এস ইন্দ্রকুমারদা সাহিত্য একাদেমিগী ত্রান্সলেসন এৱার্দ পীরগনি
ইম্ফাল, মার্চ ৭ ; সাহিত্য একাদেমি, নিউ দিল্লীনা শকখঙলবা লোলশিংদা হন্দোকপা লাইরিক্তা পীবা সাহিত্য একাদেমি প্রাইজ ফোর ত্রান্সলেসন ২০২৪ গী মনা ফংলগদবশিং গী মমিং ঙসি লাউথোরকপদা মণিপুরী লোলগী ওইনা সোইবমচা ইন্দ্রাকুমার য়াওরে।
সাহিত্য একাদেমি, নিউ দিল্লীনা থাদোরকপা চেরোল অসিদা হায়, ঙসি একাদেমি অসিগী একজিক্যুতিব বোর্দকী মীফম অমা রবিন্দ্র ভবনদা পাঙথোক্লবা মতুংদা তোঙান-তোঙানবা লোল ২১ গী লাইরিকশিং মনা অসিগীদমক খনগৎখিবনি। মাগী মাগী লোলগী ওইনা মী ৩/৩না শাবা জুরিশিংনা পুখৎলকপা রিকমেন্দেসন অদুগী মতুংইন্না মনা অসি লাউথোকপনি।
ঙসিগী মনা ফংলবশিং লাউথোরকখিবা অদুদা নেপালি অমসুং সংস্কৃতকী ওইনা য়াওদ্রি। লোল অনী অসিগীসু মখা তাবদা লাউথোক্কনি হায়রি। মণিপুরী লোলগী ওইনা সোইবমচা ইন্দ্রাকুমারনা হন্দোকপা শৈরেং লাইরিক ‘য়ুরাংবী’ দা সাহিত্যা একাদেমি ত্রান্সলেসন প্রাইজ অসি পীরকপনি। হরিবংশ রাই বচ্চননা হিন্দীদা ইবা ‘মাধুবালা’ হায়রিবা শৈরেং লাইরিক অদুদগী সোইবমচা ইন্দ্রকুমারনা মণিপুরীদা ‘য়ুরাংবী’ হায়না হন্দোক্তুনা ইবনি।
মহাক্কী লাইরিক অসিবু ত্রান্সলেসন প্রাইজ অসিগীদমক মতীক চারে হায়না রিকমেন্দ তৌখিবা জুরিনা প্রোফেসার চুংখাম য়াশৱন্ত সিংহ, দাঃ আর কে মোবী সিংহ অমসুং প্রোফেসার দাঃ সাইখোম রোবিন্দ্রো সিংহনি হায়রি।
সোর্স: পোক্নফম
0 কমেন্ট:
কমেন্ট তৌবিয়ু