আপডেট:
image

ক্ষেত্রিময়ুম্ সুবদনীগী "অশেংবা ইরল" -- মোইরাংথেম্ নেত্রজিৎ মীতৈ

ওজা ক্ষেত্রিময়ুম সুবদনীবু নৌহৌননা শক তাক্নিংঙাইদি ওইদ্রে। মমাঙদা শৈরেংগী লাইরিক, ৱারী মচাগী লাইরিক অমদি অঙাংশিংগী লাইরিক্নচিংবা লাইরিক কয়া খুদোল তম্বীখ্রবা অইবিনি। হৌজিক্ হৌজিক্না অইবী নুপীশিংতগী ওইবা লুপ লৈমরোল খোর্জৈকোলগী থৌবুরেনবী ওইদুনা লৈরি। ওজাগী "অশেংবা ইরল" কৌবা ৱারী মচা কুনগী অপূনবা লাইরিক্ অসি ইং ২০২২ গী জুন থাদা ফোঙবীখিবনি। য়াম্না শেংনা হায়জরবদা, ওজাগী ৱারী মচাশিংগী অপূনবা লাইরিক অসি পাজরুবদা করিগুম্বা খরদি ইদবা ঙমদবদগী ৱাফম খরসি ফোঙদোকচখ্রবনি ।

অইবা অইবীশিংগী মপুঙ ওইবা পান্দমদি ইজরিবা খরা অদুনা খুন্নাই অসিদা অফবা অচূম্বা মায়কৈদা খরদং ওইরবসু অওনবা পুরকপা অদুনি। ওজা সুবদনিগী ৱারী মচাশিং অসিনা অপাবশিংদা ৱাখল খলহন্দুনা পান্দমদুমক ফংহন্দুনা কান্নবা খরা পীরে হায়বসিদি হায়মনবা থোক্লরোই। ওজা সুবদনীগী "অশেংবা ইরল" হায়রিবা লাইরিক্ অসিদা য়াওরিবা ৱারী মচা খুদিঙমক লোইনা ফজবা ঙাক্তনি । অদুবু খরদং লৌখৎচরগা পাউদমজগে । পুন্সিগী অশেংবা মশক্কা য়াম্না নকশীন্ননা ইবিরকই । থোইদোক্না খন্দোক খন্জিন তৌনিংঙাই লৈতে হায়জনিংই । ওজাগী খুৎইদা মপুঙ ওইনা প্রমান-পান্থৈ অমদি পাউরৌনচিংবা মতম খুদিঙমক্তা চুমদুনতা লৈরবা পাউতাকশিং য়াওবা থেংনৈ । মসি, ওজাগী তোপ তোপ্পা ফিদম্নফম ওইবা খুৎই অমনি । মসিনা কনাগুম্বা মীশক অমনা লাইরিক অসি পারুবদা অচূম্বগী মশক ময়াম অমা অপাবশিংগী মফমদা খঙহন্দুনা অপাবা মীশক্তুগী মফমদা অফবা অচূম্বা নুংশিবা কয়াবু নৌহৌননা নীংশীংহল্লি । অইবীনা মীপুম খুদিঙমকপু অফবা চঙ থোকপা মীশক ঙাক্তা ওইহন্নিংবগী খুদম্নি । ৱারী মচাশিং অসি পাববু হেক হৌখ্রবদি লোইদ্রিবা ফাওবা পাথনিংবগী ইথিল অমদি শোয়দনা ফাওহল্লি। মসিমক ওজাগী অতাঙবা মতিক ময়াই অমনি হায়দবা ঙম্লোই ।

ওজাগী ৱারীশিং অসি ৱারী মচানি হায়রবসু অশাংবা ৱারী (উপন্যাস) কুম্না হেক্ হেক্ ৱাখলদা ফাওহনবা ৱারী মচাশিং য়াওরি । করিগুম্বা মতমদা ফিল্ম অমা ওইনা মীত্তা উরকই । মসিমক ওজানা ফিল্মগা খরা শম্নরুবনা ফিল্মগী খুৎইগা খরা নকশীন্নবনা ওইরিদ্রা হায়নসু খল্লকই । লাইরিক অসিদা য়াওরিবা ওজাগী ৱারী মচা খুদিঙমক্তা অপাবশিংদা করিগুম্বা খরদি মখা তানা খলহল্লি । ৱারী মচাশিং অসিগী পোলোইদা অপাবশিংগী মফমদা খংপ্রেক খংহন্দুনা খন্নিংবা ৱাখল খন্জরো হায়দুনা হেক হেক লংশিল্লম্মী । মসিমক ৱারী মচাগী চপ চাবা মতিক ময়াই অদুনি হায়না লৌজৈ । ওজাগী ৱারী মচা অয়াম্বদা নুপীশিংগী লমচৎনা মপুঙ ওইনা য়েক্তুনা নুপী ওইবীশিংগী মফমদা থেংনবা য়াবা থৌদোক ৱাথোকশিং চিংথোক্তুনা উৎলি । মতমসিগী মীওইশিংনা ঙাঙনবা লোন্দাসু শিজিন্নৈ, অমরোমদা অমুকসু অনৌবা ফজবা লোন্দাসু পুথোরকপা থেংনৈ ।

ওজাগী ৱারী মচাশিংগী লাইরিক অসিগী ইহান হানবা ৱারী মচা "ইপোম্ হৌদ্রবা ঈপাক" হায়বা অসিদা নমথাক তৌবা নুপাশিংগী লাংদা ইচম্ চমজবী নুপীমচা অমনা থুরুবদু উৎলি। মসি নুপীমচাশিংগী চেকশিন ৱারোল অমসুনি। অদুবু লৈখা তারুরে হায়না লৈরবী নুপীমচা অদুবু চিংখৎপীননবা অভিনাশ হায়বা মপান লমগী নুপা অমনা মমাঙদা লেপ্লরবা মতমদা ৱারোইশিন অদু অপাবশিংদা লংশিল্লম্মী । "থম্মোয়গী মরী" হায়বা ৱারী মচাসিনা থম্মোয়দগী থোরকপা নুংশিবগী ইহুলদগী হেনবা লৈতে হায়বা উৎলি । য়ুম অমদা লৈমিন্নরিবা মৌ মশেন্না নীংঙোল চাক্কৌবগী খুদোলপোৎতা হিদান্নরক্তুনা অচাউরম কানরক্লবদা মৌ অতোম্বী ওইরিবী সনাতোম্বীনা সুপ্নগী ক্বা তাঙ্গদুগা লুপা চাম্মদুগা চাউথোক্না উৎপা ঙমখি । মদুদা মনেম্বোক্না সনাতোম্বীবু শৌগত্তুনা অপাবশিংবু পেলহল্লগা ৱারী লোইশিল্লি ।

"হায় অঙাওবো, থম্বালগী লৈকাদা য়াওরিবা খোয়থুম্নবা লৈহীদো নক্না লৈবা হঙোইনা খঙদবনিনে । অরাপ্পদগী পাইরকপা খোইমুনা লৈহী চুপত্রো?" - "শঙ্গোমগী মহাসাগর" হায়বা ৱারীমচাদুদা ইঙজবী তপচবী মমৌ সনালেম্বীগী মীচঙ চঙদুনা মনেম্বোক্না মচানুপাদা চৈরকখিবনি । ৱারী মশাঙ অমগুম্না সনালেম্বী অহল ওইহল্লকই। মচানুপা অনীনা মপাল লমদা থবক তৌখ্রে অমত্তা য়াওজবা মচানুপী মপাল লমদা ময়ুম পান্থোকখ্রে সনালেম্বীসু নারে অহল ওইরবা মপুরোইবনা কৃষ্ণ জন্ম নুমীৎ অমদা লাই খুরুম্বা চৎখ্রিঙৈ মপাল লমদা লৈখ্রবা মচাশিং ফাওবা উনবা নংদনা ফমুংদগী তাদুনা পুন্সি লোইখি ৱাহং অমনি ৱারী মচাসিদা অইবীনা হংলিবসি সনাতোম্বীনা পোলোইদা ফংলিবসি মচাশিং মতিক চাননবা শেমজরুমল্ অদুরা হায়না অইবীনা হংলিবগুম অপাবশিংদা ফাওহল্লি।

"মা লৈহনগনু" হায়রিবা ৱারীমচা অসিদনা য়ুম্বানমিন্নরিবা মতৈ মনাওগী মরক্তা নুপা অদুনা নুপী অদুবু নুংশিনা লোয়নবীদদুনা ওক্তবা লমচৎ চৎলক্লবদি ৱাখলগী অনাবফাওবা লাকপা য়াই হায়বদু উৎলি। "লোকদাউন্" হায়বা ৱারীমচাশিদদি, লোকদাউন্ গা মান্নবা অথিংবা কয়াগী মরক্তা ৱাজরিবসি কনানো হায়বদু নৈনবনি। কৈথেল্ কাদুনা ইমুঙ্ পুজরম্বা মেমথোইবু কোরোনানা মংফমদা পুবিখ্রবদা নিশাদা লায়চুরম্বা মপুরোইবা মুহোন্না ৱাখল্ তারক্তুনা ইমুঙগী পোৎ চৈ খরা য়োন্থোক্লগা মনা মশিঙ্ খরা তিক্তুনা মীঙোন্দগী রিক্সো অমা ৱায়দুনা য়োন্ননবা পুথোরকই। লোকদাউন্ মনুঙগী মচাগী ওনলাইন্ ক্লাস য়াওননবা মোবাইল্ অমগী মঙলান্দা পোৎ য়োনবা থোরক্লিবা মুহোনগী মীঙোন্দগী ৱায়রকপা সেরফলা অদু পুলিসনা মুন্দুনা পুদুনা চৎখি।

অসুম্না লৈতা লায়রগী চৈথেঙ্ নংলবা মীওই কয়ানা অসিগুম্বা তান্জাদা নংলিবা অৱাবশিংদু অপাবশিংদা লোইবা নাইদনা নৈনহল্লি। "লংজিন্ খঙদ্রবা লংদুম্" হায়বা ৱারী মচা অসিদি অরোনবা লৌতুনবা মীহাত্‍ মীপুন্দা শাগত্তুনা ইবিরকই। অসিগুম্বা থৌদোক্ অসি ৱারী খরা খেন্নরবসু মনিপুরদা থোকপা থেংনখ্রে। ৱারী মচাসিদা, মচীন্ মনাওশিংগী মনুঙদা নুপা পোক্লক্তবদগী নুপা পোক্লক্ননবা হায়দুনা নুপীমচা অতোনবীসিগী মমিং চাউবা কৌখি। নুপা মমিং চাউবা কৌবখক্তা নত্তনা নুপাগুম্না শিনফম্ খুদিঙমক্তা হৈথোই শিংথোইবা ওইরকই। নুপা শমকক্ কক্তুনা নুপা ফিজেৎ শেত্তুনা মীগীদা থবক্ শূবা য়াওরম্বদগী মরন্নাই শিনশঙ্ লিংখত্তুনা চাওখৎলকই । লায়রবা ইমুঙ্ ওইরম্বদগী চাউবগী মপান্দগী নুংঙাইবা ইমুঙ্ ওইরকখি। অদুবু লাইবক্ থীবদি ইন্জিনিয়র থোইবগী ইমুঙদা থবক্ শূবগী খুৎশূমল্ লৌবা চৎখিবদগী অদুম্ হল্লকখিদ্রে। লম্বীদা থৱায় য়াওদ্রবা হকচাং ওইনা তাদুনা লৈরম্বা থেংনখি চাউবা। অদুবু চাউবগী মশাদা চাউববু কমদৌনা হাৎখিবগে হায়বগী লংলা লংজিন্ ওইবা য়াবা পোৎশক্ খরদি ফংখি। মসিগী লংলা লংজিন্ অসি কমদৌনা পুথোরক্কদগে হায়বদু অপাবশিংবু খৌরাংনা ঙাইহন্দুনা ইনশিল্লম্লগা লোইশিনখি। লাইরিক্ অসিগী মিংথোন্ ওইরিবা ৱারী মচা "অশেংবা ইরল্" য়াম্না ফজবা ৱারী মচানি। মমা মপানা ৱানা হোৎনদুনা মচাশিংবু অচৌবা মঙলান্ কয়াগা লোয়ননা য়োকপমখৈ য়োক্লক্লগা, ময়ুম্ মকৈ পাল্লক্লবা মতমদা অহল্ লমনবু তাথী তাওইনা তৌবীরক্তুনা মমা মপাদগী মাগী মাগী নুপীনা হেন্না লূম্না লৌখ্রবদা নুংঙাইগদবা মমা মপা লৈতে।

মমা অমত্তগী মচাশিংনা ইংখোল্ শম্বলগীদমক্ য়েংথীনবা ঙম্লকই । মমা মপা ওইবশিংগী অশেংবা মরল্ ওইজরিবা মচা ওইবশিংনা মমা মপা ওইবশিংবু নুপীগী শরৈদগী ওল্দ এজ হোমদা নমশিন্দুনা থম্বীখিবা অৱাবনা পোলোই ওইবা থম্মোয় নুংহিক্নহনবা ৱারী মচানি।  অতৈ ৱারীমচাশিংসু নৈনবা য়াবা ঙাক্তনি । য়ুমদা য়োকপা শা উচেকসু মীওইবগুম্না নুংশিবগী ৱাখল্ চেল্লি হায়বা উৎলিবা ৱারী মচানি "নাকেন্থানা ঙাইরি"। লম্বীগী খুদোংথীবা থৌদোক্ অমদা লৈখিদ্রবা নুংশিথোইনা লুনা চান্না মচাগুম্না য়োকচরম্বা হূই অদুনা লৈখিদ্রবা নুংশিথোইগী মংফমদা চাদা থক্তবমখৈ শঙদুনা মপুন্সি লোইখিবগী নীংঙমদবা অদু অপাবশিংগী মফমদা লংশিন্দুনা থম্লম্মী । " তাইয়োন্নরবা তাইবং" হায়বা ৱারী মচা অসিসু অকনবা শাফূ অমা পীরিবা ৱারী মচানি। ইমুঙ অমগী মতৈ মনাও অনীমক্না অচৌবা থবক্ তৌনরবদি নুংঙাই য়াইফবা ইমুঙনি হায়না কনানাগুম্বনা খন্নৈ।

অদুবু, মদুনা হেন্না অৱাবা ওইদবসু নত্তে। পুলিস ওফিসার ওইরবা মতৈ মনাও অনীনা মখোয় মখোয়গী শিনফম্ অদুনা মরম্ ওইদুনা নোংমতা হরাও নুংঙাইনা নে না তানা পুকমেন্ পাউমেন্নবা ফংজদে য়োইময়াই অমসুং লীক্লা। লীক্লানা এম পি এস সি গী চাংয়েং য়াওদ্রিঙৈ মতমদদি কয়াদা নুংশিননা নুংঙাইনা পাল্লকখ্রবা। হৌজিক্তি মখোয় অনীমক্ পুলিস ওফিসার ঙাক্তা ওইরবনিনা অচৌবগী য়াথং মতুং ইন্দুনা তোঙান্ তোঙানবা দিস্ট্রিক্ট শিংদা থবক্ তানখ্রে। ময়ুম্ মকৈ নিংথৌগী কোনুংগুম্না শারবসু মতৈ মনাও অনীনা অচৌবা ঈপাক্কি তোর্বান্ ৱাংমা ৱাংমদা লেপ্নখিবগুম্ মতম্ কুইনা উনবা ফংনরক্ত্রবদা চহী য়ামশিল্লক্লবা য়োইময়াই ৱাখলগী অনাবনা নাবা হৌরকই। থবক্তগী পোত্থাগদবা মতম্ ৱাৎলিবা লীক্লানা অনাবা মপুরোইবগী মনাক্তা ফমশেন্নরিঙৈ সি এম্না ফোন্ তৌদুনা কৌরকই । অসিগুম্বা অৱাবা পুন্সি মরেল্ অসিদা পেন্দ্রবা লীক্লানা মচীন্ থোক্না শোল্লকই "ঐবু থবক্ থাদোক্লসিরা?" ৱারী অসিনা "নিংথৌদসু মৈতান্ ৱাৎলি" হায়বা পাউরৌদু নৌহৌননা নীংশীংহল্লি। "নীংবনা অমা তম্বনা অমা" হায়বা ৱারী মচা অসিদি কোবিদ মনুঙগী অৱাবা মপাউ তম্বতা নত্তনা ৱাখলনবু নুংঙাইরবদি অনাবসু ফৈ হায়বদু উৎননবা হোৎনবনি ।

"খন্থহৌদবা মীৎকুপ্" হায়বা ৱারী মচা অসিদি ইনখৎলক্লিবী মতমসিগী নুপীমচাশিংদা চেকশিন্ পাউজেল্ পীবনি। মশক্ মশা সুকউ উনদনা ফোন্দা খঙনখি লীক্লাইগা বোইনাওগা । বোইনাওনা ফোন্ তৌরকপদদি অচৌবা থবক্ তৌবা মীশক্ অমগুম্না, ইনাক্ কৈরাক্ খুনবা ইমুঙগী মচা মশূগুম্না হেক্ হেক্ তৌরকখি । অসুম্ তোয়না তোয়না ফোন্ তৌনরম্বদগী অরেম্বদা মতম্ মাঙহন্দুনা ৱাহৈ ৱাতা ময়াম্ ইদুনা থানরক্তুনা লাইরিক্তা পুক্নিং চঙলকখিদ্রে । লীক্লাইসু মহৈগী চাংয়েংদা মায়থীবা নংলে । অদুদগী ইকায়মন্দুনা লীক্লাইসু বোইনাওগা মতম্ থানদুনা চেল্লে । অদুবু বোইনাওদি মশক্তা লম্ য়ৌনা থীবতা নত্তনা ময়ুম্ মকৈসু অদুক্কি মতিক্ নাতৈ চাদনা লৈরম্লে । ইমুঙ্ মনুঙগী খোঙহাম্ফম্ ফাওবা নাতৈ চারমদ্রবা ইমুঙ্ অদুদগী নান্থোক্নবগীদমক্ লীক্লাইনা বোইনাওগা খাইননবা ৱায়েনশঙদা চে থাখি । য়াম্না নুংঙাইবা নোক্নিংবসু পূল্লবা মতমসিগী নুপীমচাশিংদা পাউজেল্ অমা পীরিবা ৱারী মচানি ।

অতৈ ৱারী মচাশিংসু পাউজেল্ অমমম্ লোয়নবা ঙাক্তনি । "তরেৎ খুত্‍" হায়বা অসিদদি পাঙ্গল্ শোনবী ওইরবসু নুপী ওইবীশিংসু তৌবা ঙমদবা লৈতে অমদি ঙাকপীবদগী হেন্না অথোইবা অতৈ লৈতে হায়বদু উৎননবা হোৎনবনি । " শজিগী মহাও" হায়বা ৱারী মচা অসিনা, মনিপুরদা লৈঙাক্কী চৎনিংবা চৎনরোল্ কয়া চৎনহল্লবসু কনানসু মৱা ওইনা লৌবীদে হায়বদু নাখৈ শেংনা তাক্লি ।" ৱাকচিংগী নোং" হায়বসিদা অইবী ওজানা ফজবা ৱারী অমা থৱাও য়াওনা শাগৎলকপা থেংনৈ । চহী নৌরিবী, নুংশিবগী মরী লৈনরুবা নুপাদুনা ইকায়খুম্নবা মাঙহনবিখ্রবী নুপীমচা অমনি ফজবী । মমা মপা লৈখিদ্রে । ফজবীনা খুন্নাইগী মীনোক্ মৈশা ৱানা খাঙদুনা মবুক্তা নাউপুরিবা অঙাং অসিমত্তং তাইবং ফাওহল্লম্লগা মপুন্সি লোইজখ্রগে থৌরাংলকই । লায়েঙশঙদা লাক্তুনা অঙাং নুপা অমা পোকখি । অঙাং পোক্লবা মতুংদা মহাক্কি চঙজফম্ কদায়দসু লৈতে হায়বা পাউ তাবদা লায়েঙশঙগী চৌকিদার ওইবা বহাদুরনা মমা মচা পূন্না য়োকচরগে হায়দুনা চোংথোরকই ।

মতমগী মতুং ইন্না বহাদুরগীসু মচানুপী অমা ফংজরে । ফজবীসু চা - অচাপোৎ য়োনফম্ অমা হাংদোক্লে । মখোয় অনী নুংঙাই য়াইফনা অনৌবা মঙলান্ অমদা হিংবা ঙমজরে । চহী ৩/৪গী মতুংদদি ফজবীগী অহানবা মচানুপাগী মপা নিংথেম্না ফজবীবু থিরক্তুনা লৌবা লাকখি । ফজবীনা ফনা য়াদ্রবসু নিংথেম্না হন্জিন্ হন্জিন্না লাকখি । নোংমসু বহাদুরনা মশা ঙমদদুনা ফমুংদা হিপ্লিঙৈদা মচানুপাদু পীয়ু হায়দুনা নিবা লাকখি । ফজবীগা নিংথেমগা শানরিবা ৱারীশিংদু তারুরগা ফজবীনা ফনা য়াদ্রবসু, ফজবীগীদমক্ মহাক্কি লাইফ ইন্সুরেন্স কি শেনফম্নচিংবা মরল্ মথুম্ ময়াম্ ফংহল্লম্লগা পুন্সি লোমখ্রগে খল্লকই বহাদুর । ফজবীনা লায়েঙশঙদা চা অমসুং অচাপোৎ থিনবা চৎখ্রিঙৈদা বহাদুরনা মপান্ থোকখিদুনা গারীগী মমাঙদা চোংশিন্জদুনা মথ্বায় থাজখি । ৱাকচিংগী উনলেন্না য়ৈথৎপিরবী ফজবীগী পুন্সিদা ৱাকচিংগী নোং ওইনা খিক্লখিবা বহাদুর মাঙখি । অপাবশিংগী মফমদা নীংঙমদবা চৈনা অমা পীরম্লগা ৱারী লোইশিনখি । মীহুন্ চেনগুম্ চেঙ্গানরবা ৱারী মচা ময়ামদু পারুবদা থরক্ হুনগৎনরবা অপাবশিংবু নোক্ননবা অচূম্বদা ফাগী তৌরদুনা নুংঙাইরবা নোক্নিং ৱারী "ৱাকৎ মীফম্" না অমুক্ হন্না অপাবশিংবু নোকপনা লোইশিলহল্লি ।

ওজা অমুজাওনা মহাক্কি অহেনবা শেন্দানফম্ নুংঙাইনবগীদমক্ মহাক্কী মরুপ্ মন্ত্রিদা থওইনা ৱানোমদুনা চীংদা ত্রান্সফর তৌহল্লি ।। মহৈরোই ময়াম্না অফবা ওজা ত্রান্সফর তৌবা য়ারোই হায়দুনা মহৈশঙ্ থিংদুনা ৱাকৎ মীফম্ ফম্মী ।। ওজা অমুজাওনা মহৈ তম্নিংবা মহৈরোই য়াওদে হায়দুনা থেৎলিবা বেকদ্রোপ্তু শেগায়রগা "চৎখ্রো চৎলু" হায়দুনা লাউরকই । ত্রান্সফর থাবিখিনু হায়রিবা ওজাদুনা অদুম্না তৌরকপদুদদি মহৈরোইশিংদু হৌগত্তুনা তুমিন্ তুমিন্না চৎনখি ।

ৱারী মচাশিং অসিগী মরক্তা মীশিং(কেরেক্টর) খরা য়াম্বসু য়াওরি ।।অদুগা লোয়ননা মীগী মমিংশিং অদু অশম্বদা ইরকপা থেংনৈ । মসিনা অপাবদা করিগুম্বদা চমম্নবা ফাওরক্কে তৌই । ওজাগী ৱাখলদা ইগে খনবীরিবা ৱারী অমগী য়ুম্ফম্ অদু কাউখিদ্রিঙৈ মতমদা হোবে হোবে শমজীন্না ইহৌনবা হোৎনবা অমদি তেনশিনবা য়াবা মতাঙদা খরা হেক্ শাংদোকখিবা থেংনদবসু নত্তে । মসি অপাবা অমা ওইনা ফাওজরকপা ৱাখল্লোন্দুনি । অদুম্ ওইনমক্ মসিমক্না ৱারী মচাশিং অসিগী মতিক্ ময়াই হন্থহল্লবরা হায়বদুদি নত্তে । ৱারী মচা ইবদা থোইদোক্না খুৎলোইরবা ওজা সুবদনিগী মফমদগী মখা তানা অতৈ ৱারী মচাশিংগী লাইরিক্ মখা তানা ফোঙলকপা ঙাইজরি ।

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু