আপডেট:
image

ইতৈনা ইবাই ওনখ্রবদা -- ৱাইরু-ৱাইরুদা

 

 ... ইনেম্বোকসু ইমা ওনখ্রে। নুপীশিংসিসু পঙনোপ নোপ্তে, ইতৈ কৌবা ইকায়দুনা ইবাই হেক্তা কৌরে মতৈদা। খরা লৈরগদি ইমাগসি সুম কুইনা কৌমন্দুনা তল্লে, সিষ্টর নৎত্ৰগা নেনে কৌনরকপফাও য়ারি। লোল অমবু থুগায়বা হায়বসি ইশানা সুম থুগাইজবনি। মীনা থুগাইবীরকপা নত্তে। ইশাদা লৈরে।

 

(২২ আগষ্ট, ২০২২, হুইয়েন লানপাউদা ফোংখিবা  ``ৱাইরু - ৱাইরুবদা '' কলামদগি লৌখৎচবনি। )
 

বীর টিকেন্দ্রজিৎ লীলাদা (এ আই আর, ইম্ফালগী  মৈত্রম বীরনা ইবা) ইংলিসমেন ওফিসর অমনা মণিপুরী লোল অসি ইংলিস লোলগী খোন্থোক্কী মওংদা ঙাঙবা তাখি। মদু ঐনা অহানবা ওইনা তাবা মতমদা য়াম্না নুংঙাইখি। ঐদা নত্তনা ইমান্নবশিংসু  নুংঙাইখি। লম্বীদা, স্কুলদা ঐখোয় মশেল ইমালোলবু ইংলিস লোনবগী মওং তমদুনা ঙাঙন-শক্নরম্মী। রেদিওগী লীলা ওইনা তাজখিবনি মদু রুপমহল থিএটরগী লীলানি। মদু কায়দে ইংলিস মচানা মীতৈলোল ঙাঙবদা খোইবা মশানা তাবনি, মখোয়না ভাঙলিবা খোন্থোক্তু খোইবনি।

ঐখোয় মীতৈ মচাশিংনা ইংলিস, হিন্দি ঙাঙবামতমদসু তশেংনা মমালোল ওইজবা মখোয়গী  নাকোংদদি ঐখোয়না ঙাঙলিবা অসি অকোইবা লোল ওইনা তারমগদৌরিবনি। মসি তাবদা ঐখোয়বু নুংশিরমগনি। মখোয় অসে ঐখোয়গী লোল খোইনা ঙাঙইদা হায়দনা করিসু নোক্নরম্লোই। কনাগুম্বা ৱাখল শুফাত্তবা, ৱাখল চাওথোকপা ঙমদবা মীনা মদু নোক্নরম্বদি য়াই। মদুনা মদুনি।

ইমালোল ভাঙবা মতমদা য়াম্না ফজদবা মওংদা শায়র-শায়রগা, থৌওইনা ঙাঙগে য়াওনা ঙাঙবা মানবা য়াওরকপা অসি তশেংনা ইকায়বীবা নৎত্ৰগা নুংঙাইজদবা ফাওরি মখোয়গীদমক। লোল শুরক্তবা হায়বা তারে অমরোমদা মসি। ‘র’ গী খোন্থোক অমা হায়বদা মরৈ কোল্লগা ইংলিস লোল ঙাঙবদৌনা তৌবা য়াম্না লৈরে। | করিনো হায়বদা মরৈ অদু কোল্লগা ‘খরিয়নো” হায়বা য়াওনরে। মসিদা নত্তে। ‘জ’ গী খোন্থোক অসিবু ইংলিসকী খোন্থোক্তৌনা ঙাঙনবা য়াম্না লৈরে। ঐ খঙজদে হায়বগী মহুত্তা ঐ খঙজ্বদে, ঐ চাজ্বদে, ঐ উজ্বদে হায়বগী মওংদা লাক্লে। মসি ৱা ঙাঙনবদা অমদি ঙাঙবদা য়াম্না তোয়না তানরে। অমনা ‘চ’ গী খোন্থোক অসিসু মওং অমনি। অচৌবা হায়গদবদা অচুবা হায়বা মচিন চপশিল্লগা ঙাঙবা ইন্টরভিয়ু লৌবা মীওই কয়া লৈরে। ঙসি মণিপুরী (মীতৈলোল/মৈতৈলোল) অসিদা র, জ অমদি চ’গী খোন্থোকশিং অসি মওং অমা তৌখ্রে। শোয়দনা লিঙ্গুইষ্ট ময়ামগী নাকোং য়ৌখ্রগনি।
মীতৈলোল অসি ইংলিসকী খোন্থোক মান্না ঙাঙগে ঙাঙগে তৌবা লোল শুদবা মানবা অসি য়াম্না লেম্নরক্লি। ফিল্মদা থোরক্লিবী মেন রোল কুম্বী নুপীমচাশিংগী মীতৈলোলনা সুম তারুবদা পূক্নিংদা লৈত লায়রগী ৱা কাউই। ইকন্থীনা ইরল ফোয়দৎতুনা টি ভি থুগাইনীংলকই। অদুক শেল তিংনা টি ভি য়েংলগা মরৈ
ইকোন হেক কোল্লদুনা লৈতোন শেংবোই শেংদবোই মতম অমগী য়েংখোম রোমা, য়ূম্লেম্বম কুন্দোরৈ খোয়গী লোল অদু ফজদ্রা? হৌজিক্লা খোইগে য়াওনা খোইশিন্নবা মানবা অমসু য়াওনরে।

খোন্থোক্তা নত্তে, ৱাহৈসু ইশোয় শোয়নরে। খেন্নবা হায়গদবদা খেৎনবা, লামায় হায়গদবদা লৈমায় হায়না হায়নরকপা, ইনরকপা য়াম্না য়াওনরে? অমনা মপাল্লোম হায়গদবদা মাপলরোম, কুনলোম হায়গদবা কুনরোম হায়বা ইবা, হায়বা ওন্থোক্না ৱানা পঞ্জরি, তাজরি।
মীতোপ্না খুগাইরকপা, য়ানখায়রকপদি লায়রি। ইশানা ওইনা ইশাগী য়ূম জে সী বি থৌজিল্লগা থুগায়জবগী মওংনি। অঙাং মচা লোল শুফাৎত্রিবা অমনা লোল খোইনা খোইনা ঙাঙবা অদুদি তাবদা য়াম্না নুংশি, অহলনা লোল খোইবা অসিদি তাবা য়াদে। লোল শায়বা হায়বদু তারগা তোকই। ইতোনবু কাকা কৌবগী, ইতৈমবু ভাবি কৌবগী ৱা থোক্নরিঙৈ চৈরক্তা ইকুবোকপু বাজি, পাবা, পাবুং, বাবা কৌবগী নম্বো অমা হাইগৎলক্লি। ইনেম্বোকসু ইমা ওনখ্রে। নুপীশিংসিসু পঙনোপ নোপ্তে, ইতৈ কৌবা ইকায়দুনা ইবাই হেক্তা কৌরে মতৈদা। খরা লৈরগদি ইমাগসি সুম কুইনা কৌমন্দুনা তল্লে, সিষ্টর নৎত্ৰগা নেনে কৌনরকপফাও য়ারি। লোল অমবু থুগায়বা হায়বসি ইশানা সুম থুগাইজবনি। মীনা থুগাইবীরকপা নত্তে। ইশাদা লৈরে।

অমুকসু লোল অমগী গ্রাম্মার অসি হোংদবা য়ারক্তে। |হোংলিবনি হায়দুনসু নোংমা নীনিদা হোংবা নত্তে। মরম চানা হোংলকপনি, অদুদি নওনা লোল অদু চুম্না শীজিন্নবা হৈত্ৰগা লোল অদুগী অচুম্বা মশক ওইনা চৎপা য়ারোই। অঙাং মচানা গ্রাম্মার কায়না ঙাঙলিবা ময়ামদু ঐখোয়গী অচুম্বা লোল ওইনা লৌনদে, চুমথোক্নরি। ইমালোল হিংহন্নীংদবা কনা অমত্তা লৈরম্লোই। অদুবু কমদৌনা হিংহনগদগে হায়বদি খঙজদবা অমদি পাম্বৈ লৈজদবা কয়া য়াওরি।
লোল অমা হিংনবা হোৎনবদা লোল অদু তম্ন ওৱেবসাইট, য়ুট্যুব চেনেল, গ্রাম্মার এপ, খোন্থোক্কী এপ, দিক্সনরি, এনসাইক্লোপেদিয়া  অসিনচিংবা কয়া পুথোকপা চঙই, লোল অমদা হায়বদু ইরোলদা সেকেন্দ অমদা ওন্থেকপা । ইরোল অদু মীরোলদা খুদক্তা ওনবা য়ানরক্লি। ৱা ওইনা ঙাঙলগা মথন্তা টাইপ তৌহনবা য়ারক্লি, অইবা পোৎ অমা সোফ্টৱেয়রনা পাবা য়ারে। মসিগুম্বা ময়াম অসি লন্নাই অমদি লৈঙাক্না তৌগদবনি। লোল চাওখনবা চা অহাউবা, সিংঙ্গারা অচৌবা, ঙা অতাওবা য়াওবা সেমিনার, সিম্পোজিয়ম ঙাক্তনা য়াররোই, ইমালোল শায়রগা ঙাঙবা য়াম্না লৈরবনি।

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু