• 631
• ১৬ই জুলাই ২০২২ ইং
• Share on:

পুন্সিবু লাচল্লিবা কবি মৈ ভগৎকী শৈরেং “ অপাইবা তাঙ্গোই”- মিৎয়েং অমা -- তোংব্রম অমরজিৎ

ৱাহৈশিংদা য়াওরি খুনাই অমগী পুৱারী। অদুগা চিনবুং ৱারীশিংদা হিংদুনা লাক্লি  অদুঙৈগী লীংজেল থৌনা ফরবা ইপা ইপুশিংগী থৱায়শিং। ঐখোয়গী শক্তমসু কন্দুনা লাক্লি ৱাহৈশিংনা, ইমালোন্না। ঙসি মলেমগী লাক্লিবা অওনবা অহোংবা কয়াসিদা মৈতৈ ফুরুপ্না করম্না মপাঙ্গল কন্না থৌনা লৈনা হিংদুনা লৈগনি হায়বসি হৌখ্রবা পুৱারীগী লাতমশিং নৌহৌননা অমুক হাংদুনা য়েংদবা য়ারোই। অসিগুম্বা তাংককশিংদা ঙসি হৌরক্লিবা মীরোলদি মীরোল ঙাংলগা অমদি মীগী লোন্দা লাইরিক তম্লগা হেন্না লৌশিং লৈবা ওইনা লৌনবগুম তৌরকপসিদা অশৈবা ভগৎ তুমিন্না লৈথোকপা ঙমদে। কংশিল্লক্লবা তুরেল লাইজ ইচেলবু লোইবী চীংজাও নপোমদা তলা পমেল নচুম্বা থাদুনা মহৌশাগুম লুরবা লাইজ ইচেল চেলহনবা পাম্লি।

লাইরিক্কি মমিং- অপাইবা তাঙ্গোই(২০২১)
অইবা- মৈ ভগৎ 
লাইরিক্কী মখল- শৈরেং
অফোংবা- দ কলচরেল ফোরম, মনিপুর 
লাইরিক্কী মখুম- অহৈবম পদ্ম সিংহ 
লাইরিক্কী মমল- লুপা ২৫০/- 
লমায় মশিং- ১৫১

মৈ ভগৎ আসামগী হাইলাকান্দি জিলাগী লৈহৌপোকপীদা পোকই। এম বি এ ফাইনান্সনি অমসুং কোর্পোরেট হাউস অমদা সিনিয়র মেনেজর ওইনা হৌজীক হৌজীক থবক তৌরি। খুল্লাকপম চনু পুস্পাঞ্জলিগা য়ুম্বানমিন্নদুনা গুৱাহাটীদা লৈরি। মহাক ওল আসাম মনিপুরী স্তুদেন্স য়ুনিয়নগী জেনরেল সেক্রেটরিসু ওইরমখি। খোরিলোন অমসুং নাৎকা মরি লৈনবা লূপ তরাগী লাইফ মেম্বরসু ওইদুনা থবক থৌরম কয়াদা থৱায় য়াওনা চেন-চোংলিবা অইবনি। ২০০৬তা মহাকনা ইবা অহানবা শৈরেংগী লাইরিক “তানিংদে বসন্তগী খোঞ্জেল” হায়বসি ফোঙদুনা মনিপুরী খোরিলোনদা শৈরেংগী য়ুম্ফম থোনবা হৌরকখি। মসিগী মতুংদা ২০১৪দা অমুক “ৱাথোক” হায়না মিংথোনবা শৈরেং অমুক খুদোল তমলকখি। মথংদা “কাউবা ঙম্লরোই পুন্সিদা” ২০১৭ অমুক ফোংলকখি। লাইরিক অহুম্মক শৈরেং ঙাক্তনি। মসিগী মতুংদা মরিশুবা শৈরেংগী লাইরিক ওইনা “অপাইবা তাঙ্গোই” ২০২১ ফোংলকখি। অইবা মৈ ভগৎনা এদিটর এক্সিক্যুতিভ এদিটর ওইদুনা ইন্দিয়াগী লোণ তরাগী খোমজিনবা শৈরেং লাইরিক “শ্রীখন্দ শেতু” য়াওনা চেফোঙ/ সোভেনিয়র/ এন্থোলোজি মঙা ফোংখিবা লৈরে। হিন্দিদগী মনিপুরীদা হন্দোকপা রেদিও দ্রামা মচা নিফুমঙা ওল ইন্দিয়া রেদিও ইম্ফালদা ব্রোদকাস তৌখিবা লৈরে। অইবা ভগৎ ওল ইন্দিয়া রেদিও ইম্ফালগী শকখঙলবা ঈশৈ ময়েক ইবা অমসুনি। মহাক্কী ফোংখ্রবা লাইরিকশিংদা তোঙান-তোঙানবা মনিপুর অমসুং মপান মনিপুরদা লৈবা খোরিলোণগী লূপশিংনা সাহিত্যগী মনা অহুমসু পীদুনা ইকায়খুম্নখ্রবা কবিনি।  
চৎনরিবা লম্বী পুম্নমক পন্থুং অমদি শোয়দনা লৈফম থোকই। তৌইগুম্বসুং পন্থুং অদু য়ৌনবা হোৎনগে হায়রবদি ইপা ইপুনা য়াৎলম্বা অমসুং চৎলম্বা লিক্লম অমদা চৎতবা য়ারোই হায়বগী পাঊজেল পুরিবা শৈরেংনি “লীক্লম থিবা” লম্বীসিদা,/ চরাম্নরবা অঙাং ওইনা/ পোক্লকখি নঙগী খাংপোকশঙদা,/ শেংলবা শিমোমনুং/ চেল্লদুনা ঈ মরিক মরিক।/…হে পন্থৌ ইবুংঙো মিৎনা উবা লাই, নঙনা পীবিবা পুন্সিনি।/শান্নরি চেন-চোংদুনা/ নঙগী ইঙ্খোল চাইগোইনুংদা/ নঙগী খুঙ্গংদা সহরদা/ উপাল ৱাপাল ঊচেক ৱায়াশিংগা/ অহিংবা ৱাহৈ ওল্লদুনা ঙসিদি…/ঙসিসু/ খৌগংনরবা অঙাংগুম্না/ থিরি/ খোম্লাং ঈরিক;/ অয়ুক্কী লীক্লা খিক্লিবা/ নখোয়গী খুনাম হক্লিবা লীক্লমদা। (লাঃ ১২) 
ফজবা হায়বসি থিবদা তরাই তরাইনা হেক ফংদে। অদুগা ফজবা হায়বসি অমুক ঙাকনা চৎপা অমদি মসিগী ফিদম অসিসু লেংদনা থম্বা হায়বসি অরাইবদি নত্তে। মহৌশা মহাক্কী খোঙচৎ অসিমক ফজবগী তুংনফম্নি হায়বসি পুম্নমক খঙই। অদুবু হায়রিবা ফজবসিনা মমি শামজিল্লকপদা কবি কয়াদি মিপাইজরি। তেংথানরি মহৌশা মহাক্কীদমক খনবদা। কবি ভগৎসু তেংথারি মহৌশা মহাক্কীদমক অদুনা ইরক্লি “ফজবা মাঙখ্রবা মহৌশা” অহিংবা মরক্তা শিরবা মীওইবনা “হিংলিবসি অশিবগী মোংফমথক্তনি।/ উদে করিমত্তা/ ফজবা নিংথিবা ঈংতপ্পা/ মুশি-মুশি/ পোদোনগী মঙালসিদা…। কুইরে শাখিদবা। জগোই খুৎথেক অমত্তা/ উমং লাইগী লাইশঙদসু/ উপালশিংনা,/ খোঙ্গুম্মেল্লৈশিংনা ফৈরা অমত্তদা তোংদুনা অদুঙৈগুম।” (লাঃ ১৩)

ৱাহৈশিংদা য়াওরি খুনাই অমগী পুৱারী। অদুগা চিনবুং ৱারীশিংদা হিংদুনা লাক্লি  অদুঙৈগী লীংজেল থৌনা ফরবা ইপা ইপুশিংগী থৱায়শিং। ঐখোয়গী শক্তমসু কন্দুনা লাক্লি ৱাহৈশিংনা, ইমালোন্না। ঙসি মলেমগী লাক্লিবা অওনবা অহোংবা কয়াসিদা মৈতৈ ফুরুপ্না করম্না মপাঙ্গল কন্না থৌনা লৈনা হিংদুনা লৈগনি হায়বসি হৌখ্রবা পুৱারীগী লাতমশিং নৌহৌননা অমুক হাংদুনা য়েংদবা য়ারোই। অসিগুম্বা তাংককশিংদা ঙসি হৌরক্লিবা মীরোলদি মীরোল ঙাংলগা অমদি মীগী লোন্দা লাইরিক তম্লগা হেন্না লৌশিং লৈবা ওইনা লৌনবগুম তৌরকপসিদা অশৈবা ভগৎ তুমিন্না লৈথোকপা ঙমদে। কংশিল্লক্লবা তুরেল লাইজ ইচেলবু লোইবী চীংজাও নপোমদা তলা পমেল নচুম্বা থাদুনা মহৌশাগুম লুরবা লাইজ ইচেল চেলহনবা পাম্লি। অদুনা মরু চংবা ৱাহৈ থিরক্লি ‘পাউতাক হিদেন তোর্ব্বান্দা/ খুৎশু-খুৎলাইগী মহুত্তা/ শৈরেংগী ৱাহৈ ওইনা।/’ (লাঃ ৩৬) অদুঙৈগী কংশিল্লুরবা তলা পমেন কয়া ৱাহৈনা লাইৱা শোন্দুনা অনৌবা য়েন্নিং চোংহন্নিংলি অশৈবনা অদুনা অহিংবা ওইনিংবগী ঈখৌলাংবা মরক্তা ইরক্লি কংখ্রবা পামেন অমসুং ৱাহৈ হায়না মিংথোনবা শৈরেংসিদা “ঐ হিংনিংই/ শৈরেংগী মনুংদা ৱাহৈ ওইনা।/ ৱাহৈশিংসে কনা অমত্তনা/ নমজা নমথেকনবীগনু।/ ঐগী ৱাহৈদি/ মনীং তম্লবা শৈরেংগী ৱাহৈনি হিংলক্লি/ অসুক কুইবসি/ থাঙ-খৌবোম্বা, তা-খাঙশুনাহা পায়দুনা/ শরী ৱাশক ঙাক্লদুনা/ ইপা ইপুনা থম্বীরম্বা ঙমখৈগীদমক।” (লাঃ ৩৫)  
মনিপুরগী চীংশাংশিং, মনিপুরগী তম্পাক লমদম, ঙমখৈ শম্বল ওইরিবা ৱাংলবা লোইবী নপোমশিং ঙসি করি ফিভমদা লৈরি পুম্নমক খঙনরি তারি নুমিৎ খুদিং মপাউ কয়া অশংবা চীংমায়না অমুবা তাঙ্গোই ওনখিবা। কানি থাবশিংনা লমগী মপু ওইশিল্লক্তুনা লৈঙাক্কী ৱায়েল চূপ্লি পায়শিনলকপা। অকিবা মশক অমনি মুন্না খঞ্জিল্লুরগদি। তুংদা হৌরক্লিবা মীরোলশিংদা করম্বা খুদোলনো ঙসি হিংলিবা মীরোলনা পীরমগদৌরিবসি। য়াম্না চাওবা ৱাহংনি হংলিবা কবি ভগৎনা মহাক্কী শৈরেং “অশংবা চীং” হায়বসিদা। শৈরেং অসিমক য়াম্না সিম্বোলিক ওইবা অদুগা ৱাহন্থোক কয়া ফূমদুনা পাউখোংসু চল্লিবা শৈরেং অমনি। “অশংবা চীংশিং,/ অশংবশিংগী ৱারীবু তারুরগা/ পংকিতা কি/ অশংবা ওইরুবনা।/ নোং-ঙাহন্নীংদে,/ শণীঠাকুগুম্বা কনা কনাগুম্বগী/ মিৎয়েংফমদা তারুরবদি/ করি থোক্লগবা মিপাইদুনা।/ অঙানবদা হিংলগা পুম্মম মমখিদৌ শরুকপুদি/ অমম্বদা হিংবনা হেন্না ফৈ/ ইশাগী ইতিক-ইঙাল পুথোক্তুনা।” (লাঃ ৪৩) 
পুন্সি অসিমক য়োৎকী কোল্লু অমদা চপখায়দুনা উংলিবা শরুদা তোংশানা য়োমদুনা চৎলিবা মেচিন অমগুম্বনি। অহৌবা নাইবগুম অরোইবসু লৈগনি। খুঙ্গং অমসুং সহর হায়বসিসু নকশিন্নবা য়াররোইদবা তুরেল্গী তোর্ব্বান্দ অদুমকনি। মীনা পাথোক্লবা লম্বীশিং, হিংনবা হোৎনবদা মেচিনগুম্বা চেন্দবা য়ারক্ত্রবা পুন্সি কয়ানা হিংবগী ৱাহন্থোক করিনো কদায়দনো হায়না য়েংলুবদা মিকুপশিংদদি অনৌবা মতমগী কোল্লুদা নুংঙাইবা শাদুনা কোয়চেন চেন্দুনা লৈরম্লি মীওইবনা নুংঙাইফম খঙদনা শান্তি হায়বদু ফংদনা রেদিএসন মরক্তা চাওখৎপগী মৈখু মরক্তা মসিমকনি কবি ভগৎনা ইরিবা “ মেচিন ওল্লূবদা” হায়না মিংথোনবা শৈরেংসিদা। অদুনা ফোংদোক্লি ইমেজরিশিং শিজিন্নদুনা, “লোন ওইরি সিগনেলনা/ অচিনবা সহরগী লম্বীশিংদা,/ …প্রোগ্রাম সেট তৌদুনা থমখ্রবগুম/ শুরি পোত্থাবা লৈতনা।/ রেদিয়েসনগী মৈরিলক্তা/ মোবাইল নেটৱার্ককী লাংনা ফাজিনবিখ্রবা/ পোলুসনগী মৈখুনা য়োৎশিনবিখ্রবা/ মমি শামিরবা মিতমশিং…” লাঃ ৫০ তৌইগুম্বসুং পুন্সিগী নুংশিবা মশক অমদি অশেংবা নিংশা শ্বরদি খুঙ্গংদা লৈহৌরি হায়বসিমসুং য়াম্না নোস্তালজিক  ওইনা তেংথাবা থেংনৈ। খুল্লং ঈশৈসু শকনিংলি কবিনা। কুমগী নোং লাকপদা হরাওনা জগোই শানিংলি মীনম্বা য়াওদ্রবা লৌমীগী থম্মোয়গুম্না। অঙাংগুম্বা কুমগী নোংনা হৈথারকপা মিকুপশিংদা শুমাংদা থোক্তুনা নিংশিংলুদ্রবা সুর অমদা পেন্ন হৌনা শকনিংলি নোংগী ঈশৈ অমা, “ নোং-ও চুথরো/ লাংজিং মতোন থুমহৎলো/ হনুবা হনুবী তাউথরো…” (লাঃ ৫১)
মনিপুর খুনাইসিদা মীয়ামগী লুচিংপুরেল নেতা ইরাবতকি মতুংদা লাক্লিবা লুচিংবনি হায়না মশানা খঞ্জবা কয়া চেংগুম শৌবগুম পিক থন্না থোক্লকলি। থিংবসু ঙমদে। মরমদি মখোয় খুদিং মমা লৈবাকপূ য়াম্না নুংশিবা মীওই ঙাক্তনি হায়বসি মখোয়না হায়বা ঙাংবা ৱাহৈশিংনা লেংদ্রবা খুদমনি। চিনগা খুৎকা মান্নবা লুচিংবদি খুৎ থেক্তুনা পাবা য়ারি। লৈবাক্কি য়াম্না খনবা শাবা মতম অসিগী লুচিংবশিংগী মরমদা সার্কাস্তিক ওইবা তোন্দা ইরক্লি, “ঐখোয় লৈকাইগী চেয়ারমেন সাহেব” শৈরেং অসিমক শাফু কনবা অশেংবা মশক অমা উহনবা অদুগা তৌশিন্নবা লৌনম চাওবা লুচিংবা শাবশিংদা খুদোম্বী থিন্দুনা কারেম্নবনি। মখোয়না তৌরিবা খুদিং মীচম মীয়াম্না খঙদবা নত্তে হায়বদু য়াম্না তেন্না ফোংদোকনবা হোৎনবগী মমি ফজনা তাই। অদুনা হায়রক্লিবনি, “মমিং ইবা হৈব্র- হৈতব্রা/ খুন্নাইগী থৌগলদি/ য়াউশিনহৌদ য়াদে, য়াউশিল্লি…। থৌনাগা লোয়ননা মাঙ-থাদুনা চেনখৎলি/ মথৱায় খুবাক্তা হাপ্তুনা/ থৌদোক- ৱাথোক মশীং খঙদে/ কাউন্সিলগী চেয়ারমেন ওইনিংবগী মৈনা চুবদা…” (লাঃ ৫২)
কাংলুপকি ইরাংনা মরম ওইদুনা পুন্সি কয়ানা অৱাফমদা তাখিবা অমদি মদুদগী থোক্লকপা অকি তুজুংনিংঙাই ওইরবা থৌদোক ৱারীশিং ঙসি কাওবা লৈতে মনিপুরদা। অসিগুম্বা কাংলুপকী ঈরাং অসিদা য়ুম্ফম ওইদুনা শাগৎপা শৈরেংনি কবি ভগৎনা লাইরিক্কী মিংথোলসু ওইরিবা শৈরেং “অপাইবা তাঙ্গোই” হায়রিবসিসু। পিনিংলিবা পাউজেলদি শান্তিগী ইরিক অমা খিকলমদুনা অমুবা তাঙ্গোইনা কুপশিল্লুবা লোইবী নাপোমশিংদা নুংশিবা তলানা ময়োন চোংলকপনি ঈখৌ লাংলিবসু কবিনা। মরাল লৈতবা চমজরবা পুন্সিশিংনা কাংলুপ ফুরুপকি উংখৎনবা লান্দা পুন্সি কয়া পিখম্নখিবা অমদি মরাল লৈতনা নুপী অঙাংশিংনা থেংনখিবা কি তুজুংলবা থৌদোকশিংদু অমুক হল্লক্তবা ওইসনু হায়বা পাউজেলনি পিনিংলিবা কবিনা। অসিগুম্বা তমথিবা থৌদোকশিং অসিমক কনাগুম্বা খরনা পোলিটীকেল লাইলেজ লৌনবা অমদি শারৌ শিন্দুনা থোকপা কয়াসু য়াওদবা নত্তে অদুনা মসিদগী চেকশিন্না অমদি নুংশি চান্ন-চিন্ননা লৈনবা নুংশি পাউজেল পুবা শৈরেংনি অপাইবা তাঙ্গোই। অদুনা হায়রক্লি ৱাহৈনা লাইয়েক ওইদুনা, “কাঙলুপ-মশেন উংখৎনদুনা/ ঈখেং শীন্থবদা/ থৱায়-মিরেল পাইথোকখ্রবা হকচাংশিং/ মিপাইরদুনা/ শমজি খাইনা লানজেন্নৈ/ ককচেং খোইয়া শঙ্গুগুম…। অকন অরিং শীংনরি/ ওইজবতা থিদুনা,/  মখোয় খরনা অপাম্বা মওংদা।/ শান্নরি তেলঙ্গাগুম/ লংলা পায়দুনা লৈবাক্কী ঈরাংবু/ অমুক থাদোক/ অমুক চিংশিন/ নুংশিৎ মায়রম য়েংদুনা…/ লৈবাক লৈশাদা তিল্লবা/ হে তাঙ্গোই,/ কুমগী অরংবা নোংলিক্কী/ পিরাংনা শোকপদা/ ময়োল চোংলকউকো নঙ/ মুশুক মুবা কুয়োমনুংদগী।” লাঃ ১০১
মৈ ভগৎকি শৈরেংশিংদা মহৌশা খুৎশেমগী মরু ওইবা, মীওইবা অমসুং মহৌশাগী তৎন- থানবা য়াদ্রবা মরি। হৌজীক মতমগী পুন্সি মহিং লৈবাক খূনাইগী ওইরিবা অশেংবা মশকশিং পুম্নমক কোনশিন্দুনা শৈথানবা হোৎনাব থেংনৈ। মরু ওইনা পুন্সিদা থেংনরিবা পুম্নমক মচা খায়না অমমমতা পুথোক্তুনা লাচন্নবা হোৎনবসু থেংনৈ। লাইরিক অসিনা য়াওরিবা শৈরেং ৭০ পুম্নমক পাবা নুংঙাইবা কয়া য়াওরি অমসুং নৈননিংঙাই ওইবা কয়াসু য়াওরি। লেপ্তনা শৈরেং লাইরিক কয়া ইরক্কনি হায়না থাজবা থমজরি।

• ট্যাগ:
• শৈরেং
• বুক রিভিয়ু