কাছারদা লৈমরেম্বী ইন্দুপ্রভাগী মীতম উরেপ উয়ুং তমখ্রে
ইম্ফাল, ফেব্রুয়ারি ১০ : কাছারগী বিন্নাকান্দি পার্ত ২ দা লেবা সাউথ বরাক রুরেল দিবেলপমেন্তকী কমপ্লেক্সতা মণিপুরগী পুৱারীগা শাগোন্নরিবা লৈমরেম্বী ইন্দুপ্রভাগী নৌনা শাগদবা মীতম অমগী ঙসি উরেপ উয়ুং তমখ্রে।
লৈমরেম্বী ইন্দুপ্রভা স্তেচু ইনস্তোলেসন কমিতি বিন্নাকান্দি পার্ট ২ না শীন্দুনা পাঙথোকখিবা উরেপ উয়ুং তম্বগী থৌরম অদুদা কাছার বিন্নাকান্দি পার্ত ২ দগী ঙাংবম রামনারায়ন, কাছার লাখিবু খুনৌদগী ওইনাম বিরমনি অমুসং জিরিবামদগী নামৈরাকপম বুধচন্দ্র য়অওনা মশক নাইবা মীওই কয়ানা থৌরম অদুদা শরুক য়াখি।
থৌরম অদুগা মরী লৈননা অথৌবশিংগী লীক্লম থিবা লুপ, মণিপুরগী প্রেসিদেন্ত নন্দো তেকচমনা ফোঙদোকখিবদা, ১৯০২ দা মণিপুরগী নিংথৌ মোধুচন্দ্রগী মচানুপী লৈমরেম্বী ইন্দুপ্রভানা কাছারগী নিংথৌদা থাজরক্লবা মতুংদা কাছারগী মফম কয়াদা চোইনা তারিবা মীতৈগী নিংথৌ মচাশিং অমদি মীতৈ মচাশিং তাশিন খোমজিন্দুনা চহী তরেৎ খুন্তাকপগী মুংদা অৱাগী মথক্তা লান তৌদুনা মণিপুরবু নিংতম্বা ফংনবা হোৎনবদা চাউনা লৌখিবা থৌদাংশিং ঙসিগী মীরোলনা অকাও পরৈ চনখ্রবা লৈমরেম্বীনি।
লৈমরেম্বী ইন্দুপ্রভা অসি বৃতিশ অমদি অশৈবশিংনা শৈথাবদা ‘অয়ুক্কী ঙা ঙরান্নবা নুমিৎকী মশেক উনিংলবা, পূর্ণিমা থাজগী অশেংবা মশক উনিংলবদি অতোপ্পদা মতম মাঙহনগনু লৈমরেম্বী ইন্দুপ্রভা য়েংজৌ’ লৈমরেম্বী ইন্দুপ্রভাগী ফজবা শক্তম নত্তনা মহাক্কী অশানবা মীৎয়েং, অথৌবা মীৎয়েং অমদি মরৈবাক মরমদমবু নুংশিবগী ৱাখল্লোনশিং ঙসিদি হেন্না হেন্না ময়েক শেংলক্লি।
অদুগুম্লবা মহাক্না লৌলম্বা ফীরেপ-ফিদম, লমচৎ-শাজৎ অদু ঙসিগী মীরোলনা লৌবা তারগদি হেন্না হেন্না মরৈবাক মরমদম নুংশিবা, মরৈবাক মরমদমবু অৱাংবা থাক্তা পুখৎলক্কনি হায়বা ৱাখল্লোনদা ঙসি লৈমরেম্বী ইন্দুপ্রভাগী মীতম অসি খিন্নবা হোৎনবনি।
কছারদা খিনগদৌরিবা লৈমরেম্বী ইন্দুপ্রভাগী মীতম অসি মণিপুর অমদি কাছারগী অহানবা মীতম ওইগদৌরিবনি হায়না ফোঙদোকখি।
সোর্স: পোক্নফম
0 কমেন্ট:
কমেন্ট তৌবিয়ু