• 475
• ১৪ই নভেম্বর ২০২০ ইং
• Share on:

বাংলাদেশতা মণিপুরিঃ লাইনীং লীচৎ অমসুং হিংলিবা পুন্সি মহিং

এ কে শেরাম

মণিপুরি জাতিসি বাংলাদেশতদি মশীং লীক্লবা মীওই ফুরূপশিংগী অমা ওইনা হিংলিবনি। মীশীং লীকপগী হৌনবী মণিপুরিশিং অৱাবা কয়া মায়োকন্‌না য়াম্না ৱানা হিংলি। লমদমসিগী মরূ ওইবা মীওই ফুরূপ বাঙালিশিংগী অরংবা লোন-সাহিত্য-সংস্কৃতিগী মরক্তা পিক্ল’ ফুরূপ মণিপুরিনা মশাগী নাইতোম ওইবা মশক্তম ঙাক্তুনা হিংদুনা লৈবা হায়বসি অৱাবনি। ঙা অচৌবনা ঙা মচা মচাবু চাথোকপগুম মীওইবা খুন্নায়দসু অচৌবা ফুরূপনা মতম’পুম্বদা ফুরূপ মচাশিংবু তুহৎপি, নৈহৎপি, চাথোকপি। মসিসু মীওইবা লিচৎকী হৌনশা অমনি। মসি ময়ামসিগী মরক্তা মতম’পুম্বদা লানথেংনদুনা মশাগী চাকচা-ফিজেৎ, চৎন-লোনচৎ অমদি ধর্ম-সংস্কৃতিনচিংবা হিংহন্নবা হোৎনদুনা বাংলাগী মণিপুরীশিংনা করম্না পুন্সি লেল্লিবগে হায়বদি বাংলাদেশকী মণিপুরিশিংগী পুন্সি মহিং করম তৌরিবা মসিগী মতাঙদা শম্লপ্পা মীৎয়েং’মতং তানবা হোৎনবদা ঙসিগী ৱারেং অসি শক্তম লৌবনি।

খুন্দা-ৱারী

বাংলাদেশকী মণিপুরিশিংগী হৌরকফম লমদমদি মণিপুরনি। মণিপুরিশিংনা হায়রিবা মণিপুরসিবু থাদোক্তুনা মপাল মণিপুরদা মরূ ওইনা কাছাড়, আসাম, ত্রিপুরা অমসুং বাংলাদেশকী মফম কয়াদা খুন্দাখিবসি মণিপুরী ইতিহাসকী তমথীরবা তাঙ্কক কয়াদনি। ময়াম্না হেক খঙনরিবসি বাংলাদেশতা মণিপুরিশিংনা খুন্দারকপসি মরূ ওইনা ‘চহী তরেৎ খুন্তাকপ’গী মতমদনি। খৃষ্টকুম ১৮১৯ দগী ১৮২৫ ফাওবা শন্দোক্লিবা চহী তরেৎ খুন্তাকপগী মতমদা য়াম্না পাক-শন্না বাংলাদেশতা মণিপুরি খুন্দাখি হায়বসিদি অচুম্বনি। অদুবু মদুগী মমাঙদগী অমদি মতুঙদসু বাংলাদেশকী মফম কয়া কয়াদা মণিপুরি খুন্দাখিবগী ৱারী কয়াদং লৈরি। চহী তরেৎ খুন্তাকপগী মমাঙদা মহারাজ খাগেম্বগী স্না হাক্তক্তগীনা হৌজিক্কী হবিগঞ্জ জেলাগী মনুঙ চনবা বিশগাঁও লমদমদা মণিপুরি খুন্দাবা হৌরে হায়না ইতিহাসকী খুদম কয়াদং ঐখোয়না ফংঙি। মথংদা মহারাজ গরীবনেওয়াজ অমসুং মহারাজ ভাগ্যচন্দ্রগী মতমদসু বাংলাদেশতা মণিপুরি খুন্দাখিবগী ৱারী ঐখোয়না ইতিহাসতা থেংনৈ। চহীতরেৎ খুন্তাকপগী মতুঙদসু মণিপুর অমসুং ত্রিপুরা আসামনা চিংবা অতৈ মফম কয়াদগী মতম মতমদা লমদমসিদা মণিপুরি খুন্দারকখিবগী ৱাফমসু ইতিহাসকী তাঙ্কক কয়াদা থেংনবা য়াওই। অদুবু মরূ ওইনা খুন্দাবদি চহী তরেৎ খুন্তাকপগী মতমসিদনি।

বাংলাদেশতা মণিপুরিশিংনা খুন্দারিবসি মরু ওইনা সিলেট লমদম হায়না খঙনরিবা হৌজিক্কী সিলেট বিভাগতনি। মতম্মদা ঢাকাগী তেজগাঁও মণিপুরি পাড়া, নেত্রকোনাগী সুসং দুর্গাপুর অমসুং ব্রাহ্মণবাড়িয়াগী কসবা লমদমদসু মণিপুরি খুন্দারম্মি হায়বগী ৱারী কয়া ইতিহাসতা থেংনৈ। অদুবু হায়রিবা মণিপুরি খুলশিংদু মতমগী পাক্ল’ পিবুকনুংদা চিকমাংনদুনা মাঙখিবা কুইরবনি। সিলেট লমদমদসু মণিপুরী খুন্দারম্বা খুল কয়াদং হৌজিক তাকখ্রে। হৌজিক হৌজিক মণিপুরি হায়বদি মৈতৈশিংনা খুন্দারিবা খুলশিংদি – ক) হবিগঞ্জ জেলা : চুনারুঘাট থানাগী মনুঙ চনবা – গোবরখোলা, আবাদগাঁও অমসুং শিবনগর; খ) মৌলভীবাজার জেলা : ১) শ্রীমঙ্গল থানাগী মনুঙ চনবা – বিলাছর (টিকরিয়া) অমসুং রামনগর; ২) কমলগঞ্জ থানাগী মনুঙ চনবা (ময়াম্না ভানুগাছ হায়না খঙনবা) – মঙ্গলপুর, চিৎলিয়া, নীলকুঠি, ছয়চিরি, মাধবপুর, হকটিয়ারখোলা, কাটাবিল, শ্রীপুর, গঙ্গানগর, ভানুবিল, তেতইগাঁও (মঙ্গেমখোঙ), নয়াপত্তন, ছনগাঁও অমসুং কোনাগাঁও; ৩) কুলাউড়া থানাগী মনুঙ চনবা – ফটিগুলি, ভান্ডারীগাঁও অমসুং নলধরী; ৪) জুড়ি থানাগী মনুঙ চনবা – বরইতলী, সাগরনাল, বাবুসিংগাঁও, গোয়ালবাড়ী, গৌরাঙ্গবিল অমসুং ছোটধামাই; ৫) বড়লেখা থানাগী মনুঙ চনবা – গৌরনগর, পাথারী অমসুং পুঠাদহর; গ) সিলেট জেলা : ১) সিলেট সদর থানাগী মনুঙ চনবা – মণিপুরি রাজবাড়ি, লামাবাজার, লালাদিঘীরপার, নরসিংহটিলা, সাগরদিঘীরপার, কেওয়াপাড়া, সুবিদবাজার, আম্বরখানা, বড়বাজার, শিবগঞ্জ, নয়াবাজার অমসুং দক্ষিণগাঁও; ২) গোয়াইনঘাট থানাগী মনুঙ চনবা লাখাত;  ঘ) সুনামগঞ্জ জেলা : ছাতক থানাগী মনুঙ চনবা – রতনপুর (পাড়ুয়া)।

   বাংলাদেশতা খুন্দারিবা মণিপুরিশিংগী মশীং পংয়াম য়ামদে। মসিগী মতাঙদা চপচাবী সেন্সাসসু লৈতে। চাউরাকপা মীৎয়েং’মদা মৈতৈশিংগী মশীং লিশিং তরারোমনি হায়নৈ। বাংলাদেশকী মণিপুরিশিং মশীং লীকপগী মতীক য়াম্না চোইজাইনসু তাই। খজিক্তং মৈতৈ পূনবা লম হায়বসি ভানুগাছ লমদমসিনি। হৌজিক হৌজিক মৌলভীবাজার জেলাগী মনুঙ চন্না কমলগঞ্জ উপজেলাদা তারিবা মৈতৈশিংনা ভানুগাছ হায়না খঙনরিবা লমদমসিদা মৈতৈ খুল ১৪ লৈ। হায়রিবা খুল তরামরিসিদা বাংলাদেশকী মণিপুরি হায়বদি মৈতৈ মীশিংগী খাইবোক হেন্না লৈ। মৈতৈ পাঙল হায়বদি মণিপুরি মুসলিমশিংনা খুন্দারিবসু মরূ ওইনা ভানুগাছ লমদমসিদনি। ভানুগাছকী মপালদা মৈতৈ পাঙলনা খুন্দাবসি মৌলভীবাজার সদর থানাদা খুল অমা অমসুং সিলেট জেলাগী সদর থানাদা খুল অমখক্তংদনি। মৈতৈ পাঙল হায়বদি মণিপুরি মুসলিমশিংগী মীশিংসু চাউরাক্‌না লিশিং তরারোম ওইগনি হায়নৈ।

লাইনীং লীচৎ

মৈতৈশিংগী হৌজিক্কী মরূ ওইবা লাইনীং লীচৎতি শ্রীচৈতন্য প্রভুনা শন্দোকপিরম্বা বৈষ্ণব ধর্মনি। বাংলাদেশতসু হায়রিবা বৈষ্ণব ধর্মসিনা মপুঙ ওইবা লাইনীং লীচৎ ওইরি। মৈতৈ খুন্দাবা খুল খুদিংদা লাইশং মান্দোব লিংদুনা জগন্নাথ দেব, শ্রী রাধা-কৃষ্ণ অমসুং চৈতন্য-নিতাইনচিংবা লাইগী মূর্তিশিং লাৎনৈ অমসুং চাং নাইনা মরী লৈনবা লাইগী থৌরমশিং কায়দনা পাঙথোকই। মৈতৈশিংগী মনুঙদা য়েলহৌঙৈদগী শাগোন্নরকপা লাইনীং লীচৎ চৎপসু য়াওনরি। ‘অপোকপা’ নত্রগা ‘সনামহী লাইনীং’ হায়না খঙনবা ধর্ম অসিগী থৌরম কয়াদং হৌজিকসু বৈষ্ণব ধর্ম চৎপা কাঙলূপ য়াওনা মৈতৈ খুদিংমক্‌না পাঙথোক্‌নবগুম য়ুমলাই ওইনা মৈতৈ য়ুমথোং খুদিংদা সনামহী, লৈমরেন, ইমোইনুনচিংবা অরিবা ধর্মগী মরূ ওইবা লাই কয়াদংসু লাৎনরি। ভানুগাছকী ভানুবিল মাঝেরগাঁও অমসুং নয়াপত্তন হায়বা খুঙ্গংদা ইপুধৌ পাখংবগী লাইশং লিঙ্খৎলে। মদুতসু নত্তনা শাগৈগী লাইরেম্বী নত্রগা লম কোনবা লাই ওইনা লাইরেম্বী কয়াদংসু ইরাৎনৈ। অদুগুম্বা লাইরেম্বী খরগী মতাঙদা মখাদা খরদং পঞ্জরি।

   মৌলভীবাজার জেলাগী মনুঙ চনবা ভানুগাছ হায়বা লমদমসি বাংলাদেশতা খোৱাইদগী মৈতৈ য়াম্না খুন্দাবা লমদমনি। মৈতৈ খুল তরামরিনা শাবা ভানুগাছ লমদমনি। মীশিং চাউরাক্‌না লিশিং মঙারোমনা খুন্দাবা ভানুগাছ’সিদা অপোকপা নত্রগা সনামহী লাইনীং হায়না খঙনরিবা লাইনীং লীচৎ অসি চৎপা মী হায়ফেৎ শিংথাবা য়ানা লৈ। লাইরেম্বীগী খুভমসু ভানুগাছতনা হেল্লি। কোনাগাঁওদা লৈবা উজাউ লাইরেম্বী মমিং লৈবা ময়াম্না শিংথানবা লাইগী খুভমনি। চীংদোং মচা’মদা হৌবা উজাউ অমগী মখোঙদা উজাউ লাইরেম্বীগী খুভম লৈ। মদুদা কোরি-কোম্পাক ওইনা লাইরেম্বা-লাইরেম্বীগী শক্তম খিল্লে। চহীগী ইরাৎ থৌনি তৌই। খ্রিষ্টকুম ২০০৬-তা চাউনা লাইহারাওবগী থৌরম পাঙথোকখি। মথংদসু কয়ারক লাইহারাওবগী থৌরম পাঙথোকখ্রে। ভানুগাছকী মনুঙ চনবা মৈতৈ মাধবপুর খুলদা থোঙাক লাইরেম্বী লাৎলি। থাংজা-লৈপাকপোকপা খুদিংগী ইরাৎ থৌনি তৌই। লমদম অসিগী মঙ্গেমখোঙ খুঙ্গংদনা মকোংলৈমা লাইরেম্বীগী খুভম লৈ। শজিবু চৈরাউবা মতমদা লাইরেম্বী অসিগী ইরাৎ থৌনি তৌই। নয়াপত্তন হায়বা খুলদা লৈবা কোন্থৌজম শাগৈনা কোন্থৌজম লাইরেম্বীগী খুভম অমা লাৎলি। অদুগা নগর হায়না খঙনবা খুলদনা লাইয়েক ওইনা শাদুনা ইমা লাইরেম্বীগী (মালেম ইমা) শঙলেন শারগা লাৎলি। চহীগী দুর্গাপূজাগী মতমদা মালেম ইমাগীসু ইরাৎ থৌরম পাঙথোকই। সিলেট জেলাদসু ইমা লাইরেম্বীগী খুভম খিন্দুনা ইরাৎ থৌনি তৌবগী খুদম ঐখোয়না থেংনৈ। সিলেট শহরগী খুনৌ লৈকাইদা লৈবা কোন্থৌজম শাগৈগী কাঙবুনা কোন্থৌজম লাইরেম্বী লাৎলি। হান্নদি পিথ্রাইনা শবা ইমাগী মূর্তি লৈরম্মি হায়। অদুবু ১৯৭১ খ্রিষ্টকুমগী বাংলাদেশকী নীংতম লানদা মূর্তি অদু মাঙখ্রে। হৌজিক লাইয়েক অমা খিল্লগা ইরাৎ তৌরি। কালেনগী পূর্ণিমাদা চহীগী ইরাৎ থৌরম পাঙথোকই। সিলেট শহরগী সাগরদিঘীরপার হায়বা খুলদুদসু ইপুধৌ অমসুং ইমা লাইরেম্বী লাৎলি। শিবগঞ্জতসু ইমা লাইরেম্বীগী ইরাৎ তৌই। মদুতসু নত্তনা মৌলভীবাজার জেলাগী জুড়ী উপজেলাগী মনুঙ চনবা ছোটধামাই খুঙ্গংদা ইমা লাইরেম্বীগী খুভম অমসু লৈ। মদুদসু ময়াম্না ইরাৎ থৌনি তৌনৈ। মণিপুরিশিংগী মনুঙদা সুন্নী ইসলাম ধর্ম চৎপা কাঙলূপ অমসু লৈরি। ‘মৈতৈ পাঙল’ হায়না চাউরাক্‌না খঙনবা ফুরূপ অসি মৌলভীবাজার জেলাগী কমলগঞ্জ উপজেলাগী ভানুগাছ হায়বা লমদমসিদা মশীং ফনা য়াম্না খুন্দাদুনা লৈরি। মখোয় ইসলাম ধর্ম চৎলি। ধর্মগী ওইবা থৌরম পুম্নমক চাং নাইনা নিংথিনা পাঙথোকই। মমালোন ওইনা মৈতৈলোনদি খক থাদে, অদুবু লাইনীং লীচৎ খেন্নবদগী সংস্কৃতিগী লমদসু খেন্নবা শক্তম কয়া লাক্লে। অদুবু মৈতৈগা মৈতৈ পাঙলশিংগদি য়াম্না নক্‌না-নুংশিননা তিন্ননা লৈরি। মৈতৈ মনুঙদা হৌজিক খ্রিষ্টান ধর্ম চৎপা মীসু য়াওনরক্লে। মখোয়গী তোঙান্না চার্চ অমসু লিঙ্খৎখরে।

লাইরিক লাইশু, শিনফম অমসুং শেলথুমগী ফিবমঃ

সিলেট টাউনদা মণিপুরি খুল ১২ খক লৈ। মদুদা হৌজিক হৌজিক লৈরিবা মণিপুরিশিংগী মশীং চাউরাক্‌না লিশিং অনীরোমনি। মসি নত্তনা অতৈ মণিপুরিশিংদি খুঙ্গংদা লৈবনি। খুঙ্গংদা লৈবা মণিপুরিশিংগী মরূ ওইবা শিনফমদি লৌ-ঊ শিংউবনি। মণিপুরি অয়াম্বগী মশাগী ওইবা লম খরা খরদি লৈনৈ। মশাগী লম অমত্তা লৈতবা য়ুম খরসু য়াওদবা নত্তে। মশাগী লম লৈজবশিংনা মশা মশাগী লমদা, অদুগা লৈতবা কাঙবুশিংনা মীগী লম ইজারা লৌরগা লৌ-ঊ শিংউবগী থবক তৌনৈ। মদু নত্তবদা নিপাশিংগী মনুঙদা ঊ শুবা (মিস্ত্রী), সানা শুবা (সুনারি) খরা খরা তৌনবা য়াওই; নুপীশিংনা মৈতৈ ইয়োং নত্রগা অচৌবা তাঁততা মৈতৈ ফি শাই। মতম্মদা মৈতৈনা শাবা ঙা ফাবগী ইন মীয়াম্না য়াম্না পাম্নরম্মি। অদুবু হৌজিক্তি ইন শিত্রে, অদুনা শানদ্রে। হৌজিক য়াম্না হেক চৎনরিবসি মৈতৈ নুপীনা শাবা শাড়ি, ইন্নফি, মাইথফিদক, টেবিলক্লথ, খুদৈ অসিনচিংবা মখল মখাগী মৈতৈ ফিরোলশিং। মৈতৈ শাড়িগীদি হৌজিক য়াম্না ডিমান্ড লৈ। অদুনা মৈতৈ নুপীশিংনা ফিরোল শাবসিনা শেন্দান লম্বীগী চাউরবা মরম অমা ওইরি। মতম অমদা মৈতৈ নুপীশিংনা চেম্বাক শুবা অমসুং মুড়ি পোকপসিসু চাউরবা শেন্দান লম্বী অমা ওইরম্মি। হৌজিক্তি মেশিননা মীগী মহুৎ শিনখ্রবনিনা মেশিনদগী থোকপা চেম্বাক-মুড়িনা মৈতৈগী চেম্বাক-মুড়িগীসু মহুৎ শিনখ্রে। অসুম্না মতমগা লোয়ননা শিনফমদসু অহোংবা কয়া লাকই। টাউনদা লৈবা মণিপুরিশিংগী মরূ ওইবা শিনফমসি সনা শুবনি (সুনারি)। মদুগী হেক মথংদা শিনফম ওইনা পনবা য়াবসি মটর মেকানিককী থবকনি। অদুবু মতমগী য়াওলগা লোয়ননা ঙাকথোকপা য়াদ্রবা অহোংবা কয়াদং লাকই টাউনগী মৈতৈশিংগী শিনফমদসু। হৌজিক টেকনোলোজী চাওখৎলকপগা লোয়ননা সনাগী ওর্নামেন্ট মেশিননাঙাক শানরে, হান্নগী মওংদা খূৎনা শাবা চৎনরক্ত্রে। মেশিননা শাবা ওর্নামেন্টনা ডিজাইননচিংবা ফজবা হেল্লি, মমলসু হোংঙি হায়না মদুনা হেন্না পাম্নরে। অদুনা সুনারিগী শিনফম মাঙশিল্লকলে। অয়াম্বনা হৌজিক সনাগী লীককোল য়োনবগী রেডিমেড দোকানদা পোৎয়োন-মী ওইনা থবক শুনরে। মটর মেকানিক্কী লমদসু অনৌবা টেকনোলোজী চংঙকপদগী মৈতৈ মেকানিকশিং মাইয়োং য়াবা ঙম্লকত্রে। অতোপ্পা কাঙলুপকী মী মরূ ওইনা মেইনস্ট্রিম বেঙ্গলিশিংনা ‘টেকনিকেল নো-হাউ’দা খুমাঙ চাউশিল্লকপা অমসুং শেল থুম মরাং কায়না শিজিন্নদুনা অনৌ অনৌবা মোডার্ন টেকনোলোজিগী মেশিননচিংবা শিজিন্নরকপা অদুগা মৈতৈ মেকানিকশিংনা মায়কৈসিদা শোত্থবা মসি পুম্নমক্‌না মরম ওইদুনা ঙসি মটর মেকানিককী লমদসু মৈতৈশিং শিনফম মাঙশিল্লক্লে। অদুনা অয়াম্বা মৈতৈশিংগী শেল-থুমগী ফিবম নোংমা-নোংমগী ফগৎলকপদি লায়রদনা ময়াই চাইথরক্লি।

বাংলাদেশকী মণিপুরীশিংগী লাইরিক লাইশু হৈবগী জেনারেল চাংদি হায়ফেৎ ৱাংঙি। ময়েক মশক খঙবগী চাং ৮০%দগীসু হেল্লি। অদুবু এস.এস.সি অমসুং মদুদগী হেন্না থাক ৱাংনা লাইরিক হৈবগী চাংদি অমুক য়াম্না লীকই। খৃষ্টকুম ১৯৭৯দা পাংথোকখিবা সার্ভে অমদা চাং অসি ৪%তং ওইরবসু হৌজিক্তি খরা হেল্লে-হন্দক্তা পাংথোকপা চাংয়েং’মদা ২২% ওইরে। চাকুরীজীবীগী মশীংসু ১৯৭৯গী সার্ভেদা ৩%দং ওইরম্মি। হৌজিক চাং অসি খরা হেন্দুনা ২০১১গী সার্ভেদা ১১% ওইরে। শেলথুমগী ফিভমদা মণিপুরীশিং খরা শোত্থরি। অয়াম্বনা লাইরবগী থাক্তনি, ইনাক-কৈরাক খুনবা শেল-থুম য়াম্না পায়বা য়াওদে হায়বা য়াই। অদুম্নদি ওইরগা য়াম্না লাইর-চিত্থবা মচিঞ্জাক পুবা ঙমদবা চাকনি-ফিনিবদি অমত্তা লৈতে। হৌজিক সরকারগী লোয়শংদা নত্রগা অতৈ অতৈ শিনফমদা অচৌ অচৌবা থাকতা থবক তৌনবা য়াওনরক্লে। সরকারগী ফম্নাইবা ওইবশিংদা এডিশনাল সেক্রেটারি, জোয়েন্ট সেক্রেটারি, ডেপুটি সেক্রেটারি ওইবা লৈরে, ডাক্তারদা প্রোফেসরগী থাক য়ৌবা য়াওরে, ইঞ্জিনিয়ার লৈরে, এডভোকেট লৈরে, ব্যাংক সার্ভিসতা ডেপুটি জেনারেল ম্যানেজার, এসিস্ট্যান্ট জেনারেল ম্যানেজার ওইবা য়াওরে, কলেজকী ওজা ওইবা লৈরে, হাইস্কুল-প্রাইমারী স্কুলগী ওজাদি য়াম্না লৈরে, হেডমাস্টার ওইবসু য়াওরে। মপান থোক্‌না ইউরোপ-আমেরিকা-কানাডা অমসুং মিডল-ঈস্টকী লৈবাক কয়াদা লৈবা অমসুং থবক তৌনবসু য়াওরে। লল্লোন-ঈতিক্কী থবক্তা মায় ওনশিল্লকপসু কয়া য়াওনরক্লে। লাইরিক লাইশু হৈবগী চাং হেনগৎলকপগা লোয়না-লোয়ননা বাংলাদেশকী মণিপুরিশিংগী শেল-থুমগী ফিভমসু খরা খরদি ফগৎলক্লি হায়বসি হায়মনবা থোক্লোয়।

নাৎ-ফিদম অমসুং কুম্মৈ-ফিওংঃ

বাংলাদেশতা মপুঙ ওইরিবা মীওই ফুরূপ বাঙালিশিং অমসুং মখোয়গী চাওখৎলবা অমদি ময়েক লারবা লোন-সাহিত্য-সংস্কৃতিগী মৈঙাল্লক্তা মশীং লীকপা মণিপুরিশিংনা মশাগী মশক্তম ঙাক্‌নবা হোৎনবসিদি শরেং-পোরোমগুম্বা অচৌবা ঙাগী মরক্তা তুশোল্লবা ঙা-মচাশিংনা ৱানা হিংবগুমনি। ময়েক লারবা বাঙালি সংস্কৃতিগী মৈঙাল্লক্তা নোংমা নোংমগী মকশিল্লকখি মণিপুরী নাৎ-সংস্কৃতিগী শক্তম। অদুমকপু বাংলাদেশকী মণিপুরিশিং ঙসিসু মশাগী মশক্তম ঙাক্তুনা হিংলি। বাংলাদেশকী মৈতৈ খুন্দাবা খুলগী মশীং ৫০ রোমনি। খুল খুদিংদা লাইশং মান্দোব লৈনৈ। অচৌবা খুলদদি লাইশং মান্দোব অনী-অহুম লৈবসু য়াওরি। মান্দোবশিংদা নিয়ম নাইনা লাই সেবা তৌবা, সন্ধ্যা গৌরী, আরতিনচিংবা কৎলি। ধর্মগী ওইবা থৌরম পুম্নমক মান্দোবতা পাঙথোক্‌নৈ। হৌজিকসু মতম মতমদা নট সংকীর্ত্তন, ধুমেল, মহাসংকীর্ত্তননচিংবা পাঙথোকই। অদুবু মতমগা লোয়ননা মশেক মঙালদি খরা খরা মকশিল্লকলি। পুঙ য়ৈবা, ঈশৈ শকপা, দোহারগী মশীং ৱাৎশিল্লক্লে। নহারোলশিংগী মনুঙদা নৌনা তমখৎপগী থোইদোকপা ইহুন লৈতে। মহারাস জগোই চহীগী পাঙথোকই, অতৈ জগোইশিংসু মতম মতমদা পাঙথোকপা য়াওই। অদুবু মশীং লিকশিল্লক্লে। ঝুলোন জগোই সিলেট টাউনগী লৈকাই খুদিংদা মতম কুইনদগী পাঙথোক্তুনা লাকই। হৌজিকসু পাঙথোকই। অদুবু লৈকাই মশীং হন্থরক্লে। পেনা শকপা লৈত্রে। খোংজোম শকপা ওজা অমখক্তমক লৈরি। কনাসু নৌনা তমখৎনদ্রে। বাসোক শকনখিদ্রে, মসিগী নাৎকী খুদম’সিমা মাঙশিল্লক্কদৌরে। নুপী পালা মরক মরক্তা পাঙথোকই। স্টেজ পার্ফোমেন্সকীদমক মৈতৈ জগোই তম্নবদি কন্না চৎনরি। ন্যাশনাল নত্রগা লোকাল কুম্মৈ-ফিওং থোকপদা মৈতৈ জগোই উৎননবা শিল্পী য়াম্না থোকই। ন্যাশনাল কম্পিটিশন কয়াদা মৈতৈ জগোই শাদুনা ন্যাশনাল এওয়ার্ড ফংবা নুপীমচা নত্রগা নিপামচা য়াম্না থোক্লে। অতৈ অতৈ লমদসু ন্যাশনাল কম্পিটিশনদা শরূক য়াদুনা চ্যাম্পিয়ন ওইবা নত্রগা অতৈ মনা কয়াদং ফংঙকপা ফনা য়াম্না য়াওরে। মরূ ওইনা লাইয়েকপদা, ঈশৈদা অমসুং অভিনয়গী লমদনি অসিগুম্বা এওয়ার্ড ফংখিবশিং। ঈশৈগী লমদা মৈতৈ ঈশৈতা নত্তে বেঙ্গলীগী ঈশৈ শক্তুনা য়াম্না মিংচৎ ফংলবা কলাকারসু লৈরি। ধর্মগী ওইবা থৌরমশিং মরূ ওইনা কৃষ্ণজন্ম, রাধাজন্ম, কাং চিংবা হায়বা রথযাত্রা, মেরাগী নিয়মপালি, শজিবুগী থৌরম অমসুং অতৈ পূজানচিংবা লোইনা চাং নাইনা পাঙথোক্‌নৈ। হন্দক চহী খরসিদা নৌনা মৈতৈগী চৈরাউবগী থৌরমসু য়াম্না চংখোন্না পাঙথোক্‌নবা হৌরে। মেরাগী নিয়ম পালিদা হৌজিকসু লৈকাই খুদিংগী মান্দোবতা পালি পুদুনা ধর্মগী লাইরিক তাবা, ঙম্মোক কৎলগা প্রসাদী চাবা কায়দনা চৎনরি। মেরা-ৱা যুংবগী চৎনবীদি মতমগা লোয়ননা খরা খরা মাঙথরক্লে। রথযাত্রা হায়বদি কাং চিংবগী থৌরমসু নিংথিজনা পাঙথোকই। কাং চিংঙি, পালি পুদুনা খেচ্রি কৎলি, জয়দেব চোংঙি, করিমত্তা চিত্থদনা থৌরম পুম্নমক পাঙথোকই। সিলেট টাউনদদি কাং চিংবগী থৌরমসি মৈতৈগী য়াম্না চাউরবা থৌরম্মনি। চহী তরেৎ খুন্তাকপগী মতমদা মহারাজ চৌরজিৎ, মার্জিৎ অমসুং গম্ভীর সিংহনা সিলেট টাউনদা নিংথৌ কোনুং শেমদুনা লৈরম্বা মতমদুদগী চাউরাক্‌না ১৮২৩/২৪ দগী সিলেটতা কাং চিংবসি হৌখিমানি হায়বা থাজনবা লৈ। মফমদু হৌজিক মণিপুরি রাজবাড়ি হায়না খঙনরে। সিলেটকী মণিপুরি রাজবাড়িদগী য়াম্না থাপ্তনা সিলেট টাউনগী হেক ময়ায়মক্তদা রিকাবীবাজার হায়বা মফমদুদা মৈতৈগী কাং চিংফম মফম অমা সরকারনা পীদুনা লৈরম্মি। অরিবা রেকর্ডনচিংবদদি মফমদু ‘রথের স্থান’ হায়বদি রথ চিংবগী মফম হায়না শক্তাক্লম্মি। হৌজিক্কী অনৌবা রেকর্ডতদি মদু লৈখিদ্রে। করামচাউবা কয়ানা লম মচেৎ মচেৎ খোপচিনখিদুনা খরা ময়েং তারবসু, হৌজিক ফাওবদা লম খরদি সিলেট সিটি কর্পোরেশননা ঙাক শেন্নদুনা বাউন্ডারি খাজিল্লগা মৈতৈগী কাং চিংনবা মফমনি হায়না লৈরি। সিলেট শহরদা হৌজিক মৈতৈগী খুল ১২ লৈরি। হায়রিবা মৈতৈ খুল অয়াম্বদগী কাং চিংদুনা পুরক্লগা রিকাবীবাজারদা লৈবা কাং চিংফম মফমসিদা লোইনা পুল্লৈ। মদুগা লোয়ননা গৌড় ধর্ম চৎপা বাঙালি হিন্দু লাইশং খরদগীসু কাং খরা চিংঙকপা য়াওই। নুমিৎসিদা কাং ১৪/১৫ রোম পুল্লি। ময়াম পুল্লগা শ্রী জগন্নাথ দেবকী আরতি পূন্না তৌমিন্নৈ। আরতি-পূজানচিংবা পুম্নমক লোইরগা অমুক মশা মশাগী কাং চিংদুনা মরৈকায়দা হন্নৈ। কাং অকোনবা নুমিৎতমুক (ফিরা রথ) চপ চানা কাং চিংঙি-কাংগী হৌনবী থৌরম’পুম্বা লোইনা পাংথোকই। কাং চিংবা মতমসিদা করিগুম্বা অশোয়-অঙাম থোক্তনবা পুলিশনা চেকশিন্না ঙাকশেল্লি। কাংফমদা মৈতৈ নুপী নিপা অঙাং অহলগা লোয়ননা ময়াং পাঙল য়াওনা মী য়াম্না তিল্লি। সরকারগী ফম্নাইবশিং লাক্‌না কাং চিংবগী হরাউবদা শরূক য়ামিন্নৈ। সিটি কর্পোরেশনগী মায়কৈদগী মৈতৈ লাইশং মান্দোব খুদিংদা কাংগীদমক চহীগী ওইনা শেলগী তেংবাং অমা কায়দনা পী। অহৌবদগী অরোইবা নুমিৎ মাপলনি চুপ্না কাংফমগা থংনবা মফমশিংদা চাউনা মেলা ফম্মি। কাং চিংবদি মৈতৈতা নত্তে, বৈষ্ণব লাইনীং চৎপা বাংলাদেশকী মফম মফমদা লৈবা অতৈ বাঙালি হিন্দুশিংসু চিংঙি। অদুবু, অসিগুম্না কাং ময়াম অমা মফম অমদা পুল্লগা পূজা-আরতিনচিংবা পূন্না পাঙথোকমিন্নবা, নুপী-অঙাং য়াওনা মী য়াম্না তিনবা, অহৌবদগী অরোইবফাও নুমিৎ মাপলনি চুপ্না কাংগী মেলা চাউনা পাঙথোকপসিদি সিলেট শহরদা নত্তনা বাংলাদেশকী অতৈ মফমদা তৌবা লৈতে। ‘রথের মেলা’ নত্রগা ‘কাংগী মেলা’ হায়না খঙনবা মেলা অসিগীদমক্তা হৌজিক্তি সিলেটকী মীয়াম অপূম্বনা চহীচুপ্পা খৌরাংনা ঙাইনদুনা লৈ। কাংফম, মৈতৈগী কাং চিংবা অমসুং কাংগী মেলা পুম্নমক অসি ঙসিদি সিলেটকী চাউরবা কুম্মৈ অমসুং ঐতিহ্যগী শরূক অমা ওইরবনি।

শান্ন-খোৎনবগী মতাঙদা মতম্মা সিলেটকী মৈতৈশিং ন্যাশনাল লেভেলদা শক তাকপা ঙম্বগী ফিবমদা লৈরম্মি। মরূ ওইনা ফুটবোল শান্নবা, ভলিবল, ব্যাডমিন্টন, দাবানচিংবা মশান্নদা য়াম্না মমিংচৎলবা শান্নরোয় কয়াদং থোক্লম্মি। হৌজিক্তি অদুগুম্বা শান্নরোয় থোকখিদ্রে। মৈতৈগী থায়নদগী চৎনরক্লবা মশান্ন কাং শান্নবা মরক্তা মুৎথরুরবসু হৌজিক নৌনা অমুক কন্না চৎনরক্লি। কাং ফেডারেশননচিংবা লিঙ্খৎতুনা চাং নাইনা কাং কম্পিটিশনশিং পাঙথোক্তুনা কাং শান্নবা কন্না শৌগৎলক্লি। বাংলাদেশকী কাং টিম মণিপুরদা চৎনফাও কাং শান্নরুরে। শজিবুদা লিকোন শান্নবগী চৎনবীসু লৈরি। হন্দক মৈতৈ চৈরাউবদা লিকোন শান্নবগী কম্পিটিশনসু পাঙথোকখি।

লোন-সাহিত্যগী মতাঙঃ

জাতি অমা হিংনা লৈবদা লোনগী শরূক য়াম্না চাউই। লোন লৈত্রবদা নত্রগা মুৎখ্রবদা মীওই ফুরূপ অমা মশাবু জাতি অমনি হায়না খক শক তাকপা ঙম্লোই। ঙসিগী পৃথিবীসিদা অচৌবা ফুরূপকী মঙাল চাউবা লোন-সংস্কৃতিগী মরুমদা ফুরূপ মচা কয়াগী লোন-সংস্কৃতি মাঙখিদুনা জাতি’দুমা মাঙখিবগী খুদম কয়াদং লৈরিবনি। বাংলাদেশতা মণিপুরিশিং মীশীং য়াম্না লীকই, মশাগী মমালোন ইমুঙ মনুঙদা শিজিন্নবা নত্তনা অতৈদা শিজিন্নবগী খুদোংচাবা লৈতে। সরকারগী থোংদসু মণিপুরি লোননা চিংবা বাংলাদেশকী অপীকপা ফুরূপশিংগী মমালোন ওইরিবা লোনশিংবু শক খঙবীবা নত্রগা লোনসিনা লাইরিক লাইশু তম্বগী খুদোংচাবা লৈতে। অদুনা মণিপুরি লোন অসি য়াম্না লিরবা অমসুং চংখোল্লবা লনগৈ অমগী মপু ওইরবসু বাংলাদেশতদি লোন অসি নোংমা নোংমগী শিথরক্লি। অনৌবা চারোলশিংনা লোন অসি ঙাঙনরক্তবা, লোনসি ইবা পাবা থোক্তবা অসিগুম্বা পুকনিং হন্থবগী মরমশিংসি খরা খরা’সুম হেনশিল্লকখি। অসিগুম্বা তাঞ্জা অমদা লোন অসিবু হিংহন্দুনা থম্বা অমসুং চাওখৎহনবগী মীৎয়েংদগী ‘বাংলাদেশ মণিপুরী সাহিত্য সংসদ’ হায়বা সংস্থান অসি শক্তম লৌখিবনি অমসুং সংস্থান অসিনা চাং নাইনা মৈতৈলোনগী সাহিত্য চেফোঙ ফোঙবা, সাহিত্যগী সেমিনার, সম্মেলননচিংবা পাঙথোকপা, শৈরেং, ৱারেং, ৱারীমচানচিংবা সাহিত্যগী লাইরিকশিং ফোঙবা অসিগুম্বা খোঙথাং কয়াদং লৌখৎলি। মদুতসু নত্তনা সাহিত্য সংসদনা ‘মণিপুরী ভাষা উৎসব’ কৌবা থৌরম অমসু চাং নাইনা পাঙথোকপা হৌরকই। থৌরম অসিগী মখাদা মৈতৈলোনদা ইবা মণিপুরী লোন, সাহিত্য, সংস্কৃতি অমসুং ইতিহাসকী মতাঙদা ইবা লাইরিক অমা ফোঙলগা স্কুলগী থাক্তা তম্লিবা মহৈরোয়শিংদা য়েন্থোকই অমসুং অকক্‌নবা নুমিৎ অমদা লাইরিক অসিগী মথক্তা পরীক্ষা লৌই। মদুদা মায় পাকপা মহৈরোয়শিংবু মনা-মথুম পীদুনা থৌগৎনবা হোৎনৈ। মসিগুম্বা খোঙথাং কয়াগী মহৈ ওইনা ঙসি বাংলাদেশকী অনৌবা জেনারেশনগী মহৈরোয়শিংগী মনুঙদা মমালোন ইবা, পাবা অমসুং নুংশিবগী ইহুন অমদি পোকহনবা ঙম্মে। মদুগীসু মথক্তা মণিপুরী ভাষা গবেষণা ও উন্নয়ন সংস্থা হায়বা সংস্থান অমনা বাংলাদেশকী সরকারদা প্রি-প্রাইমারি অমসুং প্রাইমারি থাক্তা মণিপুরি মহৈরোয়শিংগীদমক্তা মণিপুরি লোন তম্বগী খুদোংচাবা পীননবা কন্না দাবি তাল্লি। মরকসিদা মণিপুরদা মৈতৈ ময়েক চৎনরকপগী তুং ইন্না বাংলাদেশতসু সরকারগী থোংদা মণিপুরি লোননা লাইরিক তম্বগী খুদোংচাবা ফংলবদি মৈতৈ ময়েক্‌না লাইরিক তম্বা হৌননবা হায়না অঙাংশিংবু মৈতৈ ময়েক মশক খঙহনবগী মীৎয়েংদগী মৈতৈ ময়েক তম্বগী লাইরিক অমা ফোঙলে অমসুং স্কুল লিংদুনা মৈতৈ ময়েক তম্বিবগী থবক চৎথবা হৌরে। মায়কৈসিদা মণিপুরী ভাষা গবেষণা ও উন্নয়ন সংস্থানা অকনবা খোঙজং চঙশিল্লি। মৈতৈ স্কুলদা তম্লিবা মহৈরোয়শিং মৈতৈ ময়েক মশক খঙলে, মৈতৈ ময়েকতা ইবা লাইরিক পাবা-ইবা ঙম্মে।

মণিপুরি সাহিত্যগী ঈচেল অমসু হৌজিক বাংলাদেশতা কন্না চৎথরক্লি। মণিপুরি লোন অমসুং সাহিত্যবু নুংশিদুনা মীওই কয়ানা সাহিত্য চর্চাগী লমদা খোঙদোয় হুল্লি। শৈরেং, ৱারেং, ৱারীমচানচিংবা লাইরিক কয়াদং ফোঙনরক্লি। হৌজিক ফাওবদা বাংলাদেশতা ফোঙবা মৈতৈ লোনদা ইবা সাহিত্যগী লাইরিক য়াঙ্খৈরোমদি শুরে। ঐখোয়না আশা থম্লি মণিপুরি সাহিত্যগী মসিগী খোঙজেল অসি অতৈসু মপুঙ মরৈ ফারক্তুনা নোংমদি শোয়দনা মণিপুরি সাহিত্যগী মরূ ওইবা লনগৈদা বাংলাগী অইবশিংনা অচৌবা শেন্থাং অমদি হাপ্পা ঙমগনি।

ৱারোইশিনঃ

বাংলাদেশকী মণিপুরিশিং মশীং লীকপগী মতীক য়াম্নসু চোইজাইননা তাই। অদুনা হিংননবগী লানফমদা মখোয়না থেংনরিবা লান অসি য়াম্নসু মরম য়াম্মি। অদুমক্তদা লমদমসিগী মণিপুরিশিং ঙসিসু মশাগী নাৎ-সংস্কৃতি, লোন অমদি হৌন-লোনচৎ কয়াদং ঙাক্তুনা চৎলি; ঙসিফাওবদা লমদম অসিগী মীশীং য়াম্লবা মীয়ামগী মরক্তা মশাগী নাইতোম ওইবা মশক্তম ঙাক্তুনা হিংলি। তোঙান-তোঙানবা সংস্থান কয়াদংনা মায়কৈসিদা লেপ্তনা অমসুং হনবা লৈতনা হোৎনরি। হন্দক মরকসিদা ইন্ডিয়ান হাই কমিশনগী মায়কৈদগী ইন্ডিয়া সরকারগী শেলগী মতেংনা মৈতৈ য়াম্না খুন্দাবা মফম ভানুগাছতা চহীগী রাসপূর্ণিমা পাঙথোকলিবা মফমদুদা মণিপুরী কমপ্লেক্স অমা শাখ্রে। কমপ্লেক্স অসিগী মনুঙ চন্না জগোই-ঈশৈ তম্বগী কালচারাল সেন্টার অমা, ওপেন এয়ার স্টেজ অমা, কম্পিউটার সেন্টার অমা, ফিশা-লোনশাগী ট্রেনিং সেন্টার অমা অমসুং অতৈ প্রোজেক্ট কয়াদং য়াওরি। মসিগী কমপ্লেক্স অসিগী মরম ওইনা বাংলাদেশতা লৈবা মণিপুরীশিংগী নাৎ-সংস্কৃতি চর্চাগী মতাঙদা অতৈসু খুমাঙ চাউশিল্লকখিনি হায়বগী থাজবা ফোঙদোকচরি।