পুন্সিবু মচু লোক্লিবা ৱারীমচাগী লাইরিক ‘অশেংবা ইরল’ মীৎয়েং অমা
লাইরিক্কি মমিং- অশেংবা ইরল (২০২২)
অইবী- ক্ষেত্রিময়ুম সুবদনী
অফোঙবাঃ ৱাহেংবম কুমারী চনু, সেক্রেটরি লৈকোল
য়াইস্কুল পুলিস লেন্দ, ইম্ফাল
লাইরিক্কী মখল- ৱারীমচা
লাইরিক্কী মখূম- কোন্থৌজম মাইকেল মীতৈ
লমায় মশিং-২৭৮
লাইরিক মমলঃ লুপা ৬০০/-
মমা মপা নিংজবা মচা মশুশিংনদি থাজবা ঙম্লোই সনাজাওবগুম্বা মচা কয়া লৈরক্লি হায়বসে ঙসিগী মনিপুরদসু। লৈখিদ্রবা তোম্বীনৌগী মপুরোইবগী চহীগী উৎসব কৎনিংলবসু মচা অহল সনাজাওবনা হোয় মায় হায়রদ্রবদা ৱারৌজবনা ইন্ত্রোদক্সন ওইদুনা ৱারীসি হৌহল্লি। মমা মপা ওইবশিংনা মচাশিংবু নুংশিবদি মপাল নাইদে। অদুনা হায়রক্লি অইবীনসু, “মচাগীদমক মমা মপানা ৱাবদি হৌনাশানি। তুরেলগি ঈচেল হঙ্গৎনা চেনবরা?”
ক্ষেত্রিময়ুম সুবদনী ক্বাকৈথেল অখাম লৈকাইদা ইং ১৯৫৭গী সেপ্টেম্বর ১৫ পোকখি। অপোকপা ক্ষেত্রিময়ুম য়াইমা অমসুং থম্বাল দেবীগী মরিশুবা মচানুপী ওইনা ফংজখিবী সুবদনী য়াম্না অঙাং ওইরিঙৈদগী হৌনা শৈরেং ইবা পামজদুনা লাকখি অমসু শৈরেং কয়া ইদুনা হৌরকখি। মহৈরোইশিংগী ঈহৌ কয়াদা শরুক য়াদুনা লাকখি। এল এম এস লো কোলেজদা তম্লিঙৈদা কোলেজ অসিবু গভর্নমেন্ট কোলেজ ওইননবগীদমক কোলেজগী ইন্দিফিনিট হঙ্গর স্ত্রাইক্তা (দিসেম্বর ৯, ১৯৮০) মহৈরোই ময়ামগী লুচিংবী অমা ওইনা শরুক য়াদুনা নুমিৎ ৪৫নি জেলদা লৈখি। কোলেজ অসি গভর্নমেন্ট কোলেজ ওইরে হায়দুনা লৈঙাকনা লাউথোক্লকপদগী জেলগী থোরকখি।
অইবী অসি সোসিয়েল ৱেলফিয়ার দিপার্টমেন্ট, গভর্নমেন্ট ওফ মনিপুরগী দিস্ত্রিক প্রোগ্রাম ওফিসার ওইরম্মী। অইবীগী ফোংখ্রবা লাইরিকশিংদি- ১) মাঙখ্রবা ঈশৈগী সুর (শৈরেং, ১৯৭৫), ২) লাইবক (নোভেল, ১৯৭৮), ৩) নহাকপু ঐগী কনানো (ৱারীমচা, ১৯৮২), ৪) নুংগী চীনবান (ৱারীমচা, ১৯৮৭), ৫) পৃথিবী ফুঙ্গাৱারী খরা (লৌরেম্বম ইন্দিরাগা ইমিন্নবা, ১৯৯৪), ৬) পিগী ৱারী (শৈরেং, ১৯৯৫), ৭) য়েন্নিংথানা লাকপদা (ৱারীমচা, ২০০০), ৮) প্রজাতন্ত্র চৎপা লৈবাক অমগী ৱারী (অঙাংগী খোরিলোল, ২০০১, দাইরেক্তোরেট ওফ এদ্যুকেসননা পীবা অঙাংগী লাইরিককি মনা ফংলবা লাইরিক), ৯) অৱাং নোংপোক্কী ফুঙ্গাৱারী খরা (ফুঙ্গাৱারী, ২০০২), ১০) ভারতকী ফুঙ্গাৱারী খরা (২০০৬), ১১) শকনাইবা খরগী পুন্সি (পুন্সি ৱারী, ২০০৮), ১২) ইলুস্ত্রেটেদ ফোক টেলস ওফ মনিপুর (কোমিক, ২০১০), ১৩) মৈশা অমসুং মৈচাক (ৱারীমচা, ২০১২), অমসুং হন্দক্তা ইকুই কুইদ্রিঙৈদা ফোংখিবা মহাক্কি লাইরিকনা ১৪) অশেংবা ইরল (ৱারীমচা, ২০২২)নি। অঙাংগী লাইরিক ওইনা পুথোক্লিবা ইল্লুস্ত্রেটেদ ফোকতেলস ওফ মনিপুর অসিমক ইংলিস্তা হন্দোক্তুনা ‘ননাও ফুঙ্গাৱারী’ হায়না ফোংখিবা লৈরে। অমদি অতৈ অঙাংগী লাইরিকসু ইংলিস্তা ত্রান্সলেসন তৌদুনা ফোংখ্রে। মমল য়াম্লবা লাইরিক কয়া লেপ্তনা ইরগা অসুম্না মনিপুরী খোরিলোলদা খুদোল লেপ্তনা তম্লকপা অসিমক য়াম্না থাগৎনিংঙাইনি।
মনিপুরী খোরিলোলদা নুপীশিংতনা শেম্বা খোরিলোলগী লূপ অমা ওইরিবা লৈকোল (লৈমরোল খোর্জৈকোল)গী হৌজিক হৌজিক প্রসিদেন্ট ওইনা থৌ পুরি। নেস্নেল অমসুং ইন্তরনেস্নেলগী থাক্তা পাঙথোকপা শৈরেং শৈদিন্নবা, ৱারীমচা পাবা, অইবশিং উনবা, কনফরেন্স অসিনচিংবা কয়াদা মনিপুরী খোরিলোলবু মহুৎ শিন্দুনা শরুক য়াদুনা লাক্লি। অইবীসি সাহিত্য অমসুং অতোপ্পা হীরম কয়াদা মনিপুর মনুং অমসুং মপানগী মনা কয়াসু পিদুনা ইকায়খুম্নখিবা লৈরে।
মমা মপা ওইবশিংনা মচাশিংগীদমক কদায় ফাওবা কত্থোকপা ঙম্বগে হায়বগী নুংশিরবা ৱারী কয়া তানরি অমসুং লীনরি। পু-পাং শুদনা নাওকোল্লকপা মচাশিংনা অথোইবা মী ওইরকপা ঙকনিংঙাই ওইদে। মরমদি অৱা মচা লেম্না মাংদে হায়বদু মায় পাকলবা মীওই কয়াগী পুন্সিনা লেংদ্রবা খুদম ওইরি। তৌইগুম্বসুং থাজদবা ৱারী কয়াদি তারক্লি হেক অপোকপা মমা মপাবু ওল এজ হোমদা থম্বগী। লাইরিক লাইশু হৈরবা, লৈবাক মীরক তিল্লবা ইমুংগী মীওইশিংনা হেক পোকমিন্নবা মচিল মনাওশিংগী মরক্তা মহৌশাগা মান্নদবা মওং অমদা চেকপল মরোল মরোল খাজিন্নবা, কৌনদবা, চংনদবা অসিগুম্বা পুকচেল মতা অসি হৌজীক হৌজীক কনতেম্পোরেরি মনিপুরী খুনাইদা থোক্লিবা ৱারী অমনি। অসিগুম্বা রিএলিতি অসি মনিপুরী খোরিলোলদা মমি তাদনা খক তোক্তে। মমিং লৈরবা সাহিত্যগী লাইরিক অয়াম্বা অশেংবা থৌদোকনা ইথিল পিদুনা ইরকপনা মশিং য়াম্মি। অইবী সুবদনীগী ‘অশেংবা ইরল’ হায়না মিংথোনবা লাইরিক অসিদা পুন্না ৱারীমচা ২০ য়াওরি। ৱারীমচাশিং অসিদা মনিপুরী খুনাইগী হৌজীক হৌজীক ওইরিবা শক্তম অমদি নিংথিজনা য়েক্লি। চৎনবী থাজনবী, লাইনিং লাইশোন, কুমহৈ হরাও, পুন্সি মহিং ফনা য়াম্না কোনশিন্দুনা ফজরবা প্লোট কয়াদা অপাবশিংগী থম্মোয়দা মতম কুইনা মমি তাদুনা লৈহৌরগদবা নুংশিরবা ৱারীশিং য়াওরি। মরু ওইবা প্রোতাগোনিস্টশিংদি নুপীনা ওইহল্লি। লাইরিক্কী মীংথোল ওইরিবা ‘অশেংবা ইরল’ অসিমকসু তোম্বীনৌনা প্রোতাগোনিস্ত ওইহল্লি। অখাং কনবী মৈতৈ নুপীনা মচাশিংবু কমদৌনা মী ওইনবা শেম্বগে হায়বদু মচং ওইবা ৱাহৈ খরদা ফোংদোকনবা হোৎনৈ। কৈথেল লুকমাই পান্দুনা ৱানা হোৎনদুনা শেমজরকপা মচানা মী ওইরবা মতমদা মপা মমাবু মীরাইবা, হ্ন্না য়েংদবা মতৌ, মীনুংশি লৈতনা ইন্থোকপা, মসিনা মরম ওইদুনা অপোকপী মমানা ওল এজ হোমদা অরোইবা য়াহিপ তানখিবা। মতাং অসিদা তোম্বীনৌগী মচা অহল সনাজাওবনা নিংঙম্লক্তবগী ময়েক লারবা শক্তম অমা অপাবশিংদা শং শং উহল্লি ইরিবা দাইলোকশিংনা।
মমা মপা নিংজবা মচা মশুশিংনদি থাজবা ঙম্লোই সনাজাওবগুম্বা মচা কয়া লৈরক্লি হায়বসে ঙসিগী মনিপুরদসু। লৈখিদ্রবা তোম্বীনৌগী মপুরোইবগী চহীগী উৎসব কৎনিংলবসু মচা অহল সনাজাওবনা হোয় মায় হায়রদ্রবদা ৱারৌজবনা ইন্ত্রোদক্সন ওইদুনা ৱারীসি হৌহল্লি। মমা মপা ওইবশিংনা মচাশিংবু নুংশিবদি মপাল নাইদে। অদুনা হায়রক্লি অইবীনসু, “মচাগীদমক মমা মপানা ৱাবদি হৌনাশানি। তুরেলগি ঈচেল হঙ্গৎনা চেনবরা?” (লাঃ ৪৫) সনাজাওবগা মপাল লমদা লৈবা মনাওনুপা থানিল অনীগী মরক্তা লৈরিবা উংখৎনবা মতৌ, মমৌনা মনেম্বোকপু থৌওইবীদবা মওং, মশানা ৱানা হোৎনজদুনা শাবা য়ুমদা মীতোপ অমগুম্না অহল মতম ওইরক্লবী তোম্বীনৌনা লেল্লিবা পুন্সি, ইংখোল মচেৎ খরগী মিকানবগী ইমুংদা শান্তি লৈতবা অমদি অপোকপী মমাবু ইন্থোকপা ৱারীশিং অসি ইবেমনুংশি লাকপদা ৱারী পুম্বা লীথোকহল্লি। তোম্বীনৌ মশুনুপা নিংথেম্না মবোকনা লৈরিবা ওল এজ হোমদা মবোক উনবা লাক্লম্মি। ৱারী পুম্বা অঙাংগী ইচম চমজবা মতৌদা মবোক্তা লীজৈ, মমা মপা অনি তোয়না কৎনবগী, মপানা য়ু ঙাওদুনা য়ুমদা নুংতিগী লাকপগী। অদুগা মমানা মনেম্বোকনা লাৎলম্বা লাইদা ধুপ মৈরা ফাওবা কৎতবগী ৱারী তম্মি। মসিদা অনৌবা মতমদা য়ূম্বাল্লোন্দা লাক্লিবা অহোংবশিং ময়েক শেংনা ফোংদোক্লি। লাইরিক্তি হৈরগা লৈশুদি য়াওদ্রবা খুনাই অসিগী হৌজীক্কি অনৌবা মীরোলদা ৱাখল খন্থহল্লি। অমরোমদা অহল লমন পান্দ্রবা ইমূংশিংদা নহানা তৌনিং তৌনিংবা তৌদুনা পুন্সিবু লায়না লৌবা অদু ফত্তে হায়না ফোংদোক্লি। মচা নুপা অহল সনাজাওবনা মনাওনুপা থানিলগী ইংখোল শরুকসু য়াওনা মঙোন্দা নাম্মা পানগে হায়বদা মমানা য়াদবগী হেক অপোকপী মমাবু খৎনবা অমদি ইন্থোকপা থৌওংশিং মিৎমাংদা উহল্লি তেন্তকনা হায়রিবা দাইলোকশিংদা অমদি খুফোংদোকসিদা। ওফিস কাবা মমা মপাশিংনা মচাশিংবু বোর্দিং স্কুলদা থমজিনবা, মসিদা অঙাং অমনা মপু মবেন্দা নাউথি শাজবা ফংদবগী, নুংশিনা লোয়নজবা ফংদবগী নুংঙাইতবা, লাইফকি ভেল্যুসশিং অহল লমনদগী তমজগদবদু ফংদবগী নুংঙাইতবা অদুসু মতাং চানা ফোংদোকলি। অমরোমদা মচা নুপা পোক্তবা ইবেমনুংশিগী মতাং অমসু পুশিল্লক্তুনা খুনাই অসিদা মচা পীবা পোক্তবা নুপীশিংদা নুপা ওইবশিং অমসুং খুনাইনা য়েংলিবা মিৎয়েং, অদুগা মচা নুপা অনী পোক্লিবা তোম্বীনৌনা থেংনরিবা অৱাবা অনীসিদা করিবু খেন্নরিবগে হায়না ৱাহং হংলি।
চেন্নাইদা লৈবা তোম্বীনৌগী মচানুপা অতোম্বা থানিলনা ময়ুমদা লাকপদা মমানা ওল এজ হোমদা লৈরম্বা থেংনবদা মথম্মোয় পুবা ঙমদবা, ময়ুমদা চংদনা হোটেলদা লৈরগা মমাগী চান-থকনবা, মফি মরোল থিল্লকপা, মমাবু য়ুমদা অমুক পুনবা হোৎনজবা মসিদা মমানা নুংশিনা হায়রকখিবা পুম্নমক তাইবংদা থোকপা অশেংবা ৱারীগুম্না লীরি। মসিনি ৱারীসিনা ফজরিবা।
হেক অপোকপী মমাবু ওল এজ হোমদা থম্বা ঙম্লিবা সনাজাওবা লাইরিক হৈরবসু লৈকাইনা অমদি খুনাইনা মহাকপু পারা তম্বীখি। মহাকনা তৌরিবা থৌওংদো লাল্লে হায়না। মসিদা মনিপুরী খুনাইদা লৈরিবা ফজবা নিতি নিয়মশিং কৈরোই লৈকাই অহল লমন পানবগী মশক অমা উৎলি। লৈকাই ক্লবনা কৌরগা ৱাখল তামিন্নবা হায়বা ফজবা ৱায়েল অমগী সিস্তেম অদুসু মতাং চানা পুশিল্লকই অইবীনা। য়ু থকপা লেপ্তুনা মমানা লৈরিবা ওল এজ হোমদা মমৈথংদা মমাবু ময়ুমদা পুরগে খল্লগা লৌবা লাকপদদি মমা তোম্বীনৌ অনা ফমশেন্নদুনা লৈরমখি। সনাজাওবা মাগী নুপী অমসুং মচানুপা নিংথেমগা পুন্না মমাগী নাক্তা চংশিন্দুনা ঙাকপীনা হায়, “ ইমা ঐখোয়না লানবা ঙাক্তনি, নচাবু ঙাকপীয়ু” ময়ুমদা হল্লসি হায়বদা মমানা নুংশিনা হায়রকই, “ সনাজাওবা, মীওইবগী নুংঙাইবদি লন-থুমদা নত্তে। অশেংবা নুংঙাইবদি ঈশ্বরদা মায় ওণশিল্লগতা ওইরম্লে। ইচাগী দোষ পাপ পূম্নমক ইমানা লোইনা কোকথোক্লবনি। নঙনা মী ওইনা অমুক্তং হিংহৌবদো অদুনি ইমানা পাম্লিবা। ঙসিদি নুংঙাইরে নঙনা জ্ঞান তারকপসে। শিরবসু খুয়া তুশিৎলে” (লাঃ ৫১) মমা অমগী থম্মোয়দা চেল্লিবা মচা নুংশিবগী ঈচেলদি অরোইবা মিকূপ অদু ফাওবা কংলমদ্রি তোম্বীনৌদা। ঙাকপীহৈবী থম্মোয়না লানলে খঙলবা মচাবু ঙাকপিরমখি। স্পিরিচ্যুএল ওইবা থাক অমদা পুখৎলকখি অইবীনা। অদুগা অরানবা তৌবশিংবু মীনুংশি অমসুং থৌজালগী ঈরিকনা শেংদোক চামথোকহল্লি। তোম্বীনৌ ওল এজ হোম অদুদা অদুমক অরোইবা য়াহিপ তানখি। মচা নুপা সনাজাওবনা ময়ুমদা পুবা ফাওবা ঙমখিদে। মমানা মহাক্কি থৱায় য়াওদ্রবা হকচাং অদুসু দক্তর তম্লিবা মহৈরোইশিংনা শিজিন্ননবা হোস্টপিতালদা দান তৌরমখি। সনাজাওবা অমসুং মমৌ সনাহনবী য়াম্না নীংঙমখিদে। অৱা পোলোই ওইবা থৌদোক অসিনা মখোয় অনীদা চাওরবা পারা অমদি তমলমখি। পুন্সি হায়বসি য়াম্না তেল্লি অদুনা অশেংবা ইরল করিনো হায়বদু খঙনবা হোৎনৌ হায়না অইবীনা অপাবশিংদা পাউমেল্লি। ৱারীমচাগী ফজবা হায়বদু মসিদা অদুমক থেংনবীগনি।
কোভীদ-১৯গী চৈথেং নংলুরবা মতুংদা পুথোক্লকপা ৱারীমচাগী লাইরিক ওইবনা লাইরিক অসিদা পেন্দেমিক লিটরেচরগী মমিসু তাদনা তোক্তে। নুপানা খুল্লিংবা খুনাইদা নুপীশিংনা থেংনরিবা অৱাবা পুন্সি মহিং অদুগী মমি তাবা ৱারীমচানি “লোকদাওন” নুপীতনা শু নোমদুনা ইমুং পুবা য়ুম কয়া লৈরি অদুবু কোভীদ-১৯গী লোকদাওননা কয়া য়াম্না চৈথেং পীখিবা হায়বদুদি পুম্নমক থেংনখিবা ঙাক্তনি। মেমথোইগী মপুরোইবা মুহোন য়ুদা এদিক্ট চুখি। থবক শুগনি চৎকনি খঙখিদে। মচানুপা থোইথোই লাইরিক ফবা অঙাং ওইরবসু মনিং থুংহনবা ঙমদে। লাইবক থিবদগী কোভীদনা মরম ওইদুনা মেমথোই নাদুনা লৈখিদে। মুহোন কোক্তা খুৎ হাপখি। চেং চানিংঙাই ফাও লৈখিদে। জ্ঞান তারকখি মুহোন, মচা শেমদবা য়াদে খল্লকখি। ইংখোল শুদুনা মচাগী লাইরিক তমহন্নবা হোৎনখি। অদুবু মনা মশিং খরা য়োন্নবা হোৎনবদা লোকদাওনগী চৈথেং নংখি। পুলিস লাক্লগা লোকদাওন থুগায়বগী মুহোননা ফম্বা পোৎফম থিংজিনখি অদুগা পুলিসনা শেরফালা মুন্দুনা পুরগা চৎখি। শেরফালাদু মীদগী ৱাইরকপনি হায়রফাওবা তাবীদনা পুখিবা মতাংসিদা ঙাংনরিবা দাইলোক অসিদা য়াম্না সিম্বোল্লিক ওইবা পাউজেল অমদি পিরি। চরা হেনবদগী শিবগা কোভিদনা নারগা শিবগা করম্বনা হেন্না ৱাবগে হায়না। শেরফানা পুলিসনা মুনদুনা পুখিবদা অপাবশিংদা পাউখোং অমদি চল্লম্লি অইবীনা।
নুপী ওইবীশিংনা খুনাই অসিদা থেংনরিবা অৱা- অনা, খুদোংচাদবা কয়া, চৎনবী থাজনবী কয়ানা পীরিবা চৈথেং, কারাম চাওবা, মশাগীতা খনবা মীওইবগী লিচৎ, লৈতা-লায়রবা হায়বসিনা পিরিবা চৈথেং, খুনাই অসিদা চেনশিল্লকলিবা অমোৎপা ঈচেল, নাপল কাবা মীওইবগী মচৎ অসিগুম্বা কয়া অসি সব্জেক্ট ওইনা পুথোক্তুনা ইরি। ফিদমনিংঙাই ওইবা পুন্সিবু পামজবী অইবীনা খুনাই অসিবু য়াম্না কুপ্না নৈনদুনা মহাক্কি ওইবা মিৎয়েংদা পুন্সি হায়বদু অসুম্না তৌরগদি হেন্না য়াইফগনি হায়বদু লাইরিক অসিদা য়াওরিবা নিংথিজরবা ৱারীমচা ২০সিদা ফোংদোকনবা হোৎনরিবা অসিমক মায় পাক্লে হায়বা য়াই। মনিপুরী খোরিলোলদা দিকেদ খরসিদা সুবদনীনা ৱারীমচাগী পূক্কৈদা চাওরবা খুদোল তমদুনা লাক্লিবসি মমল য়ামই।
- ট্যাগ:
- বুক রিভিয়ু
- তোংব্রম অমরজিৎ
0 কমেন্ট:
কমেন্ট তৌবিয়ু