খুরাইজম অথৌবনা য়ুএনগী সেসনদা মণিপুরগী মতাঙদা ৱা ঙাঙখ্রে
ইম্ফাল, সেপ্টেম্বর ২৯ : জেনেভাদা ঙসি পাঙথোকখিবা ৫৪ শুবা য়ু এন হিউমেন রাইটস কাউন্সিল সেসন্দা মণিপুরগী খুরাইজম অথৌবনা মণিপুরগী মতাঙদা ৱা ঙাঙখ্রে হায়না ইপসাগী চেরোল অমনা হায়রি। অথৌবনা সেসন অসিগী এজেন্দা নম্বর ৫, হিউমেন রাইটস মেকানিজমদা ৱা ঙাঙখি।
খুরাইজম অথৌবনা মণিপুরগী ইন্দিজিনস মীয়াম্না মায়োক্নরিবা ফীবমশিংগী মতাঙদা পুখৎখি। ক্রোস-বোর্দর নার্কো তেরোরিস্ত গ্রুপশিংনা হৌরকপা মুক্নবা অসিদা মী ২০০ হেন্না থৱায় মাঙখ্রে অমসুং য়ুম ৫০০০ রোম মাঙ-তাকপদগী মী লীশীং ৬০ রোম ময়ূম –মকৈ লৈহন্দ্রে।
ওইরিবা নুংনাংবা ফীবম অসিদা মণিপুরগী শান্তি পামজবা মীশিংনা ইন্দিজিনাস মেকানিজম অমসুং কাউন্সিল অসিগী অতৈ মরী লৈনবা লূপশিংবু ইন্দিয়া গবর্নমেন্ততা পাউ ফাওনবদা মতেঙ পাংবীনবা আপিল তৌরি।
ইলিগেল ইম্মিগ্রেসন অমসুং ইন্দো-ম্যান্মা বোর্দরলেন্দ মরুওইনা মণিপুরগী চীংশিংদা একর লীশীং কয়াদা পোপি থাবগী ইসু; মণিপুরদা হৌজিক থোক্লিবা ঈরাং অসিদা কা হেনবা মওংদা হিউমেন রাইটস খোঙ্গাওনবগী ৱাফম য়েংশিনবা মরী লৈনবা এজেন্সি অমসুং পার্টিদা তকশিন্নবা; নার্কো-তেরোরিজমগী চৈথেং, অনৌবা গোল্ডন ত্রাইঙ্গল শাফোংলক্লিবা অমসুং মণিপরগী ইন্দিজিনস মীয়াম অমদি ওয়েশিয়া রিজনগী অচেৎপা ইথনিক হারোমনি, ইকনোমি স্তেব্লিতি অমসুং ইকোলোজিকেল ওয়েলবিংদা চাউনা থোক্কদবা ফলশিং রেকগনাইজ তৌনা অমদি য়েংশিন্নবা; লমদম অসিদা মণিপুরদা হৌজিক থোক্লিবা ঈরাং অসি য়াওনা নার্কোতেরোরিস্তকী থবক-থৌরমশিং দা ইম্মিগেন্ত আর্ম মিলিতেন্ত গ্রুপশিং য়াওরম্বা য়াবগী চিংনবা লৈবনা মসিগুম্বা গ্রুপশিংগা লৈনরিবা সস্পেন্সন ওব ওপরেন্সকী পোলিসি নিংথিনা রিভিয়ু তৌনবা তকশিল্লি।
কাউন্সিলগী কলেক্তিব ইফোর্তশিং মণিপুরগী ইন্দিজিনস মীয়ামগী অৱাবা হন্থহনগনি অমসুং হৌজিক থোক্লিবা ঈরাং অসিদা অচুম্বা অমদি শান্তি ওইবা মওংদা ৱাখৈবা পুরক্কনি হায়না ঐখোয়না অশা তৌরি হায়খি। ইপসা অমসুং সিবিল সোসাইতি ওর্গানাইজেসন্স (সিএসও) নিপালননা অথৌবগা য়াম্না কন্না পাউ ফাওনদুনা মহাক্না য়ুনাইতেদ নেসন্স, জেনেভাদা লৈরিঙৈ হেক অঙম্বা থাক্তা ইম্পেক্ত পীনবা হোৎনরি। মহাক্না য়ু এন মেন্দেত ওফিসশিং য়াওনা মরী লৈনবা তোঙান-তোঙানবা রিপোর্টারশিংদা চিন-কুকি নার্কো-তেরোরিজম অমসুং অনৌবা গোল্ডন ত্রাইঙ্গল শাফোং লক্লিবা অসিগী মতাঙদা ফেকচুয়েল রিপোর্ত অমা পীশিনবসু হৌরে হায়নসু ইপসাগী চেরোল অসিনা হায়রি।
সোর্স: পোক্নফম
0 কমেন্ট:
কমেন্ট তৌবিয়ু