image

তোম্বা খুমনদা থোমাস হর্দি নীংশিং সাহিত্য মনা ২০২২ পীরগনি

ইম্ফাল, সেপ্টেম্বর ১২ : সাহিত্য য়োকখৎ কাঙলুপ (সায়োকা) তেন্থানা চহী খূদিংগী খুঙ্গংগী মরমদা ইবা লাইরিকশিংদা পীদুনা লাকপা থোমাস হর্দি নীংশিং সাহিত্য মনা ২০২২ চহী অসিগী ওইনা খাঙবোক অমসুং ইকোপ নিংথৌ পুয়াগী অইবা লাইশ্রম তোম্বা খুমনদা পীদুনা ঈকায়খুম্নরগনি হায়ান সায়োকা তেন্থাগী সেক্রেটারি মাইবম প্রেমোজিৎনা থাদোরকপা চেরোল অমনা ফোঙদোরক্লি।

এৱার্দ অসি লমদম অসিগী শক্নাইরবা অইবা কবিরাজ মোইরাংথেম রাজেন্দ্রনা দোনার ওইদুনা থোমাস হর্দিবু নীংশিংলদুনা লমদম অসিগী অইবা-অইবীশিংনা খুঙ্গংগী মরমদা ইবা লাইরিকশিংদা কুমজা ২০১৭তগী লেপ্তনা পীদুনা লাকখিবনি। এৱার্দ অসিদা শেল ওইনা লুপা লিশিং ৫, সোল অমদি শকখঙচে অমা য়াওরি।

এৱার্দ অসি চহী অসিগী লাক্লিবা ওক্টোবর ১০, নিংথৌকাবা নুমীৎতা পাঙথোক্কদবা সাহিত্য য়োকখৎ কাঙলুপ (সায়োকা) তেন্থাগী মপোক কুমওন থৌরমদা লান্থোক্কনি। থোমাস হর্দি নীংশিং সাহিত্য মনা ২০২২ ফংলগদবা অইবা লাইশ্রম তোম্বা খুমন কুমজা ১৯৪৬ কী জানুয়ারী ৫দা থৌবা দিষ্ট্রিক্টকী মনুং চন্না লৈবা খাঙবোক পার্ট টু ময়াই লৈকায়দা লৈখিদ্রবা লাইশ্রম মোধু অমদি লাইশ্রম ওংবী পিশক অনীগী মপারী ওইনা তাইবংদা খোঙদারকখি।


মহাক কুমজা ১৯৬৮ গী সেপ্টম্বর ৯দা মণিপুর লৈঙাক্কী মখাদা এ এস আই (ওয়ালেস) ওইনা থবক চঙখি। কুমজা ২০০৯ গী ফেব্রুয়ারি ২৮ দা থবক্তগী পোত্থাখি। মহাক্না থবক তৌরিঙৈ মতমদা লেমজনিংঙাই ওইরবা এৱার্দ কয়াসু ফংখি। মহাকপু সোসল রিফোর্মার এন্দ মোবিলাইজ ওইনা শকখঙলদুনা বাবু জগজিবন রাম কলা সংস্কৃত এন্দ সাহিত্য একাদেমী এৱার্দ, নিউ দিল্লীনা কুমজা ২০২০ গী আগস্ট ৮দা নেসনেল এৱার্দ পদুনা ঈকায়খুম্নখিবদা নত্তনা মণিপুরগী নিংথৌ ইনিংথৌ সনাজাওবা লৈশেম্বনা কুমজা ২০০৯গী মে ২১দা শংলাকপা (অসুপ্পা) হায়বা মিংথোল অসি পীদুনা ঈকায়খুম্নখি। লোয়ননা অইবা কুমজা ২০১২ গী আগস্ট ৪দা ইনিংথৌনা সোনারেল হায়বা মিংথোল অসিসু পীদুনা অৱাংবা থাক্তা ঈকায়খুম্নখি।

কুমজা ২০২২গী জুলাই ১০দসু ওল ইন্দিয়া কংলা পাখংবা দিভেলপমেন্ট সোসাইটি মণিপুরনসু অমাই পিবা হায়বা মিংথোল অসি পীদুনা ঈকায়খুম্নখ্রবা অইবা অসিনা ইবা খাঙবোক অমসুং ইকোপ নিংথৌ পুয়া হায়না মিংথোনবা লাইরিক অসি মশাগী হৌরকফম মখুঙ্গং লমদমগী মরমদা ইবা থোইদোক হেন্দোকপা লাইরিক অমনি হায়না খনগৎতুনা চহী অসিগী ওইনা সায়োক্না থোমাস হর্দি নীংশিং সাহিত্য মনা অসি পীনবা ৱারেপ্নখিবনি।

নীংশিংবা য়াবদি, এৱার্দ অসি ফংলগদবা অইবা লাইশ্রম তোম্বা খুমন মমাঙদা অবুং লাইশ্রম য়ুমদারোল পুয়া হায়না মিংথোনবা লাইরিক অমসু ইদুনা ফোঙখিবা লৈখ্রে। সায়োক্না এৱার্দ অসি ইহান হানবা ওইনা কুমজা ২০১৭ তা কার্টিক মাইবনা ইবা লাইরিক তেন্থা খুন্দারোলদা পীখি। কুমজা ২০১৮ দনা শমজেৎশাবম তোলচৌনা ইবা লাইরিক থোঙজাও খুন্থোকলোন, কুমজা ২০১৯ দনা তখেল্লম্বম নগেন্দ্রনা ইবা লাইরিক পলেমগী মরমদা, কুমজা ২০২০ দনা য়ুম্নাম মহেন্দ্রকুমারনা ইবা লাইরিক ৱাংজিংগী সনাগী য়ুম্বী অমদি কুমজা ২০২১ দনা নাওরেম চন্দ্রমনিনা ইবা ককচিং অমসুং মসিগী পারমপারা নাৎতা পীদুনা ঈকায়খুম্নখিবনি হায়নসু চেরোলদুনা মখা তানা ফোঙদোরক্লি।

সোর্স: হুইয়েন লানপাউ

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু