মণিপুরী শৈরেংগী নুমিৎ, ২০২৪ পাঙথোকখ্রে
মালেমগী লোল খুদীংমক্কী খোরিরোল শৈরেংদগী হৌরকখিবনিঃ রাজেন তোইজাম্বা
ইম্ফাল, ওক্তোবর ১৭
ফিক্সন এন্দ পোইত্রি ক্লব, মণিপুরনা শীন্দুনা ‘মণিপুরী শৈরেংগী নুমিৎ, ২০২৪’ ঙসি কৈশাম্পাৎতা লৈবা দিরেক্তোরেত ওব ইনফোর্মেসন এন্দ পাব্লিক রিলেসন্স (দি আই পি আর) গী কনফারেন্স হোলদা পাঙথোকখ্রে।
ফিক্সন এন্দ পোইত্রি ক্লব, মণিপুরগী প্রেসিদেন্ত দাঃ হৈস্নাম বুধিচন্দ্রনা প্রিসাইদ তৌদুনা পাঙথোকখিবা থৌরম অদুদা সাহিত্য একাদেমি, নিউ দিল্লীগী মণিপুর লেংগ্বেজ এদভাইজরি বোর্দকী কনভেনর প্রোফেসর রাজেন তোইজাম্বনা চীফ গেস্ত অমসুং সি-ওয়েবস, মণিপুরগী হান্নগী প্রেসিদেন্ত য়েংখোম ইন্দিরা দেবীনা গেস্ত ওব ওনর ওইনা শরুক য়াখি।
থৌরম অসিদা চীফ গেস্তকী ৱারোল পীরদুনা প্রোফেসার রাজেন তোইজম্বনা হায়, মালেমগী লোল খুদীংমক্কী খোরিরোল হৌরকপা মতমদা শৈরেং ওইনা ইনরকপা ঙাক্তনি। মণিপুরী খোরিরোল নৈনবদসু মণিপুরী শৈরেং অসি ঙল্লিঙৈ মতমদগী লৈরকই। শৈরেংগী শকওং অসি মীরোল-মীরোলগী থোরকপা অইবশিংগী মতুং ইন্না অহোংবা লৈ। মসিনা শৈরেংগী থাকসু হেন্না ৱাংখৎলকই। মণিপুরী শৈরেংসু মীরোল-মীরোলগী অইবশিংনা হোৎনরম্বা কয়া অদুনা ঙসিগী অৱাংবা ফিদা অসি কনবা ঙম্লিবনি।
ফিক্সন এন্দ পোইত্রি ক্লব, মণিপুরনা মেরাগী থানিল নুমিৎ অসিবু অখন্নবা নুমিৎ অমা ওইনা লৌরগা ‘মণিপুরী শৈরেংগী নুমিৎ’ হায়না পালন তৌরক্লিবা অসি অফবা খোঙথাংনি। মসিবু লমদম অসিদা লৈরিবা অমদি মপালদা লৈরিবা মণিপুরী খোরিরোলবু চাওখৎনবা হোৎনরিবা লূপশিংনসু তরাম্না ওক্তুনা পালন অসি পাক-শন্না পাঙথোকমিন্নবা মথৌ তায়। মসিনা মণিপুরী শৈরেংবু হেন্না চাওখৎহনবা অমদি থাক হেন্না ৱাংখৎহনবদা অচৌবা মতেঙ ওইগনি হায়না রাজেন তোইজাম্বনা ফোঙদোকখি।
থৌরম অদুদা শক্নাইরবা অশৈবা অহুম মথংশীৎনা সাহিত্য একাদেমি এৱার্দি লনচেনবা মীতৈ, সাহিত্য একাদেমি এৱার্দি বিরেন্দ্রজিৎ নাওরেম অমসুং সাহিত্য একাদেমিগী মণিপুর লেংগ্বেজ এদভাইজরি বোর্দকী হান্নগী কনভেনর নোংমাইথেম কিরনকুমারনা চেয়ার লৌদুনা সেসন অহুম থোক্না শৈরেং শৈদিন্নবসু পাঙথোককখি।
থৌরমগী মনুং চন্না মণিপুরী লোনগী শক্নায়রবা অশৈবা অনী মথংশীৎনা সলাম তোম্বা অমসুং কেংবা য়েংখোমদা মখোয়না মণিপুরী শৈরেংগীদমক কত্থোকপগা লোয়ননা মমল নাইদ্রবা থৌদাং লৌলকপগীদমক মনা পীদুনা ইকায় খুম্নখি। লোয়ননা নিংঙোম্বম নন্দো সিংহনা এদিতর ওইদুনা পুথোকপা ফিক্সন এন্দ পোইত্রি ক্লব, মণিপুরগী রিসার্ছ জর্নেল ‘মপাউ’ গী ২৩ শুবা মশীংসু ফোঙখি।
অমরোমদা, শৈরেংবশিংগী অপূনবা লূপ (শাল), মণিপুরনা শীন্দুনা ইম্ফাল ইস্তকী য়ারলপাৎতা লৈবা কোম্বীরৈ লৈকোলদা মেরাগী থানিলদা য়ুম্ফম ওইবা ‘মেরা থানিলগী নুমিদাংৱাইরম অমা’ হায়না মিংথোনবা শৈরেং শৈদিন্নবগী থৌরম অমসু শক্নায়রবা শৈরেংবা রাজেন্দ্রো ওক্রম অমসুং রাজমনি নোংথোম্বনা শৈদিন পুরেন ওইদুনা পাঙথোকখ্রে।
রাইতর্স এসোসিসেন ককচীংনা শীন্দুনা চহী খুদীংগী পাঙথোক্তুন লাকপগুম মণিপুরী শৈরেংগী নুমিৎ থৌরম ঙসি ককচীংদা লৈবা রিপ্রজেন্তেতিব ওব লোইজ ককচীংগী ওদিতোরিয়ামদা পাঙথোকখ্রে। থৌরম অদুদা রিতয়ার্দ হেদমাস্তর মোইরাংথেম মুকুন্দনা চীফ গেস্ত, রাইতর্স এসোসিয়েসন ককচীংগী প্রেসিদেন্ত পুখ্রম্বম নিমাইনা প্রেসিদেন্ত, সাউথ ইস্ত মণিপুর কলেজ কোমলাথাবীগী এসিস্তেন্ত প্রোপেসার কেএসঐচ বিরোহিনীনা গেস্ত ওব ওনর ওইখি।
থৌরম অদু পাঙথোকপগী মতাঙদা এসোসিয়েসনগী সেক্রেতরি বীরমঙ্গোল মোইরাংথেমনা নুংগী ওইবা ৱারোল ফোঙদোকখি। প্রেসিদেন্ত পুখ্রম্বম নিমাইনা মণিপুরী শৈরেংগী নুমিৎ থৌরমগী মরমদা ৱা ঙাঙখি। থৌরম অদুগী শরুক অমা ওইনা অইবা অইবী কয়ানা শরুক য়াবা শৈরেং শৈদিন্নবা অমসুং পাঙথোকখি। শৈরেং শৈদিন্নবা অদুদা পাথোক্নখিবা শৈরেংশিং অদুগী মরমদা রিতয়ার্দ তিয়র নাওরেম অমুয়াইমনা ৱা ঙাঙখি হায়রি।
সোর্স: পোক্নফম
0 কমেন্ট:
কমেন্ট তৌবিয়ু