আপডেট:
image

বদরুন সাজবমগী ৱারীমচা — হুকখিদ্রবা কুন্দো পরেং

ইমাগী সেবা ঙমহৌদ্রবসু লৈবাক্কী সেবা তৌবা ফংজরবদি নচাগী পূন্সিদি মহৈ য়াল্লে। ইমা লৈবাকপু নোংমতা ওইরবসু ঙাকচবা ঙম্লবদি নচাগী পূন্সিদি য়াইফরবা পূন্সিনি। চহী চাম পূন্সিরগা লৈবাক্কী দমক অফবা থবক অমত্তসু তৌরমদনা শিখিবদগীদি নোংমতা ওইরবসু ভারত ইমাগী সেবা তৌরম্লগা শিখ্রবদি নচাগী পূন্সিদি মপুং ফারবনি। মণিপুরগী ইতিহাসতা থৌনা ফরবা মচা কয়া বীর টিকেন্দ্রজিৎ, থাঙ্গাল জেনরেল লীন্থোইঙম্বী মখোয়শিংদুসু মীতৈ ইমানা পোকপনি। ইমাগী চিম্বালদগী থোরকলিবা ৱাহৈশিংদু পকচদে। কৈদৌঙৈদসু মীতৈ ইমানা ঙাকপীরোই। ইমাগী য়াথং ইন্দে হায়দুনা নচাবু ৱারৌগনু। মতম খুদিং নচাগী মঙ্গল নীবিয়ু লৈশেম্বা ইবুংঙোদা।

 

-ৱা অমত্তা হংজগে মমা, শেংনা খুম্বীয়ুকো।

 

-অয়ুক ঙন্তাসিদা করিনো ইবেম্মা হংগেগা খোৎকেগা, লাইরিকতুম পাথোকলুচো। মমা পাউখুম পীবা শংদে, থবক থনা লোয়শিনগে।

 

-মমা, ঐগী ৱাহংগী পাউখুম পীদ্রিঙৈ মমা থবক লোয়শিম্বসু য়ারোই, ঐসু লাইরিক পারোয়।

 

-ফরে ইবেম্মা হংবীরক্লো, মমাদি লাইরিকসু নীংথিনা হৈহৌদে, অরুবদি হংলক্কনু মমা খুম্বা ঙম্মোয়।

 

-অদুবুরো মমা, লাইরিক্কী ৱা নত্তেদা মমানা খঙবা ৱানি শেংনা খুম্বীয়ুকো।

 

-হংলক্লোনে ইবেম্মা। থবক ময়াম অমা ইমাংদা পরেং লেংলিবসি লোয়শিল্লকপদদি নঙগী স্কুল কাবগী মতম্না হাল্লক্লনি।

 

ঐগী ইচানুপী রোজীসি ৱাহং হংগল্লি। মানা তারক উরকপা খুদিং ঐঙোন্দা হংবা মাগী মথৌনি। মাগী নৌজরিবী কোক মচাসিদা মাগী মমামুক খঙ-হৈবা মীওই মালেমদা অনী শুদে খল্লমাল্লে। ঐসু ঐনা খঙজবা খুদিং মাঙোন্দা শেয়ার তৌজৈ। নোংমতসু নাথৈদুনা পাউখুম পীরুদে। অচুম অচুমবা পাউখুম পীনবা হোৎনৈ।

 

-য়ুম পান্দবা নুপীসু লুখ্রা ওইব্রা মমা?

-য়ুম পানদবা নুপীদি লৈশাবীনি। লৈশাবীনা লুখ্রা ওইবা হৌনদে। য়ুম পাল্লবা নুপীগী মপুরোইবা লৈখিদ্রবা নুপী অদুবু লুখ্রাবী কৌই।

-মমাং লৈকাইগী চেচে মালতীসে ময়ুমসু পান্দে হায় অদুগা মাবু লুখ্রাবীনি হায়রীসিনা করিগীনো?

 

মতাংসিদা রোজীগী মপা কদোমদগীনো ফৎ চংশিল্লকই “মসি অঙাংসি য়াম্না খুমাং চাওশিল্লেকো করি ৱাহংনো নঙনা হংলিবদো? মীনা তাখ্রগা করি হায়খিনি লাইরিক পারুচো” হায়না ঙাংবদগী ইচানুপী রোজী মাগী লাইরিক পাফমদা চংখি। রোজী মপাবু য়াম্না কিজৈ, মপানা হায়বা ৱা মানা ইন্দবা লৈতে।

 

অসুক পীক্লিবী ইচানুপীদা থম্মোয় কায়রবা ৱারীসে করম্নসু শারুগনি। নুংশিববু থম্মোয়দা য়োক্তুনা থম্লীবি মালতীবু করেম-কথাংনবীরিবা সমাজসিগী মশকসিবু ঐগী চমজরবী ইচানুপীনা ওন্থোকপা ৱাহং অমা হংলকপদগী ঐগী ঙসিগী পূন্সি শিন্থাদা পূক্নিংচংবা ঙমদে। নীংশিংবদা থম্মোয় মহী চেল্লবা থৌদোক কয়াদু মিৎমাংদা জগোয় শাররি।

মমাং লৈকায়গী মালতী লুখ্রাবী নত্তে। ইকু অতোম্বগী মচানিপা শরৎকা চহী কয়া নুংশিনরম্লগা শরৎনা কারগিলগী লান্ফমদা সহিদ ওইখিবদগী লুখ্রাবীগী ফিজোল শেৎতুনা চম্লবা পূন্সি অমদা খোংদাজরীবিনি। মালতী অমসুং শরৎ লুহোংগদবা নুমিৎ কুন্নি ৱাৎলিঙৈদা ইনাওনিপা শরৎ লৈখিদবনি। শরৎ মেট্রিক পাশ তৌরগা লাইরিক মখা তমথখো হায়বা য়াদনা সিপাই চংখিবনি। মমা ইবেম্মা সনাহম্বীনা য়াম্না খামজৈ।

 

-ইবুংঙো নঙনা চংলিবা থবকসি ইমাদি সুকয়া য়ানিংদে। নপাসু মনুং মতম চাদনা লৈখিদে। নচিন-ননাওসু নিপা অনী শুবা নত্তে। নচল পীশকসিগা নঙগা হন্না হন্না থিবদা অনীদগী হেন্দ্রবনি। হৌজিকসু মতম লৈরি লাইরিক মখা তমথখো। নোংমৈ পায়বা থবকসে ইমাদি কিজৈ। নঙনসু কাপহন্নিংদে, নঙবুসু পালহন্নিংদে। ইমানা হয়েং অহল ওইরক্লগা শোল্লক নারক্লগসু ইমাগী সেবা মতম চানা তৌবা ফংদবা থবকতুবু ইমাদি পামজখিদ্রেদা।

 

-লান্মীদগী হেন্না চাউবা ঈজ্জৎ লৈবা থবকসিবু কদায়দা লৈরমগনি। ইমাগী সেবা ঙমহৌদ্রবসু লৈবাক্কী সেবা তৌবা ফংজরবদি নচাগী পূন্সিদি মহৈ য়াল্লে। ইমা লৈবাকপু নোংমতা ওইরবসু ঙাকচবা ঙম্লবদি নচাগী পূন্সিদি য়াইফরবা পূন্সিনি। চহী চাম পূন্সিরগা লৈবাক্কী দমক অফবা থবক অমত্তসু তৌরমদনা শিখিবদগীদি নোংমতা ওইরবসু ভারত ইমাগী সেবা তৌরম্লগা শিখ্রবদি নচাগী পূন্সিদি মপুং ফারবনি। মণিপুরগী ইতিহাসতা থৌনা ফরবা মচা কয়া বীর টিকেন্দ্রজিৎ, থাঙ্গাল জেনরেল লীন্থোইঙম্বী মখোয়শিংদুসু মীতৈ ইমানা পোকপনি। ইমাগী চিম্বালদগী থোরকলিবা ৱাহৈশিংদু পকচদে। কৈদৌঙৈদসু মীতৈ ইমানা ঙাকপীরোই। ইমাগী য়াথং ইন্দে হায়দুনা নচাবু ৱারৌগনু। মতম খুদিং নচাগী মঙ্গল নীবিয়ু লৈশেম্বা ইবুংঙোদা।

 

মচাগী ৱাহৈশিংদু তাবদা হায়নিঙাই লৈতনা ইকাইবা পোকখি সনাহনবী। মানা খল্লম্লিবা ৱাখল অদো অরান্বনি হায়না খনজখি। মচাগী মফমদা মায়থিবগা লোয়ননা মচাদা অয়েৎপা পীখিদ্রে। হরাও হরাওনা মচাবু বিদাই পীরগা থবক মফমদা চৎহনখি। মহাক ভারত ইমাবু ঙাক শেল্লিবা লান্মী অমগী মমানি হায়না থম্মোয়দা চাওথোকচবা পোকখি মচানা থা থাগী তলব থারকলবনিনা ৱান নংনা হিংজরম্বা পূন্সিদুসু শিৎ নান্ন পাঞ্জরে। খঞ্জৈ মথম্মোয়দা ঐগী ইচাদি সনা মতুমনি শাগৈগী মৈতাল অরাবনি। মাগী ৱাখলবু হন্না হন্না থাগৎচৈ সনাহম্বী।

 

অরেপ্পা লৈতনা চেন্থরিবা মতমগী ঈচেলগী মতুংইন্না শরৎসু মপুংফাবা পাখং হায়বদু ওইরে। মমা ইবেম্মা সনাহম্বীসু মানা ছুটি লাক্লিঙৈদা লুহোংথোক্লগে হায়দুনা মতম কূইনদগী মচানিপাগা নুংশি মরী লৈনরক্লবী মালতীবু মৌ হায়জরুরে। মাইগৈ অনীমক হরা হরাও য়ানদুনা থা অমগী মতুংদা লুহোংবা লেপনরে অদুবু লায়বকথিবদি লুহোংগদবা থামুক্তা ঙাইরিঙৈদা মখোয়গী ইউনিট অদো কাশ্মীরদা পোস্টিং ওইরে হায়দুনা হায়রকপদগী কাশ্মীরগী দমক খোংশানখি। কারগিলগী লানফমদুদা তুম্বা চাবা খঙদনা ভারতকী লান্মীশিংনা মায়োকনরিঙৈ তাঞ্জাদুদা য়েকনবগী নোংমৈ গুলিনা পানদুনা সহিদ ওইখি শরৎ। নুমিৎ অদুদগী হৌনা মালতীনা লুখ্রাবীগী ফিজোল হোংখি। মাগী ইমুং মনুংনা মালতীবু লুহোংনবা থৌরাং কয়ারক হন্না তৌখি অদুবু পূম্নমক নূঙনা ঈশিং চায়বগা পাংখক ওইখি।

 

শরৎকী অশিবা হকাচং মতমচানা পুরক্তুনা লৈবাক্কী হৌনবী ঈজ্জৎকা কোন্ননা পোৎলোয়খি। মমা ইবেম্মা সনহম্বীসু বীর অমগী মমাগী শক্তম লৌদুনা মচাবু অরোইবা বিদায় পীখি। শরৎকী অশিবা হকচাং পুরকপদা লোয়নরকখিবা লান্মী অমনা চিঠি অনীখক খুৎশিন্নরৈ চিঠি অমনা মমাগী মিংদনি অতোপ্পা অমদুনা মাগী নুংশিরবী মালতীগী মিংদনি। মালতীগী চিঠি অদুদা অসুম্না ইরম্মী।

ঐগী নুংশিজরবী মালতী

 

চিনবালসিনা হায়বা ঙম্লমদ্রবা ৱাহৈ খরা চেজেৎসিনা ইহুৎ শিন্দুনা হায়জগে। মতম অসি য়াম্না তেল্লি। য়েক্নবগী বোম টোপকী খোঞ্জেলসি নকশিল্লক্লে। মালতী নঙ-ঐগী লুহোংবদো পাংথোক্কনি হায়বা থাজদ্রে। লানফম অসিদগী অমুক হল্লক্কনি হায়বগী থাজবুস মমি শাম্লক্লে। করিগুম্বা হল্লক্লবদি নঙগা ঐগা লুহোংসি ঐনা লানফম অসিদা থৱায় থাখিবা থোক্লবদি নঙগী শরৎ লৈবাককী দমক থৱায় থাখিবা থোক্লবদি পোকপগী মহৈ য়ানখ্রে খননা মিৎতগী পি তারক্কনু অদুগা মতম চানা নঙ লুহোংখো নঙগী ইমা বাবাবু নিংবা কায়হনগনু। লাইবক ফবা কনাগুম্বা অমগী ঙকশমদা ঐনি খন্না কুন্দো পরেং হুকউকো। নঙগী শুমাং মতোন্দা শাৎহৌরিবা কুন্দো লৈরাংদো ওইহনগনু “হুকখিদ্রবা কুন্দো।”

 

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু