আপডেট:
image

নবকুমার নোংমৈকাপ্পম গী নোক্নীং ৱারী মচা পিকত্রু – ০২

[মণিপুরী লিটরেরি সোসাইটি ‘না ২০১৮দা ফোংখিবা মণিপুরগী শক্নাইরবা অইবা ওজা নবকুমার নোংমৈকাপ্পমগী ”তূম্লমদাইদা অমমমদং (নোক্নীং ৱারী মচা পিকত্রু)” কৌবা লাই

 

[মণিপুরী লিটরেরি সোসাইটি ‘না ২০১৮দা ফোংখিবা মণিপুরগী শক্নাইরবা অইবা ওজা নবকুমার নোংমৈকাপ্পমগী ”তূম্লমদাইদা অমমমদং (নোক্নীং ৱারী মচা পিকত্রু)” কৌবা লাইরিক অদুদগী নোক্নীং ৱারী মচা পিকত্রু খরা অইবগি অয়াবা লৌজরগা মণিপুরী মিররগী অপাবাশিংগীদমক অমুক ওয়েবসাইট অসিদা আপলোড তৌজবনি। লাইরিক অসিগী মতাংদা ৱাহৌদোক ওইনা ওজা ইবোহল সিংহ কাঙুজম (প্রসিদেন্ট, মণিপুরী সাহিত্য পরিষদ, ইম্ফাল)না অসুম্না ফোংদোকপিরম্মী – ” ইনৌ নৌবা মচন অমা ওইনা ”নোক্নীং ৱারী মচা পিকত্রু” হায়বা অমসু মরূ হুল্লক্লি । নবকুমার নোংমৈকাপ্পমগী অনৌবা খূৎথানি। ৱারী মচন অসিগী পান্দমদি মপূংদা ফাগিনি, অপাববু নোকহনবনি।”

চহী খরগী মাংদা ফোংখিবা ওইরবসু মণিপুর অমসুং মপান মণিপুরগী অপাবাশিংদা নৌহৌননা অনৌবা মখলগী সাহিত্যগী মচল অমা ওইরিবা নোক্নীং ৱারী মচা পিকত্রু খরা ময়ামদা পাহননিংদুনা, তাহননিংদুনা থমজবনি। ময়াম পাবিয়ু অমসুং নৈনবিয়ু। – ইদিতর, আর্টস, মণিপুরী মিরর। ]

 

 

 

লীশীং অনী চৎপীগী মপু

 

ঙসিদি চহী হৌবা নুমিৎনি হায়দুনা মমান্নবশিংগা হীদাক পায়মিন্নরগা নিশা নুংঙাইখৎলকপগী মতাংদুদা ৱারীনা মারিনরকই।

 

কন্দ্রঙনা হায়রকই, “ঐনা নিশা নুংঙাইরকপা নুমিৎতা ঐখোয় শাইগী মখজাইদা নুংশিনা অমুক-মুক চূপ্পিবা খূদিংগী মানা মাগী ফমুং মনাক্তা লৈরিবা শেনফুদুদা লূপা তরা চৎপী অমমম হেক-হেক থাদহল্লি। চহীসিদা ঐনা মঙোন্দা কয়ারক চূপখিগে য়েংগে হায়দুনা ঙরাং বা-বাই নুমিৎতা শেনফূদু থুগাইরুবদা লূপা লীশীং মঙা হেন্না য়াওরম্বগী ৱানিনে। মদুদা ঐনা খল্লিবসি নুংতিগী চূপ্লবসু নুমিৎ ৩৬৫নিগী লূপা ৩৬৫০দগী হেন্না য়াওফম থোক্তবনি। থবক চত্থোক্তুনা য়ূমদা হল্লক্তবা নুমিৎসু ফনা য়াম্না য়াওখ্রিপোৎনি।”

 

ঙাংবনা গ্লাসতু থাংগৎলগা অমুক্তংদা কুৎ য়োৎলগা হায়রকই, “তরা চৎপী নত্তবশিংগী মশীংদুদি নঙ খঙলিব্রা?”

 

কন্দ্রঙনা খুম্লকই, “নীংশিংলি, চামঙা চৎপী অহুমগা লীশীং অনী চৎপী অমগনি।”

 

শেল মশীংদু লাল্লি চুম্মি হায়দুনা কন্দ্রঙগা ঙাংবগা অততাই ওইনা য়েৎনরকপদগী খূৎ য়াওনরক্কদৌরবদুদা ময়াম চঙদুন খামদোক্লে।

 

ঙাংবনা শাউনা হায়রকই, “অহুম্লক্কী ঐনা থাদরম্বদি চামঙা চৎপী অহুমখক্তনি। অদুগা মানা লীশীং অনী চৎপী অমসু য়াওইকাকা হায়জিল্লক্লদনা।”

 

ঙাংবগা কনদ্রঙগা লাল দিক্লার তৌনরক্লবদা শেয় য়াম্না শৎকনবা হম্পোইবা পাখ্রা তোয়াই মীরক তাল্লক য়েংলগা থুনা য়াঙনা অমম্বা মরক্তুদা শৎ মাঙখ্রে। (১৮-০৫-২০১৭)

 

 

 

খঙদে হায়বনা মফরে

 

মণিপুরদা লালহৌবগি ঈরাং য়াম্না কল্লিঙৈ মতমনি।

 

পেত্রোল্লিং লাকপা আর্মিশিংদুগী মরক্তগী অমনা লৌরাং শূদুনা লৈরিবা শানৌতোনগী মনাক্তা চঙশিল্লক্লগা মনাক্তা হংলখি,“ সোমদা লালহৌবশিংককা চৎখিবা উহৌব্রা? ”

“আর্মিনা হংলক্লদি খঙই হায়রুরবদি পংহংদা হংজিল্লকপনি অদুগা খঙদবা অমতং য়াওরকপদা হেক্তা ফূবনি। অদুনা, হংলকপা খূদিংমক খঙদে হায়না খূম্বনা মফরবনি,” হায়না ময়াম্না হায়নবদু খংনীং নীংশিংলক্তুনা শানৌতোন্না খুম্লম্মী, “ খঙদে।”

“ করম্বা মতমদা হেক-হেক লাকই? ”

“ খঙদে,” নাকোংদা চঙলকপগা চীনলোমদা থাদোরকপনি।

নখোয় লৈকাইদা লালহৌবশিংগা মরী লৈনবা মীওইককা লৈব্রা? ”

“ খঙদে।”

শানৌতোনগী কোক্তু খঙলক্লবা করিনো আর্মিদু মোমোন তৌরকখি।

“ নঙ চাক চারক্লব্রা? ”

“ খঙদে,” করিমত্তা খঞ্জিল্লুদনা শানৌতোন্না খুমদোকখিবনি।

মাগী মওংদুদা আর্মিদুনা খংহং হংজিল্লকই, “ নঙগী নমীং করি কৌই? ”

“ খঙদে।”

“ করি! নশাগী নমীংফাও খঙদবা,” হায়রগা খূৎচাওদুনা অমুক্তং থাজিল্লকপবু শানৌতোন ঊংজা পুরগা লৈখোম মরক্তা মমায়না য়ুংশিনখি। (২৫-০৪-২০১৭)

 

 

 

চরূগী মী অমসুং উচেক

 

লাই হরাওবগী নোং খামগনি হায়দুনা লাক্লিবা মাইবদুনা মাগী তৌফম থোকপা লাইশোন নীনশোন, লাইথৌদু লৈপ্তনা পাঙথোক্লি। অদুবু নোংদি হেন্না-হেন্না হৈথরকপদুদা খোয়শাওনরবা নহা কাঙবুদুনা লাউশিন্নরক্লে:

“ওজা মাইবনা তৌবিরিসিবু করিনো? ঐখোয়না নহান্দগী চাক থাক্তুনা থম্লক্লিবসে নোং হেন্না হৈথ চুহন্নবা নত্তেয়ে।”

“নোং খাম্বা মাইবা, ঙসি, কায়নি।”

“মাইবা হাৎহৈদে হায়বা লৈতবনিকো।”

“মফমসিদা চৈতূপ, থাঙ তেন করিসু ৱাত্তেয়ে।”

… … …

মীয়ামদুনা অকনবা খোল্লাউগা লোয়ননা মায়কৈ সলাই খঙদবমখৈ পঙলাওদা লাউশিন্নরক্লবদুদা মাইবদু লাই খুরুম্লমবদগী ফুক হৌগৎলগা চেন্থোকখ্রে। অদুগা নাশোন্ননা শাউনা হায়রম্মী, “নুংশিৎকা লেনগা য়াওদ্রিসে নরাইবক্তুম ফরবনি।” (০৩-০৪-২০১৬)

 

 

 

লৌ

 

ইম্ফাল তম্পাক্তা পোস্তিং তাবা লৈঙাক্কী থৌমীশিং, নোং খরা হেক চুখিবগা ঈশিং থূম্লে হায়দুনা ওফিস হেক-হেক কানরক্তে। থৌওংসি চহী খরসিদা লেপ্তনা অসুম চত্থনরক্লি।

ওফিস কানরক্তবশিংগী মরক্তা চীংগী দিস্ত্রিক, উখ্রুলদগী রমথিংসু কারক্ত্রে। ওফিসার মথন্তনা শূবা য়াদদুনা ফাইল কয়া পেন্দিংদা লৈরে।

মানা ওফিস কারকপা নুমিৎতা ওফিসারনা কৌশিল্লগা হংই, “রমথিং, নঙনা হন্দক ওফিস কারক্ত্রিবসিগী মরম করিগীনো?”

“সার ঈশিং চাউদুনা য়ূম লোইনা থূম্লে। অদুগীনে।”

ওফিসারদুনা ইঙক-ঙক্না হংজিল্লি, “আই, অঙকপনিহে! নখোয়গী চীদোন্দুদবু কমদৌনা ঈশিং চাউরিনোনে?”

(২০-০২-২০১৬)

 

 

 

চিংখৎপিবা

 

ফমেন্দা ফম্লিবী মবোক হনুবীদু তম্না চেনশিল্লকপদা অঙাংদা চুরি তাফমদা য়ুংশিনখ্রে। মখুৎ অনীমক মওং চাদনা ননশিনখিবদুদা গারী চাকা ঊংবদৌনা হৌগৎপা ঙমদদুনা কপ্তুনা অদুম লৈরে।

তৌরিবা মতৌদু উবদা মবোক হনুবীদুনা ময়া ইকোপ কোপ্না হায়রকই, “ ইবুংঙো, হৌগৎপা ঙমদ্রবরা? ইবোক্কী নাকসিদা লাউ, ইবোক চিংখিৎপিগে। ”

শূমাঙ মতোন্দা ঙসাইদগী ফি শূরিবী অঙাং মমাদু, হনুবীদুগী ৱাদুদা শাউরক্তুনা ফী-ফী কাম্না হায়রকই, “ তুশিন্দুনা হৌগৎপা ঙমদ্রবা অঙাংসিনা ননাক্তা কমাইনা লাকপা ঙমদৌরিনো ? ননাক্তা লাকপবু ঙম্লবদি ইবোক্না চিংখৎপিদ্রবসু য়ারে।”

হনুবীদুনা ইতপ-তপখৈ অমুক হায়রকই, “ অদু ওইরগনা, নঙনা ঐবু নচাদুগী মনাক্তা পোরগা অমুক্তা থাংজিল্লাউ, নচাদো্ ঐ চিংখৎপিগে। ” (১৯-১০-১৯৯৭)

 

 

 

ভদ্রমহিলা

 

ইচে লৈরেন্তোম্বীদু মমায় মমীৎতু ইপোম পোমখৎ, অফিং কারগা কপ্লি কপ্লি তৌরদুনা ফিংনা প্রপ প্রপ লাকই। লাইরিক লাইশুসু তমখিদবীনি।

ইমানা ইচিং চিংনরদুনা হংলুই, “করিনো নঙনা তৌরক্লিসিবো?”

ইচেনা হেক্তা ফিংগৎলগা কপ্না-কপ্না হায়রকই, “উশিৎ থৌওইদদুনা ঐঙোন্দা জাৎ-জাৎ হায়বগী তপ তাখৈ খৎনথোক্লম্লবা। মখোয়গী মপা মপুদুনা ঐখোয়গী ইপা ইপুদগী করিদা হেল্লদনা! ইবুং ইপ্বা অসুক য়াম্না লৈরিঙৈদা মানা ঐবু উশিৎ থৌরইদনা পঙতৌ তৌবা য়াব্রা?

ইমানা তকশিল্লদুনা মখা তানা হায়, “অদুবু কৈদৌনরগে হায়বা?”

“মানা ঐবু উশিৎ থৌওইদদুনা ঐঙোন্দা ‘ভদ্রমহিলা’ হায় শারিয়ে। ঐনা কদাইৱাইদা ভদ্রমহিলা ওইখ্রে? মফম মতম তাক্লুরাউ হায়দুনা মখূৎ পায়দুনা চিংলসু নোক্রেম হায়ক্রেমনদুনা অদুম লৈ। অদুদগীদি ঈচীনসে পেন্নবা খৎনরম্লগা য়ুমগী পোৎ চৈককা লোইনা থুগাইরম্লগা লাক্লবনি। ঐগী ইবুং ইপ্বাশিংদু কদাই কদাইদা চৎনখি? কৌথোরকউ। মরীল তেংহল্লুসি।”

ঐনা নোকপা খাঙলগা, তপ্না চঙশিল্লগা হায়রুই, “ইচে, ঐ ৱা হায়গে, অচৌ অশাংগী নুপী, পূকলে চাউরবী হায়বসে হিন্দীদা ভদ্রমহিলা হায়রে। অদুদা নঙনা শাউরিবা করিগীনো? ইংলিসতনা লেডিস হায়দো।”

ইচেদো পূমঙক-ঙক্না ঐঙোন্দা মুন্না য়েংলকই, “অওইবরো?”

“ঐনা ইচেদবু ফাগি অমুক তৌখিগদ্র?”

কপ্লি-কপ্লি মখা তাথরকই, “অদুনা ওইরে ঐনা শাউরগা মানা পঙনোক্তা নোক্লিদো। ঐদি ঐনা লমৎচ কাম্লুরে হায়দুনা মানা হন্থনা হায়রিবনি হায়দুনা সি য়ৌনা শাউখৈ শাউরুরগা! ঐদি য়ূমদুদা কমাইনা অমুক চঙদোইবা?”

(২৭-০৯-১৯৮৭)

 

( নবকুমার নোংমৈকাপ্পম গী নোক্নীং ৱারী মচা পিকত্রু – ০১ ) – 

নবকুমার নোংমৈকাপ্পম গী নোক্নীং ৱারী মচা পিকত্রু – ০১

 

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু