খুন্দামিন্নরিবা ফুরুপশিংগী দাইলেক্ত কোনশিন্দুনা মীতৈলোলবু অশেংবা মণিপুরী লোল ওইহনসিঃ আর কে মেঘেন
ইম্ফাল, দিসেম্বর ১১ : লমদম অসিদা খুন্দামিন্নরিবা ফুরুপশিংগী দাইলেক্তশিং কোনশিন্দুনা মীতৈলোলবু হেন্না মপূং ফাবা অশেংবা মণিপুরী লোল অমা ওইনা দিভেলপ তৌনবা হোৎনমিন্নসি হায়না আর কে মেঘেন (সনায়াইমা) না ফোঙদোকখ্রে। আর কে মেঘেননা ৱাফম অসি ঙসি অপূনবা খোরিরোলগী মালেমগী লুপনা অইবা-অইবীশিংদা পীবা মনা লান্থোকপগী থৌরম অমদা শরুক য়ারদুনা ফোঙদোকখিবনি।
ঙসি পেলেস কম্পাউন্দদা লৈবা লময়ানবা শঙলেন্দা অপূনবা খোরিরোলগী মালেমগী লূপকী প্রেসিদেন্ট দব্লিউ অমুচৌনা প্রিসাইদ তৌদুনা পাঙথোকখিবা থৌরম অদুদা আর কে মেঘেন (সনায়াইমা) না চীফ গেস্ত, মণিপুরী শোর্ট স্টোরি সোসাইটি ইন্দিয়াগী ভাইস প্রেসিদেন্ট কেঐচ কান্ত অমদি অইবা অমসুং ক্রিটিক ওইনা শরুক য়াখি।
থৌরম অদুদা চীফ গেস্তকী ৱারোল পীরদুনা আর কে মেঘেননা হায়খি, লিতরেচরগী থাক ৱাংনা লৈজবা মীতৈলোল অসি ঙসিদি শিত্থরক্লে। মীতৈলোল অসি লমদম অসিগী খুন্দামিন্নরিবা য়েলহৌ ফুরুপশিং অমসুং অতৈ ফুরুপ মচাশিংগী ফাওনা-লোল অমা ওইরিবনি। মীতৈলোল হৌজিক্না মণিপুরীলোল হায়নসু হায়নরক্লিবা লোল অসি হেন্না চাওখৎনবা হোৎনমিন্নবা চঙই। মীতৈলোল অসিদা খুন্দামিন্নরিবা য়েলহৌ ফুরুপশিংগী দাইলেক্ত কোনশিন্দুনা হেন্না মপূং ফাবা অশেংবা মণিপুরী লোল ওইনা দিবেলপ তৌসি। মসিনা লমদম অসিদা খুন্দামিন্নরিবা ফুরুপশিংনা লোল অসিবু মশা-মশাগী মমালোলগুম মথম্মোয়দা ফাওহনবা ঙমগনি।
মহাক্না হায়খি, মণিপুরী লোল চাওখৎহনবদা লমদম অসিগী অইবা-অইবীশিংগী অচৌবা থৌদাং অমা লৈ। নোবেল, শৈরেং, ৱারী মচা অসিনচিংবা লাইরিকশিং ফোঙবদা খুন্দামিন্নরিবা য়েলহৌ ফুরুপশিংগী দাইলেক্তকী ফজবা ৱাহৈ-ৱাতাশিং হাপ্তুনা শীজিন্নবা চঙই। মণিপুরদা হিন্দু লাইনিংগী প্রেক্তিস চৎনরকপদগী চীংমী-তম্মীগী মরক্তা রিলিজিয়াস কন্ত্রাদিক্সন লাকখি। মসিগী মতুং বৃটিশ লাক্তুনা চীংমীশিং খৃষ্টিয়ান লাইনিংদা চঙদুনা ওয়েষ্টার্ন এদজুকেসন য়ৌরকখি। মখোয়গী দিবাইদ এন্দ রুল পোলিসিনা হান্না লৈরম্বা রিলিজিয়াস কন্ত্রাদিক্সন অদু পোলিটিকেল কন্দ্রাদিক্সন ওনখিদুনা মচোই তানবগী ফীবম অসি য়ৌরকখিবনি।
ঙসিগী মণিপুরী খুন্নাইগী ওইরিবা ফীবম অসি কূপ্না নৈনদুনা অপূনবা অমত্তা ওইনা হিংমিন্নবা পুন্সিরোল অদু পুরক্নবা হোৎনবদা লমদম অসিগী অইবা-অইবীশিংনা থৌদাং লৌমিন্নসি হায়না আর কে মেঘেন (সনায়াইমা) না ফোঙদোকখি। ঙসিগী থৌরম অদুদা অইবা পুখ্রম্বম বীরেন সিংহদা ‘ৱাকমা’ তাইটেল অমসুং অইবী চোংথাম ওংবী সুবধনীদা ‘খোরিরোলগী লৈচন মনা’ লান্থোক্তুনা ইকায়খুম্নখি।
সোর্স: পোক্নফম
★ ইসাগী লোন ৱাহৈবুনা নাথৈবিরগা, সিজিন্নবিগে খনবিদ্রগা অতোপ্পা ফুরুপকী দাইলেক্তসিং কোনসিন্বা !!! ★ মীতোপকী দাইলেক্তশিং সিজিন্নরগা অশেংবা মণিপুরী লোন ওইহন্বা !!! ☞ ওজাসিংগী ৱাখল্লোনসু থম্বিরকউ ৷
অশেংবনি খুন্দামিন্নরিবা ঐখোইমশেলগি ফাওনলোল অসি হেন্না মপাঙ্গল কলহন্ননবা কন্না হোৎনা মিন্নবা মথৌ তারি।