বাংলাদেশতসু অথৌবশিং নিংশিং নুমিৎ পাংথোকখ্রে
সিলেট, আগস্ট ১৪ : বাংলাদেশকী মফম কয়াদসু ব্রিটিশকী মায়োক্তা লান্থেংনখিবা থৱাইনা পোন্থা পিখ্রবা অথৌবশিংগী মফমদা হৈকৎ লৈকৎ কৎতুনা ইকায়খুম্নবা উৎখ্রে। ঙরাং ১৩ আগস্ট থাংজ নুমিৎ নুংথিল পুং মঙা তাব মতমদা মণিপুরী কালচারেল একাডেমী, নয়াপত্তন, আদমপুরবাজার’না শিন্দুনা থৌরম অমা পাংথোকখি হায়দুনা একাডেমীগী থাদোরকপা চেরোল অমাদা খংহনলকখি। একাডেমী অসিগী প্রেসিডেন্ট থোঙাম পলাশ সিংহনা ময়াই তাংবল লৌরগা মীথুংলেনদা শান্ত কুমার সিংহ, সেক্রেটারী, মণিপুরী প্রাথমিক শিক্ষক সমিতি, বৃন্দারানী সিনহা, ফাউন্ডার, মণিপুরী ভাষা প্রশিক্ষণ কেন্দ্র, অবুজম মণিভদ্র, সেক্রেটারী, ইন্টারন্যাশনাল মণিপুরী এসোসিয়েশন, বাংলাদেশ চ্যাপ্তার, হামোম প্রবিত, সেক্রেটারী, বাংলাদেশ মণিপুরী সাহিত্য সংসদ, কমলগঞ্জ মশা, কন্থৌজম শিল্পী, ফাউন্ডার, হৈরোল অতিথি ওইনা শরুক য়াখি। খুরাইজম প্রমেশ্বরনা কন্ডাক্ট তৌরদুনা মহৈরোয়শিংগী শৈরেং চাংদম্নবা অদুদা ক্লাশ অমা, অনী (ক গ্রুপ) ক্লাশ অহুম-মঙা (খ গ্রুপ) ক্লাশ তরুক-নিপাল (গ গ্রুপ) খায়দোক্তুনা চাংদম্নবগী শরুক অমসু য়াউখি হাইনসু হায়রি।
অসিগুম্লবা ইজাতিগী ওইবা থৌদোক ৱাথোক কয়াতং ঐখোয়না থৌরম ওইনা পাংথোক্ত্রগদি তুংদা হৌরক্কদৌরিবা অঙাংশিংদা খংহন্বদা অৱাবা অমা ওইনা মায়োক্নরনি। মদুনা চহীগী পাংথোক্নবা হায়দুনা থৌরমদা শরুক য়াখিবা ৱাঙাঙলোয়শিংনা হায়বিরম্মি । অরোইবদা শৈরেং চাংদম্নবদা মথং মনাও ওইবশিংদা প্রাইজ য়েন্থোকখি হায়দুনাসু খংহনলকখি।
অমরোমদা বাংলাদেশ মণিপুরী সাহিত্য সংসদনা শিন্দুনা বাংলাদেশকী সিলেটতসু ঙরাং ১৩ আগস্ট ২০২২ অথৌবশিং নিংশিং নুমিৎ পাঙথোকখ্রে হায়দুনা চেরোল অমনা খংহনলকখি। সংসদকী সভাপতি এ কে শেরামনা থৌরম মপূ ওইদুনা অমসুং জেনারেল সেক্রেটারি নামব্রম শংকরনা কনডাক্ট তৌদুনা পাঙথোকখিবা থৌরমদুদা মমালমদমগী নীংতম্বা ঙাকপগীদমক থৱায়গী পোন্থা পীখ্রবা মণিপুরী অথৌবশিংবু ইকাইখুম্নবা উৎতুনা ৱা ঙাঙবিখি নীংতম লান্মী মনমোহন সিংহ, বিকাশ মীতৈ, কেএইচ. সমেন্দ্র সিংহ অমসুং নীহার রঞ্জন শর্মা। লন্নায় লেংবা শৈরেং পাথোকখি কবি রওশন আরা বাঁশি খূৎহৈবম। অমসুং থৌরমগী অহৌবদা ময়াম চঙনা অথৌবশিংগী মিতমদা হৈকৎ-লৈকৎ তৌদুনা ইকাইখুম্নখি হায়দুনসু খংহনলকখি।
0 কমেন্ট:
কমেন্ট তৌবিয়ু