আর কে বিদুরঃ সনাগী থম্বালনা লৈতেংখিবা ফিল্ম ক্রিতিক
মণিপুরী সিনেমাগীদমক্নি হায়না নুংশিজনা কৎথোকচরক্লিবা নহা অদুগী অচুম্বদুবু নাথৈখিবদুনা ঙসিদি মণিপুরী ফিল্ম ইন্ডাষ্ট্রিনা চহী ৫০ শুরবা মতম অসিদা ইন্ডাষ্ট্রিগী অচৌবা মসা অমা ওইরিবা ফিল্ম কৈথেলদা লাইসেন্স পায়বা ডিজিটেল প্রোজেক্তর খিনবা সিনেমা হোল অমত্তা মণিপুরদা লৈত্রে হায়না এসেম্বলিগী লৈমায়দা মণিপুরগী চীফ মিনিষ্টারনা থম্বিখ্রে; ফিল্মদগী কারক্কদবা লৈঙাক্কী রিভিন্যুসু মমাঙগী চহী অনীদি শুন্যদা লৈরে হায়না ফোঙদোকপিখি। সেন্টারগী মিনিষ্ট্রি অব ইনফোর্মেসন এন্ড ব্রডকাষ্টিংগা মণিপুর লৈঙাক্কী আর্ট এন্ড কালচার লোইশঙগা ফিল্ম সেন্টারদা চহী ৪০ হেন্না মরী থাদৎনদুনা লাকখিবনি।
ইন্দিয়াগী প্রেসিডেন্টনা হকথেংননা ইকায় খুম্নবা ঊৎতুনা য়েন্থোকপা নেশনেল ফিল্ম এৱার্দসতা, মণিপুরী মচাদা ইহান হান্না সনাগী থম্বাল (স্বর্ণ কমল) ফংখিবা মীশকসি আর কে বিদুরনি। মহাক্না ৫৬শুবা নেশনেল ফিল্ম এৱার্দস ২০০৮দা বেস্ট ফিল্ম ক্রিতিক তাখি। মণিপুরদতা নৎতনা ইন্দিয়াগী চীংখৈ লমদম ফুম্বদা হরাওনখি। মরমদি মনা অদু তাঙনা ফংবা মনানি; ইন্দিয়াগী ফিল্ম স্কোলার ময়াম অথো-অহেন তান্নবনি। ইং ১৯৮৪ দগী হৌনা মনা অসি থিন্দোরকপদগী, ইন্দিয়াগী চীংখৈ লমদমদগী বেস্ত ফিল্ম ক্রিতিকতা সনাগী মেডেল ফংখিবসি শুপ্নগী মীওই ৫ দমক ঙাইরি।
আর কে বিদুর
আর কে বিদুন (অক্টোবর ১০, ১৯৪১-জুন ৯, ২০২১) অচঙবা ফিল্ম ক্রিতিক অমনি। ফিল্ম ক্রিতিক অমা ওইবখক্তদসু নত্তে। ফিল্ম সোসাইতগী এক্টিভিস্টনি। মণিপুরী সিনেমাবু চাওখৎহন্নবগী ঈহৌদসু চাউনা মায়রোং য়াখিবা মীশক্নি। ফিল্ম মুন্না খঙবতা নৎতনা মণিপুরী লোল অমসুং কালচারগী ফজবা অদু নীংথিনা খঙঙি। ইবসু মরীক চুম্না ই। ৱাহৈগী মপাঙ্গল ফজনা খঙঙি। ইবসু মরীক চুম্না ই। ৱাহৈগী মপাঙ্গল ফজনা খঙঙি। ৱাহৈশিংগী য়াচন ফূরকপদা প্রমান-পান্থৈ হাপচিনবা হৈ। অপবাশিংদা অনৌবা মচাক অমা পীদুনা খঙহল্লি অমসুং নুংঙাইহল্লি।
আর কে বিদুরগী ক্রিয়েটিব ৱার্ক্সকী অহানবা খোঙথাং অসি শৈরেংদগী হৌখি। মশাগী চহী ২২ মুক শুরকপদা, ইন্দো-চাইনাগী লান্দা শকখঙবিখিদ্রবা লান্মী কয়া মরমদমগীদমক্তা থৱায়না পোন্থা পীখিবা, অদুবু লৈবাক্কী মপী-মপা কনামক্তদা খঙবিখিদবা, ইকায়খুম্নবা ঊৎপিখিদনা লান্দা মপুন্সি লোমখিবা লান্মীশিংবু শৈথাদুনা ইখি-‘কাউথোকখ্রবা জৱানগী স্মৃতি।’ শৈরেং অদু কালচারেল ফোরামগী ঋতুদা ফোঙনবা পীশিনখি। মতমদুগী ঋতুগী এদিটর খুমন্থেম প্রকাশনা লৌখৎপিদুনা ফোঙবিখি। মদুদা কয়গী মতীক হরাওজখি; ইনীংহনবগী অচৌবা ঈনোৎ অমা হাপ্পীখি। মতম অদুগী মণিপুরী লিটেরেচারগী লাকঙম-ফাঙমদ্রবা খঙ-হৈরবশিং হাওবম গৌরদাস, চোংথাম মণিহার, লৈমপোকপম দামুদোর, অশাংবম মীনকেতননচিংবা মথক থোংবা ময়ামগী মতুং ইনখি।
আর কে বিদুর কমার্স সাবজেক্টতা মাস্টারনি। লক্ষনৌ য়ুনিভার্সিটিদগী পাস তৌখি। লক্ষনৌদা লৈরিঙৈদা নৱাবকী কালচার, গজল, সায়রী অমসুং উর্দ্দু লোনসু মহাক্কী লূ-তোংদা চঙখি। একাউন্টেন্ট জেনারেল অফিস, মণিপুরদা অডিটর ওইনা থবক চঙখি। মণিপুরী থিয়েটারগী অনৌবা য়াওলদা নৈনমী ওইনা য়াওরকই। পুখ্রম্বা শামু, কানাইলাল, রতন থিয়ামগা পুল্লকই। সিমান্ত পত্রিকা অমসুং খোল্লাওদা মহাক্কী থিয়েটারগী আর্টিকেলশিং ফোঙখি। রতন থিয়ামগী ‘অষাড় কা এক দিন’ নৈনদুনা ফোঙখি।
ফিল্মগী নৈনমী ওইনা
মহাক্না ফিল্মগী নৈনমী অমা ওইরকখিবা অমগী ফিল্ম এপ্রিসিয়েসন কোর্সতা থানবা থৌরাং তৌখি। ফিল্ম সোসাইটি অব মণিপুরনা আর কে বিদুরবু ইং 1977 কী ফিল্ম এপ্রিসিয়েসন কোর্সতা য়াওনবা থাখি। ফিল্ম সোসাইটি অব মণিপুরনা পুথোকপা শেল খরগা মরন্নাইগী শেল খরগনা কোর্স অদু য়াওখি। কোর্স অদু য়াওরুবদগী ফংলকপা মালেমগী ফিল্মশিংগী পুৱারী, থিওরী অমসুং ফিল্মগী লোলশিং অদুগী মহৈদুনা মঙোন্দা মপূং ফাবা ফিল্ম ক্রিতিক অমা ওইবা ঙমখি। ক্রিতিক অমা ওইবগী মহাক্কী মগুণ অদুদি, মহাক্না নেশনেল ফিল্ম এৱার্দতা বেষ্ট ফিল্ম ক্রিতিক ফংখিবগী সাইতেসন্দা অসুম্না ইরি- For taking the readers to astate little known to our film makers. He understands cinema like few others, bringing with him an open mindset ইবোহল শর্ম্মানা প্রেসিডেন্ট ওইদুনা অমসুং আর কে বিদুরনা জেনারেল সেক্রেটারী ওইদুনা ইম্ফাল সিনে ক্লাব ইং 1979 দা লিংখৎখি। ফিল্ম সোসাইটি অনী শুরকপদগী মণিপুরগী সিনেমা চাওখৎহনবগী ঈহৌদসু লূপ অনী অসি হেক হেক পূন্দুনা ড্রাইভিং ফোর্স অমা ওইদুনা মণিপুরগীসু ষ্টেত ফিল্ম পোলিসী লৈগদবনি হায়বগী ঈহৌ চৎথখি। ইং ১৯৯০ গী জুন ৩ দা ইম্ফালগী জে এন মণিপুর ডান্স একাডেমী হোলদা অহানবা ষ্টেত লেবেল সেমিনা অন ষ্টেত ফিল্ম পোলিসী পাঙথোকখি। ফিল্ম সোসাইতি অনী অদুগী হোৎনজখিবদু পল্লদুনা মহাক্কী লাইরিক ‘ৱাখল মচু মচু, শক্তম মখল মখল’দা পল্লি-‘জি রেনোরগী ফিল্মশিং অমদি দি সিক্কাগী ফিল্ম ‘বাইসাইকেল থিফ’ না সত্যজিৎ রায়বু ‘পথের পাচালি’ ফিল্ম পুথোকপদা পূক্নীং থৌগৎপা, আশা, হৈনীংবা পোকহনবা মতৌগুম মণিপুরগী সোসাইটি অনী অসিনা শেমগৎখিবা অফবা ফিল্মগী এটমোসফিয়ারদা এক সিনে প্রোডাক্সনগী পৃথিবী ফাওরবা ফিল্ম ‘ইমাগী নিংথেম’ থোকহনখিবনি হায়বা য়াই।”
ফেডারেসন অব ফিল্ম সোসাইটি অব ইন্দিয়া অসি মিনিষ্ট্রি অব ইনফোরমেশন এন্ড ব্রডকাষ্টিংগী মখাদা মতেঙ পীদুনা চলাইবগুম ষ্টেত-ষ্টেতশিংদা লৈনরিবা ফিল্ম সোসাইটিশিং অসিসু লম লমদুগী লৈঙাক্না মতেঙ পীদুনা চলাইবনি। মণিপুরগীদি মদু মণিপুর লৈঙাক্না খঙবিখিদে। মহাক্না অসুম্না ইরি- “কেরনা, তামিল নাদুনচিংবগী ষ্টেত গবর্ণমেন্তনা সোসাইতিশিংবু য়োকখৎ শৌগৎপিবগী থৌওং অদুগুম মণিপুর ফিল্ম দিভেলপমেন্ট কাউন্সিল লৈরিঙৈমতমদা শেলগী তেংবাং খরা চাং নায়না ফংলম্মী। কাউন্সিল অদুনা কোর্পোরেশন ওন্থোকখিবা মতাঙদা অহৌবা চহী অমা অনীদা খরা নীংশিংবিরম্মী। মতুং তাবদগী ঙসি ফাওবদা করিসু খন্নখিদ্রে। অঙকপদি ফিল্ম সোসাইটিশিংবু তেংবাংবদি লায়রদুনা কোর্পোরেশন অসিনা পাঙথোকপা ফিল্ম ফেষ্টিবেল অমসি সেসন কয়া ফাওবদা ফিল্ম সোসাইটিশিং শম্ননবা অমদি চঙলক্নবা লম্বী পীবা লৈখিদে। ৱাফম কয়া অসিনা মরম ওইদুনা মণিপুরদা ফিল্ম সোসাইটি শিত্থখিবনি।”
মণিপুরী ফিল্ম ইন্ডস্ত্রিগীদমক আর কে বিদুরনা এলাংবম নীলকান্তনা লাউরম্বা ফিল্ম সোসাইটি আন্দোলন অমসুং নেশনেল ফিল্ম পোলিসী ১৯৮০ গী ৱার্কিং গ্রুপকী চলচিত্র একাডেমিগী ৱাফমন কন্না শৌগৎতুনা হোৎনরম্মী। ইন্দিয়াগী ফিল্ম পোলিসীদা রিজনেলগী থাক্তসু ইন্ডাস্ট্রি লৈহন্নবা হোৎনরকপদসু মণিপুরগীসু লৈহন্নবা নীংজখি। ইন্দিয়া লৈঙাক্কী খুদুং ইন্দুনা মণিপুরসু চৎসি হায়বসি মহাক্কী খোল্লাওনি। মাগী খোল্লাও তাবিবগী মহুৎতা মণিপুর লৈঙাক্না মহাকপু ইন্থোকপিখি। মহাক্কী আর্টিকল-কনাগী ডাইরেক্টরেট-“ইজ ইট এনি ওয়ে” দা ইরি-“নভেম্বর ১৩, ১৯৮০ দা ফমখিবা কাউন্সিলগী একজিক্যুটিব মিটিংদা লৌখিবা ৱারেপশিংগী মনুংদা মতমদুদা ‘সোসিয়েল ওয়েলফেয়ার আর্ট এন্ড কালচার দিপার্টমেন্ট’ কী মখাদা মণিপুর ফিল্ম দেভেলপমেন্ট কাউন্সিল থম্বিনবা মণিপুর গভর্ণমেন্ততা রিকমেন্দ তৌবা হায়না ৱারেপ লৌখি। মিটিং অদুদা মেম্বার অনী কে ইবোহাল শর্ম্মা (ফিল্ম প্রডিউসার, ডিরেক্টর), আর কে বিদুরনা কন্না য়েৎখি। সেন্টার অমদি নেশনগী ওইনা ফিল্ম অমদি ফিল্মগী ৱাফম পূম্নমক মিনিষ্ট্রি অব ইনফোর্মেশন এন্ড ব্রডকাস্তিংগী শরুক ওইগদবনি। অদুবু অচুম্বা ৱাফমদু নাথৈরগা ‘ভেস্তেদ ইন্টারেস্ত’ অমদি পোলিটিকেলাইজেসন তৌবনা কন্না হুমদুনা পুখিবদগী কাউন্সিলবু আর্ট এন্ড কালচারগী মখাদা নমশিনখি। কাউন্সিল অসিগী মথংগী একজিক্যুটিব মিটিং ডিসেম্বর ১৮,১৯৮০ দা ফম্বা মতমদদি অচুম্বা ৱাফম হৌদোক্লুবা মেম্বার অনী অসি হেক্তমক লৌথোক্লগা অনৌবা একজিক্যুটিব কমিটি অমা শেমখ্রে। .. ওন্ন-তৈনবা, চান-চূনদবা থৌওংগী মশক থোকপা অদুমক হৌরকখি।”
মণিপুরী সিনেমাগীদমক্নি হায়না নুংশিজনা কৎথোকচরক্লিবা নহা অদুগী অচুম্বদুবু নাথৈখিবদুনা ঙসিদি মণিপুরী ফিল্ম ইন্ডাষ্ট্রিনা চহী ৫০ শুরবা মতম অসিদা ইন্ডাষ্ট্রিগী অচৌবা মসা অমা ওইরিবা ফিল্ম কৈথেলদা লাইসেন্স পায়বা ডিজিটেল প্রোজেক্তর খিনবা সিনেমা হোল অমত্তা মণিপুরদা লৈত্রে হায়না এসেম্বলিগী লৈমায়দা মণিপুরগী চীফ মিনিষ্টারনা থম্বিখ্রে; ফিল্মদগী কারক্কদবা লৈঙাক্কী রিভিন্যুসু মমাঙগী চহী অনীদি শুন্যদা লৈরে হায়না ফোঙদোকপিখি। সেন্টারগী মিনিষ্ট্রি অব ইনফোর্মেসন এন্ড ব্রডকাষ্টিংগা মণিপুর লৈঙাক্কী আর্ট এন্ড কালচার লোইশঙগা ফিল্ম সেন্টারদা চহী ৪০ হেন্না মরী থাদৎনদুনা লাকখিবনি।
আর কে বিদুরনা মণিপুরী সিনেমাগী মঙজরম্বা মঙ অদুদি কাং-খোং চাইরবা মণিপুরী ফিল্ম ইন্ডাষ্ট্রি অদু নৎখিদে। ফজবতনা লৈতেংলবা মণিপুরী সিনেমাগী অরঙবা ঈথক্তনা ঙাল্লবা মণিপুরী ফিল্ম ইন্ডাষ্ট্রি অমা উজবা অদুনি। মদুদা ফিল্মগী খূৎহৈরবা টেক্নিশিয়ানশিং, আর্টিসশিংনা হরাওনা শান্নজদুনা হিংজবদুনি। মদুদা মহাক্না হরাওজদুনা চাউথোকচদুনা ইজবদুনি। মণিপুরী সিনেমাগী ফজরবা পুৱারী অমা শেমগৎনীংঙম্বদুনি।
0 কমেন্ট:
কমেন্ট তৌবিয়ু