আপডেট:
image

ইপসাগী লুপা ফুদোংবা থৌরম পাঙথোকখ্রে

ইম্ফাল, সেপ্টেম্বর ১৪ : ইন্টার্নেসনেল পিছ এন্দ সোসিয়েল এদভন্সমেন্ট (ইপসা) না শাফোংলকখিবা চহী ২৫ মপুং ফারকপগী লুপা ফুদোংবগী থৌরম ঙসি থাংমৈবন্দগী দিএম য়ুনিভার্সিটি কেম্পাসতা লৈবা ইমা খুন্থোকহানবী শঙলেন্দা পাঙথোকখ্রে। থৌরম অদুগী চীফ গেষ্টকী ৱারোল পীরদুনা জেনিমসকী ডাইরেক্টর দাক্তর দেবেন লাইশ্রমনা ইপসানা চঙশিল্লিবা থবক থৌরমশিং মথং মথং মায় পাক্না পাঙথোকপা ঙম্বা ওইবীয়ু হায়না ফোঙদোকপগা লোয়ননা থৌরম অসিদা চীংতম ইচিন ইনাও পুন্না হরাও তয়াম্না শরুক য়ামিন্নবা উবসি য়াম্না নুংঙাই হায়খি।

ইপসাগী প্রেসিদেন্ট তৌরাংব্রম বিরজিৎনা হায়, হৌজিক হৌজিক ইন্দিয়া লৈঙাক্না অৱাং নোংপোক ষ্টেটশিং মরুওইনা মণিপুরদা তুহৎপীবা মানবগী থৌওং কয়া লেপ্তনা চত্থরকপা লেপত্রি। হন্দক্তসু ইন্দিয়া লৈঙাক্কী য়াথং মতুংইন্না অৱাং নোংপোক্কী ষ্টেটশিংদা নম্ফুদা হিন্দি লোল তম্বীগদবনি হায়বসিনা ষ্টেট ষ্টেটশিংগী লৈজরম্বা ইরোল ইয়েকশিং নমশিনবা মানবা থৌওং চত্থরকপা অসিমক লমদম অসিগী মীয়ামগী খ্বাইদগী লাইবক থিবনি। থৌওং অসিমক ইপসানসু অকনবা মওংদা কন্দেম তৌই। অৱাং নোংপোক্কী ষ্টেটশিংদা হিন্দি লোন তমগদবনি হায়বসি লৈরিবা ষ্টেটশিং অসিগী খুনাই অসিবু থৌওই উশিত্তবনি হায়বসি ময়েক শেংনা তাক্লি।

মহাক্না হায়, ইন্দিয়ানগী চহী ৭৫ শুবগী থৌরম পাঙথোরকপগী মনুং চন্না ইন্দিয়া লৈঙাক্না ষ্টেট ষ্টেটশিংদা ইন্দিয়াগী ফ্লেগ চীংখৎতুনা থৌরম পাঙথোক্নবা য়াথং পীরকখি। ইন্দিয়াদা তিল্লুবা অমা ওইনা ইন্দিয়াগী নিংতম্বা নুমিৎ থৌরম অসি ইকায়খুম্নবা ফাওই। অদুবু চহী লীশাং শিৎনা আগস্ট ১৩ দা ল্পেনা পাঙথোক্তুনা লাকপা অথৌবশিংগী নিংশিং থৌরম অমদি মথংগী নুমিৎ আগস্ট ১৪ গী মণিপুরগী নিংতম্বগী নুমিৎ ফাওবা কোনশিন্দুনা য়ুমথোং খুদিং ইন্দিয়াগী ফিরাল পায়হনখিবা অদুমক অকনবা মওংদা নুংঙাইতবা ফাওই।

আগস্ট ১৩ অসিদি এঙ্গলো মণিপুরী ৱারদা থৱায় থাখ্রবা অথৌবশিংগী মফমদা হৈ লৈ কৎতুনা ইকায়খুম্নবা উৎলিবনি। মসিবু থরৱায়না ইন্দিয়াগী নিংতম্বগী নুমিৎক থৌরমগী মনুং চলহনখিবা অদুমক লাইবক থিবনি। লোয়ননা আগস্ট ১৪দা পাঙথোক্নরিবা মণিপুরগী নিংতম্বা নুমিৎ থৌরম চহী কয়াগী মমাঙদগী পাঙথোক্তুনা লাকখি অদুবু চহী অসিগী ওইনদি লোঞ্জা লোনথুপ্নবা মানবা মওংদা অথিং অরাক পীখিবা অদুসু অকনবা মওংদা কেন্দম তৌই। লাক্কদবা চহীশিংদসু অসিগুম্বা থৌওং লৈঙাক্না চত্থরোইদবনি।

লমদম অসিগী মীয়াম্না চহী কয়াগী মমাঙদগী তান্দুনা লাকপা দিমান্দ ইন্নার লাইন পার্মিৎ (আইএলপি) সিষ্টেম অসিখক নত্তনা য়েলহৌ ফুরুপ অসি কন্নবা লম্বী লৈত্রি। অদুবু সিষ্টেম অসিগী বেজ এয়ার ১৯৬১ ওইহনখিবা অসিমক লৈঙাক অসিনা লমদম অসিগী করিমত্তা খন্দবা থৌওংনি। লৈঙাক্না ফীরেপ অসি লৌরমদাইদা জেসিআইএলপিএস অমদি লমদম অসিগী মীয়াম অমত্তা তান্নরমদবা অসিসু লাইবক থিবনি। লৈঙাক্কী থৌওং অসিদি চহী কয়াদগী আইএলপিগী বেজ এয়ার ১৯৫১ ওইগদবনি হায়না ইনৌ হৌদুনা লাকখিবা লমদম অসিগী মীয়াম অমদি হান্নগী লৈঙাকপু উশিৎ থওইদবনি হায়না লৌই হায়নসু মহাক্না মখা তানা ফোঙদোকখি।

থৌরম অদুগী নুংগী ওইবা ৱারোল পীরদুনা ইপসাগী জেনারেল সেক্রেটারি দব্লিয়ু গুনেশ্বরনা হায়, ইপসানা শাফোংলকপদগী ঙসি ফাওবা লেপ্পা লৈতনা লৈপাক্কী লুর লুরবা তম্ফম কয়অ অমদি কংলৈপাক অসিদা থোক্লিবা থৌদোক ৱাথোক কয়াদা শরুক য়াদুনা লাকপগা লোয়ননা ঙসি ইপসা চহী ২৫ মপুং ফারে।

ৱাখল্লোন মান্নবা ফেমিলি ওর্গানাইজেসন লুপ নিপাননা পুনশিন্দুনা জষ্টিস কম্মিটি ওন এঙ্গলো মণিপুর ৱার ১৮৯১ মার্টিয়ার্স এন্দ ফ্রিদম ফাইটার্স কংলৈপাক কৌবা এপেক্স বোদি অমা শেমগৎতুনা ১৮৯১ গী এঙ্গলো মণিপুরী ৱারদা ইরৈপাক্কীদমক্তা থৱায়না পোন্থা পীখ্রবা অথৌবা ইপা ইপুশিংগী খোঙ্গুল লীদুনা ঙসিগী মীরোল অমদি তুংগী মীরোরদা খঙহৌননবগীদমক্তা পুৱারিগী শিংখোং থিবা হৌরক্তুনা মীয়ামদা খঙহল্লক্লি হায়খি।

ইপসানা লীশাং শীৎনা চত্থরকপা থৌরমগী মনুং চন্না হন্দকসু কংলৈ পুৱারি খোঙ্গুল লীবা’ খোঙচৎ অমা আসামগী মফমশিং চৎলুই। লক্ষিপুর কাছার, জারিবোন লালা হাইলাকান্দি, অৱাপলি কমাংখা হায়রিবা মফমশিংসিদা চৎতুনা চোইনা চোইনা খুন্দা লৈতাখ্রবা ঈগী মরী ইরৈচাশিংবু উনদুনা পুকমেন পাওমেন্নরুই। ইপসাগী পান্দমদি ইরৈচা পুম্নমক মীওৎ মীতৈ লতবা মীওইবা খুদিংমক নুংশি চান্নবা হিংমিন্নবা খুনাই অমা অমসুং অমত্তা ওইবা শক্তম য়োকখৎপগা লোয়ননা মোঙ্গোলোইদ ওইবা মচৎ মনাৎ ঙাক্না চৎপা অসিনি। অদুনা মীগা মীগগী মরক্তা মান্নবা থাক লৈহন্নবা হোৎনদুনা লাকপা লুপ অমনি।

ইপসানা য়াম্না লুম্না লৌবা কংলৈপাক মণিপুর ইরৈপাক ইরমদম অসিগী নিংথৌরোল ৭৬ না শীজিন্নরম্বা পোলিটিকেলগী ওইবা ফিরালগী মরমদা ২০১০ গী জানুয়ারী ১০ দা ষ্টেট গেষ্ট হাউসতা অচৌবা সেমিনার অমা শিনখি। মদুতা নত্তনা ইং ২০১০ গী আগস্ত ২১ দা জিএম হোল ইম্ফালদা লৈপাকসিগী অখঙ অহৈশিং অমদি মীয়ামগী ওইবা মীফম অমা পাঙথোক্তুনা য়ানরবা মতুং ইং ২০১৭গী আগস্ট ১৪ দা মণিপুর য়ুনিভার্সিটিদা য়েৎনবা লৈত্রবা কংলৈপাক্কী ‘ফিলাল লাইরিক’ ইপসানা ফোঙখি।

ইং ১৮৯১ গী এঙ্গলো মণিপুরী ৱারদা ইরৈপাক ইরমদম কংলৈপাক্না লোইলম শন্দোকপা বৃটিশকী মখুৎতা মীখা পোনখিবা নুমিৎপু দার্ক দে ওবজার্বেসন মণিপুর লোষ্ট হার সোভরেন্টি হায়দুনা এপ্রিল ২৭ তা লীশাং শিৎনা চহী খুদিংগী পাঙথোক্তুনা লাক্লি। চহী ৫৬ বৃটিশকী মখাদা প্রোটেক্তোরেৎ ষ্টেট ওইনা লৈরবা মতুং ইং ১৯৪৭ গী আগস্ট ১৪ গী অহিং নোংয়াইদা কংলৈপাক মণিপুরবু বৃটিশকী মখুৎতগী লোইলম থাদোকপীরমদুনা নিংখা তম্বা মরোমদোম লেপচখিবা নুমিৎ ১৯৪৭ গী আগস্ট ১৪ অসিবুসু ইবুধৌগী তুথুপ মপান য়েকপা ফিরাল চীংখৎতুনা লীশাং শিৎনা পাল তৌদুনা লাকখি হায়না ফোঙদোকখি।

থৌরম অদুদা ইপসাগী চীফ এদভাইজর ঐচ ইবোতোম্বী খুমন, য়ুসিএমগী প্রেসিদেন্ট জয়চন্দ্র কোন্থৌজম, মাও য়ুনিয়ন ইম্ফালগী প্রেসিদেন্ট দাক্তর পুনি লোসি, তাংখুল নাগা ফুতটহিলস ওর্গানাইজেসনগী ভাইস প্রেসিদেন্ট আরভি সোন জিমিক আইমোল ট্রাইব য়ুনিয়নগী প্রেসিদেন্ট আরতি অখেল আইমোলনা গেষ্ট ওব ওনার ওইনা শরুক য়াখি। তোঙান তোঙানবা ফুরুপ অমদি সিএসওশিংগী লুচিংবগী মীহুৎশিংদা খুদোল পীদুনা ইকায়খুম্নবা উৎখি।

সোর্স: সঙাই এক্সপ্রেস

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু