নুমিৎ হুম্নি চত্থরকপা রাজর্ষি ভাগ্যচন্দ্র লৈখিদবগী ২২৬ শুবা পালন থৌরম লোইশিনখ্রে
ইম্ফাল, ওক্টোবর ১০ : রাজর্ষি ভাগ্যচন্দ্র কলচরেল ফাউন্দেসন, মণিপুর অমদি জেএন মণিপুর দান্স একাদমিনা শীন্দুনা রাজর্ষি ভাগ্যচন্দ্রনা লৈখিদবগী চহী ২২৬ শুবা পালন থৌরম নত সঙ্কির্তন, রাস লীলাগা লোয়ননা উত্তর প্রদেশকী অয়োধ্যাগী রাম মন্দির বৃন্দাবন অমদি রাধা কুন্ডদা নুমিৎ হুম্নি চুপ্না পাঙথোকখিবা থৌরম ঙরাং লোইশিনখ্রে।
থৌরম অসি পাঙথোকপগী মতাংদা রাজর্ষি ভাগ্যচন্দ্র কলচরেল ফাউন্দেসন, মণিপুরগী ৱাঙাংলোয় তখেল্লম্বম ইরাবোতনা হায়খিবদা, ইং ২০১২ দগী হৌদুনা রাজর্ষি ভাগ্যচন্দ্রনা চৎলম্বা বাংলাদেশ, ম্যান্মার য়াওনা ভারতকী তোঙান তোঙানবা ষ্টেটশিংদা চৎতুনা রাজর্ষি ভাগ্যচন্দ্রগী লৈখিদবগী কুমওন পালন পাঙথোক্তুনা লাক্লি।
ইরাবোতনা মখা তানা হায়, রাজর্ষি ভাগ্যচন্দ্রনা লীংখৎপীরম্বা মহারাস, কুঞ্জরাস, বসন্তরাস হায়রিবা জগোয় মখল অহুম অসি অয়োধ্যা, বৃন্দাবন অমদি রাধা কুন্ডদা মফম হোং হোংদুনা পাঙথোকপনি। রাজর্ষিনা থম্বীরম্লিবা কলা সংস্কৃতিবু বাংলাদেশ, ম্যান্মার য়াওনা ভারতকী তোঙান তোঙানবা মফমগী মীয়ামদা খঙহন্নবগীদমক চহী খূদিংগী মফম হোং হোংদুনা কুমওন পালন অসি পাঙথোকপনি। হৌখিবা চহীদসু ত্রিপুরাদা রাজর্ষি ভাগ্যচন্দ্রগী মুর্ত্তি খিন্দুনা ত্রিপুরাগী মীয়ামদা রাজর্ষিবু শক খঙহনখি।
থৌরম অদুদা শরুক য়াখিবা জেএন মণিপুর দান্স একদমিগী দাইরেক্টর ও বিলাশনা ফোঙদোকখিবদা, রাজর্ষি ভাগ্যচন্দ্রনা হৌদোকপীরম্বা রাস লীলাশিং তোঙান তোঙানবা লাইফমশিংদা চৎতুনা অমুক হন্না মণিপুরদা শান্তি পুরক্নবা খুরুমজবনি হায়খি।
থৌরম অদুদা জেএন মণিপুর দান্স একাদমিগী দাইরেক্টর ও বিলাশ, রাজর্ষি ভাগ্যচন্দ্র কলচরেল ফাউন্দেসন মণিপুরগী প্রেসিদন্টে ইন চার্জ জি রঞ্জিৎ, এদভাইজর আরকে রাধামোহন, ভাইস প্রেসিদেন্ট এম অশোক, জেনরেল সেক্রেটরি টিঐচ ধনকুমার য়াওনা ষ্টেট কলা একাদেমি ন্যু দিল্লিগী মীহুৎশিংসু শরুক য়াখি।
সোর্স: পাউজেল
0 কমেন্ট:
কমেন্ট তৌবিয়ু