ঙসিগী খুন্নাইসিদা চৎনরোল খঙবা লৈরিবরা লৈত্রবরা হায়বসি ৱাহং ওইরেঃ রতন থিয়াম
ইম্ফাল, দিসেম্বর ১৬ : থাইনদগী ঐখোয়গী লৈজরক্লবা হৈনবী চৎনবী ৱাংমা লাল্লবরা। ঐখোয়গী ইপা-ইপুনা চৎনরম্বা লমচৎ ফজবা ত্রেদিসন খঙবা রিচুয়েল চৎনরোল খঙবা ঙসিগী খুন্নাই অসিদা লৈরিবরা লৈতবরা হায়বসি ৱাহং ওইরে হায়না শক্নাইরবা থিয়েটার দিরেক্টর, প্রদ্যুসর রতন থিয়াম্না ফোঙদোকখ্রে।
তরাগী চৈশুনা থৌদাং লৌদুনা ইকোনোমিক রিবাইবেল হায়বা অসিদা পোরোম্পাৎতা লৈবা কমপ্লিট হিয়ারিং সোলুসনগী হোলদা পাঙথোকখিবা থৌরম অমদা ফোঙদোকখিবনি।
থৌরম অসিদা মীথুংলেন ওইখিবা রতন থিয়ামনা মখা তারদুনা হায়, ঐখোয়গী চৎনরোল লৈরিব্রা লৈতব্রা হায়বা ৱাহংসিগী মরক্তা অতোপ্পা মপান লমদগী লাকপা মীনা অমুক য়েংবা লাক্লিবনি। ইন্দোনোসিয়াদা বার্লিগী খুঙ্গং মচা মচাদা মালেমগী মীয়াম্না খুঙ্গং অদুগী ফজবা কয়া য়েংবা লাক্লি। অদুনা মণিপুরগী ফজবা ঐখোয়গীদা করিগী য়েংবা লাক্লোইদৌরিবনো। লমদম অসিগী ফজখ্রবা লোক্তাক ঙসি ফাওবদা লৈঙাক্না শেমজিনবীদে। পাৎ অসিদা বোট অনীখক থম্লগা মোদার্ননি হায়বা য়ারোই।
ঐখোয় লমদম অসি চাওখৎহনগে হায়রবদি য়াম্না হোৎনবা চংই। মণিপুরদা লৈরিবা মীওইশিং অসি মখুঃ-মশা কয়াম হৈগে হায়রগদি অনীশুবা লাঞ্জাওদা ককচিংদা এলোদ্রোম শাদুনা লৈরম্মী। মদুদা অতোপ্পা এরোপ্লেন ময়াম অমা লৈরম্মী। হৌজিক ফাওবদা লৈরম্লবদি শেমজিল্লগা থৌগনি। মীতৈ মচানা হৈবসি অদুক্কী মতিক হৈ। মদুগুম্বা ময়াম অমা লৈন-লৈনা ঐখোয়গী খুন্নাই অসি কদায়দনো অমা পুত্থরি।
হৌজিক্তী লাইরিক হৈবা ময়াম অমসু লৈরে। ঐখোয়দি লীলা তৌরগা হিংজবনি। হৌজিক্তী লমদম অসিদা মে ৩ দগী থোরকপা ইরাং অসিনা মরম ওইরগা লীলা তৌবসু য়াদ্রে। চারা হেনবা তাবনি। চৈথেং হায়বসিদি খুদিংমক্তা ফংই। মৈ মে লাউনা লমদম অসিদা লৈরিবা মীওইশিং হৌজিক হিংলিবনি। ঙসি ফাওবদা লৌমীশিংগীদমক খনবীদুনা অফবা মখলগী কেনেল কয়া অমা শাদনা লৈরি। মোদেল ভিলেজ ওইদ্রিবা মখৈ লমদম অসি চাওখৎলে হায়বা য়ারোই। লৌ উরগা ঈশিং ফংদবনা মরম ওইরগা লৌমী কয়া অমা অৱা চৈথেং নংলি অমদি লমদম অসিদগী লৌফম কয়া অমা হাঙদুনা লৈরি।
ওক্না নিল্লগা লমহুইনা মরা থাবসিসু ঐখোয়না খঙগদবনি। শুবা নোম্বা কনবা খ্বাইদগী তন্দবা হায়বদু মীতৈ ফুরুপ ঐখোয়না ওইননবা হোৎনমিন্নসি। লমদম অসিদা করি করি রিছোর্স ফংলিবগে হায়বদু ঐখোয়না নৈনবা চংই হায়না ঙসিগী হৌরক্লিবা তুংগী মীরোলশিংনা নৈনফম থোকই।
সঙাই ফেষ্টিভেল তৌবসিদি টুরিজম ফেষ্টিভেল নত্তে। টুরিজম ফেষ্টিভেল হায়বদুদি মফম খুদিং তৌগদবনি। ঙসিদগী চহী ২৫ গী মমাংদা দুবাইদা করি ওইরম্মী। করিসু লৈরম্বা নত্তে। মফম অসি থাউ খরা থোকপা নত্তনা ঈশিং থক্নিংঙাই ফাওবা লৈবা নত্তে। হায়রিবা লমদম অসি খ্বাইদগী চাওখৎপা লমদম অমা ওইরে। মরম অসিনা ঙসি হায়ওয়েশিংদা ত্রাক মপোৎ মপোৎ পুশিল্লক্তুনা লমদম অসিগী পুকচাক থাক্লি অদুবু ত্রাকশিং অসিনা মণিপুরদগী থোকখিবা মতমদদি ইহাং হাংনা থোকখি। মসি থোক্তনবা লমদম অসিদা লৈরিবা ঐখোয় খুদিংমক্না হোৎনমিন্নদুনা পোৎ-চৈ কয়া অমা মপান লমদা থাদোক্নবা ঐখোয় খুদিংমক্না হোৎনমিন্নসি হায়খি।
সোর্স: হুইয়েন লানপাউ
Ojagi mamal yamlaba waheibu thagatchadaba ngamjade! Manipur da changlakliba Garishing hankhibada hangna hallanningde Nanaisu.