নুমিৎ ৫নি চত্থগদবা ‘ফেষ্টিবেল ওফ বুকস’ হৌদোকখ্রে
ইম্ফাল, মার্চ ০৯ : মণিপুরদা হৌজিক থোক্লিবা কনফ্লিক্ট অসিনা মরম ওইরদুনা পূক্নিং ৱাখল লৈতাহন্দববু খরদংবু ওইরবসু লাইরিক পাবগী হৈনবী থম্নবগী পান্দমদা রিদরস বুক ষ্টোরনা শীন্দুনা নুমিৎ মঙানি চত্থগদবা ‘ফেষ্টিবেল ওব বুকস’ হৌদোকখ্রে।
ফেষ্টিবেল অসি ঙসি ইম্ফালগী পেলেস কম্পাউন্দদা লৈবা মণিপুরী ষ্টেট ফিল্ম দিভেলপমেন্ট সোসাইটি (এম এস এফ দি এস) কী কেম্পসতা হৌদোকখিবনি।
অসিগুম্বা মখলগী অহানবা ফেষ্টিবেল ওইরবা ফেষ্টিবেল ওফ বুকস অসিদা থম্লিবা মীতৈলোলগী লিটরেচরগী লাইরিকশিং য়াওনা লাইরিক পূম্নমক্তা চাদা ২০ গী দিস্কাউন্ট পীগনি। অদুগা লাইরিক অনী লৈরবদি লাইরিক অমা হাপ্পগী চৎনবীসু অখন্নবা লাইরিক খরদা পীগনি হায়রি। ফেষ্টিবেল অসিদা পুথোরক্লিবা লাইরিকশিংগী মনুঙদা ফিক্সন, নন ফিক্সন, ক্লাসিক্স, মীতৈ লোলগী লিটরেচর, নোর্থ ইষ্ট অমসুং মহৈরোয়শিংনা তম্নবা টেক্সট বুকশিং য়াওরি।
ঙসি হৌদোকখিবা ফেষ্টিবেল অসিগা মরী লৈননা রিদরস বুক ষ্টোরগী কোওর্দিনেটর দামুদোর অরাম্বমনা ফোঙদোকখিবদা চহী অনীরোম মণিপুরগী মীয়াম হৌজিক ফাওবা থোক্লিবা কনফ্লিক্ট অসিনা মরম ওইরদুনা পূক্নিং ৱাখল নুংঙাইতবা মায়োক্নহল্লক্লি। মরম অসিনা ফেষ্টিবেল অসিদা পুথোক্লিবা লাইরিকশিং অসি পারগা পূক্নিং ৱাখলগী অৱাবশিং অদু খরদং ওইরবসু হন্থহন্নীংবগী পান্দমদা ফেষ্টিবেল অসি পাঙথোকপনি। অদুগা লাইরিক পাবগী হৈনবী থমহন্নীংবগা লোয়ননা ইম্ফালবু লাইরিক পাবশিংগী সিটি অমা ওইহন্নীংবগী পান্দমদা পাঙথোকপনি। ফেষ্টিবেল অসি মীয়াম পুম্নমক্না শরুক য়াবীদুনা মায় পাকহনবীয়ু হায়নসু মহাক্না আপীল তৌখি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু