আপডেট:
image

মতম শাংনা পাউমী ওইরক্লবা খোল্লাও দেবেন লৈখিদ্রে

ইম্ফাল, সেপ্টেম্বর ৮ : মতম শাংনা পাউমী ওইনা থবক তৌদুনা লাকপগা লোয়ননা সঙাই এক্সপ্রেস পাউচে অসিমক্কি ব্যুরো চীফ ওইনা থবক তৌরম্বা নোংমাইথেম দেবেন ঙসি অয়ুক পূং ১০ রোম তাবদা কৈশাম্পাৎ লৈমজম লৈকায়দা লৈবা ময়ুমদা লৈখিদ্রে। মশাগী চহি ৭৫ রোম শুখ্রবা লৈখিদ্রবা দেবেনগী লোয়নবী অমসুং মচানুপী মরী লৈহৌরি।

মহাক্না লৈখিদবদা মতম অমদা পাউমী ওইরম্বা চীফ মিনিষ্টার এন বিরেন্না অৱাবা ফোঙদোরকপগা লোয়ননা পাউমীশিংনসু মহাক্কি মফমদা লৈ-শু কত্তুনা ইকাইখুম্নবা উৎপগা লোয়ননা অৱাবা ফোঙদোকখ্রে। মতম শাংনা মশাগী অনাবনা মরম ওইদুনা লায়েংদুনা লৈরকখিবগা লোয়ননা ঙসি অয়ুক পূং ১০ রোম তাবদা মহাক্কি কৈশম্পাৎ লৈমজম লৈকায়দা লৈখিদবনি।

হৌখিবা চহি ১৯৭৪ দা ওল মণিপুর ৱার্কিং জার্ণেলিষ্ট য়ুনিয়ন, আমজু লিংখৎপদা অচৌবা থৌদাং লৌখিবতা নত্তনা মণিপুর প্রেস ক্লাব লিংখৎপদসু য়াওখিবগা লোয়ননা আমজুগী মরুওইবা থৌপুবা ওইরমখিবা এন দেবেন্না ঙসি খঙহৌদনা লৈখিদবদা মণিপুর প্রেস ক্লাবতা পাউমীশিং, সিপিআই অমসুং সিপিএমগী মীওইশিং অমদি মহাক্কি খঙন-চান্নবশিং য়াওনা মিনিট অনী তুমিন্না লেপ্তুনা ইকাইখুম্নবা ঊৎখিবগা লোয়ননা মহাক্কি থৱায়না তাইবং মপুগী লৈকোন্দা ঈংনা লৈরুনবা থৌনিজখি।

মহাক্কি থৱায় য়াওদ্রবা হকচাং ঙসি প্রেস ক্লাবতা পুরকখিবগী লোয়ননা আমজু, ইজিএমগী লুচিংবশিং অমদি পাউমীশিংদা নত্তনা সিপিআই অমসুং সিপিএমগী থৌমীশিং অমদি মহাক্কি ইমুং-মনুং অমসুং খঙন-চান্নবশিংনা অরোয়বা ওইনা মহাক্কি মফমদা হৈ-লৈ কত্তুনা ইকাইখুম্নবা উৎখি। সঙাই এক্সপ্রেসকি মেনেজমেন্ট অমসুং এদিটরিয়েল ষ্টাফকি থোইদোকপা অৱাবা ফোঙদোকপা মীফম অমা ঙসি পাউচে অসিগী ওফিসতা পাঙথোক্তুনা মহাক্না লৈখিদবদা নুঙাইতবা ফোঙদোকখি অমদি মহাক্কি মফমদা ইকাইখুম্নবা উৎখি।

হৌখিবা চহি ১৯৪৭ কি জুলাই ১৬ তা কৈশাম্পাৎ লৈমজম লৈকায়দা পোকখিবা নোংমাইথেম দেবেন মচীন-মনাও নুপা মরী নুপী অনীগী মনূংদা মহাক্না ইতোন তোনবনি। কৈশাম্পাৎ এলপি স্কুলদা মহৈ তম্বা হৌরক্লগা মণিপুর কলেজদা লোইশিন্নবা মতূং ১৯৭৯ না মতমদুগী পাউচে খোল্লাওগী জোইন্ট এদিটর ওইনা থবক চঙখিবগা লোয়ননা ১৯৭৪ দা আমজু লিঙ্খৎপদা অচৌবা থৌদাং লৌদুনা পাউমীশিংগী য়াইফনবা থবক তৌরকখিবা মীওইনি।

মহাক হুইয়েন লানপাও, ইম্ফাল ফ্রী প্রেসতা থবক তৌরকখিবগা লোয়ননা সঙাই এক্সপ্রেসকি ব্যুরো চীফ ওইনা থবক তৌরমখি। তোঙান তোঙানবা মেদিয়া হাউসশিংনা তোঙান তোঙানবা কেপাসিটিদা থবক তৌরম্লবসু খোল্লাও দেবেন হায়না খহনবা খোল্লাও দেবেন পাউমী অমা ওইনা য়েক্নবা নত্ত্রগা মরূফ হায়বা থমদনা পাউমী অমগী চপ-চাবা থৌদাং লোরম্বা মীওইনি। হৌরক্লিবা পাউমী কয়া মহাক্কি লমজিং মখাদা পাউমী ওইবা শিনফমদা তারপী তম্বীবগী থবকশিং লেপ্তচনা তৌরকপা মীওইনি।

মহাক্না খহহৌদনা লৈখিদবা অসি পাউমী খুন্নাইগী ওইনা মেনখৎপা ঙম্লরোইদবা অচৌবা মাঙজবা অমনি হায়না আমজুগী প্রেসিডেন্ট ৱাঙ্খেমচা শ্যামজাইনা ঙসি মহাক্কি মফমদা হৈকৎ লৈকৎ তম্বা অমদি অৱাবা ফোঙদোকপগী থৌরমদা ফোঙদোকখি। মহাক্না লৈখিদবদা ইমুং মনূং অমদি খঙন-চান্নবশিংনা নংহৌরিবা অৱাবদা আমজু, ইজিএমনা শরূক য়াবসু ফোঙদোরক্লি।

চহি দিকেদ মরী পাউমী ওইনা থবক তৌদুনা লাক্লবা নোংমাইথেম দেবেননা ঙসি মহাক্কি ময়ুমদা খহহৌদনা লৈখিদবদা চীফ মিনিষ্টার এন বিরেন্না থম্মোয় শোক্না নুংঙাইতবা ফোঙদোক্লদুনা মহাক্কি পুন্সিগী অরোয়বা শরুক ফাওবা মেদিয়াগী য়াইফবা হোৎনরম্বা মীওই অমা লৈখিদবা অসি মণিপুরগী ইচঙ থৌবা পাউমী অমা লৈখিদ্রবনি হায়না চীফ মিনিষ্টারগী চেরোল অদুনা ফোঙদোরক্লি।

সোর্স: সঙাই এক্সপ্রেস

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু