আপডেট:
image

ঐঙোন্দা দাদা সাহেব ফালকে এৱার্দ পীরক্লোইঃ অরিবম শ্যাম শর্ম্মা


ইম্ফাল, আগস্ত ২৯ : “ঐঙোন্দা দাদা সাহেব ফালকে এৱার্দ লৈবাক অসিগী মরিশুবা খ্বায়দগী ৱাংবা সিবিলিয়ান এৱার্দ অমা ওইরিবা ‘পদ্মশ্রী’ হন্দোকখিবা মণিপুরগী ইমিনেন্ত ফিল্ম মেকার অরিবম শ্যাম শর্ম্মানা ফোঙদোকখ্রে। 
ইন্টারনেসনেলগী থাক্তা ইকায় খুম্নরকখ্রবা ইমিনেন্ত ফিল্ম মেকার অসিনা ৱাফম অসি ঙসি পেলেস গেত্তা লৈবা এম এস এফ দি এস (মণিপুর স্তেত ফিল্ম দিবেলপমেন্ত সোসাইটি) গী মাল্টিপার্পজ ওদিটোরিয়ামদা পাঙথোকপা ফিল্ম ফোরাম মণিপুরগী ১৮ শুবা মপোক কুমওন থৌরমদা ফোঙদোকখিবনি। 
থৌরম অদুদা স্পিসিয়েল গেস্ট ওইনা শরুক য়াখিবা অরিবম শ্যাম শর্ম্মানা হায়খি, ফিল্ম ফোরাম মণিপুর য়াওনা ঐবু নুংশিবিবা কয়ানা ঐহাকপু ‘দাদা সাহেব ফালকে এৱার্দ’ পীদুনা ইকায় খুম্নবদা মতিক চায় হায়না লৌবিরি। অদুবু ঐহাক এৱার্দ অসি ফংলোই। লৈবাক অসিগী ওইনা সিনেমাগী লমগা মরী লৈনবদা পীবা খ্বায়দগী ৱাংবা মনা ‘দাদা সাহেব ফালকে এৱার্দ’ অসি ফংনবা হোৎনবদা মীচং-শঙ্গা য়াম্না চঙই। দিল্লীদা ঐখোয়বু শৌগৎ পিরক্কদবা লমদম অসিদগী অচৌবা মী অমত্তা লৈতে। আসামগী ওইনদি ফংখিবা য়াই। মখোয়গীদি দিল্লীদা অচৌবা ফম পায়বা মী ময়াম অমা লৈ। 
নেসনেল ফিল্ম এৱার্দ অমদা মহাক্না থেংনখিবা নুংঙাইতবা থৌদোক অমা নিঙশিংলদুনা শ্যাম শর্ম্মানা হায়খি, ঐহাক্কী ফিল্ম ‘ইশানৌ’ অসি নেসনেল এৱার্দকী বেস্ত ফিল্ম কেটেগোরিদা মকোক থোংনা লৈরবসু ফংবা ঙমখিদে। মতম অদুদা মখোয়না মণিপুরী লোন অসি সেদ্যুল চন্্রিবা লোন ওইবগী খুদোংচাবা লৌদুনা মমাঙদা লৈতবা কেতেগোরি অমা পুথেঅক্তুনা হায়বদি ‘বেস্ত ফিচর ফিল্ম ইন নন-সেদ্যুল লেঙ্গুয়েজ’ হায়দুনা পীরকখিবনি। ঐঙোন্দা ‘দাদ সাহেব ফালকে এৱার্দ’ অসি পীদনবা মরমসু অমা অদুমক মখোয়না পুথোরক্কনি। মসিদা ঐহাক্না ‘পদ্মশ্রী’ হন্দোকখিবা অসিসু অদুমক পুশিল্লকপা য়াবা মরম্নি। 
পিকখ্রবা মীশিং য়ামজদবা মণিপুরনা আর্ট এন্দ কালচারগী লমদা ঙসি ফিদা অমা ক্ল্লক্লিবা অসি অঙকপা অমনি। লমদম অসিগী আর্ত এন্দ কালচারগী ওইবা মচাক কয়া লৈরিবা অসি ঐখোয়গী য়াওরিবা ক্রিএটিবিতি অদুগী পোথোক্নি। ঐখোয়না তৌরকপদা মালেমনা অদুমক এপ্রিসিয়েসন তৌনরকই। মসিমক্ননি ঙসি ‘মণিপুরী সঙ্কীর্তন’ না য়ুনেস্কোনা থোকপা মালেমগী ইন্তেনজিবল কালচারেল হেরিতেজ মনুংদা চল্লক্লিবা অসি। মণিপুরী জগোই থোইদোক হেন্দোক্না মালেমগী জগোইগী ফম্বাক্তা ফিদমনিংঙাই ওইবা ফিদা অদুমক ফংবা ঙম্লিবা অসিনি। ফিল্মগী লমদসু মঙাই তেলেন্ত অৱাৎপা লৈতে। 
মণিপুরী ফিল্ম চাওখৎহনসি হায়রবদি ঐখোয় মশেলগী মরক্তা ইন্নদুনা লৈবগী থবক্তি থাদোকপা ফৈ। হৌজিক ফিল্ম পোলিসি লৈরে, কমায়না চাওখৎহনসিগে হায়বদু পুন্না খন্নমিন্নবা মথৌ তায়। হৌজিক্তি টেক্নোলোজিগী মখাসু য়াম্না পোল্লক্লে। ঐখোয়গী টেক্নোলোজি অহেনবা অফবা শিজিন্নবা তায়। ভাবোক অপঙবা লৈতে। ফিল্ম তৌরিবশিংগী মরক্তা লৈবা অশোয়বা অরানবা অদুসু চুমথোক্নবা শেমদোকপা চঙই। ঐখোয়না পূন্না হোৎনমিন্নদুনা মণিপুরী ফিল্ম চাওখৎনবা হোৎনমিন্নসি হায়না অরিবম শ্যাম শর্ম্মানা ফোঙদোকখি। 
থৌরমগী চীফ গেস্তকী ৱারোল পীরদুনা লংথবাল এসেমব্লি কনস্তিত্যুএন্সিগী এম এল এ করাম শ্যামনা হায়খি, ফিল্মদা ঐখোয়না তমশিনবা য়াবা পরা কয়া অমা য়াওই, ফিল্মসু এদজুকেসনগী শরুক অমনি। মীওইবগী পুন্সিদা থোকপা থৌদোক-ৱাথোক, অৱা-নুংঙাই কয়া ফিল্মদা মমি তারিবনি। হৌজিক মণিপুরী ফিল্ম অসি শিথরক্লে হায়না কন্না ঙাংনরক্লি। অদুবু মণিপুরী ফিল্ম শিরোই। মীয়াম্না ফিল্মদগী লাপ্না খক লৈতে। মণিপুরবু মালেমদা মশক তাকপদা ফিল্মনসু অচৌবা থৌদাং অমা লৌরবনি। ঙসি ইন্টারনেসনেল অমসুং নেসনেল লেবেল য়ৌনা মণিপুরী ফিল্মনা চঙশিন্দুনা লমদম অসিগী মিংচৎ পুরক্লিবা অসি লম অসিদা কত্থোক্তুনা হোৎনরিবা কয়াগী মপালদগীনি। 
ফিল্ম ফোলাম মণিপুরগী চেয়ারমেন এল সূর্জকান্তনা প্রিসাইদ তৌদুনা পাঙথোকখিবা থৌরম অদুদা ফোরাম অসিগী এদভাইজর আরকে নিমাই অমসুং লমদম অসিগী শক্নাইরবা আর্তিস্ত থেঅইদিংজম তোম্বী (নেসনেল এৱার্দি) সু শরুক য়াখি। ঙসিগী থৌরম অদুদা, কোরোন লাইচৎ মনুংদা ফিল্ম পুথোকপা ঙম্নদনা লৈনবা মতমদা ফিল্ম শিথহনবা য়াদে হায়বা ৱাখল্লোনদা ৱারবসু ৱানা ফিল্ম পুথোকখিবা প্রদ্যুসর, দিরেক্তর য়াওনা তোঙান-তোঙানবা মণিপুরী ফিল্ম চাওখৎনবা হোৎনবদা অঙম্বা থৌদাং লৌরক্রিবা মীশিংবুসু অচম্বা খুদোলপোৎ পীদুনা ইকায় খুম্নখি। লোইশিল্লকপদা এৱার্দ উইনিং ফিল্ম অমা ওইরিবা কানাদিয়ান ফিল্ম ‘ৱার উইটচ’ কাপ্তুনা মীয়ামদা মীৎয়েং তাহনখি। 

সোর্স: পোক্নফম

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু