আপডেট:
image

তঙাইফদ্রবা মঙলান অমা -- -আই. এস. থিংগোম

ঐখোয়গী খুন্নাইগী মী কয়া আসাম অমসুং ত্রিপুরাগী মফম কয়াদা চোইজাইননা খুন্দা-লৈতাদুনা লৈরিবসি লক্ষীপুর, জিরিবাম অমসুং হোজাই এরিয়া অহুমসিদা য়ুম হোংলকপগী পান্দম অমা থমসি। মণিপুরগী জিলা খুদিংমক্তগী মণিপুরীশিং হায়রিবা মফম অহুম’সিদা খুন্দানবগী থৌরাং অমসু পায়খৎসি। হায়রিবা ৱাফম অসি হেক তাবদা ওইররোইদবা, নাকোংদা হাপ্নিংদবসু য়াই! ইজরাইলদা করম্না ইহুদি ময়াম পুশিল্লকপা, লেবাননদা নোংম নোংমগী মীশিং হেনগৎলক্লিবা ভিয়েটনামদা চোইনা চোইনা তারুরুবা প্রজাশিং মণিপুর, ত্রিপুরাসিদমক ওইরক্লিবা কোলোনাইজেশনগী শক্তমশিং মাঙদা থম্লগা খন্থফম থোকই।

 

হৌখ্রবা ৱারী ওইরবসু অরি-অনৌ য়ান্নরবা ৱাহং কয়ানা ঙসিগীতা নত্তনা তুংলমচৎকীসু য়াওনা তত্তনা হংনরিবনি। অদুঙৈ চহী তরেৎ খুন্তাকপা মতমদা (১৮১৯-১৮২৬) মণিপুরগী নিংথৌ মচা অহুম চৌরজিৎ, মারজিৎ অমসুং গম্ভীর সিংহনা য়ুমথংননবা কাছাড় লৈবাক্তা কোনুং অহুম শেম্লদুনা তোঙান তোঙানবা লৈবাক্তা পাল্লম্মী।

খৃঃ কুমজা ১৮২৬ দা বার্মীজশিংবু তন্থোক্রগা গম্ভীর সিংহনা মণিপুরগী নিংথৌ ওইনা ফমখ্রবদা কাছাড়দা নিংথৌ মচা অমত্তা লৈখিদে। নিংথৌফম ফংহৌদ্রবা চৌরজিৎ অমসুং মারজিৎ তীর্থ চৎপগী লম্বেলদা খোঙশানখি। অদুবু ফম মুন্নবগী মহিক অদুদি নিংথৌ মচাশিংগী শীংলিদগী মাঙবা য়াদবনিনা চৌরজিৎকী মচা ইবুঙো অনী ত্রিভুবনজিৎ অমসুং নরেন্দ্রজিৎনা মারজিৎকী কোনুং ওইরম্বা কোনুং লৈকাই (হাইলাকান্দিদা) হায়রিবা মফম অদুদা লাক্লগা মণিপুরদা লান্দানবগীদমক শেম শাখি। খৃঃ কুমজা ১৮৪১দা মণিপুর নিংথৌগী মথক্তা লান্দারুবগী ত্রিভুবনজিৎ লানফমদা থৱায় থাখি।

খৃঃ কুমজা ১৮৫৮ দা শোক্নখিবা সিপাহী লালহৌ (সিপোয় ম্যুটিনি) দা নরেন্দ্রজিৎকী কাঙলুপসু য়াওশিল্লবদগী বিন্নাকান্দিগী লানফম অদুদা মায়থিবা ফংলদুনা চেনবদগী নরেন্দ্রজিৎ সিংহসু বৃটিশ সিপাইশিংনা ফাজিল্লগা সমুদ্রগী ৱাংমদা কালাপানিদা থাখি। নরেন্দ্রজিৎকী মতুংদা চুম্নদং লৈবাকমপু ওইনা কোনুং লৈকাইদা (হাইলাকান্দি) লৈরম্বশিংদি দয়াবন্ত, কোইরেংসনা, লালাসনা, গোলাপসনা নচিংবনি।

লাকচনিংলিবা ৱাফম অদুদি মণিপুরগী নিংথেম মচাশিংনা চৎখ্রবগী মতুংদা বৃটিশনা খুদুম চনখ্রবা কাছাড় লমদম অসিদা মণিপুরগী ওইবা করিমত্তা লৈহৌদবসিনি। খ্বাইদগী পেন্দবা অদুদি কোনুং অহুমদু কি:মি: ৫০.৬০ লাপ্না লৈনবনা খুন্দারিবা প্রজাশিংদি কাংখোং চাইদুনা চেল্লকপা ময়াম অদুসু মফম অমত্তদা পুংনা লৈরম্বা তারবদি নিংথৌ পান্দ্রবসু মীতৈশিংনা ডোমিনেট তৌবা, মেজোরিটি ওইবা লমদম অমা ওইনা ঙসিসু উবা ফংগদবনি। চোইজাইননা লৈখিবনিনা নোংম-নোংমগী অতোপ্পা খুন্নাইগী মীগী মশীংনা হেনগৎলকপনা মফম খুদিংমক্তা মণিপুরীশিং মাইনোরিটি ওইরক্লি।

মসিনা চৈথেং ফংলিবসিনা পোলিটিক্সকী মতাং অসিদনি। জিপি প্রেসিডেন্ট খরা কারকপা নত্তনা অৱাংবা থাক্কী মীহুৎ থাগৎপগী মতাংদদি মঙলান ওইদুনা অসুম লৈরগনি। পনবা য়াবদি কাছাড় লমদম অসিদগী জিরিবাম, হোজাই অমসুং কুম্বী তেরখা নচিংবদা মী য়াম্না খুন হোংনখি। হৌজিকমুক গুৱাহাটিদা য়ুমলিংবসু চত্থনরক্লি। মরম অসিদগী কাছাড়দা লৈবা মীতৈগী মীশিং পংহেন হেনগৎতে। ডেমোক্রেসিগী লানবুং অসিদদি ঐখোয় অসি য়াম্না শোত্থারবা লান্মী ওইরবনি। মীনা লুচিংবা ওইরগা ঐখোয়না তুংইনবা এন. আর. সি চৎহন্নবা খন্নরক্লিবসি করিগীনে?
বরাক তম্পাক অসিদা মণিপুরী অমসুং মণিপুরী মুসলিম য়াম্বা কেন্দ্র হায়রবদি লক্ষিপুর কেন্দ্রনি। অদুবু অপুনবা মীশিংগী চাদা ৫০% য়ৌবা ঙমদবনিনা মীখলদা মায় পাকপা হেক্তমক ঙমদে। মতৌ অসুম্না জিরিবাম বিধানসভা কেন্দ্র অসিসু মীতৈনা মশীং লিকপা মফম অমা ওইশিল্লকপনা থংন থংননা মীতৈ মীরেপ কাবা ঙমশিল্লকত্রে। মফম মফমদা অতোপ্পা খুন্নাইগী ফুরূপশিংনা নোংম-নোংমগী খুন্দারক্তুনা মীশিং হেনগৎলকপগী থৌওং অসি মণিপুর, আসাম, ত্রিপুরাদা তপ্না তপ্না চত্থরক্লি।

ঐখোয়গীসু তোঙানবা পোলিসি লৈফম থোকপনি। ঐখোয়গী খুন্নাইগী মী কয়া আসাম অমসুং ত্রিপুরাগী মফম কয়াদা চোইজাইননা খুন্দা-লৈতাদুনা লৈরিবসি লক্ষীপুর, জিরিবাম অমসুং হোজাই এরিয়া অহুমসিদা য়ুম হোংলকপগী পান্দম অমা থমসি। মণিপুরগী জিলা খুদিংমক্তগী মণিপুরীশিং হায়রিবা মফম অহুম’সিদা খুন্দানবগী থৌরাং অমসু পায়খৎসি। হায়রিবা ৱাফম অসি হেক তাবদা ওইররোইদবা, নাকোংদা হাপ্নিংদবসু য়াই! ইজরাইলদা করম্না ইহুদি ময়াম পুশিল্লকপা, লেবাননদা নোংম নোংমগী মীশিং হেনগৎলক্লিবা ভিয়েটনামদা চোইনা চোইনা তারুরুবা প্রজাশিং মণিপুর, ত্রিপুরাসিদমক ওইরক্লিবা কোলোনাইজেশনগী শক্তমশিং মাঙদা থম্লগা খন্থফম থোকই।

উনা উনা অনৌ অনৌবা য়ুমকৈ কয়া শাজিল্লক্তুনা খুন্দারকপা হায়বসি খজিক্তং থিজিন হুমজিল্লগা ইলায় লায়না খঙবা য়াবা ঙাক্তনি। খন্থবা অমসুং খঙজিনবা হায়বসি খ্বাইদগী হেন্না দরকার ওইরিবসি। করম্না খুন্দাহনগনি লৈফম, চাফম হিংনবগী লম্বী হায়বদুদি তপ্না তপ্না হোৎনরগা পাম্বৈ কয়ারোম থোকচরক্কনি। ঙসিদগী চহী নিফু য়াঙ্খৈগী মতুংদা ওইরবসু মঙ ফাওনরক্নবা মঙলান অসিমক ঐখোয় মঙবা হৌরসি।

 

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু