বাসোক শৈশকপী রাধারানী দেবী ---তোলেনসনা
মহাক্না য়াম্না পামজবা অদুদি বাসোক ঈশৈনি। বিশগাঁও, ভানুগাছ, সিলেট নচিংবা অমসুং ত্রিপুরাগী মৈতৈ খুঙ্গং কয়াদা মহাকপু বার্তোন ফংদুনা ঈশৈ শকখি। মহাকপু ময়াম্না ‘বাসোক শৈশকপী রাধে’ হায়রগা খংনরকপা হৌখি।
মণিপুরী খুন্নাইদা নাৎ শক্তম ঙাকপদা ঈশৈ জগোইদা খ্বাইদগী চাওনা থৌদাং লৌবা উবসি নুপীশিংনা মহেল্লি। ত্রিপুরাদা মশক নাইরবা
শৈশকপা কলাকারশিংগী মনুংদা লাইশ্রবম নিঙোল নিংথেম ওংবী রাধারানী দেবীসু অমনি। তখেনগী পুৱারীদা শান্তিনিকেতন্দা অহানবা মণিপুরী জগোই ওঝা ওইবিরম্বা নৃত্যগুরু রাজকুমার বুদ্ধিমন্তগী মমৌ নুপী রাধারাণী দেবী চৎখিবা জুলাই ৬দা কৃষ্ণখুয়া তানখি।
মশাগী চহী ৯১ শুখ্রবী মহাক্না লৈখিদবদা মণিপুরী সাহিত্য পরিষদ অমসুং মণিপুরী লিটরেরী এ্যন্ড কলচরেল ফোরাম ত্রিপুরাগী মাইকৈদগী অৱাবা অমদি নুঙাইতবা ফোঙদোকখ্রে। নিংথেম শাগৈদা ময়ুম পাল্লবী রাধারাণী দেবী, ইং ১৯৩২ দা বাংলাদেমকী বিশগাঁও মৈতৈ খুঙ্গংদা পোকখি। মহাক্কী অপোকপগী মিং লাইশ্রবম কামিনী দত্ত অদুগা অপোকপীনা কমলীনি দেবী কৌই। মচিন মনাও ৫গী মনুংদা মৌপা অমা (রাধামোহন) য়াওনা নুপীদা রাধারানী দেবীনা অতোম্বীনি।
লাইরিক লাইশুদা থোইদোক্না থৱায় য়াওদ্রবসু মৌপাগীদমক হোৎনবা কনবা উবদুদা ওঝাগী থৌশীলদগী ক্লাস ৮ দা বিশগাঁও স্কুলদা প্রাইমারী ফাওবা তম্লম্মী হায়। অঙাং ওইরিঙৈগী ঈশৈদা মহাক্কী থৱায় য়াওবা উবদুদা মপাবুংনা অমুক মণিপুরদা থাদুনা চহী অহুমরোম নাতুম সিংহদা গুরু বরণ লৌরগা বাসোক ঈশৈ, নৌকা বিলাস, নিমাই সন্যাস নচিংবা মখল কয়াগী ঈশৈ তমদুনা লাকখি।
মহাক্না য়াম্না পামজবা অদুদি বাসোক ঈশৈনি। বিশগাঁও, ভানুগাছ, সিলেট নচিংবা অমসুং ত্রিপুরাগী মৈতৈ খুঙ্গং কয়াদা মহাকপু বার্তোন ফংদুনা ঈশৈ শকখি। মহাকপু ময়াম্না ‘বাসোক শৈশকপী রাধে’ হায়রগা খংনরকপা হৌখি। বিশগাওদগী মখোয়গী ইমুংনা তখেনদা হোংলগা খোয়াই ডিস্ট্রিক্ট মনুং চনবা গৌরনগর মৈতৈ খুঙ্গংদা খুন্দারকখি। তখেনগী শক্নাইরবা নৃত্যগুরু রাজকুমার বুদ্ধিমন্তগী মচা নুপা য়াইমা হিন্দী প্রচারক রাজকুমার ইন্দ্রজিৎ সিংহগা ইং ১৯৫০ দা পুন্সি লৈপুন্নখি।
পনবা য়াবদি রাজকুমার ইন্দ্রজিৎ অমসুং রাজকুমার কমলজিৎ মচিন মনাওনি। মপুরোইবা আসাম রাষ্ট্রভাষা প্রচার সমিতিগী থৌবুরেন অমা ওইবনা রাধারানীসু জোরহাট, গুৱাহাটি নচিংবা তোঙান তোঙানবা মফমদা মতম শাংনা লৈখি। ইং ১৯৭৩গী জুন ৮দা মপুরোইবা লৈখিদে। মচা নুপা (কিশোর) মচা নুপী অনি (প্রনতী, হাপতী) সু মতম চাদনা লৈখিদ্রে, হৌজিক মচা নুপী প্রতিভা, ময়া নিপা, মমৌ অমসুং মশুশিং য়াওনা মরিমত্তা কয়াসু লৈরি। রাধারানীনা লৈখিদবসি ত্রিপুরাগী মৈতৈগী পুৱারীদা মশক নাইরবা শৈশকপী অমা কেনখ্রবনি।
কর্টেসি : মরূপ
0 কমেন্ট:
কমেন্ট তৌবিয়ু