মমা লৈবাক নীংবা পুখ্রম্বা কাজাও — চোংথাম তোম্বা সিংহ
অইবগী ৱাখন্দদি, মহাকপু অথৌবা অমগী মিংথোন পীখিবসি ‘মহাক্না মার্চকী তাং ২৪গী অয়ুকতা মণিপুর অমসুং বৃটিশ কোনুংদা কাপ্নরে হায়বা পাউ হেক ফংবগা মমালৈবাক্কী লান য়াওরুনবা কিঃমিৎ ১৬ মখোঙনা তা অশাংবা অমা পায়দুনা লাকখিবসিনি।
মমালৈবাক নুংশিদবা মীওই মালেমদা লৈরম্লোই। অদুবু, মমালৈবাক্কী দমক্তা মথৱায় কত্থোকপা ঙম্বা মীগী মশিংদি খরা তাংঙি। অদুগুম্বা অতাংবা মীওইলক্তা, ইম্ফালদগী খা-রোমদা কিঃ মিঃ ১৬ রোম লাপ্পা কাংঙমোং খুঙ্গংদা লৈবা শ্রী পুখ্রম্বম চাওবগী মপারী ফিঙাং হায়নসু খঙনবা, পুখ্রম্বা কাজাওসু অমনি। পুখ্রম্বা কাজাও মতম অদুদা জমান্দার ওইরম্মী। মশাগী চহী ৩৫ শুরকপা মতমনি। মহারাজ সুরচন্দ্রগী মায়োক্তা স্না বোরাচাওবনা ফম্বালগী হৌবা লালহৌদা শরুক য়ারুবগীদমক মহাক কৈশুম শংদা চহী মঙা রোম লৈখি। ইং ১৮৯০, সেপ্টেম্বরগী লালহৌদা মহারাজ সুরচন্দ্রনা চেনখ্রবদা অমসুং যুবরাজ টিকেন্দ্রজিৎকী অচানবা অমা ওইরকখি।
পুখ্রম্বা কাজাওনা মমালৈবাক্কী দমক্তা মথৱায় কৎখিবসি ইং ১৮৯১, মে থাগী তাং ২৫, নিংথৌকাবা নুমিৎকী অয়ুক পুং ৭ তাবদনি। হায়রিবা পুংফম অসিদা মহাকপু কংলা লানবনগী মমাংদা মঙক্তা থৌরী থুদুনা হাৎখিবনি।
মহাকপু শিবগী চৈরাক পীখিবগী মরমদি মতমদুদা মণিপুরদা বৃটিশকী পোলিটিকেল এজেন্ট ওইনা লৈরম্বা মিঃ গ্রীমউডপু তানা থিন্দুনা হাৎলুবগীনি। মতাংসিদা নীংশিংবা য়াবদি, ইং ১৮৯০ গী সেপ্টেম্বর ২১ দা, নিংথৌ মচা মশেন মরক্তা ফম্বাল মুন্নবগী থোকখিবা লালহৌ অদুনা মতমদুদা নিংথৌ ওইরম্বা সুরচন্দ্রনা মণিপুর থাদোক্তুনা চৎখ্রগা কলকাতাদা আসামগী চীফ কমিশনারদা মহাক্কী মনাওশিংনা মুনবিখ্রবা মহাক্কী নিংথৌফম অদু হঞ্জিনহনবীয়ু হায়দুনা ৱাকৎখি। ৱাকৎ অদুগী খুদোংচাবা লৌরগা বৃটিশ গভর্ণমেন্ট অব ইন্দিয়ানা যুবরাজ টিকেন্দ্রজিৎপু উপায় অমা নত্রগা অমা তৌদুনা ফারগা মণিপুরগী ৱাংমদা থাদোকখিবনা আসামগী চীফ কমিশনার মিঃ কুইন্টনবু সিফাই ৪০০ গা লোয়ননা মণিপুরদা থারকখি।
মিঃ কুইন্টনা মার্চকী তাং ২২ গী অয়ুক পুং ১০ তাবদা ইম্ফালদা থুংলখি। হেক থুংলবগা বৃটিশ রেসিডেন্সিদা দরবার অমা তৌদুনা যুবরাজবু ফানবা হোৎনবা মায় পাক্তবদগী, মতমদুদা নিংথৌ ওইরবা মহারাজ কুলচন্দ্রদা যুবরাজবু শিন্নৌ হায়না বৃটিশ সরকারগী ৱাফম অদু ফোঙদোক্লম্মী। মদুসু য়াদ্রবদা, মার্চকী তাং ২৪গী অয়ুক অঙনবদা বৃটিশ সিফাই চনি রোমনা যুবরাজকোন্দা যুবরাজবু ফানবা লান্দাখি।
অরোন-অথুপকী লানদা অদুদা মৈতৈগী মাইকৈদা মীচম ১০০ রোম শিখি। মখোয়শিং অদুগী মনুংদা নুপী-অঙাং, ব্রাহ্মননচিংবা কয়া য়াওখি। পুখ্রনবা তঙ্কো, খুম্বোং সুবিদার, লৈশাং জমান্দার অমসুং অথোকপম দেৱান য়াওনা
কংলাগী নোংচুপ থংবা স্নাথোঙ শঙবা মখোয় তরা মাথোয় শিখি। অদুবু নুমিৎ য়ূংলকপদগী মৈতৈনা লানদু মথক থংলক্তুনা বৃটিশ সিফাইশিংবু মায়থিবা পীখি। উপায় লৈত্রবা বৃটিশনা লান লেপ্পগী বেঙ্গুন খোংদুনা ৱারী শান্নবদা খঙহল্লকখি। অসুম তৌদুনা, মিঃ কুইন্টননা লুচিংদনা অফিসার মঙাগা বেঙ্গুন খোংবা অমগা পুন্না মখোয় ৬ কংলাদা দরবার তৌনবা লাকখি। অদুম ওইনমক, দরবার অদুদা য়ানবা অমতা পুরকপা ঙমখিদে মরমদি যুবরাজ টিকেন্দ্রজিৎনা বৃটিশশিংগী খুৎলাই পুম্নমক মৈতৈদা শিন্নৌ হায়বা অদু মিঃ কুইন্টননা য়ারমদে। মরম অদুনা দরবার অদু খাঙতপ্তা লোইশিনখি। দরবার লোইদুনা বৃটিশ অফিসারশিং অদু হন্নবা থোরকপদা, খোইশাওনরবা মীয়াম্না হুপচিল্লক্তুনা অফিসারশিংদু ফুচৈবা হৌরকখি। তাঞ্জা অদুদনি পুখ্রম্বা কাজাওনা মিঃ গ্রীমউডপু তানা থিল্লুরিবসি। মদুগীদমক, মহাকপু ফারবা তুংদা মেজর মেক্সওয়েলনা মে থাগী তাং ১৯ দা ৱায়েন চত্থদুনা মিঃ গ্রীমউড হাৎপগী মরাল শিদুনা শিবগী দন্ডি পীখিবনি।
ৱাফমদি-পুখ্রম্বা কাজাওবু ঐখোয়না অথৌবা অমা ওইনা ইরাৎলিবগী মরম অসি মুন্না খঙবা অমা চংই। মিঃ গ্রীমউডপু তানা থিন্দুনা হাৎপগীদমক মহাকপু অথৌবা ওইরিবরা? মতাং অসিদা হায়জনিংবদি, নুমিৎ অদুদা কংলাদা তিল্লম্বা অমসুং বৃটিশ অফিসারশিং তম্না হোৎচিল্লকখিবা পুম্নমক মখোয়গী মরী-মতাশিং নত্রগা ইমুং-মনুংগী মীওইংশিং হাৎখিবগী অশাওবনা লুতোন্দা মৈ হৌরবা প্রজাশিংনি। অদুনা, পুখ্রম্বা কাজাওনা তৌরিবদুমক কাজাওনা য়াওরমদ্রবসু অতৈ মৈতৈ খুদিংমক্না তৌরমগনি খল্লি।
অদুনা মিঃ গ্রীমউডপু তানা থিনবগীদমক মাঙোন্দা অথৌবা হায়না মিংথোন পীখিবা ওইরোই খল্লি।
অইবগী ৱাখন্দদি, মহাকপু অথৌবা অমগী মিংথোন পীখিবসি ‘মহাক্না মার্চকী তাং ২৪গী অয়ুকতা মণিপুর অমসুং বৃটিশ কোনুংদা কাপ্নরে হায়বা পাউ হেক ফংবগা মমালৈবাক্কী লান য়াওরুনবা কিঃমিৎ ১৬ মখোঙনা তা অশাংবা অমা পায়দুনা লাকখিবসিনি।’ মহাক নুমিদাংৱাইরমদা কোনুং য়ৌরক্তুনা কংলাগী খা-থংবা স্নাথোঙদা চঙলক্তুনা দরবার তৌফমদা লাকখিবনি। মহাক্না লাকখিবদু মহাকপু লান য়াওরুরাও হায়না নিংথৌনা লাকউ কৌরকপসু নত্তে, মনা পীগে লাকউ কৌরকপসু নত্তে। মমা লৈবাক্তা য়েক্নবনা লান্দারক্লে অদু ওইরবদি মমা লৈবাক কনদবা য়াদে, লান য়াওফম থোকই হায়দুনা মশানা খঙনা, হৌনবা নাইদনা কোনুং তম্না লাকখিবনি। মহাক্কী সিগুম্বা থৌনা অমসুং ৱাখল্লোন অসি হৌজিক্কী মীরোন্না চেনবা ঙম্লবদি ইমা লৈবাক কনানসু লাকচবা ঙম্লোই। অতোপ্পা লৈবাকশিংগী মমাং থাদুনা চৎপা ঙমগনি।
কর্টেসি: মরূপ
0 কমেন্ট:
কমেন্ট তৌবিয়ু