image

নৌহৌননা নীংশিংলুবদা চিত্রকলা রত্না রাজকুমার চন্দ্রজিৎসনা সিংহঃ লাইয়েকপা লিজেন্দ অমগী হীংদুনা লৈরবা পুৱারী

লাইরিকঃ আরকেসিএস, মহাক লৈখিদবগী তেংথাখোল, ২০০৫

খোমজিনবাঃ বুধিমন্ত কর্ত্তা 

লাইরিক্কী লমায় মশিংঃ ১৫৬

“মীওইবগী পুকনিংগী অনীংববু য়ৌনা ফোঙদোক্তুনা য়েকপা ঙম্বা অসিগুম্বা তাঙলবা চিত্রকার অসি ঈস্বরগী থৌজাল ফংলবা মীশক অমনি” 

ভক্তি স্বরুপ দামোদর শ্বামী

 

“A true artist is not the one who is inspired, but one who inspires others” Salvador Dali”

 

লাইরিক অসিগী অহানবা লমায়সিদা শকনাইরবা অইবা মীয়ামগী ওজা আরকে শিতলজিৎনা ৱাহৌদোক অমা ইরি। মসিদং পাবদা অদুমক খঙবা ঙমগনি আরকেসিএসনা মনিপুরবু কয়াম নুংশিজখিবগে হায়বদু। য়ুনিভর্সিতিদা অৱাংবা থাক্কী মহৈ তম্লুদ্রগসু মহাকনা থিজিন হুমজিন্দুনা পুথোক্লম্লিবা মনিপুরগী পুৱারীগী খ্বাইদগী মরু ওইবা তাংককশিংগী মনুংদা চহী তরেৎ খুন্তাকপা, জাপান লান, মার্জর এগ্রিমেন্ট, এঙ্গলো মনিপুরী ৱার অসিনচিংবা কয়া অসি ওইল পেন্তিং ওইনা ভিজ্যুএল হিস্তরি ওইনা পুথোক্লম্বা হায়বসি পিঐচ দি কয়াগা চাংদম্নবা য়াবগে হায়বসিনি। থবক তৌবদুনি মহাকনা পামজখিবদি। পুন্সিবু ৱাহন্থোক লৈহনবা অমসুং মীওই মপোক্তা পোক্লকপগী করিগুম্বা খরা ইমা লৈবাক মনিপুরগীদমক খুদোল তম্লবদুনি ফিদমদি।  অদুনা আরকেসিএস পেত্রিয়োত অমনি হায়না লৌদবা ঙমদে। মহাক লাই য়েকপগী কলা অসিনা মালেমদা মনিপুরবু মশক তাকনবা হোৎনবীরম্বা মণিপুর ইমাগী নুংশিথোইরবা চিত্রকারনি।

 

লাই য়েকপা হায়রিবা কলা অসি মীপুম খুদিংনা হেক্তা তমদুনসু কয়া হৈগন্দবা অদুগুম্বা কলা অমনি। মসি মপোক্কী পীথোক্লকপা হায়বা গুন অমা য়াওদনা হৈবসু ওইদে হায়না অখঙ অহৈশিংনা হায়নবা লৈ। অচুম্বসুনি লাই য়েকপা, লাই শাবা অরায়বা মহৈ অমদি ওইদে। থৱায় য়াওবা, পুকনিং লুপশিনবা অমদি অরেপ্পা ৱাখল য়াওদনা লাই য়েকপা হৈগনি হায়বা লৈতে। লেপ্তনা হোৎণবা অমসু য়াম্না মরু ওই। মপোক্কি পীথোক্লকপনি হায়রবসু মদু হোৎনদ্রবদি করিসু পাঙথোকপা ঙমদে। চিত্রকার, লাই য়েকপা, লাই শাবা মীওইশিংদি অশৈবা কবিগুম্না, লাইরিক ইবা মীওইশিংগুম্না অচিকপা মফমদা লৈনিংই, অতপ্পা অইংবা পুকনিংগা মতম পুম্নমক্তা লোয়নদুনা চৎলি। পেন্থোকপা হৈবা, পুন্সিনা পীরিবা থৌদাং অদু মতম চানা পাঙথোকপা হায়বসিদা চেৎনা থাজৈ চিত্রকারশিংনা। মালেমগী চাওখৎলবা সিভিলাইজেসনশিংগী পুৱারীদা হনগৎনা য়েংলুবদা থেংনগনি শকনাইরবা আর্তিসশিংনা লৈবাক অমদা পীরিবা মপাল নাইদ্রবা খুদোলশিং। মালেম শিনবা থুংনা মমিং লৈরবা চিত্রকার কয়া লৈরি। লিওনার্দো দা ভীন্সি, মাইকেল এঞ্জেলো, ভিন্সেন ভান গো, পীকাশো অসিনচিংবা কয়ানি। ইন্দিয়াগীসু লৈরি এম এফ হুইসেন। মনিপুরদি লৈত্রবরা। লৈরি মশক নাইরবা চিত্রকারশিং। অমমমতং লৌখত্তুনা নৈনবদা চাওরবা কলাগী লাইরিক কয়া ইবা য়ারবা আর্তিস কয়ানি মনিপুরগীদমক থোক্লকখিবা ঐখোয়গী চিত্রকার খুদিংমক।

 

মনিপুরদা লাই য়েকপগী ইহৌ অমা শাগৎখিবা লময়ানবা লাই য়েকপা নীংথৌজম ভাদ্রা, রাজকুমার য়ুমজাওসনা, মহারাজকুমার প্রিয়াব্রতা অমসুং হঞ্জবম শ্যাম্মো শর্ম্মা, থোইদোকনা মীয়াম্না শোন্নরিবা শকনাইরবা লাই য়েকপা ঙাক্তনি। মনিপুরবু আর্ত অমসুং কলচরনা মালেমগী মীয়ামদা মশক তাক্লিবসিগী মরক্তা ঐখোয়গী চিত্রকারশিংনসু মশক তাক্লি হায়বসিনি হেন্না চাওথোকচনিংঙাই ওইরিবসি। লিমকা বুক ওফ রেকোর্দতা ১৯৯৪দা পুৱারিগা মরি লৈনবা পেন্তিংশিং য়েক্তুনা রেকোর্দ চনবা ঙম্বা মনিপুরগী আর্তিস অমা হায়রগদি আরকেসিএসনি। মণিপুর স্তেত কলা একাদেমিনা শিন্দুনা ইম্ফালগী জিএম হোলদা পাঙথোকখিবা আর্তিস অমগী খ্বাইদগী মশিং য়াম্না য়েকপা লাই এক্সিবিসন তৌখিবা অসিমক ইচম চম্বা লাই য়েকপা অমনা হেক্ত তৌবা ঙম্লোই। অচেৎপা ফিরেপ লৈবা অমদি অচৌবা মঙলান মঙবা মীওঈতনা ঙমগদবা থবকনি। চিত্রকারদি পোক্লকপনি হায়বসিসু অচুম্বনি। আরকেসিএসকি অপোকপা রাজকুমার য়ুমজাওসনা মনিপুরগী লময়ানবা চিত্রকার অমনি। অদুনা মহাক্কী ঈদা লাই য়েকপগী কলা অসি লোয়নদুনা লাকপা শোয়দনা ওইগনি। মহাক ১৯২৪গী ওক্টোবর ১৩দা তাইবঙ খোঙদারকখি। মশাগী চহী ১৪দগী লাই য়েকপদা শিনফম ওইনা চংশিল্লকখি। তাইবঙ মীওই মপোক্তা লাইপোক ওইনা লাকখিবশিংদি য়াম্না চম্না পুন্সি লেল্লি অমদি মখোয়না হীংলিঙৈদা পাঙথোক্কদবা মথৌদাং অদুতমক লাইনিং ওইদুনা লৈ হায়বসি আরকেসিএসকি পুন্সিনা লেংদ্রবা খুদম্নি।

 

মহাক লৈখিদবগী অৱাবা ফোংদোকপগী অমদি মহাক্কী মরমদা শকনাইরবা মীওই কয়ানা ইরকখিবা ৱারোলশিংদু খোমজিন্দুনা মচা ইবুংঙো বুধিমন্তা কর্ত্তানা লাইরিক ওইনা পুথোক্লিবা “আরকেসিএস মহাক লৈখিদবগী তেংথাখোল” হায়রিবা লাইরিক অসিদা চিত্রকার আরকেসিএসনা মনিপুরগীদমক তৌরম্লিবা মপাল নাইদ্রবা কলাগী খুদোল শৈথারিবসি পাবদা শোয়দনা অঙকপা অমদি অপাবা খুদিংদা ফাওগনি। কনানা থাজবা ঙমগনি মহাকনা হিংলিঙৈদা লাই লীশিং তরা হেন্না য়েকখি হায়বসি। অদুবু মহাক্কী পুন্সি অমসুং থবকশিং নৈনরুবা মতমদদি চোংথোক্লকখি মতিক মগুণ কয়া মথং মথং। চিত্রকারশিংগী ভিজন অসি অসুক্কি মতিক পাক চাওই, মিৎয়েং য়াম্না শাল্লি অমদি তুংগীদমক য়াম্না উশিনলি। মখোয়দি কৎথোকপা হায়বা অথোইবা গুণ অসি পোক্লকপদা অদুম য়াওদুনা লাকই হায়বসি লাইরিক অসিদা ইরিবা শকনাইরবা মীওই কয়াগী পুকনিংগী ৱারোলশিংনা লেংদ্রবা খুদমনি।

 

লাইরিক অসিগী অহানবা লমায়সিদা শকনাইরবা অইবা মীয়ামগী ওজা আরকে শিতলজিৎনা ৱাহৌদোক অমা ইরি। মসিদং পাবদা অদুমক খঙবা ঙমগনি আরকেসিএসনা মনিপুরবু কয়াম নুংশিজখিবগে হায়বদু। য়ুনিভর্সিতিদা অৱাংবা থাক্কী মহৈ তম্লুদ্রগসু মহাকনা থিজিন হুমজিন্দুনা পুথোক্লম্লিবা মনিপুরগী পুৱারীগী খ্বাইদগী মরু ওইবা তাংককশিংগী মনুংদা চহী তরেৎ খুন্তাকপা, জাপান লান, মার্জর এগ্রিমেন্ট, এঙ্গলো মনিপুরী ৱার অসিনচিংবা কয়া অসি ওইল পেন্তিং ওইনা ভিজ্যুএল হিস্তরি ওইনা পুথোক্লম্বা হায়বসি পিঐচ দি কয়াগা চাংদম্নবা য়াবগে হায়বসিনি। থবক তৌবদুনি মহাকনা পামজখিবদি। পুন্সিবু ৱাহন্থোক লৈহনবা অমসুং মীওই মপোক্তা পোক্লকপগী করিগুম্বা খরা ইমা লৈবাক মনিপুরগীদমক খুদোল তম্লবদুনি ফিদমদি।  অদুনা আরকেসিএস পেত্রিয়োত অমনি হায়না লৌদবা ঙমদে। মহাক লাই য়েকপগী কলা অসিনা মালেমদা মনিপুরবু মশক তাকনবা হোৎনবীরম্বা মণিপুর ইমাগী নুংশিথোইরবা চিত্রকারনি।

 

নীংশিংবা য়াই কাওবা ঙম্লরোইদবা নুমিৎ অমা- নভেম্বর ২০, ২০০৪ মনিপুরগী মীয়ামদা শেংলবা লাইফম্লেন কংলাবু মনিপুরগী মীয়ামদা শিন্নখিবা নুমিৎ। কুমজা ১৩৩ মতুংদা ভারতকি প্রাইম মিনিস্তর দাঃ মনমোহন সিংহনা মণিপুর মীয়ামদা কাংলা খুৎশিন্নখিবা নুমিৎ অসিদনি মীয়ামগী চিত্রকার আরকেসিএসনা তাইবঙ মপুগী লৈকোলদা তিনখিবা নুমিৎ অদু। নুমিৎ অসিতবু কুমজা কয়া ঙাইদুনা লৈরকপগুম্না থোকখি। নুংশিবা মীকুপ, অৱাবা মীৎকুপ, নুংঙাইবা পুংফম অহুম্মক পুল্লগা ঙাইরম্বগুম্না থোকখি। মহাকনা য়েকপা, “কংলা- দি গ্লোরি ওব মনিপুরী সিবিলাইজেসন” ভারতকী প্রাইম মিনিস্তর দাঃ মনমোহন্দা খুদোল তমখি মতমদুগী মণিপুর লৈঙাক্কী চীফ মীনিস্তর ওক্রম ইবোবীনা। মহাকনা য়েক্লম্বা কংলাগী স্নথোঙগী পেন্তিংসু মতমদুগী অসাম রাইফলস্কি  ডি জি লেপ্টঃ জেনরেল ভোপিন্দ্র সিংহনা প্রাইম মিনিস্তরদা নুমিত্তুদা খুদোল তমখি।  পুংফম অসিতবু ঙাইরম্বগুম শকনাইরবা চিত্রকার আরকেসিএস তাইবঙ খোঙচৎ পন্দোম লোমখি মশাগী চহী ৮১শুরকপদা। য়াম্না সিম্বোলিক ওইখি। কংলাবু মহাকনা কয়াম নুংশিজখিবা হায়বদুসু নুমিৎ অসিগী কাওঙমদ্রবা থৌদোক অসিনা ওইরি। মুৎনাইদ্রবা কলাগী খোঙ্গুল অমদি থম্নমখি আরকেসিএস ম্যুজিয়ম ওফ আর্ত এন্দ ক্রাস্ত হায়দুনা লেমজনিংঙাই অমসুং চাওথোকচনিংঙাই ওইরবা হিস্তরিকেল পেন্তিংগী আর্ত গেল্লরী অমা মনিপুরগী লৈমায়দা। গেল্লরী অসিমকসু মহাকনা মালেম তাইবঙপান অসি থাদোক্কদবা কুমজা অমা ৱাৎলিঙৈদা ২০০৩গী মে ৫দা মতমদুগী উরিষ্যাগী রাজ্যপাল শ্রী এমএম রাজেন্দ্রন, মনিপুরগী রাজ্যপাল শ্রীবেদ মারৱা অমসুং চিফ মিনিস্তর শ্রীওক্রম ইবোবীনা হৌনবী মতুং ইন্না হাংদোকখি। মসিবু য়েংনবা মালেমগী মফম কয়াদগী আর্ত লভরস কয়া লমকোয়বা কয়া মনিপুরদা লাকপা লেপত্রি। হৌজীক ফাওবদা মালেমগী লৈবাক ৫০ হেনবদগী মীওই কয়া গেল্লরী অসিদা লাকখিবগী পাউদম লৈরি।

 

শকনাইরবা আর্তিস, পাউল সিজেন্না হায়, ‘A work of ar which did not begin in emotion is not art’ লাই য়েকপা হায়বসি আরকেসিএসকিদি শিনফম নত্তে, আর্ত হায়বসিনা মহাক্কী থৱায়নি হায়বসি য়াম্না ঙন্না খঙখি হায়বসি উবা ফংই। মহাক্কী থম্মোয়দগী থোক্লকপা পুৱারীগী অকাওবগী ঈরোন্নুংদা লুপখ্রবা শক্তমশিং নৌহৌননা কেনভান্সতা পুথোকলকপা হায়বসি ওন্থোকনা মমল য়ামখ্রে। অয়াম্বা মতমদা মীয়ামগা শম্নবা পামখি। অদুনা তুংগী মীরোলদা লাই য়েকপা হায়বা মহৈ অসি হৌরক্লিবা অঙাংশিংদা তম্বীবদা খরদং মতেং ওইনবা হায়দুনা লাই য়েকপগী মপি লাইরিক দ্রোৱইং বুক অমা স্তূদেন্ট স্তোরনা পুথোকখি ১৯৫০দা। মসি ১০৭২ফাওবা লাই য়েকপগী লাইরিক ওইনা তম্নরমখি। অঙনবা মতম ১৯৪৭তা মালেমগী অনীশুবা লাঞ্জাওদা লানকায়রুরবা মতুংদা লান হঞ্জিন্নরকপা মতমসিদা মেক্সৱেল বজার হৌজীকনা থাঙ্গাল কৈথেলসিদা মহাক্কি লাই য়েকপগী স্তূদিও অমা হাংদোকখি। শকনাইরবা মনিপুরগী পুৱারী ইরম্বা নীংথৌখোংজম খেলচন্দ্রনা লাইরিক অসিদা ‘আরকেসিএসকী মরমদা ঐনা খঙহৌবা’ হায়বসিদা ইরিবসি ওন্থোকনা মমল য়ামখ্রবা পুৱারীগী লাতম অমনি মরু ওইনা মনিপুরগী আর্ত হিস্তরি শাগৎলকপদা। অদুনা ইরম্লি,’ মনিপুরদা সিনেমা পোস্তরে য়েকপা হৌদোকখিবা, লাইসু শারম্মী, দুর্গাগী মূর্ত্তি, সরস্বতিগী মূর্ত্তি, মন্দপ্তা থেৎনবা লাই য়েকপা, মসিদা নত্তনা কাংগী চীংবগী লাই, ঝুলনগী লাই কয়া অসিনচিংবা পনবা য়াই। হোর্দিংদা অচৌবা লাই য়েকপসি আরকেসিএসনা ইহান হানব্রা খল্লি।’ ‘থিয়েটরগী লমদদি মহাক্কী দান চাউই’

 

পণ্ডিত খেলচন্দ্রনা থেংনহৌবা মহাক্কি থোইদোক হেন্দোকপা কলাগী মগুণ অসিবু শিংথারদুনা অসুম্না ইরি, ‘মহাক পোর্ত্রেৎ শিন্দোকপা হায়বদি মীগী শক্তম য়েকপদা মমীংসু চৎখিবা কলাকারনি। বৈষ্ণব ধর্ম্মগা মরি লৈনবা ইতিহাসকা মরী লৈনবা লাইশিং মোইরাং কংলৈরোল, (খম্বা থোইবীগী ৱারী) ইতিহাসকা মরী লৈনবা লাইশিং  অমসুং মতম অমদা চৎনরম্বা চৎনরোল, কেমেরানদি কেচর তৌহৌদ্রবা লাই কয়াবু হৌরক্লিবা তুংগী মীরোলগীদমক্তা য়েকপীরম্বা পনবা য়াই। মহাক্তী কলাকার শাবা নত্তে, ফাওনবা হোৎনখিবসু নত্তে, মহাক্তী মনিপুর ইমাগী মশাইগোন্দা মণিপুর ইমাগী অহোবা, অহাঙবা কলাগী থবক কয়াবু মেনসিন্নবা লাইনা থারকপা অশেংবা কলাকারনি।’

 

লাইরিক অসিদা ভক্তি স্বরূপ দামোদর শ্বামীনা শকনাইরবা চিত্রকার অসিনা খঙহৌদনা নোঙ্গাখিবদা থম্মোয় শোকনা অৱাবা ফোঙদোক্লি। মীরমদগী সনখ্যাগী কর্ম্ম য়াওবা থৌওইনা লেংলকখি। দামোদর শ্বামীগা আরকেসিএসকা ১৯৮২-৮৩ মতমসিদগী শকখঙনখি। মসিগী মতুংদা দামোদর শ্বামীগা চিত্রকার অসিগা নকশিন্নখি। কলাকার অসিনা য়েকপা ভক্তি ভাবনাদা য়ুম্ফম ওইবা বৈষ্ণব ধর্ম্মগী মমল য়াম্লবা লাই কয়া ঙসিসু ইস্কোন মনিপুরগী মনিমন্দিরদা লৈতেং ওইরি হায়না শিংথারম্লি। মহাক্কী লাই কয়া নোংচুপ বেঙ্গোলগী মায়াপুর ধামদা পুদুনা শ্রীচৈতন্যমহাপ্রভুগী চহী ৫০০শুরকপগী পালনগা মরি লৈনবা উৎখিবা অদুদা মালেমগী ভক্ত বৈষ্ণব লীশিং কয়ানা থাগৎনখিবদু কয়াদি নুংঙাইরবা মীকুপ অমা ওইরিবা। হীরম অসিদা পান্দুপ অমা লৌখৎতুনা রিচার্স ফাওবা তৌবা য়ারি। য়াম্না পাক চাওখ্রবা কলাগী পূক্কৈ অমদি ওইরি।

 

আরকেসিএসকী পুন্সি খোঙচৎনা পন্দোম লোমখিবদা মনিপুরদা লৈরিবা শকনাইরবা মীওই কয়া অৱাবা অমসুং নুংঙাইতবা লেপ্তনা ফোঙদোকনখি। ঙসিসু মেনশিনবা ঙম্লরোইদবা অহাংবা অমদি লৈহৌরি। লাইরিক অসিদা ওজা আরকে শিতলজিৎকী ৱাহৌদোক্তগী হৌদুনা মণিপুর মনুং অমসুং মপান্দা ফোংবা পাউ চে কয়াদা মহাক লৈতবগী অৱাবা ফোঙদোকপা অমদি মহাকনা কলাগী লমদা খুদোল তম্লম্লিবা কয়াবু শিংথাদুনা ইবা কয়া অমা য়াওরি। মসিদা য়াওরি শকনাইরবা স্পিরিচ্যুএল গুরু ভক্তি স্বরূপ দামোদরগী, শকণাইরবা হিস্তরিয়ান এন খেলচন্দ্রগী, মনিপুরী সাহিত্যগী শকনাইরবা অইবা নোভেলিস্ত চিত্রস্বর শর্ম্মানা চিত্রকারদা কৎচবা শ্রধানজলি, লাইশ্রম সমরেন্দ্রগী; শকনাইরবা ক্রিতিক আরকে বিদুরনা ইবা শ্রধানজলি; আরকেসিএস (শম্লপ্পা পুন্সি ৱারী) ‘অথৌবা’ মণিপুরবু মালেমদা মশক তাকখিবা- থিঙ্গোম মঙ্গী; মালেমদা পাউদম্লম্বা আরকেসিএসস- হাওবম সনাজাওবা; চিত্রকার রাজকুমার চন্দ্রজিৎসনাদা- দাঃ ষামিনী; নুংঙাইবা নুমিত্তা অৱাবগী- দাঃ মখোনমনি মোংশাবা; আরকেসিএসনা নোঙ্গাখিবদা- বুধ চিংথাম; কংলানা ঐখোয়গী ওইবদা- গীতাঞ্জনি সোরাম; কংলা অমদি আরকেসিএস- মাইবম লন্নচন্দ্র; আরকেসিএসনা লৈখিদবদা- ঐচ সোমোরেন্দ্রা; মণিপুর থিয়েটরদা আরকেসিএসকী খুদোল- লমাগো; ইতিহাসকী লমায় অমনা খুমজিনখিবদা- শরতচান্দ থিয়াম অসিনচিংবা কয়ানি লাইরিক অসিদা য়াওরিবসি। মপাল লমদা লৈবা মহাক্কি কলা অসিদা লুপচবা মীওই কয়ানসু ইরকখি লেপ্তনা মসিগী মরক্তা পিতর বিয়াঞ্চি, সোরোজকুমার, R.S. Jassal, Anupam Bordoloi অসিনচিংবা কয়ানা ইরকখি। লমদম অসিগী মিনিস্তর ওইরম্বা দাঃ এম নারা, এম এল এশিং, কয়ানা তেংথাখি চিত্রকার অমনা চৎখিবদা।  আর্ত সোসাইতিগী চেয়ারমেনসু ওইবীরম্বা কলাকার অসিনা নোঙ্গাখিবদা কয়াম ৱানখিবা হায়বদু লাইরিক অসি পাবদা থেংনবীগনি। খুনাই অসিদা লৈরিবা কাংলুপ ফুরুপ কয়ানা অমত্তা ওইনা মীয়ামগী লাই য়েকপা অসিদা লৈখিদবদা ৱাজবা অদুমক উবা ফংই। লাইরিক অসি মনিপুরগী আরর হিস্তরি শাগৎপদা চাওনা মতেং ওইগনি হায়বগী থাজবা থমজরি। মহাক্কী শিংথানিংঙাই ওইরবা খুদোল অসিবু ইকায়খুম্নবা ওইনা মনা মথুম কয়াসু খুৎশিন্নখি মহাকনা হীংলিঙৈদা। থিয়েটর সেন্তর মনিপুরনা বেস্ত স্তেজ দেকোরেটর ১৯৬০দা পীখি। মণিপুর সাহিত্য পরিষদনা ‘শীল্প ভুষণ’ ১৯৮১দা পীখি। মণিপুর স্তেত কলা একাদেমি ফেল্লো ১৯৮৯দা ফংখি। মণিপুর লৈঙাকনা রিবল্বিক দেদা গোল্ড মেডল পীখি। মণিপুর দ্রামাতিক য়ুনিয়ন্না ‘গম্ভিনি এৱার্দ, ২০০৩ খুৎশিন্নখি অমসুং মনিপুরী সাহিত্য পরিষদনা ‘চিত্রকলা রত্না ২০০৫তা পীখি।

 

লৈবাক অসিগী প্রসিদেন্ট, প্রাইম মিনিস্তর, য়ুনিয়ন মিনিস্তর কয়া অমদি ইন্দিয়াগী লৈরিবা স্তেটশিংদা মহাক্কী কঅলা অসিনা য়ৌদবা লৈখিদে হায়বা লাইরিক অসি পাবদা লোয়ণা থেংনবীগনি। শকনাইরবা চিত্রকার আরকেসিএসনা মঙলম্বা মঙলান অদুদি লোয়নমক মঙফাওনখিদনা তাইবঙ চেংজেল লোইখিবনা হান্দুনা পুন্সি নুমিৎনা য়াচংবদা য়াওখি। অদুবু মচা ইবুংঙো বুধিমন্ত কর্ত্তানা অমুক লিকম অসি ঙাকনা পন্থৌ অপোকপনা পাঙথোক্কে খল্লবা কয়া চংশিল্লি থবক ওইনা। মসিমক ঙসি হৌরক্লিবা লাই য়েকপা কলা অসিবু পামজবা নহা কয়াদা অচৌবা থৌনা অমনি। আর্ত এক্সিবিসন কয়া লেপ্তনা পাঙথোকপা, ঐখোয় মশেল অমনা অমবু তেংবাংনবা অমদি হেন্না মনিপুরবু মালেমগী মীয়ামদা লাই য়েকপা কলা অসিনসু মশক তাকপদা পুম্নমকনা অমত্তা ওইনা থৌদাং লৌমিন্নবা মথৌ তাই।

 

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু