আপডেট:
image

তর্পন শোনবা --সুরচান্দ শর্ম্মা

...পুরোহিতনা শোনবিরবসু মন্ত্র অদু করিনো, করি হায়রিবনো, মদুগী ভাব করিনো হংগদবনি। মঙ-হা গুম্না তৌরগা পুক্নিং অপেনবা খক ওইদে। ব্রাহ্মণ পুরোহিতনসু যজমানবু নীংথিনা ভাব তাহনবীদুনা লমজীংবিরবদি অফবগী মথক্তা অফবতমক ওইরকই। কুপ্না য়েংশিল্লবদি তর্পণদা উবা ফংলি-পাক চাউরবা তাইবঙ পানবগা ঐ ঐগী ইশাগা তৎন থানবা য়াদ্রবা অচৌবা মরী অমা লৈনৈ।

‘তর্পন’ হায়বসি ঈশিংতনা তৌবা পিতৃ-যজ্ঞ অমনি। মীওইবনা নুমিৎ খুদিংগী মপা-মপুগী শ্রাদ্ধ শোনফম থোকই, মদু তপর্ণনা মহুৎ শীনবা য়াই। মরম অসিদগী অহল্লমন্না নুমিৎ খুদিংগী ইরুজবা লোইরগা ঈশিং মনুংদা নৎত্রগা খরা মথক্তা আচমন তৌরগা ঈশিং খুজোক অহুমনা রাম তর্পণ তৌবা চৎনরকই। মসি পাকথোক চাওথোকপ ঙমখিদবনা তোকপগী মহুত্তা চৎনরকপনি।

‘তর্পণ’ অর্থদি পেন্ননবা তৌবা হায়বনি। মী শিবগী তৌবা হৌনবা প্রেত তর্পণদি অশিবা অদুতগীনি অদুগা চহিগী থোকপা পিতৃপক্ষ কৌবা ‘তর্পণ’ অসিদদি ব্রহ্মা-বিষ্ণু শিবদগী হৌদুনা নাপী-শিংবী ফাওবগী পেন্ননবা ওইনা পাকথোক্না তৌনৈ। হিন্দু-শাস্ত্রনা য়াৎলম্বা মীওইবগী পুকচেল চাওনবা, অশেংবা মশাগী ওইজবা ফংননবা শীল্লম্বশিংগী মরক্তা ‘পিতৃ-তর্পণ’ হায়বসিসু অমনি।

মসিদা ফোঙদোক্লিবা ভাবতি :- তাইবঙ পানববু শেম্বীরম্লিবা জগৎ অপুম্বগী মপা অদুসু ইপানি, জ্ঞানগী মৈরা উৎপীদুনা থম্মোয়গী অমম্বা কোকহনবীবা তাইবঙ পানবগী লুচিংবা ওইখিবা মহাপুরুষশিং অদুসু পুম্নমক্কী মপানি, পুম্নমক্না মহাক্কা নক্নবা মরী লৈনৈ, অদুনা ঐখোয়না পুম্নমক্কী য়াইফনবা তৌরগা ঐখোয়গীসু অফবা ওইগনি। সত্যজ্ঞানদি পুম্নমক্তগী হেল্লি, মরম অদুনা অসিগুম্বা সত্যজ্ঞান পীবিরম্বা পুকচেল চাওরবা মহাক অদুবা লাৎনফম থোকই হায়দুনা ইহান হানবা মক্তদা ‘দেবতর্পণ’গী বিধান লৈ।

ব্রহ্মা বিষ্ণু অমসুং রুদ্র-লাই অহুম অসিমক ঈশ্বর শক্তিগী তোঙান তোঙানবা মশক অমমনি, অদুনা লাই অহুমসিনা মাগী মাগী মথৌ কায়দনা পাঙথোকপীনবা হায়বদি মখোয়দগী ঐখোয়গী কান্নজবা ফংনবা মখোয়বু অঙঙম্বা মওংদা পেলহনফম থোকই। মথংদা যক্ষ-রক্ষ উচেক অমসুং লিল নচিংবগী তর্পণ তৌননবা তাক্লি হায়বদি মখোয় অসিসু মাগী মাগী মথৌ-মশিন কায়দনা তৌনবা ওইসনু হায়বগী মরমদা মখোয়গী পেন্ননবা তৌবগী মওংনি। ফত্রবা লিন ফাওববু সৃষ্টিদা য়াওহল্লম্লিবসি মাগী কান্নবা অমদি শোয়দনা লৈবননি। মরম অদুনা লিনগী জাৎমখৈবু মাঙহন্নিংবা অরানবনি-মুন্না খন্নফম থোকই।

মথংদা লাক্লে মনুষ্য-তর্পণ। মনুদগী মানব তারকপনি, ঐখোয়নসু হায়নৈ, হে মনু তাইবঙ মীওইবা। মীওইবদি খন্থহৈবা জীবনি (মনন কর্ম্ম)। কপিল, পঞ্চশিখ নচিংবা দার্শনিক ওইবা অদুগা সনক সনন্দ নচিংবা ভক্তি-শাস্ত্রগী অহানবা লময়ানবশিং অসিনা যুগ কয়াগী মমাংদা য়াম্না খন্থহৈবগী মগুণ চেল্লম্বা ওইবনা হায়বদি মীওইবনা মখোয়গী মপান য়াম্না তাংবা ওইবনা অদুগুম্বা জগৎকী কান্ননবা তৌবিরম্বা খন্থহৈরবা মহাজনশিং অদুগী মফমদা তৌবীমল খঙবা উৎফম থোকই হায়বনি।

মথংদনা দিব্য-পিতৃ তর্পণ। দিব্য হায়বদি লাইওইখ্রবা নৎত্রগা করিগুম্বা হিরম অমদা নত্রবসু অমদা মাঙবা নাইদ্রবা থোইদোক হেন্দোকপা মগুণ অমা চেনখ্রবা মীওইববু হায়বনি। মীওইবা জাতিবু হিরম কয়াদা চাওখৎহনবীরকপা, লাইমক্কা মান্নরবা হায়বদি স্বর্গদা লৈখ্রবা অদুগুম্বা খ্বাইগী মপা ওইরবা মখোয়গী আত্মানা পেনবীসনু নীংদুনা ঐখোয়না ঙমজবা মওংদা পুজা কৎচবনি।

মথংদা লাক্লে পিতৃ তর্পণ :- য়েগদবা অমদি ইশাগী ইপা-ইপুগী ৱাদি হান্না হায়দ্রদুনা কোন্না থম্লম্লিবসি করিগীনো? খ্বাইগী মাঙদা পুখৎলম্বা য়াদবরা? অপোকপা ইমাদগীদি জ্ঞানগী লম্বী উত্তুনা লমজিংবা অদুগুম্বা জ্ঞানীশিং অদুনা হেল্লি হায়বসি খঙননবা তৌরম্বনি। মনুনা হায়রম্মী-‘অজ্ঞে ভবতি বৈ বালঃ পিতা ভবতি মন্ত্রদঃ। চহী ফনমক য়ামদুনসু খঙদবা মী অদুদি অঙাংনি, জ্ঞানগী মৈরা উৎপীবা অদুতনা অশেংবা ইপানি।

মথংদা রামতর্পণ, লক্ষ্ণন তর্পন অমুক লাক্লে। পুম্নমক অসি শুপচিন্দুনা মসিদা অমুক হায়রি- ‘আ ব্রহ্ম স্তস্ব পর্য্যন্তং জগতৃ প্যতু’ তাইবঙ পানবা পুম্বনা পেল্লসনু। মন্ত্রদি শম্লগা তাইবঙ থোনবা চাউখ্রবা ভাবনি। মরম অদুনা চৎনবী ঙাকপদা ওইনা ভাব তাদনা ‘তৃ প্যাতাং তৃ প্যতং’তা হায়দুনা ঈশিংতমক হৈদোক্লগা অদুনদি ইশাদা করিসু ওইজদে। তাইবঙ খোন্না চাউখ্রবা অরংবা মঙাল অমনা ইশাগী পুক্নিংদা ঙান্দুনতা লৈনবা হায়বদি পুকচেল পীক্তনবা, মকা লাম্নবা ভাব তানা তানা থবক পুম্নমক তৌগদবনি।

পুরোহিতনা শোনবিরবসু মন্ত্র অদু করিনো, করি হায়রিবনো, মদুগী ভাব করিনো হংগদবনি। মঙ-হা গুম্না তৌরগা পুক্নিং অপেনবা খক ওইদে। ব্রাহ্মণ পুরোহিতনসু যজমানবু নীংথিনা ভাব তাহনবীদুনা লমজীংবিরবদি অফবগী মথক্তা অফবতমক ওইরকই। কুপ্না য়েংশিল্লবদি তর্পণদা উবা ফংলি-পাক চাউরবা তাইবঙ পানবগা ঐ ঐগী ইশাগা তৎন থানবা য়াদ্রবা অচৌবা মরী অমা লৈনৈ। মথক্তা উৎখ্রবা ‘আ ব্রহ্মস্তম্ব পর্য্যন্তং জগত্তৃপ্যতু’- লাইদগীনা নাপী ফাওবগী জগৎনা পেল্লসনু-কয়া চাউখ্রবা ভাবনো, অসুম্না ঐগী ইশা অসিবু জগৎ অপুম্বগীনি জগৎপুম্বসু ঐগীনি হায়বা ৱাখলসি তর্পণনা নীংশিংহল্লি।

অমরোমদা ইশা ইশাগী ইপা-ইপুগী মমিং মথাসু মসিনা তত্তনা নীংশিংহল্লি। ইপা ইপুগী মিং তাকপা ঙমদবসু ঐখোয়গী চাউরবা দোষ অমনি। মরম পুম্নমক অসিনা শাস্ত্রনা পিতৃ-তর্পণ তৌদবা য়াদে হায়রম্লিবনি। পরলোকপু থাজদদুনা মচা-মশুশিংনা পিতৃ-তর্পণ তৌদ্রবদি ঈশিং খৌরাংলবা মপা মপুশিং অদুনা মখোয়গী মশাদগী ঈ থকই হায়বদি মচা-মশুশিংগী অফবা ওইদে।

অসিগুম্বা তর্পণ অসি চেঙনা, যবনা, থোইদিং নৎত্রগা সনা লুপা মচুমতনা, ফংদ্রগা চুম্নগী ঈশিংতনসু তিংথৌনা ফাওবা খীক্তনা তৌবা য়াই। ঈশিংদি থৱায়গী মশকনি, অমরোমদা মসিদি খক ফংদবা লৈতে হায়দুনা মসিনা ‘তর্পণ’ তৌনবা বিধান শেম্লম্লিবনি। মসিদা মমল চঙবা চঙদবা করিসু লৈতে, তৌদনদি তোকফদে হায়বনি। ইশা নাদুনা চৎপা ঙমদ্রবা ফাওবদা ফম্মাংদসু অদুম্মক তৌবা য়াই। মদু ফাওবদসু ঙমদ্রবদি চুম্নগী পুক্নিংতনা ওইরবসু তৌগদবনি।

নোংমাইজিং, ইরাই, সপ্তমী, দ্বাদশী, শ্রাদ্ধ নুমিৎ অমসুং মপোক নুমিত্তদি থোইদিংদা ‘তর্পণ’ তৌবা শাস্ত্রনা থিংই, য়াদে। অদুবু তীর্থদদি শিবগী হৌনবী মতম পুম্নমক্তদি, আমবস্যাগী শ্রাদ্ধ, বিযুবারন, সংক্রান্তি, গ্রহণ, কাওথাবা অসিনচিংবদদি য়াদবা নুমিত্তসু তৌবা য়াই।   

কর্টেসি :  মরূপ

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু