী মীয়াম্না অমত্তা ওইনা য়ানদুনা লাকখ্রবা মীতৈ ময়েক্কী ময়েক ২৭ অসি মাস্টারগী থাক য়ৌনা তমখ্রবনি। ময়েক অসিবু চাওখৎহন্নবা হোৎনবগী মহুত্তা মীওই খরনা চৎনদবা ময়েক্নি হায়না সোসল মীদিয়াদা ফোঙদোক্নরক্লিবা ৱাফম অসি য়াম্নমক লাইবক থিবনি। চৎনরিবা ময়েক ২৭ অসিদা অকায়বা পীনবা হোৎনবগী মহুত্তা চাওখৎহন্নবা হোৎনমিন্নসি হায়না মীতৈ ঈরোল ঈয়েক লোইনশিল্লোন অপুনবা লূপ (মীলাল) কী জেনারেল সেক্রেটারি ইনচার্জ লাঙ্গোঞ্জম নিংঙোল নাওরেম (ও) নোংমাইলেম্বী লৈমনা ফোঙদোকখ্রে।
মীলালনা শিন্দুনা ঙসি জি এম হোলদা মীতৈ ময়েক্কী মতাংদা পাঙথোকখিবা মীয়ামগী ওইবা নেসনেল কনভেন্সনদা মহাক্না ৱাফম অসি ফোঙদোকখিবগা লোয়ননা মখা তানা হায়, লৱার ক্লাসতগী হৌরগা মাষ্টারগী থাক য়ৌনা তমদুনা লাক্লবা মীতৈ ময়েক অসিবু মীয়াম্না লান্না উহনবা য়াবা মওংদা সোসল মীদিয়াদা ৱাফম কয়া ফোঙদোক্নরক্লিবা অসি তৌরোইদবনি। মসিনা মীয়ামদা চমম্নবা কয়া পোকহল্লে। চীফ মিনিষ্টার মশামক্না মসিগী মতাংদা চমম্নবা পোকহনবা য়াবা ৱাফমশিং ফোঙদোক্তনবা হায়খিবা লৈখ্রে। হৌজিক চৎনরিবা ময়েক ২৭ অসি চাওখৎহন্নবা ঐখোয় পুন্না হোৎনমিন্নসি। ময়েক অসি হেন্না চাওখৎহন্নবা ময়েক হাপচিনবা নৎত্রগা অৱাৎপা মেনশিনবা হায়বদু খন্নরগা থোকপা ঙাক্তনি। মসিগীদমক এক্সপার্ট কম্মিটি অমা তোঙান্না লৈরি হায়খি।
ঙসি পাঙথোকখিবা মীফম অদুগা মরী লৈননা মীলালগী পাউতাক্লোই মোইরাংথেম নাওদালেনখোম্বনা ফোঙদোকখিবদা, ১৮ শুবা চহী চাদা পানখিবা ইনিংথৌ পামহৈবগী মতমদা লাকখিবা অতোপ্পা লাইনিং চৎপা মীওইশিংনা হান্না লৈজরম্বা ঐখোয়গী ময়েক অসিগী মহুত্তা বেঙ্গলি ময়েক ওইনা শিজিন্নহনখি। অদুবু মরৈবাক নীংবা মশাগী মরোল ময়েক নুংশিজবা মীওই কয়ানা চহী ৫০ রোম হনবা লৈতনা হান্না লৈজরম্বা মীতৈ ময়েকপু অমুক হন্না চৎনহন্নবা হোৎনদুনা লাক্লি। মদুগী মহৈ ওইনা হৌখিবা কুমজা ২০০৬ তগী চহী ২৭৭ রোম হেন্না শিজিন্নরুদ্রবা ঐখোয়গী ইরোল ইয়েক অসি অমুক হন্না শিজিন্নবা হৌরকখি।
অদুবু লাইবক থিবদি খুরক্কী ঈনা লাই শাবা মীওই খরনা মতম শাংনা লাইওইখ্রবা অহলশিংনা হোৎনদুনা অমুক হন্না চৎনহল্লম্বা ময়েক অসিবু চাওখৎহন্নবা হোৎনবদা অয়েৎপা কয়া পীরি। অসিগুম্বা অয়েৎ অপন পীবগী থৌদোক অসি মখা তানা থোকহন্দনবগীদমক মীয়ামগী ওইবা মীফম অসি পাঙথোকপনি হায়খি।
ঙসিগী মীফম অদুনা ৱারেপ অহুম লৌখি। ৱারেপশিং অদুদি অহানবদা হৌজিক লৈঙাক্না মশক খঙদুনা চৎনরিবা ময়েক ২৭ অসিবু চাওখৎহন্নবা তৌবা থবকশিং নত্তনা মসিবু চৎনহন্দনবা অমদি মহুৎ শিন্নবা তৌবা থবক পুম্নমক মতম চুপ্পগী ওইনা থিংবা, অনীশুবদা কনাগুম্বা লন্নাই মীওই নৎত্রগা লূপশিংনা ৱারেপ অসিগী মায়ৈাক্তা থবক তৌরক্লবদি মীওই নৎত্রগা লূপ অদুবু লৈবাক্কী য়েক্নবনি হায়না লৌবা অমদি অহুমশুবদা মীতৈ ময়েক ২৭ পু হেন্ন মশক মচু থোকহন্দুনা হেন্না মতিক মঙম লৈবা লোন অমা ওইহন্নবগীদমক ময়েক্কী এক্সপার্টশিং তান্নদুনা লৈঙাকপু মদুগী মথৌ তাবা থবকশিং পায়খৎহনবা হায়বসিনি।
মোইরাংথেম নাওদালেনখোম্বনা মীফম মপু ওইদুনা পাঙথোকখিবা নেসনেল কনভেন্সন অদুদা সোসল এক্টিভিস্ট সলাম চিতম লুৱাং, এসোসিয়েট প্রোফেসর মণিপুর য়ুনিভার্সিটি দিপার্টমেন্ট ওফ মণিপুরী ডা. এন সনাতোম্বা, মীতৈ ময়েক এক্টপার্ট কম্মিটি গভর্ণমেন্ট ওফ মণিপুর প্রোফেসর এন জি কাংজিয়া মঙাং, সী সী এস কে গী প্রেসিদেন্ট জিতেন্দ্র নিঙোম্বা, লিপুলগী প্রেসিদেন্ট টি ঐচ সোমোরেন্দ্রো, য়ু সী এমগী ভাইস প্রেসিদেন্ট ৱাই কে ধিরেন অমদি লৌশালগী প্রেসিদেন্ট মুতুম চুরামনিসু শরুক য়াখি।
সোর্স: হুইয়েন লানপাউ.
0 কমেন্ট:
কমেন্ট তৌবিয়ু