চহী অমা চত্থরকপা আর কে মাইপাকসনাগী মপোক কুমওন থৌরম লোইশিনখ্রে
ইম্ফাল, ওক্তোবর ৬ : চহী অমা চূপ্না চত্থরকপা আর কে মাইপাকসনাগী চহী ১০০ শুবগী মপোক কুমওন থৌরম ঙসি চুরাচান্দ হায়র সেকেন্দরি স্কুলগী ওদিতোরিয়মদা লোইশিনখ্রে। থৌরম অসি আর কে মাইপাকসনা মেমোরিএল ত্রস্ত অমসুং চুরাচান্দ হায়র সেকেন্দরি স্কুল অনী খূৎশম্নরগা চত্থরকপনি।
থৌরম অদুদা শক্নাইরবা অইবা সনসম উমানন্দ সিংহনা চীফ গেস্ত অমসুং স্তেত তিচর্স এৱার্দিসু ওইরিবী চুরাচান্দ হায়র সেকেন্দরি স্কুলগী প্রিন্সিপল খুলেম মেমতোম্বী দেবীনা প্রেসিদেন্ত ওইনা শরুক য়াখি।
আর কে মাইপাকসনা মেমোরিএল ত্রস্তকী প্রেসিদেন্ত আর কে দিলিপ সিংহনা হায়খি, হৌখিবা চহীগী ওক্তোবর ১১দগী আর কে মাইপাকসনাগী চহী ১০০ শুবগী মপোক কুমওন থৌরম অসি হৌদোকখি। নুমিৎ অসিদা চহী খুদীংগী ২০০৯ দগী পীবা হৌরকখিবা আর কে মাইপাকসনা জর্নেলিস্ত ফেলোশিপ অসি পোক্নফমগী কলাম্নিস্ত দাঃ চোংথাম নরেন্দ্রদা পীখি। নুমিৎ অসিদা আর কে মাইপাকসনানা ইবা মণিপুরদা ইহান হানবা সত্যগ্রহ আন্দোলন হায়বা লাইরিক অসিগী মৈতৈলোন এদিসনসু পুথোকখি। শক্নাইরবা অইবা লোংজম জয়চন্দ্রনা আর কে মাইপাকসনা মেমোরিএল লেকচরসু পীখি অমসুং নীংশিং চেফোঙ অমসু ফোঙখি।
মহাক্না হায়, ওক্তোবর থাদা থৌরম অসি হৌখিবগা লোয়ননা জানুয়ারীদা সাহিত্য একাদেমি দিল্লীগা খূৎশম্নরগা আর কে মাইপাকসনাগী পুন্সি অমসুং থবক হায়বসিদা লিতরেরি ফোরম পাঙথোকখি। মদুদা শক্নাইরবা থিএতর ক্রিতিক দাঃ লমাবম গোজেন, দি আই পি আরগী হান্নগী জোইন্ত দিরেক্তর অরিবম বালকৃষ্ণ শর্ম্মা অমসুং শক্নাইরবা ক্রিতিক লাইশ্রম মেমোনা চে পাথোকখি। ওল ইন্দিয়াদ রেদিও ইম্ফালদসু আর কে মাইপাকসনাগী প্রোগ্রাম অমসু শন্দোকখি। আর কে মাইপাকসনা অসি মণিপুরগী ইহান হান্না পাব্লিসিতি ওফিসার ওইখিবা মীশক অমসুনি। মসিগীদমক আর কে মাইপাকসনাবু ইকায়খুম্নবসু ঊৎখি।
চহী অমা চূপ্না চত্থরকপা থৌরম অসি লোইশিল্লে। আর কে মাইপাকসনানা ১৯৬৩ দা ফোঙলম্বা মহৈরোয়শিংবু ইংলিশ মরিক চুম্না ইবা অমসুং ঙাঙবা ঙম্নবা এদ তু গ্রামারগী সেরিজ অসি মীতৈ ময়েক্তা ফোঙলে হায়নসু মহাক্না হায়খি।
সোর্স: পোক্নফম
0 কমেন্ট:
কমেন্ট তৌবিয়ু