আপডেট:
image

বঙ্গবন্ধুগী লৈবাক্তাঃ মীতৈ ময়েক্তা ফোঙখ্রে

ইম্ফাল, আগস্ট ২৭ : শক্নাইরবা অইবা দাঃ থোকচোম ইবোহনবীনা ইবা ‘বঙ্গবন্ধুগী লৈবাক্তা’ হায়না মিংথোনবা লমকোই ৱারী লাইরিক অমা ঙসি ফোঙখ্রে। কৈশাম্পাৎ থিয়াম লৈরক মচিন্দা লৈবা পোক্নফমগী অফিসতা পাঙথোকখিবা ‘বঙ্গবন্ধু লৈবাক্তা’ কৌবা লাইরিক অসিগী মৈতৈ ময়েক্কী অনীশুবা খূৎয়েক্তা ফোঙবগী থৌরম অদুদা পোক্নফম পাউচেগী এদিতর অরিবম রোবিন্দ্রো শর্ম্মা, শক্নাইরবা অইবা অমসুং কবি য়ুম্লেম্বম ইবোমচা অমসুং রাজকুমার ভুবনসনানা মরুওইনা মীথুংলেন ওইখি।

ঙসি ফোঙখিবা ‘বঙ্গবন্ধুগী লৈবাক্তা’ হায়রিবা লাইরিক অসি মণিপুর য়ুনিভার্সিটিগী বিএ-দা মণিপুরী কোরগী তেক্সবুক অমসুং মণিপুর য়ুনিভার্সিটি ওব কালচারদা এম এ মণিপুরীদা তম্বা লাইরিক্নি। মসি মহৈরোয়শিংদা ফংহন্নবগী পান্দমদা ফোঙদোকপনি। শক্নাইরবা অইবা দাঃ থোকচোম ইবোহনবী সিংহ ইং কুমজা ১৯৫১ গী এপ্রিল ৫দা শীংজমৈ চোংথাম লৈকায়দা পোকই। দিএম কলেজ ওব আর্তসকী মণিপুরী দিপার্তমেন্তকী এসোসিয়েত প্রোফেসার অমসুং হেদ ওব দিপার্টমেন্ট ওইরম্মী। মতম খরা থৌবাল কলেজদসু মণিপুরীগী ওজা ওইরম্মী। ইং ১৯৮৩-৮৪দা নহারোল সাহিত্য প্রেমী সমিতি, ইম্ফালগী জেনারেল সেক্রেটারী, ইং ১৯৮৯-৯০ দা ৱাখলগী সম্পাদক, ইং ১৯৯৪-৯৭ ফাওবা মণিপুরী সাহিত্য পরিষদ, ইম্ফালগী জেনারেল সেক্রেটারী ওইনা থৌদাং লৌরম্মী।

লোয়ননা সাহিত্য একাদেমীগী মণিপুরী এদভাইজরী বোর্দকী তার্ম অমগী মেম্বারসু ওইরম্মী। বোর্দ ওব সেকেন্দরী এদজুকেসন মণিপুর অমদি কাউন্সিল ওব হায়ার সেকেন্দরী এদজুকেসন মণিপুরগী মেম্বারসু ওইরম্মী। মণিপুর ষ্টেত কলা একাদেমী ইম্ফালগী জেনারেল কাউন্সিলগী মেম্বারসু ওইরম্মী। মণিপুর স্টেত কলা একাদেমী ইম্ফালগী জেনারেল কাউন্সিলগী মেম্বারসু ওইরম্মী। মণিপুরী সাহিত্য পরিষদ ইম্ফাল অমসুং নহারোল সাহিত্য প্রেমী সমিতি ইম্ফালগী লাইফ মেম্বারনি।

অইবা অসিগী ফোঙখ্রবা লাইরিকশিংদি, অঙনবা মতমগী মণিপুরী সাহিত্যদা ইমেজরী (নৈন-ৱারেং, ১৯৯৭), বঙ্গবন্ধুগী লৈবাক্তা (লমকোই ৱারী, ২০০২), শগোল গাড়ী থৌবা গুলামদিন অমসুং অতৈ ৱারী খরা (হন্দোকপা, ২০১৩) অমসুং মণিপুরীদা পুন্সি ৱারীগী সাহিত্য (২০১৭, নৈন-ৱারেং) হায়রিবশিং অসিনি। মহাক্কী ‘বঙ্গবন্ধুগী লৈবাক্তা’ হায়রিবা লাইরিক অসিদা ইং ২০০৫ দা সেরাম মুক্তা সাহিত্য মনা অমসুং ইং ২০০৭ তা মণিপুর স্টেত কলা একাদেমী এৱার্দ পীদুনা মহাকপু ইকায় খুম্নখ্রে। অদুগা ‘মণিপুরীদা পুন্সি ৱারীগী সাহিত্য’ হায়না মিংথোনবা মহাক্কী নৈন-ৱারেং লাইরিক অসিদা ইং ২০২১ দা সাহিত্য একাদেমী এৱার্দ ফংখি। ইংরেজীদা মাধবরাম ৱাহেংবা কৌবা মোনোগ্রাফ অমসু সাহিত্য একাদেমীনা ইং ২০১৬ তা ফোঙখ্রে।

সোর্স: পোক্নফম  

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু