ইপা-ইপুশিংগী খুভম কাছাড় জিলাগী লেংওন্দবী পাৎতা লাংবনগী হৈশোয় তম্বা
আগরতলা, ওক্টোবর ২০ : ‘চহী তরেৎ খুন্তাকপা’ মতম (১৮১৯-২৬) অসি মণিপুরগী পুৱারীদা শীংথাবা য়াবা তাঙ্কক অমনি। মণিপুরবু অৱানা খুদুম চল্লবা চহী তরেৎ খুন্তাকপা মতম অদুদা ইনিংথৌ গম্ভীর সিংহ মহারাজ অমসুং নরসিংহ মহারাজ মচিল মনাও অনীনা কাছাড় জিলা মনুং চনবা লেংওন্দবী পাৎ হায়রিবা মফম অসিদা চেল্লক্লগা লোৎতুনা লৈখি হায়রি। চহী চনিরোম মমাংগী পাৎ অসি ঐখোয়গী ইপা-ইপুশিংগী খুভমনি হায়দুন হন্দক চহী মণিপুরদগী শরুক য়াদুনা পাৎ অসিদা লাংবনগী হৈশোয় থাবা অমদি চরা তম্বগী থৌরম পাঙথোকখ্রে।
ইপা-ইপুগী খুভম থিদোক্তুনা তুংগী মীরোলগী দমক ঙাক শেনবগী মতাংদা অপুনবা মীয়ামগী মীফম অমসু পাঙথোকখি হায়রি। মীফম অদুদা অথৌবশিংগী লীক্লম থিবা লুপ, মণিপুর, লেংওন্দবী পাৎ প্রোটেকশন এ্যন্ড প্রীজার্ভেশন কমিটি, আসাম, য়ুনাইটেদ ক্লাবস ওর্গানইজেশন লক্ষিপুর, আসাম অমসুং মণিপুরী চনুরা খোর্জৈ লুপনা পুন্না ফম্মিন্নদুনা ৱারী শান্নখি। ইপা-ইপুশিংগী খুভম অসি ঙাক শেনবগী ৱাফমনা মরু ওইনা মীফমদা খন্নখি।
হৌজিক লৈরিবা পাৎ অমসুং লম অসি বেঙ্গলী মচা রনজিৎ দাসকী (অপোকপা কিশোর লাল দাস) মমিংদা লৈ হায়রি। মরী লৈনবা অথরিটিগা ৱারী শান্নদুনা ইনিংথৌনা ফম্লম্বা খুভম ওইরিবা নুংপাক য়াওনা পাৎ অসিগী শরুক খরা অমা খুভম ওইনা থমদুনা শেমগৎপগী ৱাফমসু খন্নখি হায়রি।
সোর্স: মরূপ
0 কমেন্ট:
কমেন্ট তৌবিয়ু